Jean 18 - Kice Manito Ocki Omirwatcimowin

E makonakaniwitc Cecoc

¹ Ka ickwa aitetc, ki matcawok Cecoc kirika owitcewakana, akam cipicik e icatcik, Cédron itekera. Kitikan aski takonokopan neta. Ekota neta ka icatcik.

² Judas, anahwe ke pakiterimaspan Cecoca, kiskeritamokopan kaie wir e ici takonik. Mitcetwaw meka ki icawakopan neta tapickotc.

³ Aci ki pe icaw neta kitikan askik anahwe Judas, e pe iciwiratc mitcet cimakanica kaie atita iriniwa ka nanakatcitaritci kitci aiamihe mikiwamiriw. Aniki cimakanicak ki pe iciticohokowakopan cota makatewokorewa ka tiperitamiritci, acitc Pharisien iriniwa. Kaskina omicta omokomanipanak kirika wactenamakaniw takonamopanak kaie mictikoriw e ki iskahakik.

⁴ Aci Cecoc iti natcikapowictawew, kaskina e kiskeritakipan ke iciwepasitc, e kokwetcimatc: “Awin ka nantowapamekw?”

⁵ Itewok: “Cecoc, Nazareth ka otcitc.” Itew Cecoc: “Nin ni.” Judas taci witcikapowictawekopan anahweriw iriniwa ka ki pe witcewikotc.

⁶ Kotc ka iteritci Cecoca: “Nin ni,” aci kaskina aceparihowok e pakicikik.

⁷ Kiapatc kokwetcimew Cecoc, e itatc: “Awin ka nantowapamekw?” Itewok: “Cecoc, Nazareth ka otcitc.”

⁸ Cecoc itew: “Aci kit ickwa ititinawaw, nin ni. Kecpin tapwe nin ka nantowapamiekw, pakitinakok aniki kotakihik ka witcewitcik kitci matcatcik.”

⁹ Ekoni kaskina mia e acterikipan kitci pe iciwepanik ka ki itespan Cecoc, e ki itetc: “Notawi, nama otci peikw e tacitcik ni ki otci onihaw aniki ka ki pe acotamawiin.”

¹⁰ Simo Pien takonamopan micta mokomaniw. Ki korokopitam. Ki otamatotawew kitci makatewokorewa otarotakaniw. Ki kickitokewepohwew, onihiwinik. Anahwe arotakan Malchus icinikasopan.

¹¹ Aci Cecoc itew Piena: “Pitaha anihe kimicta kimokoman kimokomaniwocik. Kit iteriten ia aka kitci nekatcitaian, kotc ka ki miritc Notawi kitci iciwepasiwak?”

E iciwirakaniwitc Cecoc kitci makatekorek

¹² Cimakanicak acitc anihi ka tiperimikotcik kaie anahweriw iriniwa ka nanakatcitaritci kitci aiamihe mikiwamiriw ka ki pe iciticohokoritci cota okimawa ki makonewok Cecoca, e takopitatcik.

¹³ Tapan iriniw, Hanne e icinikasotc, Caïphe anihi ociceca. Ekota nta ka iciwirakaniwitc Cecoc, makatekorek Hanne. Ani apitc Caïphe kitci makatewokorewipan.

¹⁴ Wir Caïphe ka ki itaspan anahweriw cota okimawa: “Kirawe miroparin kirawaw otci, peikw iriniw kitci nipotc, kaskina iriniwok otci.”

Pien e itetc aka e kiskerimatc Cecoca

¹⁵ Simo Pien kirika peikw kotakihi owitcewakana Cecoc nosanehwepanak Cecoca. Anahwe kotak Cecoc owitcewakana kiskerimikopan kitci makatewokorewa. Tapickotc tca ki pitakew kirika Cecoc, neta pitakamik miniskanatikok, kitci makatewokorewa omikiwamirik e ici takonik.

¹⁶ Aric Pien orowitimik pa tacikew, pecotcik ickwatemik. Anahwe kotak Cecoc owitcewakana ka kiskerimikospan kitci makatewokorewa ki orowiw e nta aimihatc iskwewa ka nanakatcitaritci ickwatemiriw. Minawatc ki pitakahew Piena.

¹⁷ Anahwe iskwew ka nanakatcitatc ickwatemiriw itew Piena: “Nama ia ni kaie kir peikw owitcewakana anahwe iriniw?” “Namaiew ni nin,” itew Pien.

¹⁸ Ani apitc kisinakopan. Ekoni wetci ki kotowetcik neta ka atoskectaketcik kirika cimakanicak, aka kitci sikatcitcik. Waska ickotek nanipowiwakopan e tca awasotcik. Pien kaie wir awasopan.

Kice makatewokorew e kokwetcimatc Cecoca

¹⁹ Ekoni e ici kokwetcimatc Cecoca anahwe kitci makatewokorew Hanne, e itatc: “Awin aniki kiwitcewakanak?” kirika “Tan mia e ici kiskinohamakein?”

²⁰ Itew Cecoc: “Ni ki arimwan kaskina awik kitci petak kirika mocak ni ki kiskinohamakan cota aiamihe mikiwamik kaie kitci aiamihe mikiwamik, neta ka ici mawotcihitotcik kaskina cota iriniwok. Nama kekocic ni ki otci kimotc itan.

²¹ Kekwan wetci kokwetcimiin? Aniki ka ki petawitcik e arimweian, kokwetcimik ka ki itewak. Kiskeritamok wirawaw aniheriw ka ki arimotaman.”

²² Kotc aniheriw ka itetc Cecoc, pasakwehiko peikw iriniwa ka nanakatcitaritci kitci aiamihe mikiwamiriw, opimera ka nanipowiritci, e tca itikotc: “Enko ani e ici naskamowotc kitci makatewokorew?”

²³ Aci Cecoc itew: “Kecpin arotc ka itewanen, wapatahicinan tan anihe mia ka ki ici matci arimweian. Kecpin aric ki miro itewanen, kekwan wetci pe otamohwiin?”

²⁴ Aci anahwe Hanne ki iciticahwew Cecoca kiapatc e takopisoritci neta kitci makatekorek Caïphe ka icinikasoritci.

Pien kiapatc e itetc aka e kiskerimatc Cecoca

²⁵ Kiapatc Pien neta tacikepan e pa awasotc. Kokwetcimakaniwiw: “Namaiew ani kaie kir peikw Cecoc owitcewakana?” Pien kiapatc itew: “Nama. Namaiew ni nin.”

²⁶ Peikw neta ka atoskectawatc kitci makatewokorewa tcirowemekopan anihi iriniwa ka ki kickitokewepowatc Pien. Aci kokwetcimew: “Nama ia ni kir ka ki wapamitan e witcewatc Cecoc neta kitikan askik?”

²⁷ Kiapatc Pien itew: “Nama!” Mia nte kitoriwa nape pakahakwana.

Cecoc e iciwirakaniwitc kice okimak, Pilate ka icinikasoritci

²⁸ Minawatc kecepawonik, Caïphe omikiwamirik otci matcewirakaniwiw Cecoc, kice okimaw omicta omikiwamirik e iciwirakaniwitc. Aric cota okimawok nama ki otci pitakewok kice okimaw omikiwamirik, aka kitci ometciwohakaniwitcik, aka tca kitci otcinehwakaniwitcik kitci aiamihe makocetcik Pâque otci.

²⁹ Ekoni wetci orowitc anahwe kice okimaw Pilate e nta nakickowatc, e itatc: “Kekwariw ka itactahorekw anahwe iriniw?”

³⁰ Itewok: “Kecpin aka ki otci matci totak, nama ni ta ki otci pecowanan.”

³¹ Itikowok Pilate: “Kirawaw tipirawe ki ta ocitanawaw kitci tipaskonekw, kirawaw kitirakonikewiniwaw kitci apatcitaiekw.” Aci itewok cota iriniwok: “Nama ni pakitinikowinan kitci atamerimakitc awik kitci nipahakaniwitc.”

³² Ekotca ni e iti icinakonik Cecoc ka ki itespan kitci iciwepanik ke ici nipahakaniwitc.

³³ Aci Pilate pitakew omicta omikiwamik. Itew kitci pe iciwirakaniwiritci, e tca kokwetcimatc: “Kir ia ni cota iriniwok okimamiwawa?”

³⁴ Cecoc itew: “Kir ia ka ki iteritaman anihe ka itein, kekotc ma kotakihik ka ki witamaskik?”

³⁵ Pilate itew: “Ni cota iriniwin ia ni nin? Tipirawe kiwitci cota iriniwok kirika cota makatewokorewok ka tiperitakik ki ki pe iciwirikok ota. Aric kir, witamaci tan ka ki totaman.”

³⁶ Cecoc itew: “Nama ota askik otciparin nokimawin. Kecpin tapwe ki otciparik ota askik, aniki ka atoskectawitcik kata ki natowi totamopanak aka kitci makonitcik aniki cota okimawok. Tapwe, nokimawin nama otciparin ota askik.”

³⁷ Aci itew Pilate: “Ka! Kir ia ni okimaw?” Cecoc itew: “Kir ni ka itein: ni okimawin. Ni ki nitawikin kaie ni ki pe ican ota askik, tapwewin kitci pe nta tipataman. Kaskina awik ka nosanetatc tapwewiniw, natotam aniheriw ka itewak.”

³⁸ Aci kokwetcimew Pilate: “Kekwan ni tapwewin?” Ka ickwa itetc aniheriw Pilate, kiapatc ki orowiw e natawapamatc cota iriniwa, e tca itatc: “Nama ni misken kekocic kitci ki otci atamerimak anahwe iriniw.

Cecoc e atamerimakaniwitc kitci nipotc

³⁹ Aric ki kiskeritenawaw anihe mocak peikwaw tato pipona ka pe totamekw, mekwata e aiamihe makocaniwok Pâque otci, mocak peikw iriniw e pakitinak kitci orowitc kipohotowikamikok, kirawaw otci. Ki nataweritenawaw ia kitci pakitinimak anihi okimamiwawa cota iriniwok?”

⁴⁰ Aci tepitepwewok: “Nama! Kirawe anahwe Barabbas ka natawerimakitc kitci pakitinakaniwitc!” Anahwe Barabbas kimoti iriniwikopan.