Luc Omasinahikan 19 - Kice Manito Ocki Omirwatcimowin

Zachée

¹ Ka ickwa pitaketc neta Jéricho otenak Cecoc, ki capotoweckam aniheriw otenariw.

² Tapan iriniw neta Jérichok, Zachée e icinikasospan. Enko anahwe ka tiperimaspan kaskina ka natockaketcik. Micikitapan anahwe Zachée.

³ Wi nanto kiskerimakopan Cecoca e wi wapamakopanen. Aric nama tipi kinwaskosikopan. Nama tca kackitakopan kitci wapamatc, osam kaie e mitcetinaniwonik.

⁴ Ki nikanipataw. Ki iskwatowiw mictikok kitci ki wapamatc Cecoca ke pimoteritci neta.

⁵ Ka takocik neta Cecoc mia Zachéewa ka ici akosiritci, icpapiw e itatc: “Wepita e nitatowiin, Zachée. Actew kimikiwamik kitci tacikeian anotc.”

⁶ Tecikotc nitatowiw Zachée e mireritak e pitakahatc Cecoca omikiwamik.

⁷ Kaskina ka ki wapamatcik ki marerimewok Cecoca, e itatcik: “Anahwe iriniw ki nta tacikew pactati iriniwa omikiwamirik.”

⁸ Ki pasiko Zachée, e tca itatc Teperitcikeritci: “Natotaci, Teperitcikein. Apita nitirapatcitcikana ni ka mirawok kitimakisi iriniwok. Peikon kaie aniki ka ki kimotimakik, ocoriamiwaw ka ki wecimakik, newaw awocamec ni ka tapictowawok.”

⁹ Minawatc itew Cecoc: “Anotc akwacimiwewin ki pitakeparin ota kimikiwamik, osam kaie kir e omocomiin Abraham.

¹⁰ Wetci meka ki pe icatc anahwe Ka ki pe iriniwihitisotc, kitci ni natcipahatc iriniwa ka ki oniciniritci kitci akwacimatc!”

Atisokanicic: E acotamawakaniwitcik iriniwok osawo coriariw

¹¹ Minawatc kiapatc Cecoc atisokowepan anahweriw iriniwa ka ki pe natawapamikotc kitci natotakotc. Pecotcik wirata Jérusalem otenak tacikepan. Iteritamwakopan aniki iriniwok tecikotc kitci pe takociparinik Kice Manitowa Okimawiniw.

¹² Ekoni tca e ici itatisoketc Cecoc, e aitetc: “Takopan iriniw e micta kicteritakositc, warawik askik e ki icatc, kitci ki mirakaniwitc kitci okimawitc neta tipirawe otaskik. Minawatc tca kata pe kiwepan.

¹³ Epwamoci matcatc, ki wicamew mitato nta e taciritci otarotakana. Papeikw ki acotamawew peikw osawo coriariw e micta misakitakonik, e itatc: ‘Kit acotamatin ohwe coria kitci otamirotain kitci wikokwe rikitain mekwata ke itanahoan.’”

¹⁴ “Aric aniki iriniwok ka tacikewaspan neta otaskik cikerimewakopan anihi ke ki okimamiwaspan. Ki tca iciticohwewok atita iriniwa kitci natawapamaritci kice okimawa, kitci itaritci: ‘Nama ni natawerimanan anahwe iriniw kitci okimawitc nitaskinak.’”

¹⁵ “Peikon neta ki mirakaniwiw kitci okimawitc. Minawatc ki pe kiwew neta tipirawe otaskik. Aci pe wicamew otarotakana e wi nta kiskeritak ocoriam, irikik ka ki ici kackitaritci.”

¹⁶ “Anahwe nictam pe natawapamiko e itikotc: ‘Okimaw, mitato osawo coria kirawe awocamec ni ki kackitan, anihe osawo coria ka ki miriin.’”

¹⁷ “Aci itew okimaw: ‘Mirwatikwatc e miro arotakaniin! Ki ki pe miro irapatcitan anahwe memantcic ka ki acotamatan. Ki ka tca miritin mitato otenawa kitci tiperitaman.’”

¹⁸ “Aci pe natawapamiko tec anihi otarotakana, e itikotc: ‘Okimaw, niaran osawo coria kirawe awocamec ni ki kackitan, anihe osawo coria ka ki miriin.’”

¹⁹ “Itew okimaw: ‘Kir tca, niaran otenawa ki miritin kitci tiperitaman.’”

²⁰ “Kiapatc pe natawapamiko kotakeriw otarotakana, e itikotc: ‘Okimaw, enko ohwe osawo coria ka ki miriin. Ni ki katan mocwek.

²¹ Ki koctititai, osam e kiskerimitan e wi tipototaman, e otapinaman kekocic aka e ki otci kicikaman, kaie e mawotcitain kitikan aka ka ki otci matce kitikein.’”

²² “Aci itew okimaw: ‘Wesa, ki matci arotakaniwin! Ki ka tipaskonitin anihe ka ki itein. Ki kiskeritetai orina e wi tipototaman, e otapinaman kekocic aka e ki otci kicikaman, kaie e mawotcitaian kitikan aka ka ki otci matce kitikeian.

²³ Kekwan tca aka wetci ki otci nahikaman nicoriam coriawikamikok? Anotc tca ni ta ki orowititatai nicoriam kaie irikik ke ki rikihamakipan!’”

²⁴ “Minawatc itew anihi kotakihi iriniwa ka icikapowiritci: ‘Maninamowakw ohwe matci arotakan aniheriw osawo coriariw. Mirakw tca anahwe ka takonik mitato osawo coriariw.’”

²⁵ “Itewok aniki iriniwok: ‘Okimaw, aci wir takoniw mitato osawo coriariw!’”

²⁶ “Itikowok tca: ‘Ki witamatinawaw, anahwe aci ka ici tatak kekociciriw, awocamec kata pe mirakaniwiw. Anahwe aric kotak aka ka takonik kekociciriw, wawatc aniheriw memantcic ka iteritak e ici tatak, kata maninamowakaniwiw, misawatc aka e sapinakonik.

²⁷ Minawatc aniki ka cikerimitcik aka ka ki otci mireritakik kitci okimawiwak, pe iciwirakok ota. Ki ka tca nipahawawok ota, nin kitci ki wapataman!’”

Cecoc e icatc Jérusalem otenak

²⁸ Ka ickwa ici aiarimwetc, aci Cecoc kirika owitcewakana ki iti nikanickawok e mitcetinaniwonik, Jérusalem otenak e wi icawakopanen.

²⁹ Aci pecowapatam anihi otenaciciriw Bethfagé kirika Béthanie, pecotcik e ici takonik matinaciciriw Mont des Oliviers ka icinikaterik. Aci iciticahwew nicw owitcewakana, e itatc:

³⁰ “Icakw nete otenacik, nte tipickotc ka ici takok. Takociniekwe nete, ki ka wapamawaw atikocic e takopisotc, aka moci awik e ki otci okitapitc ospiskonirik. Apikonakw. Ote tca pecowakw.

³¹ Kecpin tca kokwetcimikoiekwe: ‘Kekwan wetci apikonekw anahwe atikocic?’, ki ka itawaw: ‘Teperitciketc wi apatcihew.’”

³² Aci matcawok aniki ka ki iciticohwakaniwitcik. Mia icinakoniw ka ki iteritci Cecoca.

³³ Mekwata e apikonatcik atikocica, kokwetcimikowok anihi ka otatikomiciciritci: “Kekwan wetci apikonekw anahwe atikocic?”

³⁴ Ki itewok: “Teperitciketc wi apatcihew.”

³⁵ Ki iciwitowewok Cecoca anihi atikocica. Ki actawewok ospiskonirik okapotowaniwawa anihi atikocica, kirika ki witcihewok Cecoca kitci okitapiritci nta.

³⁶ Ekoni e ici matcatc, mitcet iriniwok e tacowekititowakopan okapotowaniwaw motcik, ite ke ici tatokoskeritci anihi atikocica.

³⁷ Aci e iti peconakonik Jérusalem otenariw, ite ka pinisiwecimonik matinacik Mont des Oliviers ka icinikaterik, kaskina ka pe witcewawaspan Cecoca e mitcetinaniwonik mirwatcimewok Kice Manitowa e kiciwetcik e apitc mireritakik, e ki wapatakik kaskina e ici mata kackitakaniwonik.

³⁸ Aitewok: “Caweritakosiw anahwe okimaw ka pe iciticohikotc Teperitcikeritci! Pekateritamowin takon wakwek kaie icperitakosiw Kice Manito!”

³⁹ Atita Pharisien iriniwok kaie kirawaw e taciketcik e mitcetinaniwonik, ki itewok Cecoca: “Kiskinohamake iriniw, witamawakw aniki kiwitcewakanak aka awocamec kitci kitotcik!”

⁴⁰ Itew Cecoc: “Ki witamatinawaw, kecpin aka kitotawe, meckotc asiniik kata tepwewok!”

E matotc Cecoc, Jérusalem otci

⁴¹ Ka iti pecowapatak Jérusalem otenariw Cecoc, aci ka wapatak, ki mato,

⁴² e itetc: “Kirawaw ka tacikeiekw nete Jérusalem otenak, kata miroparinopan kirawaw otci kecpin kaie kirawaw ki nisitotamekw anotc ke ki totamekw kitci miskamekw pekateritamowin! Aric anotc ki ki katcictew, nama ki ka ki wapatenawaw.

⁴³ Kecko nikotin kekocic kata otcitciparin kirawaw otci. Waska kotenamiwak iriniwok ka wi cakotcihitakok kata ocitawok kekociciriw ke ki otci waskactatakok kitci ki natoparikatakok. Ki ka kipockakowawok. Ki ka nanakatcihikowawok aitowi aka kitci ki orowiekw.

⁴⁴ Kaskina e taciekw ki ka nipahikowawok, kirika tekaci kata pikotawok kotenamiwariw. Ke apitc pikotakaniwonik, nama wawatc kata teticin asini okitc kotak asinik, osam aka e ki otci nisitowinamekw apitc mia ka ki pe nta akwacimitakw Kice Manito.”

Cecoc e orowiticohowetc kitci aiamihe mikiwamik

⁴⁵ Aci kitci aiamihe mikiwamik iti pitakew Cecoc. Ekoni e ici orowiticohwatc anihi ka ataweritci neta,

⁴⁶ e itatc: “Itew Kice Manito Omasinahikanik, e itasinaterik: ‘Kata aiamihaniwon nimikiwamik. Ekoni ke irapatak.’ Ésaïe 56.7 Aric kirawaw ki ki ocitanawaw mia kimotiwikiwam kitci irapatak.”

⁴⁷ Tato kickwa kiskinohamakepan Cecoc neta kitci aiamihe mikiwamik. Aniki cota makatewokorewok ka tiperitakik, acitc ka kiskinohamaketcik cota aiamihe irakonikewiniw, kaie kotakihik cota iriniwok ka nikaniwitcik natowi totamwakopan kitci ki nipahakaniwiritci Cecoca.

⁴⁸ Nama aric ki otci kiskeritamok mia ke ki totakik aka kitci kiciwahatcik anahweriw iriniwa ka natotawaritci Cecoca. Kaketin meka natotawewakopan iriniwok e kakeskweritci.