Luc Omasinahikan 3 - Kice Manito Ocki Omirwatcimowin

Capatis onikan tipatcimowin

¹ Aci mitato acitc niarano pipona irikik ki Kice Okimawikopan anaha Tibère ka icinikasospan. Ponce Pilate icinikasokopan anaha ka tiperitakipan Judée askiriw. Hérode tca tiperitamokopan Galilée askik. Minawatc Hérode owitcicana, Pirip ka icinikasorispana, nete ici tiperitamirikopan Iturée askik ka icinikaterik kirika Trachonitide askik. Kotak Kice Okimaw Lysanias ka icinikasospan tiperitamokopan neta Abilène.

² Ani apitc Hanne kirika Caïphe kitci makatewokorewiwakopan. Ani apitc Jean, Sakari okosa, ki pe witamako Kice Manitowa otitewiniw, mekwata e tacikespan neta askik ka ici cipewatawokarik.

³ Ekoni tca ka ici pa icatc anahwe Jean kaskina wiec neta askik Jourdain sipik itekera, e aitetc: “Kweskatisikw! Sikahatasokw! Ki ka kasihamakowaw tca kipactatowiniwariw Kice Manito.”

⁴ Ekoni mia ka iciwepanik, kotc ka itacterik omasinahikan Ésaïe, anaha weckatc ka ki pe nikan tipatcimospan. Itemakaniw: “Petakosiw iriniw e tepitepwetc neta askik ka ici cipewatawokarik, e itetc: ‘Ocitakw meskanaw tipickotc kitci iticimok, taci ke pimotetc Teperitciketc.

⁵ Kaskina wiec e ici waratanak kata mockinetakahikatew kitci totcikatek. Kaskina matinawa kaie matinacica kata racitawokahikatewa, tapickotc kitci icinakoki. Meskanawa ka wakicimoki kata kwiskocimotakaniwono, kaie meskanawa ka matcicimoki kata mirocimotakaniwono.

⁶ Kaie kaskina awik kata wapatam e akwacimiweritci Kice Manitowa.’” Ésaïe 40.3-5

⁷ Mitcet iriniwok ki pe natawapamewok anihi Capatisa, e wi sikahatakotcik. Ki itikowok: “Kirawaw ka matci iriniwiekw, mia tapickotc kinepikok ka itatisiekw! Awin ka ki kiskinohamatakw kitci otci ocimohitisoekw otipaskonikewin Kice Manito!

⁸ Ki ta miro totenawaw, kitci ki wapatahiweiekw tapwe e ki kweskatisiekw. Akawir kaie kitci ititisoekw: ‘Abraham nitaniskotape nimocominan.’ Ki witamatinawaw meka, Kice Manito kata kackihepan, asiniwa e totawatc, kitci ocihatc Abraham otaniskotape osimiriw!

⁹ Aci ickwa micipotakaniwon ositaskw ke apatak kitci ki kickikohwakaniwitcik mictikok neta e asko otapiwitcik. Kaskina mictikw aka ka nitawikihatc miro wapimina kata kickikohwakaniwiw kirika kata mitcictepinakaniw.”

¹⁰ Aci itewok aniki iriniwok: “Tan tca e actek kitci totamak?”

¹¹ Itew Capatis: “Awik nicw opapakiwan e tatak, peikw kata mirew owitc iriniwa aka ka takonik. Peikon kaie awik e omitcimimitc kata acamew awiriw aka ka takonik.”

¹² Aci takociniwok neta atita ka natockaketcik, kaie wirawaw e wi sikahatasotcik. Kokwetcimewok Capatisa e itatcik: “Kiskinohamake iriniw, tan e ici actek ninan ke itotiskeiak?”

¹³ Itikowok: “Aka awocamec kicikasohakok patok anihe irikik ka actek ke natockasoiekw.”

¹⁴ Minawatc atita cimakanicak kaie wirawaw pe nta kokwetcimewok Capatisa, e itatcik: “Ninan tca, tan e ici actek ke itotiskeiak?” Itikowok: “Nama wikockatc ki ka nataweritamawawok iriniwok coriariw. Nama kaie arotc ki ka itactahorawaw awik aka e ki otci matci totak tepirak kitci ki otapinamowekw ocoriam. Mireritamokw aric irikik ka ici kicikakoiekw e otamiroekw.”

¹⁵ Aniki iriniwok ka natotawatcik Capatisa e aiarimweritci pehewakopan e micta asperimotcik. Kaskina iterimepanak anihi Capatisa: “Pot enko anahwe ketcinatc ka pehokopanen, Kice Manito ka ki itespan kitci pe iciticohwatc ota askik kitci akwacimiweritci.”

¹⁶ Kaskina anihi iriniwa ki itew Capatis: “Nin, ki sikahatatinawaw, nipi e apatcitaian. Aric anahwe ka pe takocik kirawe mackaweritakosiw patok nin. Nama wawatc ni tipi kicteritakosin wawatc kitci ki apikonamowak omaskisiniapi. Aric wir, ki ka sikahatakowaw, ickoteriw kitci apatcitatc kirika Miro Manitowa kitci miritakw.

¹⁷ Kata itotiskew tarasak mitowi kitike iriniw e takonak omakaripakan kitci tatipan actatc kitikaniw kirika ka maratanik. Kaskina kata mawotcitaw aniheriw okitikan kitci nahikak otactasokiwamik. Aric aniheriw ka maratanik kata ickwasam neta ickotek aka wiskat ka actweparinik.”

¹⁸ Kiapatc mitcetwaw ki kakikeskwew anahwe Capatis kaie ki tipatcimoctawew iriniwa Mirwatcimowiniw.

¹⁹ Minawatc aric ki witamawew anihi okimawa Hérode ka tiperitamirispana nete Galilée askik ka ki ici matci totamiritci, e ki nipowiritci anihi iskwewa Hérodiade, owitcicana anihi okomiriw, kaie kaskina mitcet kotakeriw kekociciriw ka ki ici matci totamiritci.

²⁰ Kiapatc tca ki iti matci totam anahwe Hérode: kipohotowikamikok ki iciticahwew Capatisa.

E sikahatasotc Cecoc

²¹ Ka ickwa sikahatasotcik mitcet iriniwok, Cecoc kaie wir ki sikahataso. Mekwata ka aiamihatc, ki cepariniw wakwek.

²² Aci Miro Manito ki pe racirew Cecoc otci, mia omemew e icinakositc. Kirika ki petam e itakaniwitc, wakwek e otewetcikaterik: “Kir nikosis, ka sakihitan, ki micta mireritamihin.”

Otaniskotape omocoma Cecoc

²³ Wiec nicto mitana tato piponesikopan Cecoc ka kitciparitc otamirowin. Irinik iterimakaniwipan Cecoc, Sosep anihi okosa. Wir tca Sosep otawiwa, Éli icinikasoripana.

²⁴ Éli otawiwa, Matthat icinikasoripana. Minawatc Matthat, Lévi icinikasoripana otawiwa. Anahwe tca Lévi, Melchi icinikasoripana. Kaie Melchi, Jannaï icinikasoripana. Minawatc kiapatc Jannaï, Sosep icinikasoripana.

²⁵ Minawatc Sosep otawiwa, Mattatias icinikasoripana. Mattatias tca, Amos icinikasoripana. Amos kaie, Nahoum icinikasoripana. Anihi tca Nahoum otawiwa, Esli icinikasoripana. Esli otawiwa, Naggaï icinikasoripana.

²⁶ Kaie wir Naggaï ka ki otawiitc, Maath icinikasoripana. Minawatc Maath, Mattatias icinikasoripana otawiwa. Anahwe tca Mattatias, Séméïn icinikasoripana. Anahwe tca kaie Séméïn, Josech icinikasoripana. Minawatc kiapatc Josech, Joda icinikasoripana.

²⁷ Minawatc Joda otawiwa, Yohanan icinikasoripana. Minawatc tca Yohanan, Rhésa icinikasoripana. Minawatc kaie Rhésa, Zorobabel icinikasoripana. Anahweriw tca Zorobabel otawiwa, Chéaltiel icinikasoripana. Anihi tca Chéaltiel otawiwa, Néri icinikasoripana.

²⁸ Kaie wir Néri ka ki otawiitc, Melchi icinikasoripana. Minawatc Melchi, Addi icinikasoripana otawiwa. Anahwe tca Addi, Kosam icinikasoripana. Anahwe tca kaie Kosam, Elmadam icinikasoripana. Minawatc kiapatc Elmadam, Er icinikasoripana.

²⁹ Minawatc Er otawiwa, Jésus icinikasoripana. Minawatc anahwe Jésus, Éliézer icinikasoripana. Minawatc kaie Éliézer, Jorim icinikasoripana. Anihi tca Jorim otawiwa, Matthat icinikasoripana. Anihi tca Matthat otawiwa, Lévi icinikasoripana.

³⁰ Kaie wir Lévi ka ki otawiitc, Simion icinikasoripana. Minawatc Simion, Juda icinikasoripana otawiwa. Anahwe tca Juda, Sosep icinikasoripana. Anahwe tca kaie Sosep, Jonam icinikasoripana. Minawatc kiapatc Jonam, Éliakim icinikasoripana.

³¹ Minawatc Éliakim otawiwa, Méléa icinikasoripana. Minawatc tca Méléa, Menna icinikasoripana. Minawatc kaie Menna, Mattata icinikasoripana. Anihi tca Mattata otawiwa, Natan icinikasoripana. Anihi tca Natan otawiwa, Tapit icinikasoripana.

³² Kaie wir Tapit ka ki otawiitc, Jessé icinikasoripana. Minawatc Jessé, Obed icinikasoripana otawiwa. Anahwe tca Obed, Booz icinikasoripana. Anahwe tca kaie Booz, Sala icinikasoripana. Minawatc kiapatc Sala, Nachon icinikasoripana.

³³ Minawatc Nachon otawiwa, Amminadab icinikasoripana. Minawatc tca Amminadab, Admin icinikasoripana. Minawatc kaie Admin, Arni icinikasoripana. Anihi tca Arni otawiwa, Hesron icinikasoripana. Anihi tca Hesron otawiwa, Pérès icinikasoripana. Kaie wir Pérès ka ki otawiitc, Juda icinikasoripana.

³⁴ Minawatc Juda, Cakop icinikasoripana otawiwa. Anahwe tca Cakop, Isak icinikasoripana. Anahwe tca kaie Isak, Abraham icinikasoripana. Minawatc kiapatc Abraham, Téra icinikasoripana. Minawatc Téra otawiwa, Nahor icinikasoripana.

³⁵ Minawatc tca Nahor, Seroug icinikasoripana. Minawatc kaie Seroug, Réou icinikasoripana. Anihi tca Réou otawiwa, Péleg icinikasoripana. Anihi tca Péleg otawiwa, Éber icinikasoripana. Kaie wir Éber ka ki otawiitc, Chéla icinikasoripana.

³⁶ Minawatc Chéla, Quénan icinikasoripana otawiwa. Anahwe tca Quénan, Arpaxad icinikasoripana. Anahwe tca kaie Arpaxad, Sem icinikasoripana. Minawatc kiapatc Sem, Noé icinikasoripana. Minawatc Noé otawiwa, Lémek icinikasoripana.

³⁷ Minawatc tca Lémek, Matusalem icinikasoripana. Minawatc kaie Matusalem, Hénok icinikasoripana. Anihi tca Hénok otawiwa, Yéred icinikasoripana. Anihi tca Yéred otawiwa, Malaléel icinikasoripana. Kaie wir Malaléel ka ki otawiitc, Quénan icinikasoripana.

³⁸ Minawatc Quénan, Énos icinikasoripana otawiwa. Anahwe tca Énos, Seth icinikasoripana. Anahwe tca kaie Seth, Adam icinikasoripana. Minawatc anahwe Adam, Kice Manitowa ki otawiiw.