Jean 15 - Kice Manito Ocki Omirwatcimowin

Tapwe cweminatikw e iteritakositc Cecoc

¹ “Nin tapwe cweminatikw e iteritakosian. Notawi, enko anahwe kitike iriniw, cweminatikoriw ka mitatc.

² Kickikaham kaskina notikoniw aka ka ici nitawikitaritci cwemina. Aric wewerita ocitaw anihi kotakihi notikoniw kitci mirwacinik, neta ka ici mirokitcik cweminak. Kickikaham aniheriw ka maratanik, kirawe kiapatc nipara cwemina kitci ki nitawikiritci.

³ Nikiskinohamakewin ka ki miritakok, aci wewerita kit ickwa ocihikonawaw kitci pekiteheiekw.

⁴ Mocak witcewocikw, mia nin mocak e witcewitakok. Otikon wircike nama ki nitawikihew cwemina, kecpin aka e aniskocik cweminatikok. Ekoni peikon kaie kirawaw ke iciwepasiekw, kecpin aka tapwe witcewiekwe.”

⁵ “Nin nit iteritakosin cweminatikw, kirawaw tca otikona. Anahwe ka witcewitc, kaie nin e witcewak, micta miro totam. Kecpin meka aka nin e witcewitakok, nama kekocic ki ka ki totenawaw.

⁶ Anahwe aka ka witcewitc kata orowepinakaniwiw, mia otikon e ki kickikahikatek e iteritakositc, nac e pasotc. Anihi otikona e pacteki mawotcitakaniwono e tca matcictehikatek.

⁷ Kecpin witcewiekwe, kaie kanaweritamekwe nititewin kitehiwak, ki ka ki nataweritenawaw wa ici nataweritamekw, ki ka tca mirikowinawaw.

⁸ E miro totamekw mia otikon ka miro nitawikihatc cwemina, ki wapatahiwanawaw tapwe e nosanehwiekw. Ekota tca ka otci kiskeritakok e icperitakositc Notawi.

⁹ Ki sakihitinawaw, mia Notawi e asitci sakihitc. Mocak tacikekw neta nisakihiwewinik.

¹⁰ Kecpin e sapitamekw nitirakonikewin, ki tacikanawaw nisakihiwewinik, mia mitowi nin e ki sapitowak Notawi otirakonikewin, mocak kaie e tacikewak osakihiwewinik.”

¹¹ “Wetci witamatakok ohwe, kitci ki ni mireritamekw, mia mitowi nin ka apitc mireritaman, tekaci kaie kitci mireritamekw.

¹² Enko ohwe nitirakonikewin: sakihitokw, kotc e asitci sakihitakok.

¹³ Nama awocamec kata ki totam awik kitci wapatahiwetc e apitc sakihatc okwimesa, e nipotc wirawaw otci.

¹⁴ Ki okwimesiminawaw kecpin e totamekw anihe ka ititakok.

¹⁵ Nama aci kit icinikatitinawaw ‘arotakanak,’ osam meka arotakan nama mocak kiskeritam tan e itotiskeritci okimama. ‘Nikwimesak’ kit icinikatitinawaw. Ki ki meka kiskeritamihitinawaw kaskina aniheriw ka ki ici kiskinohamawitc Notawi.

¹⁶ Namaiew kirawaw ka ki orapamiekw, aric nin ni, ka ki orapamitakok. Ki ki miritinawaw kitci nta miro totamekw, kitci pakitinamekw miro totamowin mocak ke mirwacik. Ki ka tca mirikowaw Notawi kaskina ke ici nataweritamawekw, niticinikasowin otci.

¹⁷ Enko tca ohwe ka witamatakok kitci itotiskeiekw: kitci sakihitoekw.”

E cikerimakaniwitcik Cecoc kirika otirinima

¹⁸ “Kecpin e cikerimitakok iriniwok ka nosanetatcik matci meskanariw ota askik, ki kiskeritenawaw ninctam e ki cikerimitcik.

¹⁹ Kecpin ki tiperitakosiekw ota askik, e ki nosanetaiekw matci meskanaw, ki ta sakihikowinawaw ota askik, osam e nosanetaiekw. Aric ki ki orapamitinawaw kaie ki ki otci wikotcihitinawaw matci meskanak ota askik. Nama tca aci ki tiperitakosinawaw ota. Ekoni wetci cikerimikoiekw ota askik.

²⁰ Mikaweritamokw anihe ka ki ititakok: ‘Awik ka atoskectaketc nama kirawe kicteritakosiw patok anihi ka tiperimikotc.’ Kecpin ki nekatcihitcik iriniwok, peikon kaie kirawaw ki ka nekatcihikowawok. Kecpin kotakihik ki natotawitcik, peikon tca kaie kirawaw ki ka natotakowawok.

²¹ Ekoni tca kaskina ke otci totatakw, osam e nosanehwiekw, aka e kiskerimatcik anihi ka ki pe iciticohwimitci.

²² Nama kata atameritakosipanak, kecpin aka ki otci pe icaian, kecpin kaie aka ki otci aimihakik. Aric aci e ki petawitcik e arimwewak, nama kata ki itewok: ‘Nama ni ki otci kiskeritenan e maratak anihe ka ki totamak.’

²³ Anahwe ka cikerimitc, cikerimew kaie Notawiwa.

²⁴ Nama kata ki otci atameritakosiwok e pactatitcik, kecpin aka ki otci itotiskewak wirawaw otci aniheriw itotiskewiniw aka wiskat kotak awik ka ki otci itotisketc. Aci aric anotc ki wapatamok ka ki itotiskewak. Ni cikerimikok tca, peikon kaie Notawiwa cikerimewok.

²⁵ Aric wetci isparik anihe, kitci ni pe otcitciparik anihe ka ki masinaterik otaiamihe irakonikewiniwak e itemakanik: ‘Ceckwat ni ki cikerimikok.’” Psaumes 35.19; 69.5(4)

²⁶ “Anahwe ke pe nta witcihitakw, enko na Miro Manito, ka petatc tapwewiniw, Notawik ka pe otcitc. Ki ka iciticahamatinawaw, Notawi otci, kaie ni ka aiarimomikw.

²⁷ Kaie kirawaw ki ka aiarimominawaw. Aci meka ki witcewinawaw esko ka kitciparian e kiskinohamatakok.”