Luc Omasinahikan 4 - Kice Manito Ocki Omirwatcimowin

E kokwetcihakaniwitc Cecoc

¹ Cecoc nete otci matcaw Jourdain sipik, Miro Manitowa e mockineckakotc. Minawatc ki iciwiriko nete askik ka ici cipewatawokarik.

² Nemitana tato kickwa irikik ki kokwetcihiko Matci Manitowa. Tekaci nama otci mitcisopan mekwata neta ka taciketc. Nac ka ickwa aniheriw nemitana tato kickokarik aci pakatepan.

³ Itiko anihi Matci Manitowa: “Kecpin tapwe kir Kice Manito Okosa, ici anaha asini kitci pakwecikaniwitc.”

⁴ Itew Cecoc: “Itemakan nta Kice Manito Omasinahikanik: ‘Nama tepirak pakwecikana kata otci pimatisiw iriniw.’” Deutéronome 8.3

⁵ Aci okitatin ki iciwiriko anihi Matci Manitowa, nakiska e wapatahikotc kaskina okimawiniw,

⁶ e tca itikotc: “Kaskina ka takok ohwi okimawinik ki ka ki miritin, kaskina mackawisiwin acitc kaskina ka micta mirwacik ka ici takok neta. Kaskina anihe ni ki mirikowin. Matci ni ka ki miraw awik tan anahwe ka wi mirak.

⁷ Kecpin tca nipiskoctawiine, kir kaskina ki ka tiperiten.”

⁸ Aci itew Cecoc: “Itemakan nta Kice Manito Omasinahikanik: ‘Ki ka kicterimaw Kikice Manitom Ka Tiperitciketc. Wir tepirak ki ka atoskectawaw.’” Deutéronome 6.13

⁹ Minawatc Jérusalem otenak ki matcewirew Cecoca Matci Manito, aci e iciwiratc okitapokw kitci aiamihe mikiwamik, e itatc: “Kecpin tapwe kir Kice Manito Okosa, nitcikwackoti!

¹⁰ Itemakan meka Kice Manito Omasinahikanik: ‘Kice Manito kata itew otacerima kitci nanakatcihiskik.’ Psaumes 91.11

¹¹ Itemakan kaie: ‘Ki ka takonikok aka kitci wisakisiteciniin asinik.’” Psaumes 91.12

¹² Naskamawew tca Cecoc, e itatc: “Itemakan Kice Manito Omasinahikanik: ‘Nama ki ka kokwetcihaw Teperitciketc Kikice Manitom!’” Deutéronome 6.16

¹³ E ickwa kaskina wiec ici kokwetcihatc Cecoca Matci Manito, ki ponihew, nitowatc e petatc kecko minawatc kitci kokwetcitatc.

Cecoc ka kitciparitc otamirowin Galilée askik

¹⁴ Minawatc ki kiwew Galilée askik Cecoc, Miro Manitowa e micta mackawisihikotc. Kaskina wiec neta askik itekera ici arimomakaniwikopan.

¹⁵ Kiskinohamakepan ko mitcet cota aiamihe mikiwamik kirika kaskina awiriwa mirwatcimikokopan.

Cecoc e wepakonakaniwitc Nazareth otenak

¹⁶ Cecoc ki icaw Nazareth otenak. Ekota ni ka ki otci matcekitc. Minawatc ka arwepi kicikarik, cota aiamihe mikiwamik ki pitakew, kotc e itotiskespan. Aci pasiko kitci tapwatak Kice Manitowa Omasinahikaniw.

¹⁷ Ki mirakaniwiw masinahikaniw e aitowi notimickweminikaterik, weckatc ka ki masinahamiritci anihi ka nikan tipatcimorispana Ésaïe. Ka ickwa tacockwemipatak aniheriw masinahikaniw Cecoc, aci miskam ka itasinaterik:

¹⁸ “‘Teperitciketc Omiro Manitoma ni tiperimimikw. Ni ki orapamikw kitci nta tipatcimoctawakik ka kitimakisitcik Mirwatcimowiniw. Ni ki iciticohokw kitci nta witamawakik iriniwok ka kipohowakaniwitcik aci kitci pakitinakaniwitcik, kaie kitci witamawakik iriniwok aka ka wapitcik aci kitci wapitcik, kirika kitci nta wikotcihakik iriniwok ka nekatcihakaniwitcik,

¹⁹ kitci ki tca tipatataman aci e otcitciparinik Kice Manito kitci cawerimatc otirinima.’” Ésaïe 61.1-2

²⁰ Ekoni e ici notamickwemikinak aniheriw masinahikaniw Cecoc. Mirew arotakana ka mitaritci masinahikaniw, kirika ki apiw. Micta kanawapamiko kaskina iriniwa neta cota aiamihe mikiwamik ka tacikeritci.

²¹ Ekoni tca e ici itatc: “Anihe anotc ka ki tapwataman Kice Manito Omasinahikanik, aci isparin ota anotc kirawaw otci ka natotawiekw.”

²² Kaskina ki mirwatcimewok Cecoca e mamiskasitowatcik e micta mirotakonik aniheriw ka ki iteritci. Kokwetcimitowok e itetcik: “Enkweriw ia ni Sosep okosa?”

²³ Itew Cecoc anahweriw iriniwa: “Ketcinatc ki ka mikawasiminawaw ohwe ka itemakak: ‘Mackiki iriniw, kikehitiso.’ Matci kaie ohwe ki ka pe icinawaw: ‘Ni ki petakanan kaskina ka ki aitotiskein Capernaüm otenak. Peikon aitota ota otenak ka ki otci nitawikiin.’”

²⁴ Aci kiapatc itew: “Tapwe ohwe ka witamatakok: nama otci peikw ka nikan tipatcimotc mirerimakaniwiw neta otenak ka ki otci pe matcekitc.

²⁵ Tapwe kaie ohwe ka witamatakok: weckatc, mekwata Élie e nikan tipatcimospan neta Israël askik, mitcetiwakopan cikawok ka kokatewakopanen. Nicto pipona acitc apita irikik nama ki otci kimiwonikopan neta askik. Kaskina wiec micta kokataniwonikopan.

²⁶ Nama otci peikw cikawa e taciritci ki otci iciticohwakaniwiw Élie kitci witcihatc. Tepirak kotc peikw cikawa ki iciticohwakaniwiw kitci nta witcihatc, Sarepta otenak e tacikeritci, Sidon askik itekera.

²⁷ Minawatc mekwata Élisée e nikan tipatcimospan, mitcetiwakopan kaie neta Israël askik e micta akosiwakopanen e omikiwapinewakopanen. Nama aric peikw nta e tacitcik ki otci kikehiko anihi Éliséa, tepirak peikw iriniw aka e cota iriniwispan, Syrie askik ka ki otcitc. Naaman icinikasokopan. Enko na tepirak ka ki witcihikotc.”

²⁸ Aci micta kiciwasiwok kaskina aniki iriniwok nta cota aiamihe mikiwamik e petakik aniheriw ka iteritci Cecoca.

²⁹ Ki pasikowok, e orowitiratcik otenak, nte e ici otcipitatcik okitatin e matinacinik, neta ka ki ici tcimatakaniwonik aniheriw otenariw Nazareth, e wi tca nitciwepinatcik.

³⁰ Ekoni aric e ici pe matcatc Cecoc, tetawitc iriniwa e ici nanipowiritci e pimotetc.

Iriniw ka makockatcihikotc matci manitowa

³¹ Cecoc ki icaw Capernaüm otenak, nte Galilée askik itekera. Ka arwepi kicikarik ki nta kiskinohamawew kaskina iriniwa nta cota aiamihe mikiwamik.

³² Ki mamiskasitawewok Cecoca iriniwok e ici kiskinohamakeritci, mictahi meka ki mackawisimakaniw okiskinohamakewin.

³³ Neta cota aiamihe mikiwamik takopan peikw iriniw e micta nekatcihikotc matci manitowa. Keskat ki tepitepwew anaha iriniw, e itatc Cecoca:

³⁴ “Ah! Kekwan ka nataweritamawiak, Cecoc, Nazareth otenak ka otciin? Ki ki pe ican ia kitci nipahiak? Ki kiskerimitin ni: kir Ka Kitcitwawisiin, ka ki pe iciticohwisk Kice Manito!”

³⁵ Kaketin aimihew anihi matci manitowa Cecoc, e itatc: “Aka kito! Pakitini kaie anahwe iriniw!” Kek anahwe matci manito wepicimew anihi iriniwa, kaskina awiriwa e wapakeritci, e pe orowitc irinik, tekaci aka e wisakohwatc.

³⁶ Kaskina ka ki wapaketcik ki mamiskateritamok, e tca aititotcik: “Mamiskatc otitewin anahwe iriniw! Ki mirakaniwiw meka tiperitamowiniw kirika mackawisiwiniw kitci ki itatc matci manitowa kitci orowiritci, kaie sapitako!”

³⁷ Anahwe ka ki iciwepak, ki micta arimomakaniwiw Cecoc neta Galilée askik.

Cecoc kikehew mitcet iriniwa e akosiritci

³⁸ Ka ickwa nakatak cota aiamihe mikiwamiriw Cecoc, nte minawa ki icaw Simo omikiwamirik. Simo osikosa micta akosiriw, e kisiswapineritci. Ki tca nataweritamawakaniwiw Cecoc kekociciriw kitci totak kitci witcihatc.

³⁹ Ki natawapamew Cecoc anihi iskwewa e nowectowatc. Ki kanawapamew e taci mackociniritci otapicimonik. Kaketin ki aimitaw aniheriw kisiswapinewiniw, e orowiticohak. Ekoni ka ici mirwatisiritci e matcamakanik okisiswapinewiniw. Tecikotc ki pasiko. Ekoni e ici pe atoskectawatc anahweriw ka tacikeritci omikiwamik anaha iskwew.

⁴⁰ E iti pakicimotc pisimw, mitcet iriniwa ka akosiritci ki pe iciwitowakaniwiw Cecoc, otcirowemakaniwawa kekotc okwimesiwawa e pe iciwirikotcik. Mitcenikopan akosiwiniw ka ki aitapinerikopanen. Tato nta e taciritci ki takinew, kaskina tca ki kikeriwa.

⁴¹ Kaie ki orowiticohwew matci manitowa, mitcet iriniwa e tiperimaritci. Kotc e orowiticohwakaniwitcik irinik aniki matci manitowok, ki tepitepwewok e itetcik: “Kir Kice Manito Okosa!” Aric kaketin ki aimihew anahweriw matci manitowa Cecoc e otcinehwatc aka awocamec kitci arimweritci. Kiskerimikopan meka wir anihi ka ki itespan Kice Manito kitci pe iciticohwatc ota askik kitci akwacimiweritci.

Cecoc pa kakeskwew cota aiamihe mikiwamiskak

⁴² E iti wapanik, Cecoc ki nakatam otenariw. Ki matcaw nte e ki icatc aka e ici taniwonik. Aric mitcet iriniwok ki nantowapamewok. Ka ickwa miskawatcik Cecoca, ki kotci matcikonewok aka kitci nakatikotcik.

⁴³ Itikowok: “Arimatc ni ka pa ican otenaskak kitci ki pa tipatataman Mirwatcimowin, ka otci kiskeritcikaterik Kice Manito Okimawin. Ekoni meka wetci ki pe iciticohokoian ota askik.”

⁴⁴ Minawatc kiapatc pa kakeskwepan cota aiamihe mikiwamiskak nete Judée askik.