Jean 16 - Kice Manito Ocki Omirwatcimowin

¹ “Ki witamatinawaw anihe aka kitci pakiteritamekw e asperimototawiekw.

² Ki ka matceticohokowinawaw cota aiamihe mikiwamik. Wawatc kata takociparin nikotin aniki ke nipahitakw, kitci iteritakik: ‘Ekote ni ke totamak kitci atoskectawakitc Kice Manito.’

³ Kata totamok aniheriw, osam aka e kiskerimatcik Notawiwa, kaie nin aka e kiskerimitcik.

⁴ Ki ki witamatinawaw anihe, otcitciparike aci kitci isparik, kitci mikaweritamekw aci e ki witamatakok.” “Nama tecikotc ki ki otci witamatinawaw anihe, esko ka kitcipariekw e nosanehwiekw. Ki ki witci tacikemitinawaw meka.

E ici otamirotc Miro Manito

⁵ Aci ni ka natawapamaw anahwe ka ki pe iciticohwitc. Nama aric otci peikw neta e taciekw ni kokwetcimikw: ‘Tante e icain?’

⁶ Aric ki micta kackeritenawaw kitehiwak ani e ki ititakok.

⁷ Aric tapwe ohwe ka pe witamatakok: kirawe kata miroparin kirawaw otci kitci matcaian. Tapwe wirata, kecpin aka matcaiane, nama ki ka pe natawapamikowaw anahwe ke pe nta witcihitakw. Aric matcaiane, ki ka pe iciticahamatinawaw anahwe kitci nta witcihitakw.

⁸ Takocike kata wapatahew ota askik iriniwa e ki onipariritci pactatowinik itekera, nte kaie icikowisk totakewinik, kaie tca nte Kice Manito otipaskonikewinik itekera.

⁹ Pactatowin e arimotaman, ekoni e icinakok: nama ni tapwerimikok iriniwok.

¹⁰ Minawatc anihe icikowisk totakewin e arimotaman, ekoni ka otci kiskeritakok: ni ka natawapamaw Notawi. Nama kaie awocamec ki ka wapaminawaw.

¹¹ Minawatc anihe tipaskonikewin e arimotaman, ekoni e icinakok: anahwe ka tiperimatc iriniwa ka nosanetaritci matci meskanariw ota askik, aci ickwa tipaskonakaniwiw.”

¹² “Mitcen kiapatc kekocic ka wi witamatakok, nama aric ki tipi mackawisinawaw kitci ki petamekw anihe tecikotc.

¹³ Pe takocike Miro Manito, anahwe ka miriwetc tapwewiniw, ki ka witcihitinawaw kaskina tapwewin kitci kiskeritamekw. Nama tepirak wir tipirawe otiteritamowin kata otci aiarimwew, aric aniheriw ki ka witamakowaw kaskina ke ici petak, kirika kata tipatcimo ke iti aiciwepanik.

¹⁴ Kata wapatahiwew niticperitakosiwiniw. Kata pe otitiko meka kaskina nin ka kiskeritaman, minawatc ki ka witamakowaw.

¹⁵ Kaskina ka ici tatak Notawi, kaie nin anihe nit ici taten. Ekoni wetci ki iteian, Miro Manito kata pe otitiko kaskina nin ka ici kiskeritaman, minawatc ki ka witamakowaw.”

Aniki ka kackeritakik kata iti mireritamok

¹⁶ “Nanake nama awocamec ki ka wapaminawaw, patoc wiskata ki ka wapaminawaw.”

¹⁷ Aci aititowok atita owitcewakana: “Tan wa itetc? Ki ki itikono: ‘Nanake nama awocamec ki ka wapaminawaw, patoc wiskata ki ka wapaminawaw,’ kaie: ‘Osam ni ka natawapamaw Notawi.’

¹⁸ Tan ni wa itetc: ‘nanake’? Nama nisitotakoniw wa itetc.”

¹⁹ Kiskeritam Cecoc e wi kokwetcimikotc owitcewakana. Aci itew: “Ki kokwetcimitinawaw ia wetci ki iteian: ‘Nanake nama awocamec ki ka wapaminawaw, patoc wiskata ki ka wapaminawaw’?

²⁰ Ohwe ka witamatakok, tapwe ni icinakon: ki ka matonawaw acitc ki ka nekateritenawaw, mekwata iriniwok ka nosanetatcik matci meskanariw ota askik e mireritakik. Ki ka arimeritenawaw, aric kitarimeritamowiniwaw kata iti natciparin kitci micta mireritamekw.

²¹ Mitowi iskwew e kanawerimawasotc, aci e natciparinik kitci wapamawasotc, nekateritam, aci kekatc kitci wisakeritak. Aric e ickwa nitawikiritci onitcanica, aci onikew e ki nekateritak. Mictahi meka mireritam ocki awaca e nitawikiritci.

²² Peikon kaie kirawaw anotc mekwata ki nekateritenawaw, aric kiapatc minawatc ki ka wapamitinawaw. Ki ka tca micta mireritenawaw, nama kaie awik kata kackitaw kitci maninamatakw aniheriw kimireritamowiniwariw.”

²³ “Ani apitc ke kicikak, nama awocamec ki ka kokwetciminawaw kekocic. Ohwe ka witamatakok, tapwe ni icinakon: Notawi ki ka mirikowaw kaskina ke ici nataweritamawekw, niticinikasowin otci.

²⁴ Nama moci ki ki otci nataweritenawaw kekocic niticinikasowin otci. Nataweritamokw, ki ka mirikowinawaw. Kata tca micaw kimireritamowiniwaw.”

Cecoc e cakotcitatc ka maratanik ota askik

²⁵ “Kaskina anihe aci ki ki pe witamatinawaw, atisokanicica e ki apatcitaian. Kecko aric kata otcitciparin aka awocamec kitci ici aimihitakok. Wewerita ki ka witamatinawaw ka ici kiskeritaman Notawi otci.

²⁶ Ani apitc ki ka nataweritamawawaw anahwe Notawi tan e ici nataweritamekw, niticinikasowin otci. Nama ni wi itwan, nin kitci nataweritamawak kirawaw otci,

²⁷ wir meka tipirawe ki sakihikowaw Notawi. Wetci sakihitakw, osam e sakihiekw, kaie e tapweritamekw Kice Manito otitawinik e ki pe otcian.

²⁸ Notawi otitawinik ni ki pe otcin, kirika ota askik ni ki pe ican. Aci ni ka nakaten ohwe aski, Notawi kitci natawapamak.”

²⁹ Cecoc itiko owitcewakana: “Aci miro nisitotakon ka itein, aka aci atisokanicic e apatcitain e arimwein.

³⁰ Aci ni kiskeritenan kaskina kekocic e kiskeritaman. Nama kaie arimatc ki ka kokwetcimikowin kekocic, kicatc meka e kiskeritaman wa kokwetcimikoin. Ekoni wetci tapweritamak Kice Manito otitawinik e ki pe otciin.”

³¹ Cecoc itew kiapatc: “Aci ia ki tapweritenawaw?

³² Aci kata otcitciparin, aci kaie ickwa pe takociparin, kitci orackaiekw, tato neta e taciekw kitci kiwetc otacikewinik, e nakaciekw nircike kitci tacikeian. Nama aric tapwe nircike ni ka tacikan. Notawi meka ni witci tacikemikw.

³³ Ki ki witamatinawaw anihe kitci pekateritamekw kitehiwak, mocak e witcewiekw. Ota askik ki ka nekatcitanawaw. Aric sokerimokw! Aci kaskina ni ki cakotcitan ka maratak ota askik!”