Luc Omasinahikan 17 - Kice Manito Ocki Omirwatcimowin

Pactatowin kaie poneritcikewin e arimotcikatek

¹ Itew Cecoc owitcewakana: “Mocak kata takoniw iriniwok ke paskewirikotcik ota askik kitci pactatitcik. Aric anahwe ke paskewiratc owitc iriniwa kitci pactatiritci, kata nakickam kitci arimiparitc.

² Kirawe kata miroparinipan wir otci, anahwe ka paskewiriwetc, kitci takopitakaniwiritci okwak asiniwa mia e irikwapiskisiritci, e pakopepinakaniwitc kitcikamik, patok kitci cikimatc peikw nta e taciritci ka apiciciritci kitci pactatiritci.

³ Aiekwamisikw tca!” “Kecpin kiwitcican e matci totak, wewerita arimotamo. Kecpin tca e mitatak aniheriw ka ki totak, ponerimi.

⁴ Kecpin nicowasowaw peikwo kickwa e matci totask, tatwaw tca e pe natawapamisk e itisk: ‘Ni cikeriten e ki matci totatan,’ ki ka ponerimaw.”

Tapwetamowin

⁵ Teperitciketc itiko otarotakana: “Witcihicinan awocamec kitci tapwetamak.”

⁶ Aci itew Teperitciketc: “Kecpin ni irikokwake kitapwetamowiniwaw mitowi kitikanicic e irikokwak rimotat ka icinikatek ka micta apicacik, ki ka ki itawaw anaha mictikw: ‘Atcicka nta, nipik tca nete nanipowi!’ ki ta sapitakowaw.”

Ke aitotisketc anahwe ka atoskectaketc

⁷ “Kecpin peikw neta e taciekw e tarikwena ka atoskectakotc ka ocitaritci kitikan askiriw, kekotc ma ka kanawerimaritci maritcenica, kecpin tca anahwe ka tiperitak e wapamatc otirinima e pe kiweritci mikiwamik, nte e ototeritci ka ki ici otamiroritci, kata itew ia: ‘Pe nta mitciso’?

⁸ Nama! Kirawe kata itew: ‘Tcipakocici. Minawatc meckotaspiso kitci pe nta atoskectawiin mekwata e mitcisoan kirika e minikweian. Minawatc tca kirctam ki ka mitcison kaie ki ka minikwan.’

⁹ Nama arimatc kata naskamew anihi ka atoskectakotc, cakotc meka enkweriw otamirowin.

¹⁰ Ekoni peikon e icinakok kaie kirawaw e atoskectawekw Kice Manito. Ickwa itotiskeiekwe kaskina ka ki ititakw, ki ta itwanawaw: ‘Ninan ka atoskectaketcik tepirak. Ni ki mireritenan kitci itotiskeiak ka ki ici nataweritak Kice Manito!’”

Mitato iriniwok ka ki kikehakaniwitcik

¹¹ Mekwata e icakopanen Jérusalem otenak Cecoc, ki pimotew nictowitc Samarie askik kirika Galilée askik.

¹² Apitc ka pitaketc peikw otenacik, aci mitato iriniwa ki pe nta nakickako. Aniki iriniwok kaskina omikiwapinewakopan. Warawik ki otcikapowiwok,

¹³ e tepwatatcik Cecoca: “Cecoc, Okimaw, kitimakerimicinan!”

¹⁴ Ki wapamew Cecoc, kirika ki itew: “Natawapamakok makatewokorewok kitci ki wapamitakok aci e icinakosiekw.” Mekwata e natawapamatcik makatewokorewa, mi kikewok e pimotetcik.

¹⁵ Peikw nta e tacitcik ka wapatak e kiketc, pe kiwe natawapamew Cecoca nte e tacikerispana, e micta mirwatcimatc Kice Manitowa e kiciwetc.

¹⁶ Pe nipiskoctawew Cecoca, e onicikweparitc askik, e naskomatc. Samarie askik otcikopan anahwe iriniw.

¹⁷ Aci itew Cecoc aniheriw ka witcewikospan: “Kaskina e mitatcitcik ki kikehakaniwiwok, taina? Tante aniki kotakihik cakitato iriniwok?

¹⁸ Nama ia awik ki otci iteritam kitci pe nta naskomatc Kice Manitowa, tepirak anahwe mantew ka ki pe natawapamitc?”

¹⁹ Minawatc itew anihi iriniwa: “Pasiko! Ekoni ici matca! Kit akwacimikowin osam e asperimototawiin.”

Kice Manito Okimawin e pe takociparinik

²⁰ Pharisien iriniwok ki kokwetcimewok Cecoca tan apitc ke takociparinik Kice Manitowa Okimawiniw. Ki itikowok: “Nama kicwatcitakaniwoniw Okimawin kitci ki wapatamekw aci e takociparinik.

²¹ Nama kaie awik kata ki itew: ‘Kanawapata, enko anihe!’ kekotc: ‘Ekota nta e takok!’ Aric kitehiwak, ekota nta e ici takonik Okimawin Kice Manito.”

²² Minawatc ki itew owitcewakana Cecoc: “Aci otcitciparin kitci pasoweritamekw kitci wapamekw anahwe Ka ki pe iriniwihitisotc, misawatc tepirak peikwo kickwa irikik kitci wapamekw. Nama aric ki ka wapamawaw.

²³ Ki ka itikowinawaw: ‘Kanawapamakw nete!’ kekotc: ‘Ekota ota e taciketc!’ Akawir matcepatakw kitci natawapamekw.

²⁴ Mia mitowi onimiskiw keskat e waskorehak kaskina icpimik ka peconakok kaie ka rawonakok, ekoni peikon ke icinakonik minawatc pe takocike anahwe Ka ki pe iriniwihitisotc.

²⁵ Pitama aric kata micta nekatcitaw, kirika anotc mitcet iriniwa kata wepakoniko.”

²⁶ “Anihe weckatc ka ki pe iciwepanik mekwata Noé ka pe pimatisikopanen, ekoni peikon ke iciwepanik pe takocike anahwe Ka ki pe iriniwihitisotc.

²⁷ Ani apitc mitcisowakopan iriniwok kirika minikwewakopan. Nipowiwakopan kirika nipowihawasowakopan, nac aniheriw e kicikarik Noé ka positcimetc. Minawatc ki riskipoteriw askiriw e ki micta kimiwonik. Kaskina aniki kotakihik iriniwok ki kwapawewok.”

²⁸ “Ekoni peikon ka ki iciwepanik mekwata Loth ka pe pimatisikopanen. Ani apitc iriniwok mitcisowakopan kaie minikwewakopan. Otapinasowakopan kaie atawewakopan. Matce kitikewakopan acitc manikewakopan.

²⁹ Aric aniheriw e kicikarik ka matcatc anahwe Loth, ka nakatak otenariw Sodome ka icinikaterik, wakwek ki otci pakitiniw ickoteriw kirika ickwaskiteskoriw. Kaskina neta ka tacikewakopanen ki nipahikowok.

³⁰ Ekoni peikon ke isparinik pe takocike anahwe Ka ki pe iriniwihitisotc.”

³¹ “Takociparinike aniheriw ke kicikarik, anahwe okitc mikiwamik ke pa taciketc, pitakamik aric e acterik otirapatcitcikan, nama acteriw kitci nitatowitc kitci otapinak otirapatcitcikan. Peikon anahwe ke pa otamirotc kitikan askik, nama acteriw kitci kiwetc omikiwamik.

³² Mikawerimimakw Loth okoma ka ki iciwepasiritci.

³³ Anahwe ke natowi totak kitci kanaweritak opimatisiwin ota askik, kata onitaw. Aric anahwe ke onitatc opimatisiwin, kata kanaweritam.

³⁴ Ki witamatinawaw: ani apitc tipiskarike nicw iriniwok tapickotc kata nipawok nipakanatikok. Peikw nta e tacitcik kata matcewirakaniwiw, kotak tca kata nakatakaniwiw.

³⁵ Nicw iskwewok tapickotc mekwata kata taci ocihewok napanewa. Peikw nta e tacitcik kata matcewirakaniwiw, kotak tca kata nakatakaniwiw. [

³⁶ Nicw iriniwok kata tacikewok kitikan askik. Peikw nta e tacitcik kata matcewirakaniwiw, kotak tca kata nakatakaniwiw.]”

³⁷ Aci kokwetcimiko owitcewakana Cecoc: “Teperitcikein, tante anihe ke iciwepak?” Itew Cecoc: “Mia mitowi e ici takonik owiaw awesis e ki nipotc, ekota neta ke waskaretcik mikisiwok.”