Jean 2 - Kice Manito Ocki Omirwatcimowin

Ka nipowinaniwok Cana otenak

¹ Ka ickwa nicwo kickokarik, nipowinaniwonikopan otenak Cana ka icinikatek, Galilée askik itekera. Cecoc okawiwa ki icariw.

² Kaie wirawaw Cecoc acitc owitcewakana ki wicamakaniwiwakopan neta kitci icatcik e nipowinaniwonik.

³ Mekwata e mirwatcitcikaterik, aci notepariniw minicaporiw. Itiko Cecoc okawiwa: “Aci noteapawew.”

⁴ Itew Cecoc: “Nikawi, kir ia ka ki mirikoin kitci witamawiin ke itotiskeian? Nama moci actew kitci wapatahiweian tan tapwe e iteritakosian.”

⁵ Aci Cecoc okawiwa iteriw anihi ka atoskectakeritci: “Kaskina totamokw aniheriw ke ititakw.”

⁶ Takonopana neta nikotwaso opotai e asiniwok. Enkweriw ko towiriw ka apatcitawakopanen cota iriniwok e aiamihe kisisipasowakopanen. Tato opotai wiec mitato mitana tato kwapahikan kata ki actakaniwon e mockinepek.

⁷ Aci itew Cecoc anahweriw ka atoskectakeritci: “Nipi nete sikinamokw opotak, nac kitci mockinepataiekw.” Aci tekaci nta mockinepatawok.

⁸ Aci itew Cecoc: “Kwapahamokw tca memantcic anihe nipi. Iciwitowakw anahwe ka mitatc makocaniw.” Ekoni e ici iciwitowatcik aniheriw.

⁹ Anahwe iriniw ka mitatc makocaniw kotcipitam nipiriw ka ki meckotciparinik kitci minicapowonik. Nama kiskeritamokopan ite e otciparinik aniheriw minicaporiw. Aric aniki ka atoskectaketcik ka ki kwapahakik nipiriw kiskeritamwakopan. Aci anahwe ka mitatc aniheriw makocaniw wicamew anihi iriniwa ka nipowiritci,

¹⁰ e itatc: “Kaskina awik pitama ka wikacinik ominicapomiwaw minihiwewok, nac aka tapwe ka mirwacinik minicaporiw kata iti minihiwewok. Kir aric anotc ka wikacik ki minihiwan mamitenamik.”

¹¹ Enkweriw nictam omata kackitawin ka ki wapatahiwetc Cecoc. Ekota neta ka ki itotisketc, Cana otenak, Galilée askik itekera. Ekoni ka ici wapatahiwetc oticperitakosiwin. Ki tapwerimiko owitcewakana.

¹² Minawatc tca nete Capernaüm otenak ki icawok Cecoc acitc okawiwa, ocima, kaie owitcewakana. Memacic tepirak ki tacikewok.

Ka orowiticohowetc Cecoc kitci aiamihe mikiwamik

¹³ Aci kekatc otcitciparinikopan cota iriniwok kitci makocetcik, Pâque e icinikaterik aniheriw cota aiamihe makocaniw. Aci matcaw Cecoc, nete e icatc Jérusalem otenak.

¹⁴ Ekoni e iti icatc kitci aiamihe mikiwamik. Neta pitakamik miniskanatikok wapamew mitcet iriniwa e ataweritci motcewotikwa, maritcenica acitc omemewa. Tawakopan kaie nta iriniwok ka meckotanakik coriariw e taci apitcik mitcisowakanatikok.

¹⁵ Aci ki takopitam cectokwapiriw Cecoc, pasakactehikaniw e ocitatc. Kaskina ki orowiticohwew anahweriw iriniwa kitci aiamihe mikiwamik, omaritcenicimiwawa acitc omotcewotikomiwawa. Motcik ki iciwepinamwew ocoriamiwaw anahweriw iriniwa ka meckotanamiritci coriariw, acitc ki kwetipiwepinamwew aniheriw omitcisowakanatikoriw.

¹⁶ Itew tca anahweriw iriniwa ka ataweritci omemewa: “Kaskina maninamokw ota! Nama actew kitci totamekw ota Notawi omikiwamik, mitowi atawewokamokw kitci icinakonik!”

¹⁷ Aci mikawiwok aniki Cecoc owitcewakana e itemakanik weckatc Kice Manito Omasinahikanik: “E apitc sakitaian ohwe kimikiwam, Kice Manito, mia e tcakaskitek nitehi e iteritaman.” Psaumes 69.10(9)

¹⁸ Aci cota okimawok kokwetcimewok Cecoca, e itatcik: “Wapatahicinan e ici mata kackitain kitci ki wapatamak tapwe e ki mirikoin tiperitamowin ani kitci itotiskein.”

¹⁹ Itew Cecoc: “Orahamokw ohwe kitci aiamihe mikiwam. Minawatc ni ka koski ocitan, nicto kickwa irikik kitci tacikaman.”

²⁰ Itewok aniki cota okimawok: “Nemitana acitc nikotwaso pipona ki tacikikatew e ocitakaniwok ohwe kitci aiamihe mikiwam. Kir tca, kit itwan kitci ocitain nicto kickwa tca tepirak kitci tacikamopan!”

²¹ Aric aniheriw ka arimotakipan Cecoc, namaieriw ni tapwe kitci aiamihe mikiwamiriw. Arimomitisopan, e witakipan ke isparinik owiaw.

²² Ka ickwa apitcipatc, ki mikawiriwa owitcewakana ani e ki itespan. Aci ki tapweritamok Kice Manito Omasinahikaniw e itasinaterik kaie kaskina ka ki pe iteritci Cecoca.

Capo kiskerimew iriniwa Cecoc e icinakosiritci otehirik

²³ Mekwata e pa taciketc Cecoc neta Jérusalem otenak, Pâque ka ici mirwatcitcikaterik, mitcet iriniwa ki tapwerimiko, e wapatamiritci e ici mata kackitatc.

²⁴ Nama aric ki otci asperimototawew Cecoc anihi iriniwa. Kaskina meka capo kiskerimekopan.

²⁵ Nama arimatc witamawakaniwikopan e icinakosiritci. Wir tipirawe capo kiskeritamokopan e icinakosiritci otehirik iriniwa.