Jean 5 - Kice Manito Ocki Omirwatcimowin

Cecoc e kikehatc iriniwa ka niponesiritci

¹ Minawatc kecikarik Jérusalem otenak ki icaw Cecoc, mekwatc e aiamihe makoceritci cota iriniwa.

² Neta waska otenak takonokopan kipwaskohikan. Ickwatema aitakonokopan nete kitci ki pitakaniwonik otenak, papitoc e aicinikateki. Peikw anihe, Maritcenici Ickwatem icinikatekopan. Pecotcik neta takonokopan kapacimo orakan. Bethzatha icinikatekopan anihe kapacimo orakan, hébreu e ici arimwaniwok, cota iriniwok e ici arimwetcik. Niarananokopan neta e ntisketakak kapacimo orakanik.

³ Ekota neta e taci mackociniwakopanen ka akositcik e mitcetitcik: aka ka wapitcik acitc ka maskisitcik kaie ka niponesitcik. [Wetci tacikewakopanen aniki, petawakopan kitci aiatakamipirinik nipiriw kapacimo orakanik ka ici takonik.

⁴ Nanikotino meka pe racirerikopan Teperitciketc otacerima kitci aiatakamiparitaritci aniheriw nipiriw. Anahwe nictam ka akositc ke pakopespan e ickwa aiatakamiparinik nipiriw ki kikew, kotc e ici akositc.]

⁵ Peikw iriniw kaie wir neta tacikekopan, nicto mitana acitc nicwaso pipona esko itapinekopanen.

⁶ Cecoc ka wapamatc anihi iriniwa e miciniritci, kirika e kiskeritakipan aci weckatc e ki itiritci, aci kokwetcimew: “Ki nataweriten ia kitci mirwatisiin?”

⁷ Itiko anihi ka akosiritci: “Okimaw, nama taw awik ke ki witcihitc, kitci pakopehitc neta nipik kipacimo orakanik, aiatakamiparike nipi. Mekwata ko e kokwetcitaian kitci pakopeian, kotak ka akositc wirctam pakopew epwamoci nin.”

⁸ Aci itew Cecoc: “Pasiko! Otapina kitetaskonikan! Pimote tca!”

⁹ Tecikotc kikew anahwe iriniw. Otapinam otetaskonikan e iti pimotetc. Ani apitc arwepi kicikakopan.

¹⁰ Cota okimawok ki itewok anihi iriniwa ka ki kikehakaniwiritci: “Arwepi kicikaw anotc. Nama actew kitci otapinaman kitetaskonikan.”

¹¹ Naskamawew e itatc: “Anahwe ka ki kikehitc ni ki itikw: ‘Otapina kitetaskonikan! Pimote tca!’”

¹² Aci kokwetcimewok: “Awin na anahwe ka ki itisk kitci otapinaman kitetaskonikaniw acitc kitci pimotein?”

¹³ Aric anahwe ka ki kikehakaniwispan nama ki otci kiskerimew anihi ka ki kikehikotc. Ekoni ka ici matcarikopanen Cecoca, osam e mitcetinaniwonikopanen.

¹⁴ Minawatc neta kitci aiamihe mikiwamik Cecoc ki mekwackawew anihi iriniwa ka ki kikehatc. Aci itew: “Aci ki mirwatisin. Aka minawatc pactatikan, aka tca wiec kitci iciwepasiin kirawe e maratak.”

¹⁵ Aci matcaw anahwe iriniw, e nta witamawatc anahweriw cota okimawa, e itatc: “Wir Cecoc ka ki kikehitc.”

¹⁶ Ekoni tca wetci iti arimihikokopanen Cecoc anahweriw cota okimawa, osam e ki kikehiwetc e mekwa arwepi kicikarik.

¹⁷ Ki itew Cecoc: “Mocak otamiro Notawi, kaie nin tca actew mocak kitci otamiroan.”

¹⁸ Ekoni tca wetci kirawe awocamec nanto kiskeritamwakopanen aniki cota okimawok ke ki totcikaterik kitci ki nipahakaniwiritci Cecoca, nama osam tepirak e ki pikotaritci aniheriw aiamihe irakonikewiniw e arwepi kicikarik, aric kaie e ki icinikataritci Kice Manitowa “Notawi,” acitc tapickotc kitci asiteritakosiritci kirika Kice Manito, e ititakosiritci.

Kice Manito Okosa otiperitamowin

¹⁹ Aci Cecoc ki naskamawew anahweriw cota okimawa, e itatc: “Ohwe ka witamatakok, tapwe ni icinakon: Kice Manito Okosa nama wiskat wircike kata ki totam kekociciriw. Tepirak kotc e ici wapamatc Otawiwa, ekoni e itotisketc kaie wir.

²⁰ Sakihiko meka. Wapatahiko tca kaskina e aitotamiritci. Kirawe kaie kiapatc e micarik ke totak kata wapatahiko. Ki ka micta mamiskateritenawaw wapatamekwe.

²¹ Tapwe Notawi apitcipahew ka niporitci, pimatisiwiniw e miratc. Peikon kaie wir Okosa mireriw pimatisiwiniw anahweriw ka wi miraritci.

²² Nama awiriw tipaskonew Notawi wir tipirawe. Okosa ki mirew tiperitamowiniw kitci tipaskonikeritci,

²³ kaskina awiriw kitci ki kicterimikoritci, mitowi wir ka ici kicterimakaniwitc anahwe Notawi. Awik aka ka kicterimatc Okosiriw, nama kaie kicterimew Notawiwa, anihi ka ki pe iciticohikotc.”

²⁴ “Ohwe ka witamatakok, tapwe ni icinakon: anahwe ka natotak e itewak, acitc ka tapwetowatc anihi ka ki pe iciticohwitc, kakike pimatisiwiniw aci ici tatam acitc nama kata anwerimakaniwiw. Mia mitowi aci e ki pimotetc nipowinik, kitci ki tca kakike pimatisitc.

²⁵ Ohwe ka witamatakok, tapwe ni icinakon: aci kekatc kata otcitciparin, aci kaie ickwa pe takociparin, ka nipotcik kitci petawatcik Kice Manitowa Okosiriw e pe petakosiritci. Kaskina ke petawatcik kata pimatisiwok.

²⁶ Notawi, enko anahwe ka pakitinak pimatisiwiniw. Ki mirew kaie wir Okosa kitci pakitinamiritci pimatisiwiniw.

²⁷ Ki mirew kaie tiperitamowiniw kitci tipaskonikeritci, osam meka wir Ka ki pe iriniwihitisoritci.

²⁸ Aka kockoparikw ohwe: aci kata pe otcitciparin kaskina aci ka ki rikwaskatakaniwitcik kitci petawatcik.

²⁹ Kata orowiwok omatikowociwak. Aniki ka ki miro totakik kata apitcipawok, kakike pimatisiwiniw kitci mirakaniwitcik. Aniki ka ki matci totakik kaie wirawaw kata apitcipawok, aric kitci anwerimakaniwitcik.”

³⁰ “Nama kekocic ni ka ki itotiskan nircike. E tipaskonikeian, nit aitotiskan kotc e ici witamawitc Kice Manito. Mia nit ici tipaskonikan. Nama meka ni nantowapaten kitci totaman nin tipirawe e aiteritaman. E iteritak anahwe ka ki pe iciticohwitc, ekoni e totaman.

E miro tipatcimakaniwitc Cecoc

³¹ Kecpin nin tipirawe e miro tipatcimitisoian, nama sokiteritakon anihe nitipatcimowin.

³² Taw aric kotak e miro tipatcimitc. Ni kiskeritamwan kaskina aniheriw otipatcimowin e tapwemakanik.

³³ Ki ki iciticohwawok iriniwok kitci natawapamatcik Capatisa. Tapwewiniw ki tipatatamakowok.

³⁴ Nama ni wi itwan, ni nantowapaten kitci miro tipatcimitcik iriniwok. Aric wetci iteian ohwe, tepirak kitci ki akwacimikoiekw.

³⁵ Anahwe Capatis, mitowi wactenamakan iteritakosipan, e iskahikatek kitci miro wactek. Memacic ki ki naheritenawaw kitci mireritamekw e waskorek.

³⁶ Takon aric nin kekocic kirawe e sokiteritakok patok aniheriw Capatis ka ki ici tipatcimitc. Kaskina e aitotiskeian, ka ki ici miritc Notawi kitci itotiskewak, ekoni ka otci miro kiskeritakok tapwe Notawi e ki pe iciticohwitc.

³⁷ Peikon kaie wir ni miro tipatcimikw Notawi, anahwe ka ki pe iciticohwitc. Nama wiskat ki ki otci petawawaw e ititakositc. Nama kaie wiskat ki ki otci wapamawaw e icinakositc.

³⁸ Nama kaie ki kanaweritamwanawaw otitewin kitehiwak, osam aka e tapwerimimekw anihi ka ki pe iciticohwatc.

³⁹ Wewerita ki kiskinohamasonawaw Kice Manito Omasinahikanik, e iteritamekw, ‘Ekota nta ke otci miskamak kakike pimatisiwin.’ Ekota aric ni mia neta masinahikanik ka ici tipatcimikoian!

⁴⁰ Nama aric ki wi pe natawapaminawaw, tapwe pimatisiwin kitci ki mirikoiekw.”

⁴¹ “Nama ni wi mirwatcimikosin.

⁴² Aric ki kiskerimitinawaw kirawaw. Ni kiskeriten aka e sakihekw Kice Manito.

⁴³ Notawi ni ki mirikw kitci pe icawak ota askik, wir otci. Nama aric ki wi tapwetowinawaw. Kecpin aric kotak awik e iteritak wir tipirawe kitci pe icatc, tecikotc ki tapwetowawaw.

⁴⁴ Ki mireritenawaw e mirwatcimitoekw. Nama aric ki nantowapatenawaw kitci mirwatcimitakw Kice Manito e peikocitc. Tan tca ke ki otci tapwetowiekw?

⁴⁵ Aka iteritamokw kitci itactahoritakok, Notawi kitci ici arimomitakok. Wir Moïse ki ka itactahorikowaw, anahwe tekaci ka ki asperimoekw.

⁴⁶ Kecpin aric tapwe ki tapwetowekw anahwe Moïse, kaie nin ki ta tapwetowinawaw. Ni ki meka pe arimomikw ka pe masinahak aniheriw omasinahikan.

⁴⁷ Aric aka tekaci e tapwetamekw aniheriw ka ki pe ici masinahak, nama kaie ki ka ki tapwetenawaw nin e iteian.”