Luc Omasinahikan 24 - Kice Manito Ocki Omirwatcimowin

Ka apitcipatc Cecoc

¹ Wipatc e kicepawocinik e manactakaniwonik, aniki iskwewok ki icawok matikowocik, e pe iciwitatcik pimiteriw ka miromakonik e ki ocitatcik.

² Ki miskawewok asiniwa ka kipahikewakaniwonik matikowocik e ki tetipepinakaniwiritci nte opimera ickwatemik.

³ Pitakewok, nama aric miskamok owiawiriw Teperitcikeritci Cecoca.

⁴ Kokwetowi iteritamok. Kek wapamewok nicw iriniwa e wasiterik owikasimiwariw.

⁵ E sekisiwakopanen aniki iskwewok, kirika e atcitaskowectatcik, ki itikowok anahweriw iriniwa: “Kekwan wetci nantowapamekw anahwe ka pimatisitc, ota ka ici nahikowakaniwitcik ka nipotcik?

⁶ Nama ni taw ota aci. Ki apitcipaw. Mikaweritamokw ka ki ititakw mekwata kiapatc e tacikespan Galilée askik, e ki itetc:

⁷ ‘Acteriw kitci makonakaniwitc anahwe Ka ki pe iriniwihitisotc, pactati iriniwa kitci makonikotc, kitci tca tcictaskowatakaniwitc tcipaiatikok, minawatc ickwa nicto kickokarike kitci apitcipatc.’”

⁸ Aci mikawiwok aniheriw ka ki iterispana Cecoca.

⁹ Ki nakatamok aniheriw matikowociriw, e nta tipatcimoctawatcik anihi mitato acitc peikw e taciritci Cecoc owitcewakaniw kaie kaskina kotakihi ka pa witcewikospan.

¹⁰ Aniki iskwewok, peikw Mari icinikasopan, Magdala e otcikopanen. Kirika kotak, Jeanne icinikasopan. Minawatc anahwe kotak, Mari kaie wir icinikasopan, Cak anihi okawiwa. Kaie aniki kotakihik iskwewok kaie wirawaw ka ki pe icatcik, ekoni kaskina e itatisokwatcik anihi Cecoca otarotakaniw.

¹¹ Nama aric ki otci tapwetakowok, osam e iteritamiritci e itatisoketcik: “Kiwockweritamokw aniheriw ka itetcik.”

¹² Aric Pien ki pasikopataw, e ispatatc e nete kanawapatak matikowociriw. Tekocik neta, wakictaw e sakiwapatak neta matikowocik. Tepirak pakiwaniciapiriw ki wapatam, tipan e icicterik. Minawatc ki kiwew omikiwamik, e micta mamiskateritak aniheriw ka ki iciwepanik.

Ka pe iciwepak neta meskanak Emmaüs otenacik ka iticimok

¹³ Anihe peikon e kicikak, nicw owitcewakana Cecoc icawakopan otenacik, Emmaüs ka icinikaterik. Anahwe otenacic wiec nicwo tipahikan asitcapan Jérusalem otenak.

¹⁴ Aiarimotamatopanak kaskina ka ki iciwepanik.

¹⁵ Mekwata e arimotamatotcik aniheriw, aci wir tipirawe Cecoca petcimoteriw e tca iti witcewikotcik.

¹⁶ Ki wapamewok, aric kekociciriw ki ispariniw aka kitci ki nisitowinawatcik.

¹⁷ Itikowok Cecoca: “Kekwan ka arimotamekw e pe pimoteiekw?” Aci nokikapowiwok e tca kackeritakik.

¹⁸ Peikw anahwe iriniw, Cléopas ka icinikasotc, itew Cecoca: “Kir ia ni e peikociin ota Jérusalem otenak e tacikein aka ka ki otci petakein kaskina ka ki pe iciwepak?”

¹⁹ “Kekwan ni ka ki pe iciwepak?” kokwetcimakaniwiwok aniki iriniwok. Naskamowok e itatcik: “Anihe ka ki pe iciwepak, kaskina aniheriw wir Cecoc, Nazareth ka otcitc, ka ki pe iciwepasitc. Micta mackawisipan anahwe, e pe nikan tipatcimospan Kice Manitowa otci. Ki wapatahiwew aniheriw, ka ki aitotisketc, kirika ka ki aitetc, Kice Manitowa e kicterimikotc kaie iriniwa.

²⁰ Nimakatekoreminanak ka tiperitakik kirika ka nikaniwitcik ninan otci ki pakiterimewok Cecoca kitci kicakonakaniwiritci. Ki tca tcictaskowatewok tcipaiatikok.

²¹ Aric enko anahwe ka asperimoakipan kaskina kitci wikotcihatc Israël iriniwa. Ekoni aci anotc nicto kickwa esko kaskina ki pe iciwepak anihe.

²² Minawatc atita iskwewok neta e taciak ni ki kockomikonanak. Wipatc e kicepawak ki icawok matikowocik,

²³ nama aric ki otci miskamok Cecoca owiawiriw. Ki tca pe kiwewok e pe nta tipatatakik e ki wapamatcik aceriwa, e ki tca itikotcik: ‘Pimatisiw ni Cecoc!’

²⁴ Atita neta e tacitcik nikwimesinanak ki icawok nete matikowocik. Ki tca wapatamok mia e icinakonik, kotc ka ki iteritci iskwewa, nama aric ki otci wapamewok Cecoca.”

²⁵ Minawatc itikowok Cecoca: “Tekaci nama kekocic ki kiskeritenawaw! Ki niramisinawaw kitci tapwetamwekw aniheriw weckatc ka ki masinahakik ka ki pe nikan tipatcimowaspan!

²⁶ Nama ia ni ki otci acteriw kitci ici nekatcitaritci anihi ka ki itespan Kice Manito kitci pe iciticohwatc ota askik kitci akwacimiweritci, epwamoci pitakeritci oticperitakosiwinik?”

²⁷ Minawatc kaskina ki witamawew Cecoc wa itemakanik aniheriw e itasinaterik Kice Manito Omasinahikanik, wir otci, Moïse omasinahikanik e ki otci kitciparinik, kaie kaskina ka ki pe nikan tipatcimotcik omasinahikaniwak e itemakanik.

²⁸ E takocikik nte ka icatcik otenacik, mia kiapatc e wi capotoweckaspan e totakipan Cecoc.

²⁹ Aric ki matcikonewok, e itatcik: “Witci tacikemicinan. Nama aci kinowec kitci tipiskak.” Aci pitakew Cecoc omikiwamirik kitci witci tacikematc.

³⁰ Mekwata ka apitc neta e witci mitcisomatc anihi iriniwa, ki otapinew pakwecikana. Ki naskamew Kice Manitowa. Minawatc ki pakwepitew e tca mamiratc anahweriw iriniwa.

³¹ Aci ki ispariniw kitci ki nisitowinawatcik. Keskat aric nama ki otci wapamewok.

³² Aititowok: “Nama ani mia e kisisoikw ka ki iteritamokw, mekwata ka aimihitokw meskanak ka pe pimoteikw, kirika Kice Manitowa Omasinahikaniw ka arimotak!”

³³ Tecikotc ki pasikowok e kiwetcik Jérusalem otenak. Ki miskawewok anihi mitato acitc peikw Cecoc owitcewakana kirika anihi kotakihi iriniwa ka ki pe witcewikoritci, e ki mawotcihitoritci,

³⁴ e tca itikotcik: “Tapwe ni ki apitcipaw Teperitciketc! Ki ni wapamew Simo!”

³⁵ Aci kaie wirawaw ki tipatcimowok ka ki isparitcik mekwata ka pimotetcik, kaie mia apitc ka ki otci nisitowinawatcik Cecoca ka pakwepiteritci pakwecikaniw.

Cecoc e wapamikotc owitcewakana

³⁶ Mekwata kiapatc e arimwewakopanen, kek wir tipirawe Cecoca pe natcikapowictako ka ici taciketcik, e tca itikotcik: “Pekaterimokw!”

³⁷ Micta kockowapamowakopan kirika sekisiwakopan. Iteritamwakopan e amatisotcik.

³⁸ Aric itikowok Cecoca: “Kekwan wetci arimeritamekw? Kekwan wetci anwetamekw kitehiwak?

³⁹ Kanawapatamokw nitcitci kirika nisit. Tapwe ni nin! Takinicikw kitci ki wapatamekw aka e amatisoekw! Nama meka owiawiw tcipai, nama kaie oskaniw. Aric ki wapatenawaw nin e owiawian kirika e oskanian.”

⁴⁰ Ka ickwa itetc aniheriw, aci Cecoc wapatahew otcitci kirika osit.

⁴¹ Aric nama kiapatc orina tapwetako, osam e micta mireritamiritci kirika e mamiskateritamiritci. Aci ki kokwetcimew: “Takon ia ota mitcim?”

⁴² Ki mirewok namesa e ki saswakaniwiritci.

⁴³ Ki tca otapinew e mowatc, e wapamikotc anahweriw owitcewakana.

⁴⁴ Itew tca: “Enko anihi kaskina ka ki witamatakok mekwata ka pa witcewitakok. Kaskina ka ki masinahak Moïse otirakonike masinahikanik, acitc aniheriw ka ki ici masinahakik ka ki pe nikan tipatcimotcik, acitc Mirwatatamo Nakamowin Masinahikanik, kaskina ka ki itactakaniwok kitci iciwepasian, actepan kitci pe icinakok.”

⁴⁵ Minawatc ki mirew kitci miro nisitotamiritci aniheriw ka masinaterik Kice Manito Omasinahikanik,

⁴⁶ e tca itatc: “Enko ohwe ka itasinatek: anihi ka ki itespan Kice Manito kitci pe iciticohwatc ota askik kitci akwacimiweritci, acteriw kitci nekatcitatc kirika kitci nipotc, minawatc tca kitci apitcipatc ickwa nicto kickokarike.

⁴⁷ Kaie kata tipatcimonaniwoniw wir oticinikasowin otci, kaskina wiec ota askik, Jérusalem otenak kitci otci kitciparinaniwonik. Kaskina kata wicamakaniwiwok kitci kweskatisitcik kirika kitci kasihamawakaniwitcik opactatowiniwaw.

⁴⁸ Aci ki ki wapatenawaw anihe ka ki pe iciwepak, kaie ki ka tipatcimonawaw e ki wapatamekw.

⁴⁹ Kirika ki ka iciticahamatinawaw anihi Notawi ka ki itetc kitci miritakw. Kirawaw tca, ota otenak ki ka tacikanawaw, nac kitci ickwa mockineckakoiekw mackawisiwin, icpimik ka otciparik.”

Ka ocpickatc Cecoc

⁵⁰ Minawatc neta otenak ki orowitirew owitcewakana Cecoc, nete e iciwiratc pecotcik otenacik Béthanie ka icinikaterik. Ekota neta ka icpipitonectatc e aiamitowatatc.

⁵¹ Mekwata tca ka aiamitowatatc, ki nakatew, e ocpickatc wakwek.

⁵² Wirawaw tca aniki iriniwok, aci micta kicterimewok Cecoca, e kiwetcik Jérusalem otenak e micta mireritakik.

⁵³ Aspinikotc kitci aiamihe mikiwamik tacikewakopan, e mirwatcimatcik Kice Manitowa.