Luc Omasinahikan 22 - Kice Manito Ocki Omirwatcimowin

Cota aiamihe okimawok e natowi totakik kitci ki otci makonakaniwiritci Cecoca

¹ Aci peconakonikopan kitci aiamihe makocaniwok, “Pakwecikan aka ka opisotc” e icinikatek. Peikon icinikatekopan Pâque.

² Cota makatewokorewok ka tiperitakik kirika ka kiskinohamaketcik cota aiamihe irakonikewiniw natowi totamwakopan ke ki totcikaterik kitci nipahakaniwiritci Cecoca, koctewakopan aric iriniwa kitci kiciwahatcik.

Aci e ickwa aiketc Judas kitci pakiterimatc Cecoca

³ Aci Judas, Iscariote e icinikatakaniwitc, ki pitciteheckako Matci Manitowa. Enko na peikw Cecoc owitcewakana anahwe Judas.

⁴ Judas ki nta aimihew cota makatewokorewa ka tiperitamiritci kirika ka tiperimaritci cimakaniciriw ka kanaweritamiritci kitci aiamihe mikiwamiriw, e arimotamawatc ke ki totak kitci pakiterimatc Cecoca kitci makonakaniwiritci wirawaw otci.

⁵ Ki tca micta mireritamiriwa anihi cota iriniwa ka nikaniwiritci kirika ki nespi tapweriwa coriariw kitci mirikotc.

⁶ Judas ici naheritam. Ekoni ka iti kitciparitc e natowi aitotak mia apitc ke ki pakiterimatc Cecoca, kitci tca makonikoritci anahweriw cota iriniwa ka nikaniwiritci, aka aric awiriwa kitci kiskeritamiritci.

Nicw owitcewakana e iciticohwatc Cecoc kitci ocitaritci kitci aiamihe makocetcik

⁷ Mekwata e mirwatcitcikatekipan anihe makocan “Pakwecikan aka ka opisotc” ka icinikatek, aci ki otcitciparin anihe e kicikak e itactekopanen maritcenic kitci nipahakaniwitc e aiamihe pakitinakaniwitc kitci ki makocaniwok.

⁸ Ki iciticahwew Cecoc Piena kirika Jeanwa, e itatc: “Matcakw, nta ocitakw kitci ki aiamihe makoceikw Pâque otci.”

⁹ Kokwetcimiko: “Tante e ici nataweritaman kitci ici nta ocitaiak makocan?”

¹⁰ Itew Cecoc: “Natotamokw! Apitc takociniekwe otenak, ki ka nakickowawaw iriniw e miwotatc nipiriw opotak. Nosanehwakw neta mikiwamik ke ici pitaketc.

¹¹ Minawatc ki ka itawaw neta ka tiperitak mikiwamiriw: ‘Kiskinohamake iriniw ki kokwetcimikw: Tante anihe aricap ke taci mitcisoak, kitci aiamihe makoceiak Pâque otci, nin kirika niwitcewakanak?’

¹² Ki ka tca wapatahikowaw icpimitakok omikiwamik micta aricapiriw, kaskina kekociciriw e takonik. Ekota tca neta ke ocitaiekw makocan.”

¹³ Ki matcawok. Kaskina mia ki icinakoniw Cecoca ka ki aiteritci. Ki tca nisawitawok ke aiamihe makocetcik.

Mamitcitc e witci mitcisomatc Cecoc owitcewakana

¹⁴ Apitc ka otcitciparinik kitci aiamihe makocetcik, Cecoc kirika otarotakana ki natapiwok kitci mitcisotcik.

¹⁵ Ki itew: “Ni ki micta nataweriten kitci witci mitcisomitakok e aiamihe makoceikw epwamoci nekatcitaian.

¹⁶ Ki witamatinawaw tca, nama minawatc ni ka mitcison ohwe e ici aiamihe makocaniwok, nac kitci otcitciparik kitci mamo mitcisonaniwok neta Kice Manito Okimawinik.”

¹⁷ Kek ki otapinam orakaniw. Mikwetc ki itew Kice Manitowa, minawatc e itetc: “Otapinamokw ohwe orakan, papeikw e taciekw minikwekw.

¹⁸ Ki witamatinawaw tca: aci anotc nama awocamec ni ka minikwan minicapo, nac kitci pe otcitciparinik Kice Manito Okimawin.”

¹⁹ Minawatc ki otapinew pakwecikana. Ka ickwa aiamihatc, mikwetc e itatc Kice Manitowa, ki papakwepitew kirika ki mamirew owitcewakana, e itatc: “Enko ohwe niwiaw ka ki pakitinikatek kirawaw otci. Ekoni ke totamekw kitci mikawi totawiekw.”

²⁰ Peikon, ka ickwa mitcisotcik, orakaniw ki otapinam Cecoc, e itatc owitcewakana: “Enko ohwe orakan ke otci kiskeritakok Kice Manito ocki otacotamakewin, e ki sikinikatek nimikw kirawaw otci.

²¹ Aric kanawapamakw tca! Anahwe ke pakiterimitc, tacikew ota! Ni witci mitcisomikw!

²² Tapwe kata nipo anahwe Ka ki pe iriniwihitisotc, kotc ka ki itactaritci Kice Manitowa kitci icinakonik. Aric kata arimipaririw anihi iriniwa ke pakiterimikotc!”

²³ Aci aniki Cecoc owitcewakana kokwetcimitowok e wikokwe nanto kiskerimatcik awin nihi mia neta e tacitcik ke totamiritci.

Awin kirawe ka kicteritakositc?

²⁴ Ki iti micta aimihitowok Cecoc owitcewakana e wi kiskeritakik awin anahwe mia neta e tacitcik ka mawotci kicteritakositc.

²⁵ Itikowok Cecoca: “Okimawok ota askik tiperimewok otirinimiwawa, kaie tca anahweriw ka tiperimikotcik aniki okimawok, wirawaw wi icinikatikosiriwa ‘ka mirotehetcik.’

²⁶ Pitoc aric kata icinakon kirawaw otci. Anahwe ka mawotci kicteritakositc neta e taciekw kata tipaterimitiso kitci iterimitisotc tapickotc anahwe ka mawotci awaciwitc. Kaie anahwe ka tiperitak kata iterimitiso mia peikon anahwe ka atoskectaketc.

²⁷ Tan ohwa meka kirawe e kicteritakositc: anahwe ka apitc mitcisowakanatikok e atoskectawakaniwitc kekotc anihi ka atoskectakotc? Anahwe ka apitc e atoskectawakaniwitc, taina? Nin ki witci tacikemitinawaw mia peikon anahwe ka atoskectaketc e totaman.

²⁸ Mocak ki ki wi tacikeminawaw mekwata ka arimihikoiapan.

²⁹ Kit acotcictamatinawaw Okimawin, mia Notawi kaie nin ka ki ici acotcictamowitc.

³⁰ Ki ka witci mitcisominawaw acitc ki ka witci minikweminawaw nete Nokimawinik. Kirika e taciekw papeikw okimaw tetapiwakanik ki ka apinawaw, kitci tipaskonekok Israël iriniwok e mitato acitc nicw otenwesitcik.”

E tipatcimotc Cecoc kitci anwerimikotc Piena

³¹ Cecoc itew Piena: “Simo, Simo! Natotaci! Matci Manito ki nataweritam kitci powiparihitakw, mia mirominockwa e micta powiparihakaniwiritci kitci ki maniparinik neta kitikaniw.

³² Aric ki ki aiamihectamatin, Simo, aka kitci ponitain e asperimototawotc Kice Manito. Ickwa tca pe kiwe natawapamiine, witcihakanak kiwitcicanak kaie wirawaw kitci sokitehetcik.”

³³ Pien itew: “Teperitcikein, aci nit ickwa aikan kaie nin kitci kipohokoian kaie kitci nipahikoian kirika kir.”

³⁴ Itiko Cecoca: “Ki witamatin, Pien, epwamoci kitotc nape pakahakwan iti wapanike, aci nictowaw ki ka ickwa itwan aka e kiskerimiin.”

Coriawoc, mackimotai kirika micta mokoman

³⁵ Minawatc Cecoc ki kokwetcimew, e itatc: “Ka iciticohotakok otenaskak kitci pa tipatcimoekw, e ki ititakok aka kitci matcewitaiekw coriawoc, mackimotai kaie maskisina, kekocic ia ki ki noteparinawaw?” “Nama kekocic,” itewok.

³⁶ Itikowok: “Aric anotc, anahwe ka takonik ocoriawoc kata matcewitaw, kaie anahwe ka takonik omackimotai. Anahwe tca aka ka takonik omicta omokoman kata atawew okapotowan kitci ki otapinak.

³⁷ Ki witamatinawaw meka, otcitakotc kata isparin anihe ka ki masinahikatek Kice Manito Omasinahikanik kitci iciwepasian: ‘Kaie ki iterimakaniwiw mia iriniw ka matci totak.’ Ésaïe 53.12 Tapwe wirata, anihe ka ki masinahikatek nin otci, kata pe iciwepan.”

³⁸ Cecoc itiko owitcewakana: “Teperitcikein, enko ohwi e niciki micta mokomana.” Cecoc itew: “Ekoni ici ponitakw”

Cecoc e nta aiamihatc matinak Mont des Oliviers

³⁹ Minawatc ki orowiw otenak Cecoc, nete e icatc matinak Mont des Oliviers ka icinikaterik, mocak ko e icakopanen neta. Ki nosanehiko owitcewakana.

⁴⁰ Tekocik neta, itew: “Aiamihakw, aka kitci cakotcihikoiekw e kokwetcihikoiekw kitci pactatiekw.”

⁴¹ Minawatc nakewara iti nakatew, wiec irikik e iciwepinakaniwitc asini. Ki nipisko e aiamihatc,

⁴² e itetc: “Notawi, kecpin ici naheritamane, ocita aka kitci nekaterimoian. Nama aric nin nititeritamowin kitci apatak, aric kir kititeritamowin.” [

⁴³ Aci aceriwa pe natawapamiko, wakwek e ki pe ototeritci, e pe nta mackawisihikotc.

⁴⁴ E apitc nekateritak, Cecoc kirawe kiapatc aiamihaw, nac e micta apwesitc, mia miko e papakikowinik otapwesiwin, motcik e papakikowinik.]

⁴⁵ Ka ickwa aiamihatc, ki pasiko. Ki pe natawapamew owitcewakana. Ki miskawew e taci niparitci, e aieskosiritci e apitc kackeritamiritci.

⁴⁶ Itew: “Kekwan wetci nipaiekw? Pasikokw. Aiamihakw, aka kitci cakotcihikoiekw e kokwetcihikoiekw kitci pactatiekw.”

E makonakaniwitc Cecoc

⁴⁷ Mekwata kiapatc Cecoc e taci aiarimwetc, mitcet iriniwa pe takociniriwa. Judas, peikw nta e taciritci Cecoc owitcewakana, enko anahwe ka ki pe iciwiratc anahweriw iriniwa. Aci natcikapowictawew Cecoca kitci otcematc.

⁴⁸ Itiko Cecoca: “Judas, ekoni ia e totaman e mamicimatc anahwe Ka ki pe iriniwihitisotc, e otcematc?”

⁴⁹ Ka wapatakik e iti isparinik aniki Cecoc owitcewakana, aci kokwetcimewok: “Teperitcikein, ki nataweriten ia kitci otatamohwakitcik, nimicta nimokomaninan kitci totamak?”

⁵⁰ Peikw tca nta e tacitcik ki otamitotawew anihi otarotakaniw kitci makatewokorewa, e tca kickitokewepowatc onihiwinik itekera.

⁵¹ Aric Cecoc itew: “Ponitakw! Ekoni irikik!” Ki takinamawew otokariw anihi iriniwa e kikehatc.

⁵² Minawatc Cecoc ki itew anahweriw cota makatewokorewa ka tiperitamiritci kaie anahweriw ka tiperimaritci cimakanica ka kanaweritamiritci kitci aiamihe mikiwamiriw acitc anihi cota aiaimihe okimawa ka ki pe icarispana kitci makonikotc: “Actepan ia kitci pe icaiekw e takonamekw micta mokomana kaie mictikwa, tarasak mia kimoti iriniw e iterimiekw?

⁵³ Tato kickwa kitci aiamihe mikiwamik ki witci tacikemititawaw. Nama wiskat ki ki otci natowi totenawaw kitci makonikoian. Aci aric anotc ki pakitinikowinawaw kitci totamekw anihe ka ici nataweritamekw, kaie anahwe ka tiperitciketc e ici tipiskarik.”

Pien e anwerimatc Cecoca

⁵⁴ Ki makonewok Cecoca, kitci makatewokorewa omikiwamirik e iciwiratcik. Pien nosanehikepan e warinakosiritci.

⁵⁵ Takonopan kotowan neta orowitimik opimera mikiwamik. Ekota ni kaie wir e apitc Pien, e witapimatc iriniwa neta ka waskapiritci kotowanik.

⁵⁶ Peikw arotakan iskwew, ka wapamatc Piena pecotcik ickotek e taci apiritci, kanawapamew, e itatc: “Anahwe iriniw, kaie wir ni pa witcewepan Cecoca!”

⁵⁷ Aric Pien itew aka e tapweritci, kirika e itetc: “Nama ni kiskerimaw anahwe!”

⁵⁸ Nanake aci kotakihi awiriwa wapamiko, e itikotc: “Kaie kir ni, peikw nta e taciritci ka pa witcewatcik Cecoca!” Itew aric anihi iriniwa Pien: “Namaiew ni nin!”

⁵⁹ Wiec e ickwa peikwo tipahikanearik, kiapatc kotakihi awiriwa otcitakotc iteriwa: “Tapwe ni, pa witcewepan Cecoca anahwe iriniw. Galilée askik meka otciriw.”

⁶⁰ Aric Pien itew: “Nama ni kiskeriten kekwan wa itein!” Mekwatc e taci arimwetc, mia kitoriw nape pakahakwana.

⁶¹ Teperitciketc pe kiwekapowiw e micta kanawapamatc Piena. Mikawiw Pien aniheriw ka ki itikospan Teperitcikeritci: “Epwamoci kitote nape pakahakwan iti wapanike, aci nictowaw ki ka ickwa itwan aka e kiskerimiin.”

⁶² Orowiw Pien, e matotc e micta kackeritak.

Cecoc e marerimakaniwitc kirika e otatamohwakaniwitc

⁶³ Aniki iriniwok ka nanakatcihawakopanen Cecoca papirotawewakopan kirika otatamohwewakopan.

⁶⁴ Ki akonakwenehwewok, e tca kokwetcimatcik: “Awin ka ki otamohwisk? Wikokwe kiskerita!”

⁶⁵ Kaskina wiec kiapatc aitawakopan e marerimatcik.

Cecoc e iciwirakaniwitc neta ka ici mawotcihitoritci cota iriniwa Ka Kitci Tipaskonikeritci

⁶⁶ Ka kicepawonik, cota aiamihe okimawok acitc cota makatewokorewok ka tiperitakik kirika aniki ka kiskinohamaketcik cota aiamihe irakonikewiniw ki mawotcihitowok. Ki natawerimewok Cecoca kitci pe iciwirakaniwiritci neta ka ici tipaskonikaniwonik, Ka Kitci Tipaskoniketcik e icinikatakaniwitcik aniki ka apitcik neta.

⁶⁷ Ki kokwetcimewok Cecoca, e itatcik: “Witamacinan ohwe: kir ia ni anihi ka ki itespan Kice Manito kitci pe iciticohwatc ota askik kitci akwacimiweritci?” Ki itikowok: “Kecpin witamatakoke, nama ki ka tapwetowinawaw.

⁶⁸ Kecpin tca nin kokwetcimitakoke kekocic, nama ki ka naskamonawaw.

⁶⁹ Anotc anahwe Ka ki pe iriniwihitisotc kata apiw onihiwinirik Kice Manitowa e mackawisiritci.”

⁷⁰ Kaskina itewok: “Kir ia tca ni Kice Manito Okosa?” Ki itew: “Ekoni e iteiekw: nin ni.”

⁷¹ Minawatc kiapatc itewok: “Nama arimatc kotakihik iriniwok ki ka nantowapamanowok kitci witakik ka ki ici petakik. Kirano tipirawe ki petawano ka ki itetc.”