Luc Omasinahikan 6 - Kice Manito Ocki Omirwatcimowin

Ka iciwepasitc Cecoc peikwaw e arwepi kicikarik

¹ Peikwaw e arwepi kicikarik, Cecoc kirika owitcewakana acockamopanak kitikan askiriw. Mirominockwa manipiteripan anahweriw owitcewakana. Pakickineripan e mowatcik.

² Atita Pharisien iriniwok ki wapamewok e totamiritci, e itatcik: “Kekwan wetci totamekw anihe aka ka actek kitci totcikatek e mekwa arwepi kicikak, kotc e itasinatek kitaiamihe irakonikewininak?”

³ Cecoca itikowok: “Nama ia ni wiskat ki ki otci tapwatenawaw anihe ka masinatek ka ki totamwakopanen Okimaw Tapit? Peikwaw e kicikarik pakatewakopan wir Tapit kirika anahweriw iriniwa ka witcewikospan.

⁴ Ki pitakew Tapit Kice Manitowa otaiamihe mikiwamirik. Ki otapinew pakwecikana ka ki aiamihe pakitinakaniwirispana Kice Manitowa otci, e mowatc, kirika ki acamew anahweriw ka witcewikotc. Aric itemakan neta kitaiamihe irakonikewininak aka e acterik awik kitci mowatc anihi pakwecikana, tepirak makatewokorewok.”

⁵ Minawatc kiapatc itew Cecoc: “Anahwe Ka ki pe iriniwihitisotc, tiperitam e arwepi kicikarik.”

Iriniw e niponesitc otcitcik

⁶ Kiapatc kotakeriw e arwepi kicikarik, ki pitakew Cecoc cota aiamihe mikiwamik e iti kiskinohamaketc. Tapan nte peikw iriniw e niponesitc otcitcik onihiwinik itekera.

⁷ Iriniwok ka kiskinohamaketcik aiamihe irakonikewiniw kirika Pharisien iriniwok wewerita nanakatcihewakopan Cecoca e totamiritci, e wi kiskeritakik ke apitc kikehakwen awiriw e arwepi kicikarik. Nantowapatamwakopan meka kekociciriw ke ki otci itactahoratcik Cecoca.

⁸ Kiskeritamokopan Cecoc e iteritamiritci. Itew anihi iriniwa ka niponesiritci otcitcirik: “Pasiko! Nikanik tca pe icikapowi kaskina awik kitci wapamiskik!” Ekoni tca e ici pasikotc anahwe iriniw e nta icikapowitc nete nikanik.

⁹ Aci itew Cecoc anihi mitcet iriniwa ka natotakotc: “Ki kokwetcimitinawaw, tan e itemakak kitaiamihe irakonikewininak kitci totcikatek e arwepi kicikak? Kitci miro totawakaniwitc iriniw kekotc ma kitci matci totawakaniwitc? Kitci akwacimakaniwitc iriniw kekotc kitci onicimakaniwitc?”

¹⁰ Kaskina e taciritci kanawapamew Cecoc, e tca itatc anihi iriniwa ka niponesiritci: “Pe icitcitceri.” Ekoni e ici icitcitcerictowatc anahwe iriniw. Ekoni e iti kiketc.

¹¹ Ki micta kiciwapamowok aniki Pharisien iriniwok kirika ka kiskinohamaketcik cota aiamihe irakonikewiniw. Ekoni e ici arimotamatotcik tan ke ki totawatcik Cecoca.

Cecoc e orapamatc otarotakana

¹² Ani apitc ekoni e iti amatciwetc Cecoc e matinarik e nta aiamihatc. Kape tipiskwa itanaho nete, e pakoserimatc Kice Manitowa.

¹³ Kek e iti wapanik, wicamew owitcewakana kitci pe natcikapowictakotc. Mitato acitc nicw ki orapamew, “nitarotakanak” e icinikatatc:

¹⁴ Simo (enkweriw kaie ka ki icinikatatc “Pien”) acitc Atre (Simo anihi ocima), acitc Cak, Jean, Pirip, Barthélemy,

¹⁵ Matio, Toma, Cak (Alphée anihi okosa), Simo (“Anahwe aka ka naheritak kitci tiperimikotc kice okimawa” ka icinikatakaniwispan),

¹⁶ Jude (Cak anihi okosa), kirika Judas Iscariote (anahwe ke pakiterimatc Cecoca).

Cecoc e kiskinohamaketc kaie e kikehiwetc

¹⁷ Minawatc iti pinisiwew Cecoc, e pe witcewikotc anahweriw ka ki orapamatc. Iti nokickaw ite e tatokwarik, mitcet nta owitcewakana e tacikeritci. Mitcetinaniwonikopan kaie e pehakaniwitc Cecoc, kaskina wiec nta Judée askik e ki pe ototeritci e pe natawapamikotc, Jérusalem otenak kaie kotakihi otenak Tyr kirika Sidon, rarewak kitcikamik ka ici aitakonik aniheriw otenariw.

¹⁸ Ki pe icawok e wi pe nta natotawatcik e kiskinohamakeritci, kirika kitci kikehikotcik e ici akositcik. Iriniwok ka arimihikotcik matci manitowa ki kikehakaniwiwok.

¹⁹ Kaskina awik natowi totamwakopan kitci takinatcik Cecoca, mackawisiwiniw meka ki orowipariniw owiawirik. Kaskina tca ki kikehikowok.

E caweritakosinaniwok kirika e arimiparinaniwok

²⁰ Cecoc ki kanawapamew owitcewakana, e itatc: “Ki caweritakosinawaw, kirawaw ka kitimakisiekw. Kice Manito Okimawin kit ici tatenawaw!

²¹ Ki caweritakosinawaw kirawaw anotc ka pakateiekw. Kecko meka kata mitcen ke mitciekw! Ki caweritakosinawaw kirawaw anotc ka matoekw. Kecko meka ki ka papinawaw!”

²² “Ki caweritakosinawaw kecpin iriniwok e cikerimitakok, kaie e wepakonitakok, kecpin kaie e marerimitakok, kaie e pakonimitakok, osam e tapwerimekw anahwe Ka ki pe iriniwihitisotc.

²³ Mireritamokekw anihe iciwepake. Kwackwackotikekw ke apitc mireritamekw. Kecko meka ki ka micta cawerimikowinawaw wakwek. Anahweriw weckatc otaniskotape omocomiwawa, ekoni ka ki ici matci totawaritci ka nikan tipatcimoritci ani apitc weckatc.”

²⁴ “Ekwa kirawaw ka micikitaiekw! Nikotin ki ka arimiparinawaw! Aci meka kit ickwa pe kakitcihikowinawaw!

²⁵ Ki ka arimiparinawaw, kirawaw anotc ka tipiparihitisoekw. Nikotin meka ki ka pakatanawaw! Ki ka arimiparinawaw, kirawaw anotc ka papiekw. Nikotin meka ki ka kackeritenawaw, kirika ki ka matonawaw!”

²⁶ “Nikotin ki ka arimiparinawaw, kecpin kaskina awik mirwatcimitakwe. Ekoni meka ka ki ici totamiritci weckatc otaniskotape omocomiwawa. Ki mirwatcimewok anihi iriniwa ka ki itekasoritci ‘ni pe nikan tipatcimonan Kice Manito otci,’ aka aric tapwe ka ki otci itotiskeritci.”

Kitci sakihokok aniki ka matci totatokok

²⁷ “Aric ki witamatinawaw, kirawaw ka natotawiekw: Sakihakok iriniwok ka matci totatakok. Miro totakok aniki ka cikerimitakok.

²⁸ Nataweritamawakw Kice Manito kitci cawerimatcik aniki ka marerimitakok, kirika aiamihectamakok aniki ka nekatcihitakok.

²⁹ Kecpin awik otamohwiske kotamikikekanik, wapatahi kweskitekera kotamikikekaniw. Kecpin awik otapinake kikapotowaniw, pakitini kaie kipapakiwaniw kitci otapinak.

³⁰ Miri kaskina iriniw ka nataweritamask kekociciriw. Kecpin awik otapinake ka ici tataman, akawir nataweritamo kitci kiwe mirisk.

³¹ Miro totakok kiwitc iriniwawok, tapickotc e ici nataweritamekw kitci miro totakoiekw.

³² Kecpin sakihekwe tepirak aniki ka sakihitakok, kekwan wetci petaiekw kitci kicterimikoiekw anihe otci? Wawatc ka pactatitcik sakihewok anahweriw ka sakihikotcik.

³³ Kecpin e miro totawekok aniki tepirak ka miro totatakok, kekwan wetci petaiekw kitci kicterimikoiekw anihe otci? Wawatc ka pactatitcik ekoni e itatisitcik!

³⁴ Kecpin e awihekok aniki tepirak ka kiskerimekok kitci tapictatakok, kekwan wetci petaiekw kitci kicterimikoiekw anihe otci? Wawatc ka pactatitcik awihewok kotakihi ka pactatiritci, kitci ki tca tapictakotcik mia irikik ka ki awihatcik.

³⁵ Ekoci aric sakihakok iriniwok ka matci totatakok. Miro totakok. Awihakok, aka tca meckotc kitci petaiekw kekocic. Ki ka tca micta cawerimikowinawaw kirika ki ka iteritakosinawaw Kice Manito ka mawotci icperitakositc okosa. Peikon meka miro totawew iriniwa aka ka naskomikotc, kirika ka matci iriniwiritci.

³⁶ Mirotehekw, mia Kotawino wakwek ka taciketc e apitc mirotehetc.”

Aka kitci tipaskonokok kiwitc irininiwok

³⁷ “Akawir awik tipaskonakw, nama tca kaie kirawaw ki ka tipaskonikowaw Kice Manito. Aka atamerimakok kiwitc iriniwawok, nama tca kaie kirawaw ki ka anwerimikowinawaw. Ponerimakok kotakihik iriniwok e ici matci totakik, kaie kirawaw ki ka kasihamakowinawaw ka ki ici patahamekw.

³⁸ Cawerimakok kiwitc iriniwawok, ki ka tca cawerimikowinawaw. Nipara ki ka mirikowinawaw. Ke apitc miro cawerimikoiekw, tarasak kata sikinikatew neta kimicta aripocik ka ici takok kikapotowanik. Nipara kata actakaniwon. Kata sitinikatew kirika kata powiparitakaniwon, wawatc awocamec kitci actakaniwok, nac kitci osamipotakaniwok. Kotc meka ka asitci tipahamekw e mirekw kiwitc iriniwaw, ekoni ke ici tipahamatakw kaie kirawaw Kice Manito.”

³⁹ Minawatc kiapatc aimihew Cecoc anahweriw iriniwa e atisokowatc, e itatc: “Iriniw aka ka wapitc nama kata ki takoniskenew kotakihi aka ka wapiritci, taina? E nicitcik meka kata posipariwok e ici waratawokarik.

⁴⁰ Nama otci peikw ka kiskinohamasotc kirawe kicteritakosiw patok anihi ka kiskinohamakotc. Aric ickwa kiskinohamasote, tapickotc kata asitci kiskeritam kirika anihi ka ki kiskinohamakotc.”

⁴¹ “Kekwan wetci kanawapatamowotc mirikosiriw e pisinitc kiwitcican, aka tca wawatc e wapamatc napakitokw kickicikok e tatc.

⁴² Tan ke ki itatc kiwitcican: ‘Niwitcican! Pakitinici kitci maninaman anihe mirikosi ka pisiniin,’ aka tca kir e wapamatc anahwe napakitokw e tatc kickicikok. Kir ka miro iriniwikasoin, pitama manini anahwe napakitokw kickicikok ka tatc. Ki ka tca miro wapaten kitci ki maninamowotc kiwitcican aniheriw mirikosiriw ockicikok.”

Wapiminatikw e nitawikihatc wapimina

⁴³ “Wapiminatikw e mirokitc nama ki nitawikihew wapimina e maratisiritci. Peikon kaie wapiminatikw e maratisitc, nama kata ki nitawikihew wapimina e mirosiritci.

⁴⁴ Tato wapiminatikw nisitowinakosiw aniheriw ka ici nitawikitatc. Nama ki mawotcihakaniwiw wapimin minesikacik. Peikon kaie cwemin nama ki mawotcihakaniwiw mictikok ka kawarik.

⁴⁵ Iriniw tca e miro iriniwitc, otehik otinam aniheriw omirotehewin. Aric ka matci iriniwitc, otehik otinam ka maratanik ka ici takonik neta. E ici arimwetc meka kiskeritakosiw tan e ici takonik otehik.”

Nicw mikiwama

⁴⁶ “Kekwan wetci icinikaciekw ‘Teperitcikein, Teperitcikein!’ aka tca e itotiskeiekw e ititakok?

⁴⁷ Ki ka witamatinawaw tan e icinakositc awik e pe natawapamitc e tca natotak nititewiniw, kirika e itotisketc aniheriw ka itewak.

⁴⁸ Mia ni iriniw ka ki kitciparitc e manikasotc, asinik e ki micta waratawokahiketc, e ki asinikanikitciketc atamitak. Ka riskipoterik, ki itacikowiniw nte mikiwamik, nama aric ki matceapotew e micta sokak, osam micta wewerita e ki ocitakaniwok anihe mikiwam.”

⁴⁹ “Aric anahwe ka natotak nititewiniw, aka aric e itotisketc ka ki itewak, mia ni iriniw ka ki maniketc askik aka e ki otci waritawikahiketc kitci asinikanikitciketc. Ka icitciwonik sipiriw omikiwamik, tekaci ki pakitiniw kirika tekaci ki orapariniw.”