Jean 6 - Kice Manito Ocki Omirwatcimowin

5 000 iriniwa e acamatc Cecoc

¹ Minawatc Cecoc ki matcaw, akam sakihikanik Galilée e icatc. Anihe sakihikan matci kaie Tibériade icinikatcikatekopan.

² Mitcet iriniwok pe nosanehwewakopan Cecoca, e ki wapatakik ka ici mata kackitaritci, e ki kikeharitci akosikana.

³ Ki amatciwew Cecoc e matinacinik. Ka ickwa takocikik neta acitc owitcewakana, ki apiwok neta motcik.

⁴ Aci kekatc kata otcitcipariniw kitci aiamihe makocetcik cota iriniwok, Pâque e icinikaterik aniheriw aiamihe makocaniw.

⁵ Waska ki itapiw Cecoc. Ki wapamew iriniwa e mitcetiritci e pe natawapamikotc. Aci kokwetcimew Piripa: “Tante ke ki otapinokw pakwecikan, kaskina kitci acamawikok aniki iriniwok?”

⁶ —Tepirak e wi nta kiskerimakopanen anihi Piripa wetci ki itetc. Aci meka kiskeritamokopan ke totak.—

⁷ Aci itew Pirip: “Kata misakitakonopan! Irikik e kanewitc awik nicwaso tato pisimwa e otamirotc kata pe isparinopan, kaskina e tacitcik kitci acamawikok, tato nta e tacitcik memantcic karikec pakwecikana kitci ki acamawikok!”

⁸ Kotak anahwe Cecoc owitcewakana, Atre e icinikasotc, Simo Pien anihi ocima, itew Cecoca:

⁹ “Taw ota peikw ockinikicic e niaraniritci opakwecikanima acitc e niciritci onamesima. Aric tan ke ki totawimikw kitci ki kaskina otci acamawikok aniki iriniwok?”

¹⁰ Itew Cecoc: “Ekoni ici weripihakok kaskina aniki iriniwok.” Micta mirockociwikacin neta. Kaskina ki weripiwok motcik iriniwok. Wiec niaranwaw kice mitato mitana taciwakopan aniki iriniwok.

¹¹ Ekoni e ici otapinatc anahweriw pakwecikana Cecoc. Mikwetc ki itew Kice Manitowa. Ekotca e ici matinawetc, e miratc neta ka apiritci, irikik e ici nataweritamiritci. Peikon ka totawatc anahweriw namesa.

¹² Kaskina ka ickwa mitcisotcik, e miro tipiparitcik, aci itew Cecoc owitcewakana: “Mawotcitakw irikik ka ickoparik aka kitci onactakaniwok!”

¹³ Kaskina ki mawockinasowok. Kiapatc neta mitato acitc nicw pakitenakaniw ki mockinetawok, pakwecikana irikik ka ickotcikeritci neta ka ki mitcisonaniwonik.

¹⁴ Aniki iriniwok kaskina, ka ickwa wapatakik e apitc miro kackitaritci Cecoca, ki itewok: “Enko na tapwe Ka Nikan Tipatcimotc ka pehakaniwispan kitci pe iciticohwakaniwitc ota askik!”

¹⁵ Cecoc kiskeritamokopan otcitakotc kitci pe natcipahikotc anihi iriniwa kitci tca wikokwe okimakatikotc. Ki matcaw tca minawatc, kiapatc neta e matcinacinik e icatc wircike.

Cecoc e pimotetc okitc sakihikanik

¹⁶ Aci e iti otakocinik, Cecoc owitcewakana ki nasipewok rarewak sakihikanik.

¹⁷ Ki positcimewok e tca kiwe acohakik aniheriw sakihikaniw, neta Capernaüm otenak itekera e icitcimetcik. Aci iti tipiskaripan. Nama moci pe atiminehokowakopan Cecoca.

¹⁸ Micta rotinikopan acitc e iti mitcahanik.

¹⁹ Wiec niarano kekotc nikotwaso tipahikan irikik ki mickawok. Kek ki wapamewok Cecoca e pe natcikapowiritci tcimanik, okitc nipik e pimoteritci. Ki micta sekisiwok.

²⁰ Aric itikowok Cecoca: “Nin ni! Akawir sekisikw!”

²¹ Minawatc ki natawerimewok kitci pe positcimeritci. Ekoni tecikotc e iti takocitcimetcik.

Iriniwok e nantowapamatcik Cecoca

²² Minawatc kecikarik, aniki iriniwok ote itekekam ka tacikewaspan nte ka ki otci matcehoritci Cecoc owitcewakana, aci nanakatcitawok tepirak e peikotakarikipan neta tcimaniw, kaie aka e ki otci positcimeritci neta Cecoca, tepirak owitcewakana e ki positcimeritci, wircikewaw e ki matcehoritci.

²³ Minawatc kotakihik iriniwok Tibériade e ki otci pe matcehotcik, ki pe macakawok neta pecotcik ka ki ici acakespan anihi pakwecikana Teperitciketc, ka ickwa naskomatc Kice Manitowa.

²⁴ Aniki mitcet iriniwok ka wapatakik aka aci e tacikeritci neta Cecoca kirika owitcewakana, ki positcimewok. Ki acohamok, Capernaüm e icitcimetcik e nta nantowapamatcik Cecoca.

Cecoc iteritakosiw mia pakwecikan ka pimatisihiwetc

²⁵ Akam sakihikanik ki ici miskawewok Cecoca. Ki itewok: “Kiskinohamake iriniw, tan apitc ka takociniin ota?”

²⁶ Itikowok Cecoca: “Ohwe ka witamatakok, tapwe ni icinakon: wetci nantowapamiekw, osam e ki acamikoiekw pakwecikan kitci tipipariekw, nama osam e ki otci nisitotamekw anihe ka ki ici mata kackitaian.

²⁷ Aka otamirokw mitcim otci ke iti onatak. Aric kirawe ki ta otamironawaw kotak mitcim otci, nespitc ka mirwacik, mitcim ka otci kakike pimatisinaniwok. Anahwe Ka ki pe iriniwihitisotc ki ka mirikowaw aniheriw mitcimiriw. Osam meka ki kicawatcihiko Kice Manitowa, Otawiwa, otiperitamowiniw e mirikotc.”

²⁸ Aci ki kokwetcimewok: “Tan e actek kitci itotiskeiak kitci ki otamiroiak kotc e ici nataweritak Kice Manito?”

²⁹ Ki itikowok Cecoca: “Enkweriw otamirowiniw Kice Manito ka nataweritak kitci itotiskeiekw: kitci ni tapwerimimekw anihi ka ki pe iciticohwatc.”

³⁰ Ki itewok: “Tan tca ke ici mata kackitain kitci wapatamak, kitci ki tca tapwerimitak? Tan ke totaman?

³¹ Weckatc kitaniskotape kimocominanak e tacikewakopanen nte ka ici cipewatawokarik ki mowewok pakwecikana, ‘manne’ ka icinikatakaniwiritci, kotc e itasinatek Kice Manito Omasinahikanik: ‘Ki mirew pakwecikana kitci mowaritci, wakwek ka otcipariritci.’” Exode 16.4,15; Psaumes 78.24

³² Aci naskamawew Cecoc, e itatc: “Ohwe ka witamatakok, tapwe ni icinakon: namaiew ni Moïse ka ki miritakw pakwecikana wakwek ka otcipariritci, aric Notawi ni, ka miritakw tapwe pakwecikana wakwek ka otcipariritci.

³³ Anihi meka pakwecikana Kice Manito ka miritakw, enko anahwe wakwek ka pe otcitc kirika tapwe pimatisiwiniw ka miratc iriniwa ota askik.”

³⁴ Itiko: “Okimaw, ekoni mocak ici miricinan anahwe towi pakwecikan.”

³⁵ Aci itew Cecoc: “Nin meka nit iteritakosin anahwe pakwecikan ka otci pimatisinaniwok. Anahwe ka pe natawapamitc nama wiskat kata pakatew, kaie anahwe ka tapwerimitc nama wiskat kata pakatamo.

³⁶ Aric ki ki ititinawaw: ki ki wapaminawaw, nama aric peikon ki tapweriminawaw.

³⁷ Tato iriniwa ka ki miritc Notawi ni ka pe natawapamikok. Nama wiskat ni ka pakiterimaw awik e pe natawapamitc.

³⁸ Wakwek meka ni ki pe otcin kitci pe nta itotiskewak wir otiteritamowin anahwe ka ki pe iciticohwitc, nama nin nititeritamowin.

³⁹ Enkweriw meka e ici nataweritak anahwe ka ki pe iciticohwitc: aka otci peikw iriniw kitci onihak aniki ka ki miritc, aric kitci apitcipahakik mamitcitc kicikarike.

⁴⁰ Ekoni meka e ici nataweritak Notawi: kaskina ka wapamatcik Okosiriw kaie ka tapwerimatcik kitci kakike pimatisitcik acitc kitci apitcipahakik mamitcitc kicikarike.”

⁴¹ Aniki cota iriniwok kiciwerimepanak Cecoca, ani e ki iteritci: “Nin, nit iteritakosin anahwe pakwecikan wakwek ka otciparitc.”

⁴² Ki itewok: “Namaiew ia anahwe Cecoc, Sosep okosa? Ki kiskerimimanowa otawiwa kaie okawiwa. Kekwariw tca wetci itwetc minawatc, ‘Wakwek ni ki pe otcin’?”

⁴³ Cecoca itikowok: “Aka kiciweritamokw e ki aiteian.

⁴⁴ Nama awik ni ka ki pe natawapamikw wircike kecpin aka pe iciwirikote Notawiwa ka ki pe iciticohwimitc. Nin tca ni ka apitcipahaw mamitcitc kicikarike.”

⁴⁵ “Enkweriw weckatc ka ki pe nikan tipatcimotcik ka ki masinahakik: ‘Kaskina e tacitcik kata kiskinohamakowok Kice Manitowa.’ Ésaïe 54.13 Kaskina awik ka natotawatc Notawiwa, e tca tapwetak aniheriw okiskinohamakewiniw, ni pe natawapamikw.

⁴⁶ Nama wirata wi itwaniwon ki wapamakaniwiw Notawi Kice Manito. Tepirak anihi ka ki pe iciticohwatc ki wapamiko.

⁴⁷ Ohwe ka witamatakok, tapwe ni icinakon: anahwe ka tapwerimitc aci takoniw kakike pimatisiwiniw.

⁴⁸ Nin nit iteritakosin pakwecikan ka pimatisihiwetc.

⁴⁹ Kitaniskotape kimocomiwawok ki mowewakopan anihi kotakihi pakwecikana ‘manne’ ka icinikatakaniwiritci, nte ka tacikewaspan ka ici cipewatawokarik. Peikon ni, ki poni pimatisiwok.

⁵⁰ Aric anahwe pakwecikan ka arimomak, wakwek ka otciparitc, kecpin awik mowate, nama wiskat kata nipo.

⁵¹ Nin nit iteritakosin anahwe pakwecikan ka pimatisihiwetc, wakwek ka otciparitc. Kecpin awik mowate anihi pakwecikana, kata kakike pimatisiw. Anahwe pakwecikan ka pakitinak, enko anihe niwiaw. Ni pakitinen iriniwok otci, kitci ki otci pimatisitcik.”

⁵² Ekoni e ici micta kikatotcik cota okimawok neta ka tacikewaspan, e itetcik: “Tan ke ki totak anahwe, kitci ki miritokw owiaw kitci mitciikw?”

⁵³ Aci Cecoca itikowok: “Ohwe ka witamatakok, tapwe ni icinakon: kecpin aka mitciekwe owiaw anahwe Ka ki pe iriniwihitisotc, kaie aka minikweiekwe omikw, nama kata takon pimatisiwin kitehiwak.

⁵⁴ Anahwe ka mitcik niwiawiriw kaie ka minikwetc nimikoriw, aci anotc takoniw kakike pimatisiwiniw, kaie ni ka apitcipahaw mamitcitc kicikarike.

⁵⁵ Iteritakon meka ohwe niwiaw tapwe mitcim, kaie nimikw iteritakon tapwe ka minikwaniwok.

⁵⁶ Anahwe ka mitcik niwiawiriw kaie ka minikwetc nimikoriw, ni witci tacikemikw nitehik kaie nin ni witci tacikemaw otehik.

⁵⁷ Pimatisiw Notawi, anahwe ka ki pe iciticohwitc. Kaie nin ni pimatisin, wir e ki miritc ohweriw nipimatisiwiniw. Peikon, kecpin awik mowite, kata pimatisiw, nin e mirak aniheriw opimatisiwin.

⁵⁸ Enko ohwe pakwecikan wakwek ka otciparitc. Namaiew na mitowi anahwe kotak pakwecikan wakwek ka ki otciparitc, weckatc ka ki mowakopanen kitaniskotape kimocomiwapanak. Misawatc e ki mowatcik, peikon kaskina ki poni pimatisiwok. Kecpin aric awik mowate ohweriw pakwecikana nin ka arimomak, nespitc kata pimatisiw.”

⁵⁹ Ekoni ka aitetc Cecoc, e mekwa kiskinohamakespan neta cota aiamihe mikiwamik Capernaüm otenak.

Itewina ka otci kakike pimatisinaniwok

⁶⁰ Ka petakotc Cecoc anahweriw iriniwa ka nosanehikotc, ani e itetc, mitcet ki iteriwa: “Arimaniw aniheriw ka ici kiskinohamaketc. Awin tca ke ki tapwetak?”

⁶¹ Cecoc kiskeritamokopan e kiciwerimikotc anahweriw ka nosanehikotc, ani e ki itetc. Aci itew: “Ki kicimitinawaw ia anihe otci ka ki iteian?

⁶² Tan ki ta iteritenawaw kecpin wapamekwe anahwe Ka ki pe iriniwihitisotc ocpickate, nete e icatc ka ki ici taciketc ickotok ka ici tacikespan!

⁶³ Wir Omanitoma Kice Manito ka pakitinamiritci pimatisiwiniw. Iriniw wir tipirawe nama kata kackitapan. Anihe ka ki aititakok, ekota ni ka otci kiskeritakositc Miro Manito acitc pimatisiwin ka otci kiskeritakok.

⁶⁴ Aric atita neta e taciekw nama tapwetamok.” Ickotok meka kiskeritamopan Cecoc awin anahweriw aka ke tapwerimikotc, kaie kiskerimepan awin anihi mia ke wecimikotc.

⁶⁵ Minawatc ki iti itew: “Ekoni wetci ki ititakok, nama awik ni ka ki pe natawapamikw, kecpin aka Notawiwa mirikote kitci ici kackitatc.”

⁶⁶ Ani apitc mitcet anihi ka nosanehikospan ki nakatiko.

⁶⁷ Ki itew Cecoc owitcewakana e mitato acitc niciritci: “Nama ia kaie kirawaw ki wi nakacinawaw?”

⁶⁸ Itew anahwe Simo Pien: “Teperitcikein, awin kotak awik ke ki nosanehwakitc? Kir meka ka pakitinaman anihi itewina kitci ki otci kakike pimatisinaniwok!

⁶⁹ Aci ohwe ni tapweritenan kaie ni kiskeritenan: Kir ni Ka Kitcitwawisiin, Kice Manito e ki pe iciticohwisk!”

⁷⁰ Aci itikowok Cecoca: “Nama ia ki ki otci orapamitinawaw, kirawaw e mitato acitc niciekw? Peikw neta e taciekw Matci Manitowiw!”

⁷¹ Anahwe ka arimomakaniwispan, Judas, Simo Iscariote anihi okosa. Enko anahwe ke wecimatc Cecoca, misawatc kaie wir e ki mirakaniwispan kitci witcewatc, peikw neta e tacitcik e mitato acitc niciritci owitcewakana.