Jean 17 - Kice Manito Ocki Omirwatcimowin

Cecoc e aiamihectamowatc owitcewakana

¹ Ka ickwa ni aitetc Cecoc, ki icpapiw wakwek e aiamihatc, e tca itetc: “Notawi, aci takociparin anihe ka itactaipan kitci pe iciwepak. Wapatahiwe oticperitakosiwin Kikosis, kitci ki tca wapatahiwetc kir kiticperitakosiwiniw.

² Ki ki meka miraw kitci tiperimatc kaskina iriniwa ota askik, kitci ki miratc kakike pimatisiwiniw kaskina ka ki acotamawotc kitci nosanehikotc.

³ Ekoni e icinakok e kakike pimatisinaniwok: e kiskerimikoin kir e Kice Manitowiin e peikociin, acitc e kiskerimakaniwitc Cecoc Krist, anahwe ka ki pe iciticohwotc.

⁴ Ni ki wapatahiwan kiticperitakosiwin ota askik, aci e ki kictaian anihe otamirowin ka ki miriin kitci itotiskeian.

⁵ Aci tca anotc ki nataweritamatin, Notawi, kitci pe acotamawiin kiapatc anihe icperitakosiwin e nta witci tacikemitan, peikon e ici icperitakosiapan ka witci tacikemitapan epwamoci takok ohwe aski.”

⁶ “Ni ki witcihawok iriniwok kitci ki kiskerimiskik wewerita, aniki ota askik ka ki acotamawiin kitci mihakik. Kir tipirawe kitirinimak iteritakosipanak. Minawatc ki ki pe acotamawin kitci mihakik, kaie ki sapitamok kititewiniw.

⁷ Aci kiskeritamok kir e otciparik kaskina ka ki pe ici miriin.

⁸ Ni ki mirawok meka aniheriw itewiniw ka ki pe miriin kitci witamawakik kirika ki tapwetamok. Ki nisitowinamok kir kititawinik tapwe e ki pe otcian kaie ki tapwetamok kir e ki pe iciticohwiin ota askik.”

⁹ “Nit aiamihectamowawok aniki nitirinimak. Nama nit aiamihectamowawok iriniwok ka nosanetatcik matci meskanariw ota askik; tepirak aric aniki wirawaw ka ki pe acotamawiin nit aiamihectamowawok. Enko meka aniki kir kitirinimak.

¹⁰ Kaskina ka tiperimakik kaie kir ki tiperimawok. Ekoni ka otci kiskeritakok niticperitakosiwin, wirawaw opimatisiwiniwak.

¹¹ Nama awocamec ni ka tacikan ota askik, aric wirawaw kiapatc ota kata tacikewok. Nin ki ka natawapamitin, Notawi, kir ka kitcitwawisiin. Nanakatcihik nitirinimak, kimackawisiwin kitci totaman, anihe peikon mackawisiwin ka ki pe acotamawiin, kitci tca iteritakositcik mia peikw awik, mitowi kaie kirano peikw e iteritakosiikw.

¹² Mekwata ka witci tacikemakik ni nanakatcihataik, mocak e apatcitaiapan kimackawisiwin, anihe mackawisiwin ka ki miriin. Ni ki nakatawerimawok. Nama kaie otci peikw e tacitcik ki otci onicin, patoc anahwe tepirak ka acterikipan kitci onicik, kitci ki tca otcitciparik anihe e itactekipan Kice Manito Omasinahikanik kitci iciwepak.”

¹³ “Aci ki ka natawapamitin. Wetci aiteian kiapatc anotc mekwata e witci tacikemakik ota askik, nimireritamowiniw kitci ki takonik otehiwak, tekaci kitci mireritakik.

¹⁴ Ni ki mirawok kititewiniw, kaie ki cikerimikowok iriniwa ka nosanetaritci matci meskanariw, osam aka e tiperitakositcik ota askik, mitowi nin aka e tiperitakosian.

¹⁵ Nama ki pakoserimitin kitci orowitiratcik ota askik, aric ma kitci nanakatcihatcik aka kitci matci totakotcik Ka Matcatikosiritci.

¹⁶ Nama tiperitakosiwok ota askik, mitowi nin aka e tiperitakosian ota askik.”

¹⁷ “Mirik kaskina kitci tiperitamowotc opimatisiwiniwaw, tekaci kitirinimak kitci iteritakositcik, kitapwewin kitci totaman. Enko meka ohwe kitapwewin: kititewin.

¹⁸ Ni ki iciticohwawok ota askik, mitowi kir e ki pe iciticohwiin ota askik.

¹⁹ Ki pakitinamatin kaskina nipimatisiwin, wirawaw otci, kitci ki tca pakiticowatakik opimatisiwiniwaw, kir misiwe kitci tiperitaman.”

²⁰ “Namaiew tepirak wirawaw anotc nitirinimak ka aiamihectamowakik, aniki aric kirika ke tapwerimitcik ickwa petamowate Mirwatcimowiniw ke witamawakotcik anahweriw anotc ka tapwerimitcik, kaie wirawaw nit aiamihectamowawok.

²¹ Ni pakoserimon kaskina peikw kitci iteritakositcik. Notawi, mocak kitci witcewitakok, mitowi kir e witcewiin, kaie nin e witcewitan; enko tca ni peikw kaskina kitci iteritakositcik, kitci ki otci tapweritakik iriniwok e ki pe iciticohwiin ota askik.

²² Ni ki mirawok icperitakosiwiniw, aniheriw peikon kir ka ki pe miriin, kitci ki tekaci peikw iteritakositcik, mitowi kirano peikw e iteritakosiikw.

²³ Nin ni witci tacikemawok otehiwak kirika kir ki witci tacikemin nitehik. Ekoni aci tekaci peikw ke ki iteritakositcik. Ekota ni ke otci kiskeritakik iriniwok tapwe e ki pe iciticohwiin kirika kir e sakihatcik, kotc e asitci sakihiin.”

²⁴ “Notawi, ki ki mirin nitirinimak, kirika ni nataweriten kitci witci tacikemitcik nte ke ici tacikeian kitci ki wapatakik niticperitakosiwiniw, anihe icperitakosiwin ka ki miriin, osam meka e ki sakihiin epwamoci kiceritcikatek ohwe aski.

²⁵ Notawi, kir mocak icikowisk ka totaman kekocic, nama ki kiskerimikok iriniwok ka nosanetatcik matci meskanariw ota askik. Aric nin ki kiskerimitin. Kiskeritamok nitirinimak kir e ki pe iciticohwiin.

²⁶ Ni ki witcihawok kitci kiskerimiskik e iteritakosiwotc. Awocamec kaie ni ka aitotiskan kitci kiskerimiskik, kitci ki mockineckakotcik kisakihiwewiniw, mia e ici sakihiin, kaie nin kitci tacikeian otehiwak.”