Jean 19 - Kice Manito Ocki Omirwatcimowin

¹ Aci Pilate itew kitci pe iciwirakaniwiritci Cecoca, kitci tca pasakactehwakaniwiritci.

² Cimakanicak ki apikatamok minesikaciriw, Cecoca octikwanirik e ki actawatcik. Kapotowaniw e mikwekicinik ki piskamotarewok.

³ Ki natcikapowictawewok, e tca itatcik: “Kwei, cota iriniwok okimamiwawa!” kirika e pasakwehwatcik.

⁴ Kiapatc orowiw Pilate, e itatc anihi iriniwa e mitcetiritci: “Natotamokw! Ni ka pe orowitahaw anahwe iriniw kitci kiskeritamekw aka e ki otci miskamowak ke ki otci atamerimak.”

⁵ Aci pe orowiw Cecoc. Apatcitaw aniheriw minesikaciriw ka ki actakaniwonik octikwanik kaie ka mikwekicinik kapotowaniw. Itikowok: “Enko anahwe iriniw!”

⁶ Aric kotc ka wapamatcik Cecoca cota makatewokorewok ka tiperitakik acitc kotakihik cota iriniwok ka nanakatcitatcik kitci aiamihe mikiwamiriw, ki tepitepwewok e itetcik: “Tcictaskowaci tcipaiatikok! Tcictaskowaci tcipaiatikok!” Itikowok Pilate: “Kirawaw tipirawe nta tcictaskowatakw tcipaiatikok! Nama kekociciriw ni ki otci miskamwan ke ki otci atamerimak.”

⁷ Aci itewok cota iriniwok: “Takon ninan nitirakonikewinan. Itactew neta kitci nipotc, osam e ki itekasotc: ‘Nin Kice Manito Okosa.’”

⁸ Ka petak aniheriw Pilate, kirawe ki sekisiw.

⁹ Ki pitakew omicta omikiwamik, e nta kokwetcimatc Cecoca, e itatc: “Tante wetciin?” Nama aric ki otci kito Cecoc.

¹⁰ Pilate minawatc itew: “Nama ia ni ki wi naskamowin? Nama ia ki kiskeriten matci kitci ki iteian kitci pakitinikoin kekotc ma matci kitci tcictaskowatikoin tcipaiatikok?”

¹¹ Itew Cecoc: “Tekaci nama takon kitiperitamowin nin kitci tiperimiin, tepirak aniheriw ka ki mirisk Kice Manito. Ekoni wetci iteian, anahwe iriniw ka ki pe pakiterimitc kitci iciwirikoian ota, wir kirawe anweritakosiw patok kir.”

¹² Aci anotc natowi totamokopan anahwe Pilate kitci ki pakitinatc Cecoca. Aric cota iriniwok neta ki iti tepwewok: “Kecpin pakitinate anahwe iriniw, nama ki okwimesimaw Kice Okimaw! Kaskina meka awik ka itekasotc ‘ni okimawin’ wi cakotcihew anihi Kice Okimawa!”

¹³ Ka petak aniheriw Pilate, ki itew kitci pe orowitirakaniwiritci Cecoca, neta wiec e ici asinikanikiterik. —“Place pavée” icinikateriw, acitc Gabbatha, hébreu e ici arimwaniwok.— Neta tipaskonike tetapiwakanik ki apiw anahwe Pilate.

¹⁴ Anahwe e kicikak peikwo kickwa epwamoci aiamihe makocaniwonik Pâque, wiec e apita kicikak. Aci Pilate ki itew cota iriniwa: “Enko ohwe kokimamiwaw!”

¹⁵ Tepitepwewok e aitetcik: “Kitci nipotc! Kitci nipotc! Tcictaskowaci tcipaiatikok!” Pilate itew: “Actew ia kitci tcictaskowatak kokimamiwaw tcipaiatikok?” Itewok aniki cota makatewokorewok ka tiperitakik: “Nama taw kotak nokimaminan, enko tepirak Kice Okimaw!”

¹⁶ Aci Pilate pakitinew anahweriw iriniwa kitci matcewiraritci Cecoca, kitci tcictaskowatakaniwiritci tcipaiatikok. Minawatc ki matcewirakaniwiw Cecoc.

Cecoc e tcictaskowatakaniwitc tcipaiatikok

¹⁷ Wir tipirawe ki pimitinikamew otcipaiatikoma e orowitc otenak, nete tca e icatc Octikwanikekan Matinacic ka icinikaterik. —Golgotha icinikateriw hébreu e ici arimwaniwonik.—

¹⁸ Ekota neta ka ici tcictaskowatakaniwitc Cecoc tcipaiatikok, cimakanica e tcictaskowatikotc. Nicipanak iriniwok mekwata kaie wirawaw e tcictaskowatakaniwiwakopanen otcipaiatikomiwak. Nictowitc ki tcimorakaniwiriw Cecoc otcipaiatikoma, aniki tca iriniwok waopimera.

¹⁹ Ki itew kaie Pilate kitci masinahikaniwonik napakitikwatikocik, okitc Cecoca octikwanik otcipaiatikomirik kitci actakaniwonik, kitci tca itacterik: “Cecoc, Nazareth ka otcitc, cota iriniwok okimamiwawa.”

²⁰ Mitcet cota iriniwok ki tapwatamok aniheriw ka ki masinahikaterik. Neta meka Cecoc ka ki ici tcictaskowatakaniwitc pecotcik ni otenak. Nicto arimwewin ki apatan e masinahikatek: hébreu, latin kaie grec arimwewina.

²¹ Aci Pilate ki itiko anahweriw cota makatewokorewa ka tiperitamiritci: “Nama ki ta pakitinen kitci masinatek: ‘Cota iriniwok okimamiwawa.’ Aric ma kitci itactek: ‘Iriniw anahwe ka ki itekasotc: Nin cota iriniwok okimamiwawa.’”

²² Itew Pilate: “Ka ki masinahaman, enko ni ke masinatek.”

²³ Ka ickwa tcictaskowatatcik Cecoca tcipaiatikok aniki cimakanicak, ki otapinamok owikasimiriw. Newaw ki tetawonamok, papeikw e kanaweritakik. Otakopiriw kaie ki otapinamok aka e kicikwaterik e misiwekanik.

²⁴ Aititowok aniki cimakanicak: “Akawir pakickipitetan ohwe akop. Ekoci metowetan kitci kiskeritamokw anahwe nta e taciikw ke kanaweritak.” Ekoni tapwe ka iti otcitciparik anihe ka masinatekipan Kice Manito Omasinahikanik: “Ki tetawonamok niwikasimiriw kirika metowakatamok nititaspisowiniw.” Psaumes 22.19(18) Ekoni mia ka ki totakik cimakanicak.

²⁵ Pecotcik Cecoc otcipaiatikomik icikapowiwakopan okawiwa, Mari, acitc otosa, acitc Clopas okoma, Mari kaie wir e icinikasoritci, acitc kotak anahwe Mari, neta otenak Magdala ka otcitc.

²⁶ Cecoc ki wapamew okawiwa, kirika pecotcik e witcikapowictakoritci anihi owitcewakana ka sakihatc. Aci itew anihi okawiwa: “Nikawi, enko ohwa kikosis.”

²⁷ Minawatc itew anihi owitcewakana: “Enko ohwe kikawi.” Kotc ka ickwa itatc anihi owitcewakana, mocak ki kanawerimeriw omikiwamirik Cecoc okawiriw.

Ka nipotc Cecoc

²⁸ Ka ickwa itetc aniheriw Cecoc, aci kiskeritam kaskina e ickwaparinik. Mamitcitc ohweriw itew: “Ni pakatamon,” kiapatc kitci ki iciwepanik aniheriw ka ki masinaterik Kice Manito Omasinahikanik.

²⁹ Takonokopan neta micta opotai e mockinepek pinekinapo. Cimakanicak ki akotitawok pakiwaniciriw pinekinapok. Minawatc ki takopitamok mictikok, eko tca e ici itaskohamowatcik Cecoca kitci minikweritci.

³⁰ Ka ickwa minikwetc Cecoc, ki itew: “Aci kaskina ickwaparin.” Ekoni ka atcitaskweparitc e nipotc.

Cecoc e pataskohwakaniwitc opimera

³¹ Tcipaiatiko kicikakopan. Nama nataweritamwakopan aniki cota okimawok kiapatc kitci itakokeritci otcipaiatikomirik awiriw ka ki tcictaskowatakaniwiritci e mekwa arwepi kicikarik. Anihe e arwepi kicikak micta kicteritakonokopan cota aiamihewinik itekera. Ki tca nataweritamawewok anihi Pilata kitci iteritci kitci natwakatehakaniwiritci iriniwa ka ki tcictaskowatakaniwiritci tcipaiatikok, minawatc acitc kitci nitanakaniwiritci owiawiwariw.

³² Aci aniki cimakanicak ki pe nta natwakatehewok anihi nictam iriniwa, minawatc anihi kotakihi, tapickotc Cecoc ka ki tcictaskowatakaniwitcik.

³³ E iti otitickwatcik neta Cecoca otcipaiatikomirik, wapamewok aci e niporitci. Ekoni wetci aka ki otci natwakatehatcik.

³⁴ Aric peikw cimakanic ki pataskahwew opimera, ospakarik itekera, ocimakan e apatcitatc. Tecikotc orowi acokowiniw omikoriw acitc nipiriw.

³⁵ Iriniw ka tipatcimotc, wir tipirawe ki wapatam aniheriw ka ki iciwepanik. Tapwe aniheriw ka ici tipatatak. Wir tipirawe kiskeritam e tapwetc. Tipatatam aniheriw kitci ki kaie kirawaw tapwetamekw.

³⁶ Tapwe kaskina ohwe ki iciwepan kitci ki otcitciparik anihe ka masinatek Kice Manito Omasinahikanik: “Nama otci peikw kata pikotakaniwoniw oskan.” Exode 12.46; Nombres 9.12; Psaumes 34.21(20)

³⁷ Ohwe kiapatc masinatew: “Kata kanawapamewok anihi ka ki pataskohwatcik.” Zacharie 12.10

Cecoc ka nta nahikowakaniwitc

³⁸ Ka ickwa nipotc Cecoc, peikw iriniw, Sosep e icinikasotc, neta otenak Arimathée ka otcitc, ki nataweritamawew Pilata kitci matcewitwatc Cecoca owiawiriw. —Anahwe Sosep ki nosanehwepan Cecoca, aric kimotc ni ki totamokopan, osam e koctakopanen anahweriw cota okimawa.— Pilate ki ici naheritam. Ekoni ka ici matcewitwatc anahwe Sosep Cecoca owiawiriw.

³⁹ Nicodème kaie wir ki pe icaw, anahwe weckatc peikwaw ka ki natawapamaspan Cecoca e mekwa tipiskarik. Wiec mitato mitana tatawatcikan pimiteriw ka miromakonik ki petaw, mictikocik e ki otinikaterik aniheriw pimiteriw, “la myrrhe” acitc “l'aloès” e icinikaterik.

⁴⁰ E nicitcik ki matcewirewok Cecoca e tca wikwekinatcik pakiwaniciwapiriw e totakik, kirika e actawatcik aniheriw pimiteriw. Ekoni ko e totamwakopanen cota iriniwok e nahikowatcik awiriw.

⁴¹ Neta ka ki ici tcictaskowatakaniwitc Cecoc, takonokopan kitikan aski. Neta kitikan askik ocki matikowoc takonokopan, asinik e ki ici ocitakaniwok, aka wiskat moci awik e ki otci nahikowakaniwitc neta.

⁴² Ekota tca ka ici nahikowatcik Cecoca, kirawe e peconakonikopanen anihe matikowoc, osam meka anihe e kicikak, peikwo kickwa ni epwamoci arwepiw kicikarik.