Jean 20 - Kice Manito Ocki Omirwatcimowin

E pacicikwak matikowoc

¹ Ka manactakaniwok, aci e petapak epwamoci pe nokositc pisimw, matikowocik ki icaw Mari, anahwe Magdala ka otcitc. Tekocik nta, aci wapamew e ki tetipinakaniwiritci micta asiniwa, neta matikowocik ka ki ici nahikowakaniwiritci Cecoca.

² Tecikotc matcepataw e nantowapamatc Simo Piena kaie anihi kotakihi Cecoc owitcewakana, anihi Cecoc ka sakihaspan. Itew Mari anahweriw iriniwa: “Ki matcewirakaniwiw Cecoc neta omatikowocik! Nama ni kiskeritenan minawatc ka ki ici arakaniwitc.”

³ Aci matcawok Pien kirika anaha kotak owitcewakana Cecoc, nte matikowocik e icatcik.

⁴ Mipatawok e nicitcik, kirawe aric ki kicipataw anahwe kotak iriniw patok Pien. Wirctam takocipataw neta matikowocik.

⁵ Cinicikiw kitci sakiwapatak matikowociriw, asinik ka ki otci ocitakaniwonik. Wapatam aniheriw pakiwaniciapiriw motcik e taci mekitanik. Nama aric pitakew.

⁶ Tekocik anahwe Pien, e ki pe nosanehwatc, pitakew neta matikowocik. Kaie wir ki wapatam aniheriw pakiwaniciapiriw motcik e taci mekitanik,

⁷ kaie kotakeriw pakiwaniciapiriw, Cecoca octikwanirik ka ki actakaniwonikipan. Nama tapickotc actepana. Tipan ki ici actew anihe pakiwanic e ki notamekinikatek.

⁸ Aci pitakew anahwe kotak owitcewakana, wirctam ka ki takocik. Wapatam kaie tapweritam.

⁹ Tapwe wirata misawatc e ki wapatakik aniheriw, nama moci nisitotamwakopan aniheriw ka masinaterik Kice Manito Omasinahikanik, e acterik Cecoca kitci apitciparitci.

¹⁰ Minawatc ki kiwewok aniki e nicitcik Cecoc owitcewakana.

Cecoc e wapamikotc Mariwa, Magdala ka otciritci

¹¹ Orowitimik taci nanipowikopan pecotcik matikowocik anahwe Mari. Matokopan. Mekwata e taci matospan ki cinicikiw kitci sakiwapatak matikowociriw.

¹² Kek wapamew nicw aceriwa tekaci e wapaspisoritci e taci apiritci neta ka ici acterikipan Cecoca owiawiriw. Peikw nete ici apiw Cecoca ka ki ici icictikwaneciniritci, kotak tca ka ki ici icicteciniritci.

¹³ Aci kokwetcimiko aceriwa: “Kekwan wetci matoin?” Aci itew: “Ki matcewirakaniwiw anahwe Ka Tiperimitc. Nama ni kiskeriten nte ka ki ici arakaniwitc.”

¹⁴ Ka ickwa itetc aniheriw, kiweskweriw. Aci wapamew neta Cecoca e taci nanipowiritci. Nama aric ni moci nisitowinawew.

¹⁵ Aci kokwetcimiko: “Kekwan wetci matoin? Awin na ka nantowapamatc?” Iteritamokopan anahwe Mari: “Iriniw kitikan askiriw ka mitatc ka aimihitc.” Ekoni wetci ki itatc: “Kecpin kir ka ki matcewiratc, witamaci nte ka ki ici aratc. Ni ka tca natcipahaw.”

¹⁶ Itiko Cecoca: “Mari!” Aci itactimikapowictawew anahwe Mari, e itatc, hébreu arimwewiniw e ici arimwetc: “Rabbouni!” —“Kiskinohamake iriniw” itwaniwon anihe.—

¹⁷ Itew Cecoc: “Akawir matcikonici. Nama sa moci ni ki otci kiwan icpimik kitci natawapamak Notawi. Matca aric nta witamawik niwitcicanak aci kitci natawapamak Notawi icpimik, kaie kirawaw Kotawiwaw, Nikice Manitom kitci natawapamak, kaie kirawaw Kikice Manitomiwaw.”

¹⁸ Ekoni e ici matcatc anahwe Mari, Magdala ka otcitc, e nta witamawatc anahweriw Cecoca owitcewakaniriw, e tca itatc: “Ni ki wapamaw Teperitciketc!” Kaskina tca ki witamawew owitcewakaniw aniheriw ka ki itikotc Cecoca.

Cecoc e natawapamatc owitcewakana ka ickwa apitcipatc

¹⁹ Minawatc peikon aniheriw e manactakaniwonik e otakocinik, anahweriw Cecoc owitcewakana mawotcihitowakopan mikiwamik. Kaskina ickwatemiriw ki kipaskohamowakopan, e koctatcik cota okimawa. Kek pe nokosiriw Cecoca, tetawitc neta ka ici taciketcik, e tca itikotcik: “Pekateritamokw!”

²⁰ Minawatc ki wapatarew Cecoc aniheriw otcitcia ka ki ici tcictaskowatakaniwitc, kaie ka ki ici pataskohwakaniwitc opimera. Ki micta mireritamiriwa anahweriw owitcewakana e wapamikotc.

²¹ Kiapatc ki itew Cecoc: “Pekateritamokw! Mia peikon mitowi Notawi ka ki pe iciticohwitc ota askik, anotc kaie nin kit iciticohotinawaw.”

²² Minawatc ki potatew owitcewakana, e itatc: “Miro Manito kitci pe otitikoiekw!

²³ Iriniwok ke ponerimekok opactatowiniwaw ota askik kata kasihamakowok Kice Manitowa. Aric aniki aka ke wi ponerimekok, nama kata kasihamawakaniwiwok.”

Cecoc kirika Toma

²⁴ Peikw Cecoc owitcewakana, Toma —“Nicocan” e icinikatakaniwikopanen, arica e icinikatakaniwitc— nama tacikekopan neta, mia ka pe icaritci Cecoca.

²⁵ Ki witamako anahweriw kotakihi Cecoc owitcewakana: “Ni ki wapamanan Teperitciketc!” Aric ki itew anahwe Toma: “Kecpin aka wapatamowake kaie aka takinamowake ka ki ici namehikotc tcictaskowakaniw otcitcik, kaie aka takinamowake ka ki ici namehwakaniwitc ospakak cimakana, nama ni ka tapweten.”

²⁶ Ka ickwa peikwo manactakanikarik, aci minawatc Cecoc owitcewakana mawotcihitowakopan mikiwamik. Kaie wir Toma nete tacikekopan. Kiapatc ki kipaskohikateriw ickwatemiriw. Peikon ki otci pe nokosiw Cecoc neta e ici taciketcik, e itatc: “Pekateritamokw!”

²⁷ Minawatc ki itew anihi Tomawa: “Pe nta takina ota. Kanawapata nitcitcia. Pe nta itina kitcitci kitci tca takinaman ota nispakak. Ponita ka anwetaman. Tapweta!”

²⁸ Aci itew Toma: “Kir Ka Tiperimiin kaie Nikice Manitom.”

²⁹ Itew Cecoc: “Osam pitama e ki wapamiin, ekoni ia wetci tapwetaman? Caweritakosiwok aniki ka tapwetakik misawatc aka e wapamitcik.”

Wetci ki masinahikatek ohwe masinahikan

³⁰ Mitcetwaw awocamec ki ici mata kackitaw Cecoc e wapamikotc owitcewakana, aka e ki otci masinaterik ota masinahikanik.

³¹ Aric kaskina ota ka takok, ki masinatew kitci ki otci tapwetamekw ohwe: Cecoc, tapwe wir anihi ka ki itespan Kice Manito kitci pe iciticohwatc ota askik kitci akwacimiweritci, enko na Kice Manito Okosa. Kecpin tca tapwerimekwe, ki ka otci mirikowinawaw pimatisiwin wir otci.