Luc Omasinahikan 10 - Kice Manito Ocki Omirwatcimowin

Cecoc e iciticohwatc nicowaso mitana acitc nicw otirinima

¹ Minawatc Teperitciketc ki orapamew nicowaso mitana acitc nicw kotakihi iriniwa. Nanicw ki iciticahwew kitci nikanickakotc, kaskina otenaskak acitc kaskina kotak wiec kitci icaritci, nete wir tipirawe ke icatc nanake.

² Epwamoci matcaritci ki itew Cecoc: “Mia kitikan askik icinakosiwok iriniwok, mitcen otamirowin ke ki totcikatek neta, aci e otcitciparik kitci mawotcitakaniwok kitikan, nama aric mitcetiwok iriniwok ke otamirotcik. Pakoserimakw anahwe ka mitatc e mawotcitakaniwonik kitikaniw, kitci pe iciticohwatc kotakihi iriniwa kitci pe nta witcihiweritci.

³ Ekoci matcakw! Aci kit iciticohotinawaw kitci atoskectawiekw, e koctatikok nete ke iciticohotakok, mia maritcenicak e pimotetcik nte e ici taritci mahikana ki ka iteritakosinawaw.

⁴ Akawir matcewitakw coriawoc, akawir kaie mackimotai. Nama kaie maskisin ki ka matcewitanawaw. Mekwata ke pimoteiekw, aka nokickakw kitci arimikowekw awik.

⁵ Pitakeiekwe mikiwamik, pitama ki ka itwanawaw: ‘Kitci pekateritamekw, kaskina e taciekw!’

⁶ Kecpin tate iriniw neta tapwe ka wi pimatisitc pekateritamowiniw otci, kata mireritam ani e itakaniwitc acitc kata mirakaniwiw aniheriw pekateritamowiniw. Kecpin aric aka tate, nama kata mireritcikatew anihe ka ki itein, nama tca kata mirakaniwiw aniheriw pekateritamowiniw.

⁷ Nte e ici mirerimikoiekw e pitakeiekw, ekota nta tacikekw. Ekoci mitcisokw kirika minikwekw ke ici mirikoiekw neta. Acteriw meka kitci ici mirakaniwitc awik tan e ici kanewitc e otamirotc. Akawir atcickakw, kotak mikiwam kitci nta tacikeiekw.

⁸ Tatwaw takociniekwe otenak, neta ke ici mirerimikoiekw, mitcikw ke ici acamikoiekw.

⁹ Kikehakok ka aiakositcik neta otenak kirika witamawakok iriniwok neta ka taciketcik: ‘Aci peconakoniw ota Kice Manito Okimawin kirawaw otci!’

¹⁰ Kecpin aric takociniekwe taci aka e ici mirerimikoiekw, ekoci icakw meskanak, kaskina kitci witamawekok:

¹¹ ‘Mirikosi ka akokek nimaskisinanik ni powititanan kitci ki kiskeritamekw arotc e ki totamekw. Aric ki ta kiskeritenawaw, aci ota peconakoniw Kice Manito Okimawin kirawaw otci!’

¹² Ki witamatinawaw: takociparike anihe ke kicikak kitci tipaskonikaniwok, aniki neta otenak ka taciketcik aka ke mireritakik kitci tacikeiekw kirawe wirawaw kata anwerimakaniwiwok patok aniki weckatc ka matci iriniwiwaspan ka tacikewaspan neta Sodome otenak.”

Otenak ka taciketcik aka ka wi tapwetakik

¹³ “Ekwa kirawaw neta Chorazin otenak ka tacikeiekw! Nikotin ki ka nakickenawaw kitci arimipariekw! Kaie kirawaw Bethsaïda otenak ka tacikeiekw, nikotin ki ka arimiparinawaw! Kecpin nitowatc nete Tyr otenak kirika Sidon otenak ki taci mata kackitaian patok ota kirawaw ka ici tacikeiekw, aci weckatc wirawaw aniki iriniwok kata ki piskamopanak wikasiriw ka kawekinik, acitc iskwaskiteskok kata ki apipanak, kitci wapatahiwetcik e kweskatisitcik.

¹⁴ Ekoni tca, takociparike anihe ke kicikak kitci tipaskonikaniwok, kirawe kata ariman kirawaw ke ici anwerimikoiekw patok aniki Tyr otenak kirika Sidon otenak ka taciketcik ke ici anwerimakaniwitcik.

¹⁵ Minawatc kirawaw Capernaüm otenak ka tacikeiekw, kit iteritenawaw ia kitci icpinikoiekw wakwek? Ki ka nitinikowinawaw, neta ka ici taciketcik ka nipotcik kitci icaiekw!”

¹⁶ Itew kiapatc owitcewakana Cecoc: “Anahwe ka natotatakw, kaie nin ni natotakw. Kaie anahwe ka wepakonitakw, kaie nin ni wepakonikw. Anahwe tca ka wepakonitc, wepakonew kaie anihi ka ki pe iciticohwitc.”

Ka pe kiwetcik aniki iriniwok

¹⁷ Minawatc pe kiwewok aniki iriniwok e nicowaso mitana acitc niciritci ka ki iciticohwakaniwitcik. Ki micta mireritamok, e itetcik: “Teperitcikein, wawatc matci manitowok ni ki sapitakonanak ka itakitcik kitci orowiteheckowatcik iriniwa, kiticinikasowin e ki apatcitaiak.”

¹⁸ Itew Cecoc: “Ni ki wapamaw Matci Manito ka pe pakicik, wakwek e ki pe otciparitc, mia onimiskiw osko e waskorehak e icinakosispan.

¹⁹ Natotacikw! Ki ki miritinawaw kitci takoskatekok kinepikok kirika mantcocak ka koctatikositcik, acitc kaskina kitci patakockamwekw omackawisiwin anahwe ka wi cakotcihitokw. Nama kekocic ki ka ki matci totakonawaw.

²⁰ Aka aric mireritamokw e sapitatakok matci manitowok. Ohwe kirawe mireritamokw: e ki masinahikateki kiticinikasowiniwaw wakwek.”

E mireritak Cecoc

²¹ Mia apitc ka itetc aniheriw Cecoc, aci ki mockineckako Miro Manitowa kitci micta mireritak, e itetc: “Notawi, kir ka tiperitaman wakwek kaie askik, mikwetc kit ititin e ki wapatahatcik kitapwewiniw ka apicicitcik, kaie tca e ki katowatcik iriniwok ka iterimitisotcik ‘ni omiro omitoneritcikaninan’ kirika ‘ni micta miro kiskeritenan kitci kekocic e ki kiskinohamasoak.’ Tapwe, Notawi, ekoni mia ka ki ici nataweritaman kitci icinakok.”

²² Minawatc itew Cecoc: “Notawi ni ki mirikw kaskina kekociciriw kitci tiperitaman. Tepirak peikociw ka kiskerimatc Kice Manitowa Okosiriw, enkweriw Otawiwa. Peikociriw kaie anihi ka kiskerimikotc Kotawino, enkweriw Okosa, acitc kaskina anihi ka wi witciharitci kitci kiskerimaritci.”

²³ Minawatc itactimikapowictawew owitcewakana Cecoc, wirancikewaw e aimihatc, e itatc: “Ki caweritakosinawaw kirawaw e wapatamekw ohwe anotc ka ici wapatamekw.

²⁴ Ki witamatinawaw: mitcet iriniwok ka pe nikan tipatcimowaspan kaie okimawok wi wapatamwakopan aniheriw anotc ka ici wapatamekw, nama aric ki otci wapatamok. Wi petamwakopan kaie aniheriw aci anotc ka ici petamekw, nama aric ki otci petamok.”

Atisokanicic: Samarie iriniw ka witcihatc iriniwa ka ki macikowakaniwiritci

²⁵ Peikw iriniw ka kiskinohamaketc cota aiamihe irakonikewiniw ki pasiko. Wikokwe paciwirekopan Cecoca arotc kitci iteritci, ke ki otci itactahorakaniwiritci. Ekoni tca e itatc: “Kiskinohamake iriniw, tan ke ki totaman kitci ki pe otitikoian kakike pimatisiwin?”

²⁶ Itiko Cecoca: “Tan e itasinatek kitirakonikewinino? Tan e ici nisitotaman e tapwataman?”

²⁷ Itew anahwe iriniw: “‘Ki ka sakihaw Teperitciketc Kikice Manitom kaskina e irikokotehein, kaie tekaci kitcitcakocik, acitc irikik e ici mackawisiin kaie kimitoneritcikanik.’ Acitc tca ‘Ki ka sakihaw kiwitc iriniw mia mitowi e asitci sakihitisoin.’” Deutéronome 6.5; Lévitique 19.18

²⁸ “Mia kit itan,” itew Cecoc. “Tota anihe ka ki itein. Ki ka tca kakike pimatisin.”

²⁹ Aric anahwe irakonike iriniw wi wapatahiwekopan e tapwetc. Itew tca Cecoca: “Awin tca niwitc iriniw?”

³⁰ Cecoc atisokawew: “Peikwaw e kicikarik iriniw pimotepan meskanak, Jérusalem otenak e ki ototespan, nete e icakopanen Jéricho otenak. Kek kimoti iriniwa ka macihiweritci ki kwackotitako e macikakotc. Ki manipitamako owikasim e kimotimakaniwitc. Ka ickwa macikowatcik, ekoni ka ici matcatcik e nakatatcik, kekatc e niporitci.

³¹ Aci peikw cota makatewokorew mia ki pe pimotew neta meskanak. Ki wapamew anihi iriniwa ka ki macikowakaniwiritci. Kweskiteskanak ki ici pimotew, aka e wi pecowapamatc.

³² Peikon kaie wir kotak cota iriniw, Lévite itekera ka ici aiamihatc anahwe towi cota iriniw, ki pimotew nta. Ka wapamatc anihi iriniwa ka ki macikowakaniwiritci, peikon kaie wir ki pimotew kweskiteskanak.

³³ Aric iriniw, Samarie askik ka otcitc ki pimotew kaie wir meskanak. Ki wapamew anihi iriniwa ka ki macikowakaniwiritci, kaie ki micta kitimakerimew.

³⁴ Ki natawapamew. Minicaporiw ki apatcitaw kitci ki kisisipatowatc omikiriw, kirika pimiteriw e totak e natokohatc ka ki aitohwakaniwiritci, minawatc ki akopitew. Minawatc ki okitetirew wir tipirawe otatikomik e iciwiratc nipewikamikok kirika e nanakatcihatc.

³⁵ Minawatc kecepawonik ki mirew coriariw ka tiperitamiritci nipewokamokoriw, e itatc: ‘Nanakatcihi anahwe iriniw. Kecpin awocamec itikitakoke, nin ki ka kicikatin minawatc pimoteiane ota.’”

³⁶ Minawatc Cecoc kokwetcimew anihi irakonike iriniwa: “Awin mia nta e nictitcik, kit iteriten, owitc iriniwa, anaha ka ki macikakotc kimoti iriniwa?”

³⁷ Itew anahwe irakonike iriniw: “Anahwe mia ka ki kitimakerimatc.” Aci itew Cecoc: “Eko ma tca ni tota kaie kir!”

Cecoc e kiwotimatc Marthe wa kirika Mariwa

³⁸ Mekwata e iti pimotetcik Cecoc kirika owitcewakana, aci iti takociniwok otenacik. Taw neta peikw iskwew, Marthe e icinikasotc. Ki pitakahew Cecoca omikiwamik.

³⁹ Taripan ocima, Mari e icinikasoritci. Anahwe Mari ki ici apiw e icisitepiritci Cecoca, ekoni ka ici natotawatc e ici kiskinohamakeritci.

⁴⁰ Micta otamikekopan Marthe e mitatc kitci mitcisonaniwonik. Aci natawapamew Cecoca, e tca itatc: “Teperitcikein, nama ia ni wiec kit iteriten aka e pamerimitc nicim e otamirowak? Witamo kitci pe witcihitc.”

⁴¹ Aci itew Teperitciketc: “Marthe, Marthe, micta mitcet kekocic kit arimeritamihikon, mitcen kaie ka arimihikoin.

⁴² Aric tepirak peikw kekocic kictapatan. Wir Mari ki orapatam aniheriw kirawe ka mirwacinik, aka ke maninamowakaniwitc.”