Luc Omasinahikan 2 - Kice Manito Ocki Omirwatcimowin

Ka nitawikitc Cecoc

¹ Ani apitc Kice Okimaw Auguste ki itew kaskina ka tacikeritci neta Romain askik kitci masinahwakaniwiritci, kitci ki kiskeritak e tacinaniwonik neta Romain askik.

² Ekoni nictam ka masinahotisonaniwonik, mekwata e kice okimawispan Quirinius neta askik Syrie ka icinikaterik.

³ Kaskina iriniwok ki nta masinahotisowok neta otenak ka otcitcik.

⁴ Kaie wir Sosep matcapan, Nazareth otenacik e ki otci matcatc, Galilée askik itekera, nete tca Bethléem otenacik e wi icatc, Judée askik itekera. Ekota ni ka otci nitawikitc weckatc Okimaw Tapit. Sosep meka otaniskotape omocomipan anihi Tapita.

⁵ Ki icaw nete Sosep kitci masinahotisotc kirika anihi ke wikimatc, Mari e icinikasoritci. Anahwe Mari kanawerimawasopan.

⁶ Mekwata e taciketcik Bethléemik, aci otcitcipariniw kitci wapamawosotc Mari.

⁷ Ki okosiw. Ekoni pitcerak e onitcanicitc. Ki wikwekinew okosa pakiwaniciapik, atikw omitcisowakanik e mackocimatc. Nama meka tepickinaniwonikopan nipewikamikok.

Maritcenici iriniwok e pe natawapamikotcik aceriwa

⁸ Nakewar neta askik tacikepanak iriniwok ka nanakatcihatcik maritcenica e tipiskarik, neta kitikan askik e ici mackociwonik.

⁹ Mekwata e nanakatisitcik, kek aceriwa pe natawapamikowok, Kice Manito e ki pe iciticohwatc. Ki waskackakowok Kice Manitowa oticperitakosiwiniw e micta wacterik. Ki micta sekisiwok.

¹⁰ Itikowok anihi aceriwa: “Aka sekisikw. Miro tipatcimowin ki pe nta tipatcimoctatinawaw, kaskina iriniwok ke otci micta mireritakik.

¹¹ Anotc ka mi tipiskarik, ota Tapit otenamik, awik ki nitawikiw kirawaw otci, Ke Akwacimitakw. Enko na Krist, Teperitciketc.

¹² Neta ke ici nisitowinawekw: awacicic ki ka miskawawaw e wikwekinakaniwitc pakiwaniciapik kirika atikw omitcisowakanik e ki micimakaniwitc.”

¹³ Kek wiskata micta kice mitcetiwok aceriwok wakwek e otci pe nokositcik, e pe mirwatcimatcik Kice Manitowa, e aitetcik:

¹⁴ “Icperimatan Kice Manito, mawotci icpimik wakwek e taciketc. Pekateritamowiniw kaie kitci takonik iriniwa otci ota askik ka sakihatc!”

Bethléem ik e icatcik maritcenici iriniwok

¹⁵ Ka ickwa nakatikotcik anahweriw aceriwa, aci wakwek e kiweritci, ki aititowok maritcenici iriniwok: “Bethléemik tca icatan. Actew kitci natawapatamokw anihe ka ki pe iciwepak, aniheriw ka ki witamatokw Teperitciketc.”

¹⁶ Wepitawok e icatcik. Ki miskawewok Mariwa kirika Sosepa, kaie onitcaniciriw e taci mackociniritci atikw omitcisowakanik.

¹⁷ Ka ickwa wapamatcik, aci ki pa tipatatamok aniheriw ka ki itikotcik aceriwa, anihi awaca otci.

¹⁸ Kaskina iriniwok ka petawatcik anahweriw maritcenici iriniwa micta kockomikowok e aitikotcik.

¹⁹ Wir Mari kaskina ki kanaweritam otehik. Mictahi mamitoneritamopan.

²⁰ Minawatc ki kiwewok aniki maritcenici iriniwok. Micta mirwatatamwakopan Kice Manitowa oticperitakosiwiniw, kirika e mirwatcimatcik aniheriw otci, kaskina ka ki ici petakik kaie ka ki ici wapatakik. Kaskina meka mia ki iciwepaniw ka ki itikotcik aceriwa.

E wirakaniwitc Cecoc ke icinikasotc

²¹ Ka ickwa nicwaso kickokarik ka ickwa nitawikitc anahwe awacic, ki kicawatocwakaniwiw. Cecoc ki icinikatakaniwiw, enkweriw icinikasowiniw aceriwa ka ki iterispana kitci icinikasotc, epwamoci kanawerimawasoritci okawiwa.

Cecoc e iciwirakaniwitc kitci aiamihe mikiwamik

²² Aci ki otcitcipariniw kitci nta aiamihatcik Sosep kirika Mari, e wi nosanetatcik aniheriw ka ici nataweritcikaterik cota aiamihe irakonikewinik, aka awocamec kitci iteritakositcik “ometciwok” cota aiamihewinik itekera, kotc e itemakanik Moïse otirakonikewinik. Aci kitci aiamihe mikiwamik iciwirewok onitcaniciwawa, nete Jérusalem otenak e takonik, kitci nta acotamawatcik Teperitcikeritci.

²³ Masinatew meka Teperitciketc otirakonikewinik: “Tato ockinikicic nictam ka nitawikitc kata mirakaniwiw Teperitcikeritci otci.” Exode 13.2,12

²⁴ Kaie ki icawok kitci aiamihe pakitiniketcik Kice Manitowa otci. Enkweriw kiapatc peikon irakonikewiniw ka itacterik: “Nicw omemewok kitci nipahakaniwitcik e aiamihe pakitinikaniwonik, kekotc nicw kotakihik ocki pirecicak.” Lévitique 12.8

²⁵ Tapan iriniw neta otenak Jérusalem, Simion icinikasopan. Anahwe iriniw icikowisk itatisipan. Kicterimepan Kice Manitowa kirika pehepan anihi ke pe nta akwacimaritci Israël iriniriw. Miro Manitowa witci tacikemikopan anahwe Simion,

²⁶ kirika ki witamakokopan aka kitci nipotc epwamoci wapamatc anihi ke pe iciticohokoritci Teperitcikeritci kitci akwacimiweritci.

²⁷ Aci neta kitci aiamihe mikiwamik ki icaw anahwe Simion, Miro Manitowa e keskinowirikotc. Ekota nta kaie ka ki iciwirikotc Cecoc onikihikwa kitci nta itotiskeritci wir otci ka ici nataweritcikaterik cota aiamihe irakonikewinik.

²⁸ Ki otapinew anihi awaca Simion. Ki naskamew Kice Manitowa, e aitetc:

²⁹ “Teperitcikein, anotc ki pe isparin anihe ka ki ici nespi tapwein. Aci ki ka ki pakitinin, nin ka atoskectatan, kitci nipoan, aci e pekateritaman.

³⁰ Aci meka nin tipirawe ni ki wapamaw anahwe ka ki pe iciticohwotc kitci akwacimimitc,

³¹ anahwe ka ki nisawihatc, kaskina awik kitci wapamatc.

³² Enko kaie anahwe mia wactenamakan ke irapatisitc kitci wactenamowatc iriniwa aka moci ka kiskerimiskik, wewerita kitci kiskerimiskik. Enko kaie anahwe ke totak kitci icperimakaniwiritci kitirinima, Israël iriniwa.”

Simion ka nikan tipatcimotc

³³ Cecoc otawiwa kaie okawiwa ki micta mamiskasitamok e itatcimakaniwiritci onitcaniciwawa.

³⁴ Simion ki aiamitowatew Cecoca kirika onikihikoriw. Minawatc itew Mariwa, Cecoc okawiwa: “Ki orapamakaniwiw anahwe awacic kitci itotisketc mitcet Israël iriniwa kitci pakiciniritci, matci kaie kotakihi kitci otci pasikopitakaniwiritci. Ki orapamakaniwiw kaie kitci wapatahiwetc e ici nataweritamiritci Kice Manitowa. Mitcet tca iriniwa kata marerimiko,

³⁵ kitci tca wactenak e iteritamiritci, ka ki ici kataritci otehiwarik. Kir tca Mari, ki ka micta nekateriten. Mia micta mokomaniw e capo pataskahwikotc kitcitcakoc, ekoni ke apitc nekateritaman.”

Anne ka nikan tipatcimotc

³⁶ Tapan kaie neta Jérusalem otenak iskwew ka nikan tipatcimotc. Anne icinikasopan, Penouel otanisa. Asser icinikasoripana otaniskotape omocoma. Aci micta kice iskwewipan anahwe Anne. Nicowaso pipona irikik ki nipowipan ka ocki iskwewispan, minawatc ki niporiw onapema.

³⁷ Mocak tca ki cikawiw. Aci nicwaso mitana acitc new tato piponesipan. Nama wiskat orowipan kitci aiamihe mikiwamik. Kape kickwa kaie kape tipiskwa atoskectawepan Kice Manitowa. Roskosopan kirika aiamihapan.

³⁸ Aci mia takociniw anahwe Anne neta e taci arimweritci anihi Simiona. Ekoni e ici micta naskomatc Kice Manitowa. Aiarimomew kaie anihi awaca, e arimotamawatc kaskina iriniwa ka peharispana Kice Manitowa kitci akwacimaritci Jérusalem iriniwa.

Ka kiwerikotc Cecoc onikihikwa Nazareth

³⁹ Ka ickwa kaskina totakik ka ici nataweritcikaterik Teperitciketc otirakonikewinik, Sosep, Mari acitc onitcaniciwawa ki kiwewok nete otenamiwak Nazareth, Galilée askik itekera.

⁴⁰ Anahwe awacic matcekipan kirika iti mackawisipan. Micta omiro omitoneritcikanipan kaie mirerimikopan Kice Manitowa.

Ka isparitc Cecoc kitci aiamihe mikiwamik ka mitato acitc nicw tato piponesitc

⁴¹ Tato pipona Jérusalem otenak icawakopan Mari kirika Sosep, kitci nta makocetcik nete e ici makocaniwonik, Pâque e icinikaterik.

⁴² Minawatc ka mitato acitc nicwo tato piponesispan Cecoc, aci ki iciwiriko onikihikwa nete e ici makocaniwonik, kotc e itemakanik cota aiamihe irakonikewiniw kitci totamiritci kaskina e asitatisiritci cota ockinikiwa.

⁴³ Ka ickwa makocaniwonik, iti kiwewok Sosep kirika Mari. Aric kiapatc nete Jérusalem otenak tacikerikopan Cecoca. Nama kiskeritamwakopan aka e witcewikotcik okosiwawa.

⁴⁴ Iteritamwakopan: “Witcewetake anihi kotakihi ka ki pe witcewitokw kikosino.” Peikwo kickwa irikik aci ki pimotewakopan. Minawatc ki iteritamok kitci nantowapamatcik anihi okosiwawa, e nta kokwetcimatcik otcirowemakaniwawa kaie okwimesiwawa.

⁴⁵ Nama aric miskawewok. Ekoni e ici kiwetcik Jérusalem otenak kiapatc e nantowapamatcik.

⁴⁶ E ickwa nicto kickokarik, aci miskawewok kitci aiamihe mikiwamik, e apitc tetawitc e ici apiritci iriniwa ka kiskinohamakeritci cota aiamihe irakonikewiniw, e natotawatc kirika e kokwetcimatc.

⁴⁷ Kaskina iriniwok ka petawatcik Cecoca micta mamiskasitawewok e apitc kakitaweritamiritci, kaie e apitc kackitaritci e naskamoritci.

⁴⁸ Sosep kirika Mari ka wapamatcik, ki micta mamiskaterimewok kaie wirawaw. Aci itew Mari: “Ninitcanic, kekwan wetci ki totawiak? Kotawi kirika nin, kaskina wiec ki ki nantowapamitinan. Ki ki micta sekihinan.”

⁴⁹ Aci itew Cecoc: “Kekwan wetci ki nantowapamiekw? Nama ia ni ki kiskeritenawaw ota e actek kitci tacikeian, Notawi omikiwamik?”

⁵⁰ Nama aric ki otci nisitotamok aniheriw ka itikotcik.

⁵¹ Minawatc ki witcewew onikihikwa Cecoc, Nazareth otenak e icatcik. Mocak ki sapitawew onikihikwa. Mocak kaie Mari ki kanaweritam otehik kaskina aniheriw ka ki isparinik.

⁵² Ki matcekiw Cecoc kirika eckam kirawe ki iti omiro omitoneritcikaniw. Kice Manitowa ki micta mirerimiko, kirika iriniwa.