Mark 10 - Kice Manito Ocki Omirwatcimowin

E kiskinohamaketc Cecoc aka kitci wepinitonaniwonik

¹ Minawatc ki matcaw Cecoc, Judée askik itekera e icatc. Minawatc akam sipik Jourdain ka icinikaterik ki iti icaw. Ki pe mitcetiriwa kiapatc iriniwa e pe natawapamikotc neta ka ici taciketc. Ki kiskinohamawew, mitowi mocak ka ki pe totak.

² Aci pe natawapamiko atita Pharisien iriniwa, e wikokwe paciwirikotc, arotc kitci itetc, ke ki otci itactahorakaniwitc. Kokwetcimiko tca, e itikotc: “Kirano kitirakonikewinino, masinatew ia matci kitci wepinatc iriniw okoma?”

³ Cecoc naskamo ka ki kokwetcimakaniwitc, meckotc kaie wir e kokwetcimatc: “Kekw irakonikewin ka ki miritakw Moïse?”

⁴ Itewok: “Enko ohweriw Moïse otirakonikewin: matci kata ki wepinew iriniw okoma. Tepirak masinahikaniw kata ocitaw e witak e matceticohwatc anihi iskwewa, aka aci e wi wikimatc.”

⁵ Aci itikowok Cecoca: “Moïse ki ocitaw ohweriw irakonikewiniw kirawaw otci, osam e micta mackawak kitehiwaw.

⁶ Ickotok ka kitciparitc Kice Manito kaskina kekociciriw ka kiceritak, ‘Iriniwa kaie iskwewa ki kicerimew.’ Genèse 1.27; 5.2 Ekoni e itacterik omasinahikanik.

⁷ Kaie itemakaniw: ‘Ekoni ke otci nakatatc onikihikowa iriniw, kitci witci tacikematc owiwa, kitci mamweritakositcik.

⁸ Mia peikw kata iteritakosiwok.’ Genèse 2.24 Nama aci nicw kata iteritakosiwok, aric mia peikw awik.

⁹ Nama tca acteriw iriniw kitci tipananak aniheriw Kice Manitowa ka ki mamowinamiritci.”

¹⁰ Minawatc ka ickwa pitaketcik mikiwamik, aci kokwetcimiko Cecoc owitcewakana aniheriw ka ki arimotak.

¹¹ Itew: “Kecpin iriniw e matceticohwatc okoma, e tca nipowitc kotakihi iskwewa, akohew anihi okoma. Pacikwatisiw.

¹² Peikon kaie wir iskwew, kecpin e wepinatc onapema, e tca nipowitc kotakihi iriniwa, kaie wir pacikwatisiw.”

Cecoc e aiamitowatatc awaca

¹³ Iriniwok pe iciwirepanak awaca kitci takinikoritci Cecoca, kitci tca aiamitowatikoritci. Aric aniki Cecoc owitcewakana ki otcinehwewok anahweriw iriniwa.

¹⁴ Ka wapatak Cecoc ani e totamiritci owitcewakana, nama ki otci mirowinam. Ki itew: “Pakitinakok awacak kitci pe natawapamitcik. Akawir otcinehwakok. Iriniwok meka ka asperimototawitcik mia ohki awacak, enko aniki ka ici tatakik Kice Manitowa Okimawiniw.

¹⁵ Tapwe ohwe ka witamatakok: awik aka ka ici naheritak kitci pe otitikotc Kice Manitowa Okimawiniw, mitowi awacic e pe otitikotc, nama wiskat kata ki pitakew neta.”

¹⁶ Minawatc ki otapinew anihi awaca. Tato neta e taciritci ki takinew, e tca aiamitowatatc.

Iriniw ka micikitatc

¹⁷ Mia e iti matcatc Cecoc, aci pe mowinitiko peikw iriniwa, e tca nipiskoctakotc, e kokwetcimikotc: “Miro kiskinohamake iriniw, tan ke ki totaman kitci ki mirikoian kakike pimatisiwin?”

¹⁸ Aci itiko Cecoca: “Kekwan wetci icinikaciin ‘miro kiskinohamake iriniw’? Nama taw awik mocak e miro totak, tepirak Kice Manito.

¹⁹ Ki kiskeriten e itemakak cota aiamihe irakonikewin: ‘Akawir manoho. Akawir pacikwatisi. Akawir kimoti. Akawir kiraski, awik kitci ki otci atamerimakaniwitc. Akawir wecimi kiwitc iriniw. Kicterimi kotawi kaie kikawi.’” Exode 20.12-16; Deutéronome 5.16-20

²⁰ Aci itew anahwe iriniw: “Kiskinohamake iriniw, esko ka pe awaciwian ni ki sapiten kaskina anihi irakonikewina.”

²¹ Cecoca kanawapamew e sakihatc, e tca itatc: “Peikw kiapatc kekocic ki noteparin. Matca nta atawe kaskina e ici tataman. Ki ka tca mamirawok ka kitimakisitcik aniheriw coriariw irikik ke kackitain. Meckotc tca wakwek ki ka micikitan. Petcimote pe nosanehici.”

²² Aric anahwe iriniw ka petak aniheriw e itakaniwitc, ki pakitcikwepariw. Ekoni e ici matcatc e micta kackeritak. Mictahi meka micikitapan.

²³ Aci kanawapamew Cecoc anahweriw owitcewakana e waskakapowictakotc, e tca witamawatc: “Micta arimaniw ka micikitatcik kitci ki pitaketcik Kice Manitowa Okimawinik.”

²⁴ Mamiskasitako owitcewakana ani e itetc. Aric kiapatc itew: “Ninitcanicak, mictahi ariman kitci ki pitakaniwok Kice Manito Okimawinik.

²⁵ Arimaniw micta atikw kitci ki pitaketc e iriko pokoneckarik caponikaniw. Kirawe aric kiapatc arimaniw iriniw e micikitatc kitci ki pitaketc Kice Manitowa Okimawinik.”

²⁶ Ickam kirawe mamiskasitamok aniheriw Cecoc owitcewakana. Aci kokwetcimitowok: “Awin tca ke ki akwacimakaniwitc?”

²⁷ Kanawapamikowok Cecoca, e tca itikotcik: “Iriniwok nama kackitawok kitci akwacimitisotcik. Wir aric Kice Manito kackitaw kitci akwacimiwetc. Kaskina meka kekociciriw wir kackitaw.”

²⁸ Aci itew Pien: “Natotaci! Kaskina kekocic ni ki pakiteritenan e nosanehitak.”

²⁹ Aci itiko Cecoca: “Tapwe ohwe ka witamatakok: kecpin awik nakatake omikiwam acitc otaski, kaie nakatate octesa, omisa, ocima, okawiwa, otawiwa acitc onitcanica, nin otci acitc Mirwatcimowiniw otci,

³⁰ awocamec mitato mitana tatwaw kata mirakaniwiw, anotc mekwata e pimatisitc: mikiwamiriw kaie askiriw, acitc ke octesitc, ke omisitc, ke ocimitc, ke okawitc, ke onitcanicitc acitc ke otaskitc kata mirakaniwiw, kirika nekatcitawiniw kata pe otitiko. Minawatc nanake nikanik kakike pimatisiwiniw kata pe otitiko.”

³¹ “Aric mitcet iriniwok anotc ka nikanickatcik, kecko otananik kata pimotewok. Aniki tca anotc ka otananickatcik kata nikanickawok.”

Aci nictowaw e witak Cecoc ke iciwepasitc

³² Aci pimotepanak nete meskanak Jérusalem otenak ka iticimonik. Nikanitepan Cecoc. Owitcewakana kaie tca ka nosanehikotcik micta sekisirikopan. Kek tipan ki iciwirew Cecoc anihi e mitato acitc niciritci owitcewakana e witamawatc aci kekatc ke iti iciwepasitc.

³³ Ki itew: “Natotamokw! Jérusalem otenak kit icanano. Ekote neta ke ici pakiterimakaniwitc anahwe Ka ki pe iriniwihitisotc, kitci makonikotc anahweriw cota makatewokorewa ka tiperitamiritci acitc ka kiskinohamakeritci cota aiamihe irakonikewiniw. Kata anwerimiko kitci nipahakaniwitc, kaie kata pakiterimiko kitci makonakaniwitc, aka ka cota iriniwiritci kitci makonikotc.

³⁴ Kata papirotako. Kata iskwatiko. Kata pasakactehiko kirika kata nipahiko. Minawatc ickwa nicto kickokarike kata apitcipaw.”

Ka ki ici nataweritakik Cak kirika Jean

³⁵ Minawatc Cak kirika Jean, Zébédée anahweriw okosa e niciritci, pe natawapamewok Cecoca, e itatcik: “Kiskinohamake iriniw, ni nataweritenan kitci itotiskein kekocic ninan otci, ohwe ke ici nataweritamatak.”

³⁶ “Kekwan ka ici nataweritamekw kitci totaman kirawaw otci?” itikowok Cecoca.

³⁷ Aci itewok: “Nete tacikeine kokimawinik e micta icperitakok, pakitinicinan kitci ici apiak opimera ke ici apiin, peikw kinihiwinik, kotak kinamatciwinik.”

³⁸ Itikowok Cecoca: “Nama ki kiskeritenawaw anihe ka ici nataweritamekw. Tarasak minikwakanik ni ka minikwan nekaterimowin, kirika tarasak ni ka sikahatason nekaterimowinik. Kirawaw tca, ki ta kackitanawaw ia kitci otci minikweiekw nekaterimowin neta minikwakanik ke minikwewakeian? Ki ta kackitanawaw ia kitci sikahatasoiekw neta nekaterimowinik, mitowi nin ke ici sikahatasoian?”

³⁹ Itewok: “Ehe, ni ka kackitanan.” Aci itikowok Cecoca: “Tapwe wirata ki ka minikwewakanawaw anihe minikwakan ke minikwewakeian, kirika ki ka pe otitikonawaw anihe sikahatasowin ke pe otitikoian.

⁴⁰ Namaiew aric ni nin ke orapamak anahwe ke apitc ninihiwinik kekotc ma ninamatciwinik. Kice Manito ni, wir ka ki orapamatc anahweriw iriniwa kirika aci ickwa nisawitawew neta ke ici apiritci.”

⁴¹ Ka petaketcik aniki kotakihik Cecoc owitcewakana aniheriw ka ki ici nataweritamiritci Cak kaie Jean, ki kiciwasiwok.

⁴² Aci kaskina wicamew Cecoc owitcewakana e tca witamawatc: “Ki kiskeritenawaw ohwe e icinakok: tawok okimawok ota askik e tiperimatcik iriniwa, mocak e witamawatcik ke aitotiskeritci. Ka kicteritakositcik natawerimewok kaskina awiriw kitci kiskeritamiritci e apitc mackawisiritci.

⁴³ Nama aric nte icinakon kirawaw otci. Kecpin aric peikw neta e taciekw nataweritake tapwe kitci kicteritakositc, acteriw kitci atoskectatakw, mia arotakan kitci iteritakositc.

⁴⁴ Kaie kecpin peikw neta e taciekw wi nikanickate, acteriw kitci arotakaniwitc, kaskina awiriw kitci atoskectawatc.

⁴⁵ Nama meka ki otci pe icaw anahwe Ka ki pe iriniwihitisotc kitci atoskectawakaniwitc, aric ma kitci atoskectaketc kirika kitci pakitinak opimatisiwin, micta mitcet iriniwok kitci wikotcihakaniwitcik.”

Cecoc e kikehatc Bartimée aka ka wapiritci

⁴⁶ Aci Jéricho otenak ki takociniwok Cecoc kirika owitcewakana. Minawatc neta ki otci matcawok, mitcet iriniwa e nosanehikotcik. Tapan neta iriniw aka e wapitc. Bartimée icinikasopan, Timée anihi okosa. Anahwe Bartimée tcikiskanak taci apipan e natotamaketc.

⁴⁷ Kek petakew: “Cecoc, Nazareth ka otcitc, takociniw.” Ki tepwew: “Cecoc, Okimaw Tapit Okosa, kitimakerimici!”

⁴⁸ Mitcet iriniwa kitotiko e itikotc aka awocamec kitci kitotc. Aric kirawe kiapatc kaketin tepwew, e itetc: “Okimaw Tapit Okosa, kitimakerimici!”

⁴⁹ Nokikapowiw Cecoc, e itetc: “Wicamakw.” Aci natcipahewok anihi aka ka wapiritci, e itatcik: “Sokitehe. Pasiko. Ki wicamikowin.”

⁵⁰ Aci motcik iciwepinam okapotowan anahwe Bartimée e pasikopatatc e natcikapowictawatc Cecoca.

⁵¹ Aci itiko: “Kekwan ka ici nataweritaman kitci totaman kir otci?” “Teperitcikein, itotiske kitci koski wapian.”

⁵² Itew Cecoc: “Matca. Tapwe kit asperimototawin, ekoni wetci ki kikein.” Tecikotc ki iti wapiw. Ki iti witcewew Cecoca ka iti matcaritci meskanak.