Luc Omasinahikan 5 - Kice Manito Ocki Omirwatcimowin

Nictam owitcewakana wicamew Cecoc

¹ Peikwaw e kicikarik neta taci nanipowikopan Cecoc e askopekanik Génésareth sakihikanik. Micta sitcikapowictakokopan iriniwa e wi natotakotc e tipatcimotc Kice Manitowa otitewiniw.

² Wapatamokopan e nicotakarik tcimaniw neta rarewak. Namesike iriniwok ki nakatamowakopan aniheriw otcimaniwawa e tca kisisiparatcik otaripiwawa.

³ Peikw ani e nicinik posatowiw Cecoc, aniheriw mia Simo otciman. Nataweritamawew Simowa kitci nimitewepahamiritci memantcic. Ekoni e ici weripitc Cecoc e tca aimihatc neta mitcet iriniwa rarewak ka tacikeritci.

⁴ Ka ickwa aiarimwetc, aci itew Simowa: “Simo, nete icitcime e asko kickaiak. Pakopehwik tca kitaripimak kitci patahorekw names.”

⁵ Aci itiko Simowa: “Okimaw, kape tipisko ni ki micta otamironan, aka tca e ki otci patahorakitc. Aric e iciin kitci itotiskeian, kiapatc ni ka pakopehwawok aripiik.”

⁶ Ekoni e ici pakopehwatcik otarapiwawa. Micta mitcet ki patahorewok namesa. Kekatc ki pikopaririwa otaripiwawa.

⁷ Ekoni tca e ici icitcitcecteparihotcik okwimesiwawa otci, neta kotakihi tcimanik e tacikeritci, kitci pe nta witcihikotcik. Ki pe icariwa. Tapickotc tca tekaci ki mockinetawok nicotak tcimaniw. Kekatc kosapewa anihi tcimana e apitc mockinetcik namesak.

⁸ Apitc e wapatak ani e iciwepanik anahwe Simo Pien, ekoni e ici nipiskoctawatc Cecoca, e tca itatc: “Matcekapowictaci, Teperitcikein. Osam ni pactati iriniwin!”

⁹ Wir Simo, kaie kaskina anihi ka witcewikotc, micta mamiskateritamok, e apitc mitcetiritci namesa ka ki patahowaratcik.

¹⁰ Ekoni peikon e iteritamirikopanen Simo anahweriw okwimesa, Cak acitc Jean, Zébédée anihi okosa e niciritci. Aci Cecoc itew Simowa: “Aka sekisi! Aci anotc iriniwok ki ka natcipahawok kitci pe natawapamitcik.”

¹¹ Ekoni ka ici seskipitakik otcimaniwaw. Kaskina ki nakatamok e tca nosanehwatcik Cecoca.

Cecoc kikehew iriniwa e omikiwapineritci

¹² Minawatc ki icakopan kotak otenak Cecoc. Takopan kaie neta iriniw e omikiwapinespan, tekaci e itikititc e omikiwapinetc. Kotc e wapamatc Cecoca anahwe iriniw, ekoni e ici nipiskoctawatc e tca oticik motcik. Pakoserimew e itatc: “Teperitcikein, kecpin ici nataweritamane, matci ki ka ki kikehin.”

¹³ Ekoni e ici icitcitcerictowatc Cecoc e tca takinatc e itatc: “Nit ici naheriten. Ekoni ici kike!” Tecikotc ki mirwatisiw anahwe iriniw.

¹⁴ Minawatc ki itiko Cecoca: “Akawir awik arimotamo e ki kikehitan. Aric matca natawapam makatewokorew kitci ki wapamisk. Minawatc ki ka aiamihe pakitinikan, kotc ka ki itactatc Moïse kitci totcikaterik, otcitakotc kitci kiskeritakok aci tapwe e ki kikein.”

¹⁵ Aric eckam ki iti micta arimomakaniwiw Cecoc. Mitcet iriniwok pe nta natotawewakopan e arimweritci acitc kitci kikehakaniwitcik e ici akositcik.

¹⁶ Mocak matcakopan Cecoc, nete ko e icaspan aka e ici taniwonik, e nta aiamihaspan.

Cecoc kikehew iriniwa ka niponesiritci

¹⁷ Peikwaw e kicikarik Cecoc taci kiskinohamakepan pitakamik mikiwamik. Pecotcik tacikepanak atita Pharisien iriniwok kaie iriniwok ka kiskinohamaketcik cota aiamihe irakonikewiniw. Nte pe ototewakopan kaskina otenaskak ka ici takonik Galilée kaie Judée askik, atita kaie Jérusalem otenak ki pe ototewok. Cecoc ki micta mackawisihiko Teperitcikeritci, e mirikotc kitci kikehatc ka akosiritci.

¹⁸ Aci atita iriniwok pe takociniwok, e pe tetaskonatcik peikw iriniwa e niponesiritci. Natowi totamok kitci ki pitakahatcik anihi ka niponesiritci, nikanik e wi aratcik e ici tacikeritci Cecoca kitci ki kikehikoritci.

¹⁹ Nama aric ki otci kiskeritamok mia ke otci pitakehatcik, osam e mitcetinaniwonik e sitcikapowinaniwonik. Ki tca iskwatowirewok, okitcitak e icatcik. Ekoni e ici pakonehakik okitc ite mia e ici tacikeritci Cecoca. Ekota ka otci nitapikenatcik anihi ka niponesiritci, otetaskonikanik e miciniritci, nictowitc e ici mitcetinaniwonik, mia nikanik e ici tacikeritci Cecoca.

²⁰ Ka wapatak Cecoc e asperimototakotc anihi iriniwa ka niponesiritci kirika okwimesiriw, ekoni e ici itatc anihi ka niponesiritci: “Nikwimes, ki kasihamakowin kipactatowina.”

²¹ Iteritamok aniki Pharisien iriniwok kaie ka kiskinohamaketcik cota aiamihe irakonikewiniw: “Kekw iriniw anahwe Cecoc ka marerimatc Kice Manitowa? Awin ke ki kasihak pactatowiniw? Tepirak kotc Kice Manito!”

²² Kiskerimikowok Cecoca e iteritakik. Itikowok: “Kekwan wetci iteritamekw anihe?

²³ Kirawe ia wetan kitci iteian: ‘Ki kasihamakowin kipactatowina,’ kekotc ma kitci iteian: ‘Pasiko, pimote tca!’?

²⁴ Aric ni nataweriten kitci kiskeritamekw ohwe: kackitaw anahwe Ka ki pe iriniwihitisotc kitci kasihak pactatowiniw ota askik.” Ekoni e ici itatc anihi iriniwa ka niponesiritci: “Ki witamatin, pasiko! Otapina kitetaskonikan! Kiwe kimikiwamik!”

²⁵ Tecikotc pasiko anahwe iriniw, kaskina awiriw e wapamikotc. Otapinam otetaskonikan ka ici micikipan, e iti tca pimotetc, omikiwamik e icatc, e mirwatcimatc Kice Manitowa.

²⁶ Kaskina awik ki micta kockowapamowok. Mirwatcimewok Kice Manitowa kirika e micta sekisitcik, e tca aitetcik: “Anotc micta kice mamiskateritakon ka ki ici wapatamokw!”

Lévi

²⁷ Minawatc ki orowiw Cecoc. Ka natockakeritci ki wapamew, Lévi ka icinikasoritci, e taci apiritci neta ka ici otamiroritci masinahikewikamikok. Itew Cecoc: “Pe nosanehici.”

²⁸ Ki pasiko anahwe Lévi, kaskina e nakatak e tca nosanehwatc.

²⁹ Minawatc Lévi ki ocitaw kitci micta makocaniwonik omikiwamik, Cecoca otci. Ki micta mitcetinaniwoniw peikon kaie ka natockaketcik ki pe icawok e witci mitcisomatcik.

³⁰ Aric Pharisien iriniwok kaie iriniwok ka kiskinohamaketcik cota aiamihe irakonikewiniw tapickotc e ici aiamihatcik, ki kiciweritamok. Itewok Cecoca owitcewakaniriw: “Kekwan wetci witci mitcisomekok acitc e minikweiekw kirika ka natockaketcik kaie kotakihik iriniwok aka e kicterimakaniwitcik?”

³¹ Itew Cecoc: “Iriniwok ka miro pimatisitcik nama takatc mackiki iriniwa natawapamewok. Ka akositcik, enko aniki ke natawapamatcik mackiki iriniwa.

³² Nama ni ki otci pe ican kitci wicamakik iriniwok aci icikowisk ka iterimitisotcik, aric kirawe aniki ka kiskerimitisotcik e pactatitcik, kitci ki tca kweskatisitcik.”

E roskosonaniwok

³³ Minawatc Pharisien iriniwok itewok Cecoca: “Aniki wirawaw Capatis owitcewakana, mocak roskosoriwa, mocak kaie aiamihariwa, peikon kaie ninan nitiriniminanak e totakik. Aric aniki wirawaw, kir kiwitcewakanak, mitcisowok kaie minikwewok.”

³⁴ Itikowok tca Cecoca: “Kecpin e ickwa nipowinaniwok, makocaniwon. Anahwe ka nipowitc wicamew okwimesa kitci pe nta witci mitcisomikotc. Kit iteritenawaw ia, kata miroparinopan aniki ka wicamakaniwitcik kitci roskosohakaniwitcik mekwata kiapatc e tacikeritci anihi okwimesiwawa ka nipowiritci? Nama ketcinatc!

³⁵ Nikotin aric maninamowakaniwitawe aniki ka nipowiritci. Aci nta kata roskosowok.”

³⁶ Minawatc Cecoc iti atisokawew ohweriw atisokaniciciriw, e aitetc: “Nama awik kata pikopitam ocki wikasiriw kitci ki pokohak kete wikasiriw aci e pikockarik. Kecpin meka ni totake, aniheriw ocki wikasiriw kata pikockariw, acitc aniheriw ocki opokohikanekin nama tapickotc kata icinakoniw kirika aniheriw ka ketewekanik.

³⁷ Nama kaie awik kata sikinam kete mackimotewanik ka pakekiniwonik ocki minicaporiw anotcikwetc e ki ocitakaniwok. Kecpin ni totake, matci kata pakickiparino anihi kete mackimotewana, ekotca kaskina ke sikiparik anihe minicapo acitc kitci onactakaniwoki anihi mackimotewana.

³⁸ Nama nte actew kitci totcikatek! Patoc ocki mackimotewanik kata actakaniwon ocki minicapo!

³⁹ Nama kaie awik kata wi minikwew ocki minicaporiw, e ickwa kotcictak kete minicaporiw. Itwaniwon meka: ‘Kirawe wikacin ka keteak.’”