Jean 3 - Kice Manito Ocki Omirwatcimowin

Cecoc kirika Nicodème

¹ Tapan peikw iriniw, Nicodème e icinikasotc, nta e tacitcik Pharisien iriniwok ka icinikatakaniwitcik. Apikopan anahwe Nicodème neta e ici apitcik cota okimawok.

² Peikwaw e tipiskarik ki natawapamew Cecoca, e itatc: “Kiskinohamake iriniw, ni kiskeritenan e ki pe iciticohwisk Kice Manito kitci pe nta kiskinohamawiak. Nama meka awik kata ki mata kackitaw mitowi kir ka totaman, kecpin aka e witci tacikemikotc Kice Manitowa.”

³ Cecoca itiko: “Ohwe ka witamatan, tapwe ni icinakon: nama awik kata ki wapatam Kice Manito Okimawiniw kecpin aka kiapatc koski nitawikite.”

⁴ Kokwetcimew Nicodème: “Tan ke ki totak aci e kiceatisitc iriniw kitci ki kiapatc koski nitawikitc? Nama minawatc kata ki pitakew okawiwa otirawasowinik kitci ki tca nicwaw nitawikitc.”

⁵ Itew Cecoc: “Ohwe ka witamatan, tapwe ni icinakon: nama awik kata ki pitakew Kice Manito Okimawinik patoc kitci ici nitawikitc nipiriw e totcikaterik acitc Miro Manitowa.

⁶ E nitawikitc awik, tariw onikihikwa. Ekoni ka otci iriniwitc. Peikon e nitawikitc Miro Manitok itekera. Ekoni ka otci manitowitc.

⁷ Akawir kockopari ohwe e ki ititan: ‘Arimatc minawatc kaskina e taciekw ki ka koski nitawikinawaw.’

⁸ Mitowi e rotik, matci arotc aicirowew. Ki peten, nama aric ki kiskeriten nte e otcirowek, nama kaie ke aicirowek. Ekoni peikon e isparitc iriniw e nitawikitc Miro Manitok itekera.”

⁹ Aci itew Nicodème: “Tan tca ke ki otci isparik?”

¹⁰ Itiko Cecoca: “Kir ki kiskinohamake iriniwin e kicteritakosiin ota Israël askik. Nama ia ki kiskeriten anihe?

¹¹ Ohwe ka witamatan, tapwe ni icinakon: ninan nit arimotenan ka ici kiskeritamak kirika ni witenan kotc ka ki ici wapatamak. Nama aric ki wi tapweritenawaw anihe ka witamatak.

¹² Nama ki tapwetowinawaw e arimotamatakok ota askik kekocic. Kekwan tca ke otci tapwetamekw kecpin arimotamatakoke kekocic wakwek itekera?

¹³ Nama wiskat awik ki otci icaw wakwek, tepirak anahwe Ka ki pe iriniwihitisotc, wakwek ka ki pe otcitc.

¹⁴ Weckatc Moïse ki icpaskohwekopan piwapisko kinepikokana kitci nokosiritci, nte ka ici cipewatawokarik askik. Peikon kaie wir anahwe Ka ki pe iriniwihitisotc, acteriw kitci icpaskohwakaniwitc,

¹⁵ kaskina awik kitci ki mirakaniwitc kakike pimatisiwiniw, tapwerimate.

¹⁶ E apitc meka sakihatc iriniwa Kice Manito, ki pe iciticahwew tipirawe Okosa e peikociritci, kaskina awik e tapwerimatc aka kitci onicik, aric kitci kakike pimatisitc.

¹⁷ Nama ki otci pe iciticahwew Okosa ota askik kitci anwerimaritci iriniwa, aric kitci akwacimaritci.

¹⁸ Anahwe ka tapwerimatc anihi Okosiriw nama anwerimakaniwiw. Aric anahwe aka ka tapwerimatc aci ickwa anwerimakaniwiw, osam aka e ki otci tapwerimatc Kice Manitowa Okosiriw e peikociritci.

¹⁹ Enko ohwe ka otci anwerimiwaniwok: anahwe ka wactenamaketc ki pe icaw ota askik, aric iriniwok kirawe sakitawok e taciketcik e ici kiski tipiskarik, patok kitci nosanehwatcik anihi ke ki wactenamakotcik, osam e matci totakik.

²⁰ Kaskina awik ka matci totak cikeritam kitci wactenamowakaniwitc. Nama natawapamew anihi ke ki wactenamakotc. Koctam meka kitci wapatcikaterik omatci itatisiwin.

²¹ Anahwe aric ka nosanetatc tapwewiniw, pe natawapamew anihi ka wactenamakeritci, kitci miro wapatcikaterik e ki miro totak, kotc e ici nataweritamiritci Kice Manitowa.”

Cecoc kirika Capatis

²² Minawatc Cecoc ki matcaw, owitcewakana e witcewikotc, nete e icatcik Judée askik. Memacic nta pa witci tacikemepan kirika sikahatakepan.

²³ Ani apitc Capatis kaie wir sikahatakekopan nete otenacik, Énon e icinikaterik, pecotcik nte Salim otenacik. Mitcakaminokopan meka nipi nte itekera. Aspinikotc pe natawapamikokopan iriniwa kitci ki sikahatowatc.

²⁴ Ani apitc nama moci kipohwakaniwikopan anahwe Capatis.

²⁵ Aci atita owitcewakana Capatis ki iti aimihewok peikw cota okimawa, e kikatotcik e arimotamatotcik aniheriw ko ka totcikaterik cota aiamihewinik, e aiamihe kisisipasonaniwonik.

²⁶ Ki natawapamewok Capatisa, e tca itatcik: “Kiskinohamake iriniw, anahwe iriniw ka ki wapamokw nete akam sipik Jourdain, anahwe ka ki tipatcimatc, aci kaie wir sikahatakew. Kaskina awik aci natawapamew.”

²⁷ Capatisa itikowok: “Nama kekociciriw kata ki pe otitiko awik, kecpin aka mirikote Kice Manitowa.

²⁸ Kirawaw ki ka ki witenawaw tapwe e ki iteian: ‘Namaiew ni nin anihi ka ki itespan Kice Manito kitci pe iciticohwatc ota askik kitci akwacimiweritci. Aric ma, ni ki pe iciticohokowin kitci nikanickowak.’

²⁹ Mitowi e nipowinaniwok, iriniw e nipowitc, tariw otiskwema e wikimatc. Okwimesa anahwe iriniw ka nipowitc pecotcik icikapowiriw. Micta mireritamiriwa e petakotc e arimwetc. Ekoni peikon e apitc kaie nin mireritaman. Anotc aci ni kice mireriten.

³⁰ Acteriw wir aci Cecoc kirawe kitci nosanehwakaniwitc, nin tca, meckotc kitci atciwoparik e nosanehikoian.”

Anahwe icpimik ka otcitc

³¹ “Anahwe icpimik ka pe otcitc kirawe mawotci icperitakosiw. Anahwe tca ota askik ka otcitc tarasak iteritakosiw kaskina kotakihik iriniwok ota askik ka taciketcik ka iteritakositcik, kaie ici arimotam tepirak ota askik e ici kicteritcikaterik. Anahwe wakwek ka pe otcitc, kirawe kicteritakosiw patok kaskina.

³² Witam ka ki ici wapatak kaie ka ki ici petak. Nama aric awik naheritam ka aiteritci.

³³ Anahwe tca ka tapwetamwatc aniheriw otipatcimowiniw, ekoni e ici wapatahiwetc e tapweritci Kice Manitowa.

³⁴ Anahwe ka ki pe iciticohikotc Kice Manitowa witam otitewiniw. Miriko meka tekaci kitci mockineckakotc Omiro Manitomiriw.

³⁵ Kotawino sakihew Okosa. Ki mirew kaskina kitci takonamiritci.

³⁶ Anahwe ka tapwerimatc Kice Manitowa Okosiriw aci takoniw kakike pimatisiwiniw. Aric anahwe aka ka wi tapwerimatc nama kata takoniw aniheriw pimatisiwiniw. Nama kaie kata akonapwaso Kice Manitowa okiciwasiwiniw.”