Luc Omasinahikan 1 - Kice Manito Ocki Omirwatcimowin

Luc e arimikowatc iriniwa ka masinahamowatc

¹ Nikwimes Théophile, Mitcet iriniwok ki kokwetcitawok kitci masinahakik ka ki pe iciwepanik ota nitaskinak.

² Ki itasinahamok kotc ka ki ici tipatcimoctawiamitcik kotakihik iriniwok wirawaw tipirawe ka ki wapatakik esko ka kitciparinik, kirika ka ki mirakaniwitcik kitci pa tipatatakik Kice Manito otitewiniw.

³ Ekoni tca wetci kaie nin nanto kiskeritamapan kaskina anihe ka ki pe iciwepak esko ka kitciparik. Minawatc ni ki iteriten, nokimam Théophile, kaskina wewerita kitci masinahaman kir otci ota ohwe masinahikanik.

⁴ Wetci itotiskeian, kitci ki kiskeritaman kaskina e tapwemakak anihe kiskinohamakewin ka ki pe otitikoin.

Aceriw e tipatcimotc kitci nitawikiritci Capatisa

⁵ Tapan cota makatewokorew, Sakari e icinikasospan. Ani apitc Hérode mekwata okimawikopan neta Judée askik ka icinikaterik. Anahwe Sakari, ekota neta kaie wir e ici apispan, aniki makatewokorewok Abia ka icinikatakaniwitcik. Taripan okoma, Risapet icinikasoripana. Anahwe iskwew otaniskotape omocoma ki kitci makatewokorewiripan, Aaron e icinikasorikopanen.

⁶ Icikowisk iterimikowakopan Kice Manitowa tapickotc e nicitcik anahwe Sakari kirika Risapet, kaie wewerita nosanetawakopan kaskina otirakonikewiniw Teperitcikeritci.

⁷ Nama aric tarikopan onitcaniciwawa. Nama ki onitcanicikopan anahwe Risapet. Aci kaie iti kiciwatisiwakopan tapickotc e nicitcik.

⁸ Peikwaw e kicikarik kitci aiamihe mikiwamik nta otamiropan anahwe Sakari Kice Manitowa otci. Wirctamiwaw meka aniki Abia makatewokorewok Sakari ka ici taciketc ke otamirotcik neta mekwata.

⁹ Ani apitc mameckotc ko icawakopan makatewokorewok e nta otamirotcik neta aricapik ka ici mawotci kicteritakonik, kitci aiamihe mikiwamik e takonik kaie kitci nta iskahak sakatakaniw neta. Aci wirctam anahwe Sakari ki orapamakaniwiw kitci nta pitaketc neta.

¹⁰ Mekwata e ickwasikaterik aniheriw sakatakaniw, iriniwok ka aiamihatisitcik neta orowitimik taci aiamihapanak e mitcetitcik.

¹¹ Kek aceriwa ki pe natawapamiko anahwe Sakari, Teperitciketc otacerima. Neta e ici iskahikaterik aniheriw sakatakaniw, onihiwinik icikapowiriw.

¹² Ka wapamatc anahwe Sakari, ki arimeritam kaie ki sekisiw.

¹³ Aric itiko anihi aceriwa: “Aka sekisi, Sakari. Ki petam meka Kice Manito ka ki ici pakoserimatc. Risapet, kiwokom, kata onitcaniciw. Kata okosiw. Jean ki ka icinikataw.

¹⁴ Ki ka micta mireriten kaie mitcet iriniwok kata mireritamok nitawikiritena.

¹⁵ Mictahi meka kata miro atoskectawew Teperitcikeritci. Nama wiskat kata minikwew minicaporiw, nama kaie kotakeriw ka minikwaniwonik ka mackawakaminik. Miro Manitowa kata mockineckako, wawatc epwamoci nitawikite.

¹⁶ Kata witcihew mitcet Israël iriniwa kitci kiwe nosanehwatcik Teperitcikeritci, Okice Manitomiwawa.

¹⁷ Kata pe tipatcimo Teperitcikeritci otci, e sokitehetc kaie e micta mackawisitc, mia weckatc e itatisirispana ka nikan tipatcimoritci, Élie ka ki icinikasoritci, kitci ki witcihatc iriniwa kitci koski miroparihitoritci kirika onitcaniciwawa, kaie kitci ki witcihatc iriniwa aka ka sapitowaritci Kice Manitowa kitci omiro omitoneritcikaniritci, mia aniki aci icikowisk ka iteritakositcik. Ekoni ke totak kikosis kitci ki ickwa aiketcik iriniwok pe takociniritena Teperitcikeritci.”

¹⁸ Aci Sakari itew anihi aceriwa: “Tan nta ke otci kiskeritaman tapwe kitci pe iciwepak? Aci meka ni kice iriniwin, kaie wir nokom kice iskwewiw!”

¹⁹ Itiko anihi aceriwa: “Kaprien ni nin. Kice Manito ni natcikapowictawaw e atoskectawak. Ni ki pe iciticohokw kitci pe nta aimihitan, kitci witamatan ohwe miro tipatcimowin.

²⁰ Nama aric ki ki otci tapweten anihe ka ki ititan tapwe ke pe iciwepak, kotc iteritakoke kitci pe icinakok. Nama tca aci ki ka kackitan kitci arimwein. Tekaci nama ki ka kiton, nac apitc otcitciparike anihe ka ki iteian kitci isparik.”

²¹ Aiapitc aniki iriniwok orowitimik ka taci aiamihawaspan pehewakopan Sakariwa. Kockopariwakopan e apitc kinowec itanahoritci nta pitakamik ka ici micta kicteritakonik kitci aiamihe mikiwamik.

²² Aric ka pe orowitc, nama ki arimwew. Aniki iriniwok kiskeritamok kekociciriw e ki icinamiritci nte pitakamik kitci aiamihe mikiwamik. Ki mitci aicitcitcepariho aka e arimwetc.

²³ Minawatc ka ickwa kictatc otamirowin neta kitci aiamihe mikiwamik Sakari, ki kiwew omikiwamik.

²⁴ Kek nikotin aci kanawerimawasoriw okoma Risapet. Nama ki otci orowiw omikiwamiwak anahwe Risapet niarano pisimwa irikik.

²⁵ Ki itew: “Nin otci aniheriw ka ki totak Teperitciketc. Ni ki micta cawerimikw e maninamowitc anihe wetci waneritamapan, aka e ki otci onitcanician.”

Mari e pe natawapamikotc aceriwa

²⁶ Ani apitc aci nikotwaso pisimwa kanawerimawasokopan anahwe Risapet. Kek Kice Manito ki iciticahwew aceriwa, Kaprien ka icinikasoritci, neta otenak Nazareth ka icinikaterik kitci icaritci, Galilée askik itekera,

²⁷ peikw ocki iskwewa kitci natawapamaritci. Anahwe ocki iskwew, Mari icinikasopan. Aci ki orakonikaniwonikopan kitci nipowitc iriniwa, Sosep ka icinikasoritci. Anahwe tca Sosep okice omocomikopan Tapita, weckatc ka ki kice okimawirispana.

²⁸ Anahwe aceriw natawapamew Mariwa, e itatc: “Mirerita! Kice Manito ki ki cawerimikw. Ki witci tacikemikw.”

²⁹ Ki micta arimeritam aniheriw ka itikotc Mari. Ki iteritam: “Tan wa itetc?”

³⁰ Itiko tca aceriwa: “Aka sekisi, Mari. Ki cawerimikw Kice Manito.

³¹ Aci kekatc ki ka kanawerimawason. Ki ka okosin. Cecoc ki ka icinikataw.

³² Kata kitci iriniwiw kirika kata icinikatakaniwiw ‘Kice Manito ka mawotci icperitakositc Okosa.’ Kata miriko Teperitcikeritci Kice Manitowa kitci okimawitc, mia otaniskotape omocoma Tapit ka ki okimawiritci.

³³ Kirika mocak kata tiperimew Israël iriniwa. Nama wiskat kata ickwapariniw okimawin.”

³⁴ Aci Mari itew anihi aceriwa: “Tan tca ke ki otci isparik, aka moci e kiskerimak iriniw?”

³⁵ Itiko anihi aceriwa: “Miro Manito ki ka otitikw kirika Kice Manito e mawotci icperitakositc omackawisiwin ki ka akwacteckakowan, mia e masinactecik. Ekoni ke otci iteritakositc ‘kitcitwawisiw’ anahwe kinitcanic ke nitawikitc. Ekoni kaie ke otci icinikatakaniwitc ‘Kice Manito Okosa.’

³⁶ Kitcirowemakan Risapet kaie wir kanawerimawaso, misawatc anotc aci e kice iskwewitc. Kata okosiw. Anahwe ka ki itakaniwitc ‘nama wiskat kata wapamawaso,’ aci nikotwaso pisimwa kanawerimawaso.

³⁷ Nama meka takoniw kekociciriw aka e kackitatc Kice Manito!”

³⁸ Aci Mari itew anihi aceriwa: “Teperitciketc nit atoskectawaw. Ni nataweriten kaskina kitci icinakok mia anihe ka ki pe itein.” Ekoni ka nakatikotc aceriwa.

Mari e nta kiwotamatc Risapeta

³⁹ Minawatc ki nisawiw Mari e wepitawa icatc nete otenacik ka ici pamatinarik Judée askik itekera.

⁴⁰ Tekocik ki pitakew Sakariwa omikiwamirik. Ki arimikawew Risapeta.

⁴¹ Kotc Risapet ka petawatc Mariwa, ki kiskerimew anihi onitcanica e micta atciparihoritci. Kek Risapet ki mockineckako Miro Manitowa.

⁴² Ki itew e micta kiciwetc: “Kirawe ki caweritakosin patok kaskina kotakihik iskwewok! Caweritakosiw kaie anahwe kinitcanic ke tatc!

⁴³ Awin tca ni nin wetci pe natawapamiin nimikiwamik, kir Ka Tiperimitc okawiwa.

⁴⁴ Mia apitc meka ka petatan ka arimikowiin, ki micta atcipariho ninitcanic e apitc mireritak.

⁴⁵ Ki caweritakosin e ki tapwetowotc Teperitciketc kitci totak aniheriw ka ki ici tipatcimoctask kitci itotisketc.”

Mari onakamowin

⁴⁶ Aci itew Mari: “Ni micta mirwatcimaw Teperitciketc nitcitcakocik,

⁴⁷ kaie ni micta mireriten nitehik, wir otci Kice Manito, anahwe Ka Ki Akwacimitc.

⁴⁸ Ki iteritam meka kitci mamitonerimitc, otarotakana e irapatisiwak aka ka tipaterimitisoan. Aci anotc nac nespitc ni ka arimomikok iriniwok kitci itetcik ‘caweritakosiw.’

⁴⁹ Mictahi meka kekociciriw ki totam nin otci Kice Manito, wir Ka Mawotci Mackawisitc. Kitcitwawisiw e Kice Manitowitc!

⁵⁰ Mocak miro totawew kaskina ka kicterimikotc.

⁵¹ Ki wapatahiwew omackawisiwin, e micta kice mackawisitc! Ki nakaticahwew iriniwa e sasekaritci.

⁵² Kaie ki maninamawew okimawiniwariw anahweriw ka okimawiritci. Minawatc anahweriw iriniwa ka tipaterimitisoritci ki mirew kitci nikanapiritci.

⁵³ Mitcet miro kekociciriw ki mirew ka pakateritci. Ka micikitaritci tca ki matceticahwew, aka kekociciriw e miratc.

⁵⁴ Ki pe nta witcihew Israël iriniwa, otarotakana. Nama ki otci onikew kitci wapatahatc omirwasiwin

⁵⁵ Abrahama kirika otaniskotape osimiriw otci, nespitc kitci miro totawatc, kotc ka ki ici nespi tapwespan kitaniskotape kimocominapana otci.”

⁵⁶ Wiec nicto pisimwa ki witci tacikemew Risapeta anahwe Mari, minawatc ki kiwew omikiwamik.

Ka nitawikitc Capatis

⁵⁷ Aci otcitcipariniw Risapet kitci wapamawasotc. Ki okosiw.

⁵⁸ Otcirowemakana acitc kotakihik iriniwok pecotcik ka taciketcik omikiwamik anahwe Risapet ki petakewok aniheriw e ki ici wapatahikotc Teperitcikeritci e apitc kitimakerimikotc. Ki micta mireritamok aniki kaie wirawaw.

⁵⁹ Nicwaso kickwa ka ickwa nitawikitc anahwe awacic, kaskina e tacitcik ki pe icawok, aci kitci kicawatocwakaniwitc. Aniheriw wi mirewakopan kitci icinikasoritci Sakari, mia otatama ka icinikasoritci.

⁶⁰ Aric Risapet ki itew: “Nama! Jean ni kata icinikaso.”

⁶¹ Ki itewok: “Kekwan tca, aka tca e ki otci tatc kitcirowemakaniwaw ni e icinikasotc?”

⁶² Aci kokwetcimewok anihi Sakariwa e mitci aicitcitceparihotcik kitci kiskerimatcik wa icinikataritci anihi onitcanica.

⁶³ Napakatikwatikociciriw ka masinahikewakaniwonik ki nataweritam Sakari. Ki masinaham: “Jean icinikaso.” Kaskina ki micta kockopariwok.

⁶⁴ Ekoni mia keskat Sakari minawatc ki kackitaw e arimwetc. Tecikotc ki mirwatcimew Kice Manitowa.

⁶⁵ Aci kaskina anahweriw iriniwa pecotcik ka tacikeritci omikiwamik ki micta mamiskateritamiriwa, kaie kaskina nte e aititanarik Judée askik ki pa atisokaniwoniw aniheriw ka ki isparinik.

⁶⁶ Kaskina ka ki petaketcik ki mamitoneritamok kaie ki kokwetcimitowok: “Tan tca ke irapatisitc anahwe awacic?” Tapwe meka Teperitcikeritci omackawisiwiniw ki witci tacikemiko opimatisiwinik anahwe awacic.

Sakari nikan tipatcimo e nakamotc

⁶⁷ Sakari, otawiwa anahwe awacic, ki mockineckako Miro Manitowa. Ki iti tipatcimo Kice Manitowa otci, e aitetc:

⁶⁸ “Mirwatcimatan Teperitciketc, Israël iriniwok Okice Manitomiwawa, e ki pe natawapamatc otirinima kitci akwacimatc.

⁶⁹ Ki ka mirikono anihi Ke Akwacimimitokw, ke micta mackawisiritci, peikw nta e taciritci Okimaw Tapitipan otaniskotape osima.

⁷⁰ Enkweriw aci micta weckatc ka ki ici tipatcimatc Kice Manito. Aniki tca ka ki pe nikan tipatcimotcik ka kitcitwaweritakositcik ki witamawew:

⁷¹ Ki nespi tapwepan kitci wikotcihitokw, kitci cakotcihatc kaskina ka wi wani totamowitcik kaie kaskina ka cikerimitakok.

⁷² Ki wapatahiwew omirwasiwin kitaniskotape kimocominowa otci. Nama kaie ki otci onikew aniheriw orictwatowin e kitcitwaweritakonik.

⁷³ Ki nespi tapwepan meka Kice Manito kitaniskotape kimocominowa otci Abraham,

⁷⁴ kitci otci wikotcihitokw omackawisiwiniwaw anahweriw iriniwa ka wi cikerimimitokw, kitci kackitaikw e atoskectawokw aka kitci koctatciikw,

⁷⁵ kaie kitci ki kitcitwaweritakosiikw acitc icikowisk kitci iteritakosiikw, tato kickwa irikik ke pimatisiikw.

⁷⁶ Minawatc kir, ninitcanic, ki ka icinikatikowin ‘Ka nikan tipatcimotc wir otci, Kice Manitowa ka mawotci icperitakosiritci.’ Ki ka meka nikanickawaw Teperitciketc kitci meskanakowotc,

⁷⁷ kitci kiskeritamihimatc otirinima kitci pe nta akwacimatc, e kasihamawatc opactatowiniwariw.

⁷⁸ Mictahi meka mirotehew Kikice Manitomino kirika ki micta miro totakono: Ki ka pe nta wactenamakono, icpimik e pe otci wactek, mia e pe sakasiketc pisimw kitci icinakok,

⁷⁹ kitci ki wactenamowatc iriniwa ka ici kiski tipiskarik ka pimatisiritci, kaie ka pwororitci, kitci ki iciwiritokw miro meskanak, pekateritamowinik ka iticimok.”

⁸⁰ Miro matcekikopan anahwe awacic kaie iti micta mackawerimokopan otcitcakocik. Ka ickwa kiceapewitc, nte pa tacikekopan askik ka ici cipewatawokarik, nac aniheriw e kicikarik ka kitciparitc e pa tipatcimotc Israël iriniwa otci.