Luc Omasinahikan 18 - Kice Manito Ocki Omirwatcimowin

Atisokanicic: Matci tipaskonike iriniw kirika iskwew

¹ Minawatc Cecoc ki atisokawew ohweriw atisokaniciciriw, e wi kiskinohamawatc mocak kitci pakoserimoritci, aka wiskat kitci atweritcikeritci.

² Ki itew: “Tapan neta otenak peikw tipaskonike iriniw aka ka kicterimaspan Kice Manitowa, aka kaie awiriwa e pamerimaspan.

³ Tarikopan kaie neta otenak cikawa, mocak e pe natawapamikospan, e nataweritamirispana icikowisk kitci totawakaniwiritci, e itikospan ko: ‘Witcihici. Pe mirici icikowisk totakewin, osam e ki wecimitc awik.’

⁴ Kinowec nama ki otci wi witcihew anahwe tipaskonike iriniw. Kek iteritam: ‘Tapwe nama ni kicterimaw Kice Manito, nama kaie iriniwok pamerimawok.

⁵ Aric anahwe cikaw ni tactikataw. Ni ka tca miraw icikowisk totakewiniw kitci kanewitc. Kecpin meka aka itotiskeiane, aspinikotc ni ka pe natawapamikw nac tekaci kitci aieskohitc.’”

⁶ Aci kiapatc itew Teperitciketc: “Natotamokw aniheriw ka ki itetc anahwe tipaskonike iriniw aka icikowisk ka itatisispan.

⁷ Nama ia kirawe wir Kice Manito kata wi mirew icikowisk totakewiniw anahweriw otirinima, ka pakoserimikotc e kicikarik kaie e tipiskarik? Kinowec ia nama kata pamotawew?

⁸ Ki witamatinawaw, tecikotc kata witcihew, icikowisk totakewiniw kitci miratc. Aric minawatc pe takocike anahwe Ka ki pe iriniwihitisotc, kata miskawew ia awiriw ka asperimototakotc ota askik?”

Atisokanicic: Pharisien iriniw kirika ka natockaketc

⁹ Ohweriw kotakeriw atisokaniciciriw Cecoc ki atisokew anihi iriniwa otci ka iterimitisoritci kirawe wirawaw e kicteritakosiritci patok owitc iriniwawa:

¹⁰ “Nicw iriniwok ki amatciwewok, kitci aiamihe mikiwamik e icatcik kitci nta aiamihatcik. Peikw anahwe, Pharisien iriniwikopan e micta aiamihatisikopanen. Minawatc anahwe kotak iriniw natockasokopan kice okimawa otci.

¹¹ Aci anahwe Pharisien ki nanipowiw nakewar e aiamihatc e kakimotc, e itetc: ‘Ah Kice Manito, mikwetc kit ititin aka e pactati iriniwian mitowi kaskina kotakihik iriniwok ka kimotitcik, ka matci totakik kirika ka pacikwatisitcik. Mikwetc kaie aka e itatisian mitowi anaha ka natockaketc.

¹² Mocak nicwo kickwa tato manactakana ni roskoson kirika mocak nit aiamihe pakitinikan, e pokwenaman irikik e kanewian tato pipona, e mitatoniwok e miritan.’”

¹³ “Mekwata anaha ka natockaketc warawik nanipowikopan. Nama wawatc icpimik itapikopan. Otatamohotisokopan oskaskikanik kitci wapatahiwetc e apitc kackeritak. Aci itew: ‘Ah, Kice Manito, kitimakerimici, e pactati iriniwian!’”

¹⁴ Aci minawatc itew Cecoc: “Ki witamatinawaw, ka kiwetc anahwe ka natockaketc, aci icikowisk ki iterimiko Kice Manitowa. Aric anahwe Pharisien iriniw nama icikowisk ki otci iterimiko. Kaskina meka awik ka icperimitisotc, kata tipaterimakaniwiw. Anahwe tca ka tipaterimitisotc, kata icperimakaniwiw.”

Cecoc e aiamitowatatc awacica

¹⁵ Iriniwok pe iciwirepanak awacica kitci takinikoritci Cecoca, kitci tca aiamitowatikoritci. Ka wapamatcik Cecoc owitcewakana, ki otcinehwewok anahweriw iriniwa.

¹⁶ Aric Cecoc wicamew awaca kitci pe natawapamikotc, e itatc owitcewakana: “Pakitinakok awacak kitci pe natawapamitcik! Akawir otcinehwakok! Iriniwok meka ka asperimototawitcik mia ohki awacak, enko aniki ka ici tatakik Kice Manitowa Okimawiniw.

¹⁷ Tapwe ohwe ka witamatakok: awik aka ka ici naheritak kitci pe otitikotc Kice Manitowa Okimawiniw, mitowi awacic e pe otitikotc, nama wiskat kata ki pitakew neta.”

Iriniw ka micikitatc

¹⁸ Peikw cota okimacic ki kokwetcimew Cecoca: “Miro kiskinohamake iriniw, tan ke ki ici totaman kitci ki mirikoian kakike pimatisiwin?”

¹⁹ Cecoc itew: “Kekwan wetci icinikaciin ‘miro kiskinohamake iriniw’? Nama taw awik mocak e miro totak, tepirak Kice Manito.

²⁰ Ki kiskeriten e itemakak cota aiamihe irakonikewin: ‘Akawir pacikwatisi. Akawir manoho. Akawir kimoti. Akawir kiraski, awik kitci ki otci atamerimakaniwitc. Kicterimi kotawi kaie kikawi.’” Exode 20.12-16; Deutéronome 5.16-20

²¹ Aci itew anahwe cota okimacic: “Esko ka pe awaciwian ni ki sapiten kaskina anihi irakonikewina.”

²² Ka ickwa petak aniheriw e itikotc Cecoc, aci itew: “Peikw kiapatc kekocic ki noteparin. Matca nta atawe kaskina e ici tataman. Ki ka tca mamirawok ka kitimakisitcik aniheriw coriariw irikik ke kackitain. Meckotc tca wakwek ki ka micikitan. Petcimote pe nosanehici.”

²³ Aric anahwe iriniw ka petak aniheriw e itakaniwitc ki micta kackeritam. Mictahi meka micikitapan.

²⁴ Wapamiko Cecoca e kackeritak. Aci itiko: “Micta arimaniw ka micikitatcik kitci ki pitaketcik Kice Manitowa Okimawinik.

²⁵ Arimaniw micta atikw kitci ki pitaketc e iriko pokoneckarik caponikaniw. Kirawe aric kiapatc arimaniw iriniw e micikitatc kitci ki pitaketc Kice Manitowa Okimawinik.”

²⁶ Aniki ka natotawawaspan Cecoca itewok: “Awin tca ke ki akwacimakaniwitc?”

²⁷ Itew Cecoc: “Kaskina kekociciriw aka ka kackitatc iriniw, Kice Manito wir kackitaw.”

²⁸ Aci Pien itew: “Natotaci! Ni ki pakiteritenan kaskina ka ici tatamak, e nosanehitak.”

²⁹ Itikowok Cecoca: “Tapwe ohwe ka witamatakok: kecpin awik nakatake omikiwam kekotc ma okoma nakatate, octesa, owitcicana, onikihikwa kekotc ma onitcanica, Kice Manito Okimawiniw otci,

³⁰ kirawe mictahi awocamec kata pe otitiko anotc mekwata e pimatisitc, kirika nikanik kakike pimatisiwiniw kata pe otitiko.”

Aci nictowaw e witak Cecoc ke iciwepasitc

³¹ Cecoc ki matcewirew anihi owitcewakana e mitato acitc niciritci, e itatc: “Natotamokw! Jérusalem otenak ki ka icanano. Ekota nta kaskina ke pe iciwepanik, kaskina weckatc ka ki ici masinahakik ka ki nikan tipatcimotcik ke iciwepasiritci anihi Ka ki pe iriniwihitisoritci:

³² Kata pakiterimakaniwiw kitci makonikotc iriniwa aka ka cota iriniwiritci. Kata papirotako. Kata marerimiko kirika kata iskwatiko.

³³ Kata pasakactehiko kirika kata nipahiko. Minawatc ickwa nicto kickokarike kata apitcipaw.”

³⁴ Aric tekaci nama ki otci nisitotamiriwa Cecoc owitcewakana aniheriw ka ki itetc. Ki katamakaniwiriwa aka kitci nisitotamiritci. Nama kaie ki otci kiskeritamiriwa kekwariw ka wi arimotak Cecoc.

Kikehakaniwiw iriniw aka ka wapitc

³⁵ Cecoc pecowapatamokopan Jéricho otenak. Peikw iriniw aka ka wapitc tcikiskanak taci apipan e natotamaketc.

³⁶ Ka petak e mitcetinaniwonik e pe pimotaniwonik, kokwetcikemo tan e isparinik.

³⁷ Itakaniwiw: “Cecoc Nazareth ka otcitc pimotew ota.”

³⁸ Ekoni e ici micta tepwetc: “Cecoc, Okimaw Tapit Okosa, kitimakerimici!”

³⁹ Aniki ka nikanickatcik kitotewok e itatcik aka awocamec kitci kitoritci. Aric kirawe kaketin tepwew e itetc: “Okimaw Tapit Okosa, kitimakerimici!”

⁴⁰ Nokikapowiw Cecoc, e itetc kitci pe iciwirakaniwiritci kitci pe natawapamikotc. Ekoni e ici natcipahakaniwiritci. E petcimoteritci, aci itew Cecoc:

⁴¹ “Kekwan ka ici nataweritaman kitci totaman kir otci?” Itiko: “Teperitcikein, itotiske kitci koski wapian.”

⁴² Aci itew Cecoc: “Tapwe kit asperimototawin, ekoni wetci ki kikein.”

⁴³ Tecikotc ki iti wapiw. Ki iti witcewew Cecoca, e mirwatcimatc Kice Manitowa. Kaskina ka ki wapatakik aniheriw ka ki pe iciwepanik ki mirwatcimewok Kice Manitowa.