Luc Omasinahikan 20 - Kice Manito Ocki Omirwatcimowin

Tante wetciparinik otiperitamowin Cecoc?

¹ Peikwaw e kicikarik Cecoc kiskinohamakepan kitci aiamihe mikiwamik, e tipatcimospan Mirwatcimowiniw. Aci pe takociniwok neta cota makatewokorewok ka tiperitakik kirika ka kiskinohamaketcik aiamihe irakonikewiniw kaie cota aiamihe okimawok,

² e tca kokwetcimatcik Cecoca, e itatcik: “Witamacinan, tante wetciparik kitiperitamowin kitci itotiskein? Awin ka ki mirisk aniheriw?”

³ Itew Cecoc: “Kaie nin peikw kekocic ki ka kokwetcimitinawaw. Witamacikw,

⁴ awin ka ki pe iciticohwatc Capatisa kitci pe nta sikahatakeritci? Kice Manito kekotc ma iriniwok?”

⁵ Aci aniki iriniwok aimihitowok, e aititotcik: “Kecpin iteikwe, ‘Kice Manito ni ka ki pe iciticohwatc,’ ki ka kokwetcimikono, ‘Kekwan wetci aka ki otci tapwerimekw Capatis?’

⁶ Kecpin aric iteikwe, ‘Iriniwok ka ki pe iciticohwatcik,’ kaskina iriniwok ki ka pemosinihikonowok kitci nipahitokok. Ketcinaweritamok meka e ki pe nikan tipatcimorispana anihi Capatisa Kice Manito otci.”

⁷ Aci itewok: “Nama ni kiskerimanan awin ka ki pe iciticohwatc kitci pe nta sikahatakeritci.”

⁸ “Ka!” itew Cecoc. “Nama meka tca kaie nin ki ka witamatinawaw nte wetciparik nitiperitamowin kitci itotiskewak.”

Atisokanicic: Kitike iriniwok e macikowatcik ka tiperitamiritci okosiriw

⁹ Minawatc Cecoc ki iti atisokawew iriniwa ohweriw atisokaniciciriw: “Peikw iriniw takonikopan okitikan aski, cweminatikwa e kitiketc. Kitike otamiro iriniwa ki awihew aniheriw okitikan aski. Ekoni e ici matcatc, kitci pa pimatisitc, kinowec e itanahotc.

¹⁰ Apitc wetcitciparinik kitci mawotcihakaniwiritci cwemina, aci ki iciticahwew peikw otarotakana kitci natawapamaritci anahweriw kitike otamiro iriniwa kitci tca mirikotc irikik cwemina ka ki acotamatotcik kitci mirakaniwitc e ki awihiwetc otaski. Aric aniki kitike otamiro iriniwok ki macikawewok anihi arotakana. Ki kiweticohwewok, aka kekociciriw e ki otci miratcik.

¹¹ Aci anahwe iriniw ka tiperitak ki iciticahwew kiapatc peikw kotakeriw otarotakana. Peikon ka ki totawatcik aniki kitike otamiro iriniwok: ki macikawewok kirika ki marerimewok e kiweticohwatcik, aka kekociciriw e ki otci miratcik.

¹² Aci minawatc kotakeriw iriniwa ki iciticohwakaniwiriw. Peikon kaie wir ki apinehwewok, e tca orowepinatcik.

¹³ Aci itew anahwe ka tiperitak: ‘Tan ke ki totaman? Ni ka iciticohwaw nikosis e micta sakihak. Pot ketcinatc anihi nikosa kata kicterimewok.’”

¹⁴ “Aric ka wapamatcik aniki kitike otamiro iriniwok e takociniritci, ki aititowok: ‘Enko anaha ke tiperitak nanake! Ahw! Ki ka nta nipahano! Kirano tca ki ka tiperitenano ohwe aski!’

¹⁵ Ki tca orowepinewok nete kitikan askik. Nac e ki nipahatcik.” Kokwetcikemo Cecoc: “Anaha ka tiperitak kitikan askiriw, tan ke totawatc anahweriw otamiro iriniwa?

¹⁶ Kata icaw neta otaskik. Minawatc kata nta nipahew anahweriw kitike iriniwa. Kotakeriw otamiro iriniwa kata mirew aniheriw okitikan aski kitci mitaritci.” Iriniwok ka petawatcik Cecoca e iteritci ki itewok: “Nama ketcinatc kata isparin!”

¹⁷ Cecoc kanawapamew e itatc: “Tan tca e ici nisitotakok ohwe ka masinatek Kice Manito Omasinahikanik: ‘Anihi asiniwa ka ki wepinatcik manike iriniwok, e ki iteritakik “nama wiec irapatisiw,” enko anihi aci ka mawotci kictapatisiritci.’ Psaumes 118.22

¹⁸ Kaskina awik ke pakicik neta asinik, kata apitcicin. Kecpin kaie anahwe asini pactcickowate awiriwa, kata apitcickosoriwa.”

E kicikowakaniwitc Kice Okimaw ka ici natockasotc

¹⁹ Aniki ka kiskinohamaketcik aiamihe irakonikewiniw kaie cota makatewokorewok ka tiperitakik natowi totamwakopan ke ki totcikaterik wipatc kitci ki makonakaniwiritci Cecoca. Kiskerimewakopan meka e ki atisokatikotcik aniheriw ka iteritci. Koctewakopan aric iriniwa neta ka tacikeritci.

²⁰ Wewerita nanakatcihawakopan Cecoca. Ki iciticohwewok iriniwa kitci nanakatciharitci Cecoca, kitci tca miro iriniwikasotcik. Wikokwe paciwirewakopan Cecoca arotc kitci iteritci e kokwetcimakaniwiritci, ke ki otci itactahorakaniwiritci, kice okimak tca kitci iciwirakaniwiritci, kitci tipaskonikoritci, e mackawisimakanik otiperitamowiniw aniki kice okimawinik.

²¹ Aci aniki ka ki pe iciticohwakaniwitcik ki kokwetcimewok Cecoca, e itatcik: “Kiskinohamake iriniw, ni kiskeritenan tapwe icikowisk e itein kaie e ici kiskinohamakein. Kirika nama kirawe ki kicterimawok atita iriniwok, aka tca kitci pamerimatcik kotakihik. Mia kit ici kiskinohamakan ke itatisinaniwok e ici mireritak Kice Manito.

²² Witamacinan tca: itemakan ia kitaiamihe irakonikewininak kitci kicikamokw ka ici natockasotc Kice Okimaw, Rome askiriw ka tiperitak, kekotc nama?”

²³ Kiskeritamokopan Cecoc e wi paciwirikotc anahweriw iriniwa. Ki itew:

²⁴ “Wapatahicikw peikw coriapiskw. Awin neta ka masinasotc kirika oticinikasowin?” “Kice Okimaw, itewok.”

²⁵ Itew Cecoc: “Mirakw Kice Okimaw ka ici tiperitak, peikon kaie wir Kice Manito mirakw ka ici tiperitak.”

²⁶ Nama ki otci kackihewok Cecoca kitci paciwiratcik arotc kitci iteritci, mekwata e mitcetinaniwonik neta. Ki mamiskasitawewok ka ki ici naskamoritci. Nama tca awocamec ki otci kitowok.

E kokwetcimakaniwitc Cecoc ke apitc nipowinaniwonikwen wakwek

²⁷ Atita cota iriniwok Sadducéen ka icinikatakaniwitcik ki pe natawapamewok Cecoca. Tapweritamwakopan aniki Sadducéen iriniwok aka kitci apitcipaniwonik. Kokwetcimewok Cecoca e wi paskewiratcik, e tca itatcik:

²⁸ “Kiskinohamake iriniw, weckatc Moïse ki ki witamakono ohweriw irakonikewiniw, e itasinaterik: ‘Kecpin iriniw e nipotc, e nakatatc tca okoma aka e ki otci onitcaniciritci, acteriw anihi ocima kitci wikimaritci ka cikawiritci, kitci tca onitcanicitcik, octesa otci ka ki niporitci.’” Deutéronome 25.5-6

²⁹ “Peikwaw nicowaso tacipanak iriniwok e owitcicanitotcik. Anahwe ka mawotci kiceatisitc ki nipowiw. Ki tca poni pimatisiw, aka e ki otci taritci onitcanica.

³⁰ Ka niconiwitc tca octesimaw ki wikimew anihi owitimwa. Kaie wir ki poni pimatisiw.

³¹ Minawatc kiapatc anahwe ka nictoniwitc octesimaw peikon kaie wir ka ki iciwepasitc. Nac kaskina aniki ka owitcicanitotcik, ekoni kaie wirawaw ka ki iciwepasitcik. Aniheriw kaie owitimowawa, ki poni pimatisiriwa, aka tca otci peikw e ki otci taratcik awaca.

³² Mamitcitc kaie wir ki poni pimatisiw anahwe cikaw.

³³ Nikotin tca apitcipatawe ka poni pimatisitcik, awin ni mia ke okomitc? Aniki meka kaskina e nicowatcitcik ki iti wikimewok anihi iskwewa!”

³⁴ Naskamo Cecoc e itatc: “Iriniwok kirika iskwewok ota askik wikimitowok.

³⁵ Aric iriniwok kirika iskwewok ka iteritakositcik kaie wirawaw kitci apitcipatcik ickwa nipotawe, kirika kitci pimatisitcik neta pimatisiwinik nikanik ka takonik, nama wikimewok nete.

³⁶ Nama kaie kata ki nipowok. Mia meka aceriwok iteritakosiwok. Kice Manito okosa iteritakosiwok, aci e ki apitcipatcik.

³⁷ Moïse wewerita ki masinaham omasinahikanik kitci apitciparitci ka ki poni pimatisiritci. Neta mia e ici arimotcikaterik e minictikwaskwearik e ickotewonik, ohweriw ki icinikatew Kice Manitowa: ‘Abraham Okice Manitoma, kirika Isak Okice Manitoma, kirika kaie wir Cakop Okice Manitoma.’” Exode 3.2,6

³⁸ Minawatc kiapatc itew Cecoc: “Kice Manito anahwe, ka pimatisitcik ni iriniwok Okice Manitomiwaw, namaiew ni ka poni pimatisitcik. Kaskina meka e taciritci iterimew ‘pimatisiwok.’”

³⁹ Atita ka kiskinohamaketcik cota aiamihe irakonikewiniw iti arimwewok, e itetcik: “Mirotakon anihe ka itein, Kiskinohamake iriniw.”

⁴⁰ Nama meka awocamec ki otci wi kokwetcimewakopan kotakeriw kekociciriw.

Anahwe ka ki pe iciticohikotc Kice Manitowa kitci pe akwacimitokw

⁴¹ Cecoc ki itew: “Kekwan wetci itwaniwok anihi ka ki itespan Kice Manito kitci pe iciticohwatc ota askik kitci akwacimiweritci, enkweriw Okimaw Tapit otaniskotape osima?

⁴² Tapit meka wir tipirawe ki masinaham Mirwatatamo Nakamowin Masinahikanik: ‘Teperitciketc Kice Manito ki itew anihi Ka Tiperimimitc: Pe nta api ninihiwinik,

⁴³ nac kitci tepahakik ka cikerimiskik, kir tekaci kitci tiperimatcik.’ Psaumes 110.1

⁴⁴ Tapit ki icinikatew ‘Ka Tiperimimitc’ anihi ka ki itespan Kice Manito kitci pe iciticohwatc kitci akwacimiweritci. Tan tca ke isparinik kitci ki otaniskotape omocomitc anihi Tapita?”

Kitci aiekwamictowakaniwitcik ka kiskinohamaketcik aiamihe irakonikewiniw

⁴⁵ Mekwata kaskina awiriw e natotakotc Cecoc, aci itew owitcewakana:

⁴⁶ “Aiekwamictowakok aniki ka kiskinohamaketcik cota aiamihe irakonikewiniw, ka mireritakik e pa pimotetcik, okapotowaniwaw ka kinekinik e apatcitatcik, kirika e mitcetinaniwonik sakitawok wewerita kitci arimikowakaniwitcik. Ke ici miro nokositcik ici apiwok cota aiamihe mikiwamik, kaie ka mawotci mirwacinik apiwinik ici apiwok e makocaniwonik.

⁴⁷ Tcakinamowewok kaskina e ici tatamiritci cikawa, kinowec e taci aiamihatcik, tepirak kitci iterimakaniwitcik ‘micta aiamihatisiwok.’ Enko aniki ke mawotci kicakonakaniwitcik.”