Jude 1 - Kice Manito Ocki Omirwatcimowin

E arimikaketc Jude

¹ Nin Jude, ka masinahaman ohwe masinahikan, Cak owitcicana. Cecoc Krist nit atoskectawaw. Ki masinahamatinawaw kirawaw ka ki wicamitakw Kice Manito kitci nosanehwekw, ka sakihitakw Kotawino kaie ka kanawerimitakw Cecoc Krist.

² Ni pakoserimawok eckam kitci acotamatakok kasihamakewiniw, pekateritamowiniw acitc sakihiwewiniw.

Arotc ka kiskinohamaketcik

³ Nimiro nikwimesak, aci weckatc ni nataweritetai kitci masinahamatakok, ohwe e wi arimotamapan: Kice Manito e ki akwacimitokw kaskina tapickotc e taciikw. Minawatc aric ni ki iteriten ohwe otcitakotc kitci arimotamatakok ota nimasinahikanik: kitci wikosimitakok kitci kispiwatamekw anihe tapwetamowin Kice Manito ka ki miratc otirinima. Peikwaw ki pakitinam, kaskina awiriw otci, nespitc kitci apatanik.

⁴ Aci meka atita iriniwok ka wi matci totakik ki kitcipariwok kitci pe icatcik neta e mawotcihitoekw, aka aric moci e wapatahitakok tapwe e ici tapweritakik. Wi meckotcitawok ka ici kiskinohamakaniwonik Kikice Manitomino omirotehewiniw otci, tepirak aka wiec kitci iterimakaniwitcik ani e ici matci pimatisitcik. Wepakonewok Cecoc Krist, anihi tepirak ka okimamiikw, wircike Ka Tiperimitokw. Aci weckatc ki tipatcimonaniwon neta Kice Manito Omasinahikanik kitci anwerimakaniwitcik.

⁵ Misawatc aci weckatc e ki miro kiskeritamekw anihe, ni nataweriten kitci mikawasimitakok: Teperitciketc e ki akwacimatc Israël iriniwa e ki orowitahatc neta Égypte askik, minawatc aric e ki iterimatc kitci niporitci anahweriw aka ka ki otci asperimototakotc.

⁶ Mamitonerimakok aniki aceriwok weckatc ka ki mirakaniwitcik mackawisiwiniw, aka aric e ki otci tipi iteritakik aniheriw. Ki tca nakatamok otitacikewiniwaw ka ki mirikotcik Kice Manitowa kitci taciketcik. Aci kanawerimikowok nte wiec e ici kiski tipiskarik, nespitc e takopitakaniwitcik, piwapiskwapiriw e ki totcikaterik, nac kitci otcitciparinik mamitcitc e kitci kicikarik kitci tipaskonakaniwitcik.

⁷ Mikaweritamokw kaie anihi weckatc otenawa Sodome kirika Gomorrhe ka icinikateki, kaie anihi otenawa papecotcik ka aitakoki. Aniki iriniwok ka tacikewaspan neta otenak matci totamwakopan kaie wirawaw, mia anahweriw matci aceriwa ka ki totamirispana, pacikwatisiwinik e ki ici matcatcik, kaie kotakeriw ka micta maratanik e ki aitotakik. Aci mekwata kicakonakaniwiwok, kakike ickotek e ki arakaniwitcik. Ekoni tca ka otci kiskeritakok aka nte kitci itatisinaniwok.

⁸ Ekoni peikon e itotisketcik aniki iriniwok anotc ka pe icatcik neta e mawotcihitoekw. Takoniw e icinakik, enkweriw ka nosanetatcik e pactatitcik, e micta matci totatisotcik. Nama ici naheritamok kitci tiperimikotcik Kice Manitowa. Marerimewok aceriwa ka icperitakosiritci, wakwek ka tacikeritci.

⁹ Wawatc anahwe kitci aceriw, Micer ka icinikasotc, nama wiskat ki otci totam. Mekwata ka kikamitotcik anahwe Micer kirika Matci Manitowa, ohweriw otci, awin nta e tacitcik ke kanaweritakipan Moïsa owiawiriw, anahwe kitci aceriw Micer nama ki otci itactahorew Matci Manitowa kitci marerimatc. Tepirak ki itew: “Kitci kicakonisk Teperitciketc!”

¹⁰ Aric aniki iriniwok mareritamok kaskina kekociciriw aka ka ici nisitotakik. Minawatc oniwirikowok aniheriw omatci totamowiniwaw, pokona e aitotakik, e itatisitcik mia mitowi awesisa e kiskeritamiritci ke totamiritci aka e mamitoneritamiritci.

¹¹ Nikotin kata nakickamok kitci arimiparitcik! Ki nosanetawok aniheriw matci meskanariw weckatc iriniwa ka ki nosanetaritci, Caïn ka icinikasorispana. Wani totamok tepirak coriariw otci, mitowi anihi kotakihi weckatc iriniwa, Balaam ka ki icinikasoritci. Ki oniciniwok, osam e ki matciparihatcik iriniwa aka kitci nosanehwaritci Kice Manitowa, mitowi anihi kotakeriw weckatc iriniwa ka ki totamiritci, Coré ka icinikasorispana.

¹² Wesa iteritakosiwok e pe icatcik neta ka ici witci mitcisomitoekw kirawaw ka nosanehwekw Cecoc. Tarasak totamok kitci ometciwonik neta. Tekaci nama waneritamok e pe nta makocetcik, tepirak wirawaw tipirawe e kanawapamitisotcik. Mia mitowi osko e pe nokok e makatewak aka tca e kimiwok, tepirak e mactak, ekoni e iteritakositcik. Mitowi kaie wapiminatikw, aka e nitawikiritci owapiminima, misawatc aci mia e asitaiarik kitci ki kicikitc, e tca kowacitc, tekaci e nipotc. Ekoni e iteritakositcik aniki iriniwok.

¹³ Peikon kaie iteritakosiwok, mia e icinakonik kitcikamik e micta mitcahanik. E tca pe iti nokonik pictewonik e ometciwonik apitc e micta mitcahanik, ekoni peikon e ici wapatihiwetcik ko omatci totamowiniwaw aniki iriniwok e micta waneritakonik. Mitowi kaie atcikocak ka pa miparitcik iteritakosiwok. Kanaweritamakowok Kice Manitowa tacikewiniw nespitc ke ici taciketcik, neta e ici mawotci kiski tipiskarik.

¹⁴ Aci weckatc peikw awik ki pe nikan tipatcimopan, Hénok e icinikasokopanen. —Nicowaswaw irikik otaniskotape omocomikopan Adama anahwe Hénok.— Arimomepan anahweriw iriniwa e nikan tipatcimospan, e ki itetc: “Natotamokw! Teperitciketc kata pe icaw kitci pe witcewikotc otacerima e kitcitwawisiritci, kitci micta kice mitcetiritci.

¹⁵ Kata pe icaw kitci pe nta tipaskonatc kaskina iriniwa. Kata anwerimew kaskina nta e taciritci ka pactati iriniwiritci, kaskina ohweriw otci, ka ki ici matci totakik e ki anwetowatcik Kice Manitowa, kaie ka ki ici pactamotcik e marerimatcik tekaci aka e kicterimatcik.”

¹⁶ Nama wiskat tipi iteritamok aniki iriniwok, mocak kaie kakitisiwok. Nosanetawok matci pimatisiwiniw, wirawaw tipirawe e ici nataweritakik. Mictahi kaie mamirwatcimitisowok. Mirwatcimewok owitc iriniwawa, tepirak kitci koski mirakaniwitcik ka ici nataweritakik.

E witamawakaniwitcik ke itotisketcik kaie kitci ekwaminitisotcik

¹⁷ Kirawaw ni miro nikwimesak, mikaweritamwokw aniheriw ka ki pe ici tipatcimoctatakok otarotakana anahwe Ka Tiperimitokw Cecoc Krist.

¹⁸ Ki ki pe itikowawok: “Ponaskiwoke kata tawok iriniwok ke papirotatakok kirika ke ici pimatisitcik wirawaw tipirawe e ici nataweritakik e maratanik.”

¹⁹ Enko aniki ka totakik wetci papikanitonaniwonik. Tiperimikowok aniheriw ka ici nataweritakik kitci matci totakik, pokona e aitotisketcik. Namaieriw Miro Manitowa ka tiperimikotcik.

²⁰ Aric kirawaw, nimiro nikwimesak, mantokasokw kitci witcihitoekw eckam kitci mackawisiekw e asperimototawekw Kice Manito. Aiamihakw, Miro Manito omackawisiwin e apatcitawekw.

²¹ Ekota nta ici pimotekw Kice Manito osakihiwewinik, mekwata e pehekw anahwe Ka Tiperimitokw Cecoc Krist kitci miritakw kakike pimatisiwiniw, e apitc mirotehetc.

²² Kitimakerimakok aniki aka ka soki tapweritakik.

²³ Witcihakok kotakihik kitci ocimohekok kakike ickotek. Kitimakerimakok kaie kotakihik, mekwata kaie memantcic e aiekwaminitisoekw, wawatc e cikeritamwekw owikasimiwaw ka ki ometcitatcik mekwata e pactatitcik.

Kitci mirwatcimakaniwitc Kice Manito

²⁴ Mirwatcimatan Kice Manito, anahwe ka kackitatc kitci kanawerimitakw aka kitci pakiciniekw acitc kitci miritakw tekaci aka kitci takok ka maratak kipimatisiwiniwak, kaie kitci mireritamekw natcikapowictawekwe e micta icperitakositc,

²⁵ wircike e peikocitc e Kice Manitowitc, anahwe Ka Ki Akwacimitokw, e ki pe iciticohwatc anihi Ka Tiperimitokw Cecoc Krist. Icperitakosiw kaie kicteritakosiw, e micta mackawisitc acitc kaskina e tiperitak. Ekoni mocak ka icinakositc, ekoni anotc e icinakositc, kaie nespitc ke icinakositc! Kekora ki iki. Nin Jude