Jean 13 - Kice Manito Ocki Omirwatcimowin

Cecoc e kisisipatcisitenatc owitcewakana

¹ Aci kekatc aiamihe makocaniwonikopan, Pâque ka icinikatek. Aci kiskeritamokopan Cecoc e otcitciparinik kitci nakatak askiriw, kitci ki natawapamatc Otawiwa. Mocak ki sakihepan otirinima ota askik, kaie ki wapatahew e sakihatc nac mamitcitc kicikarike.

² Kaskina tapickotc nipekwewakopan Cecoc acitc owitcewakana. Aci ki ickwa cikimikokopan Matci Manitowa anahwe Judas, Simo Iscariote anihi okosa, kitci wecimatc Cecoca.

³ Kiskeritamopan Cecoc Kice Manitowa e ki pe iciticohikotc, minawatc nikotin kitci kiwe natawapamatc, kaie kaskina e ki mirikotc Otawiwa kitci tiperitak.

⁴ Mekwata e taci apitcik e mitcisotcik, pasiko Cecoc. Ki maninam otakop okitc ka apatcitaspan. Pakiwaniciapiriw ki opokotehoniw.

⁵ Minawatc ki sikinam nipiriw kasitcitce orakanik. Ekoni e ici kisisipatcisitenatc owitcewakana kaskina, minawatc e ki pekositenatc, aniheriw e ki apatcitatc pakiwaniciapiriw ka ki pokotehowaketc.

⁶ Nac iti takociniw neta Simo Pien ka ici apiritci. Aci itiko: “Teperitcikein, kir ia ni, ki ka kisisipatcisitenin?”

⁷ Aci itew Cecoc: “Nama anotc ki nisitoten ohwe ka totaman. Kecko aric nanake ki ka nisitoten.”

⁸ “Nama! Nama wiskat ki ka kisisipatcisitenin!” itew anahwe Pien. Itew Cecoc: “Kecpin aka kisisipataiane kisit, nama awocamec ki ka ki witcewin.”

⁹ Itiko: “Aka tca tepirak nisit kisisipata, Teperitcikein! Nitcitci kaie nictikwan kisisipata!”

¹⁰ Aci itew Cecoc: “Awik aci e ki kisisipasotc kaskina e itikititc, nama arimatc minawatc kata kisisipaso, tepirak ositik. Nama meka aci ometciwiw. Aci anotc nama ki ometciwinawaw, nama aric kaskina e taciekw.”

¹¹ Kiskerimekopan meka Cecoc awiriw ani mia ke wecimikotc. Ekoni wetci ki itetc: “Awik neta e taciekw ometciwiw.”

¹² Ka ickwa kisisipatcisiteniwetc Cecoc, ki piskam otakop. Kiapatc ki orapiw. Itew tca minawatc: “Ki nisitotenawaw ia anihe ka ki totaman kirawaw otci?

¹³ ‘Kiskinohamake iriniw’ acitc ‘Teperitcikein’ kit icinikacinawaw. Ki tapwanawaw e icinikaciekw. Ekoni meka e iteritakosian.

¹⁴ Aci tca nin Ka Tiperimitakok kaie Kikiskinohamake irinimiwaw e ki kisisipatcisitenitakok, peikon kaie kirawaw ki ta kisisipatcisitenitonawaw.

¹⁵ Ki ki wapatahitinawaw ke totamekw, kaie kirawaw miro totatoekw!

¹⁶ Ohwe ka witamatakok, tapwe ni icinakon: nama kirawe kicteritakosiw atoskectake iriniw patok anihi ka atoskectawatc. Peikon awik ka pe iciticohwakaniwitc kitci tipatcimotc nama kirawe kaie wir kicteritakosiw patok anihi ka pe iciticohikotc.

¹⁷ Aci anotc ki kiskeritenawaw anihe. Ki ka caweritakosinawaw kecpin itotiskeiekwe.”

¹⁸ “Nama kaskina e taciekw kit arimomitinawaw. Ni kiskerimawok aniki ka ki orapamakik. Actew aric kitci pe icinakok anihe ka itasinatek Kice Manito Omasinahikanik: ‘Anahwe ka ki witci mitcisomitc ni ki atimikapowictakw.’

¹⁹ Aci ki witamatinawaw anihe anotc epwamoci isparik. Isparike tca, ekoni ke ki otci tapwetowiekw Nin ni tan e iteritakosian.

²⁰ Ohwe ka witamatakok, tapwe ni icinakon: kecpin awik tapwetowate aniheriw ke iciticohwimaki, kaie nin ni tapwetakw. Kecpin tca tapwetowite, tapwetawew kaie aniheriw ka ki pe iciticohwimitc.”

Witam Cecoc kitci wecimikotc Juda wa

²¹ Ka ickwa itetc aniheriw Cecoc, ki micta arimeritam. Aci itew: “Tapwe ohwe ka witamatakok: peikw neta e taciekw ni ka pakiterimikw.”

²² Kanawapamitowok aniki Cecoc owitcewakana, tekaci aka e kiskeritakik awiriw mia ka arimomakaniwiritci.

²³ Peikw neta owitcewakana, anihi ka sakihaspan Cecoc, ekota neta opimera e ici apiritci ka ici apitc.

²⁴ Aci nitcictako Simo Piena, kitci kokwetcimaritci awiriw ani ka wi arimomatc.

²⁵ Anahwe owitcewakana nowectaw e kokwetcimatc Cecoca: “Teperitcikein, awin na?”

²⁶ Itew Cecoc: “Ni ka akotcimaw memantcic pakwecikan ota orakanik. Anahwe ke mirak, enko na ke wecimitc.” Aci memantcic pakwepitew pakwecikana Cecoc. Akotcimew orakanik. Ekoni e ici miratc Judawa, Simo Iscariote okosa.

²⁷ Kotc ka otapinatc Judas anihi pakwecikana, aci Matci Manitowa pitciteheckako. Aci Cecoc itew: “Anihe ka actek kitci totaman, wewepitwa.”

²⁸ Neta owitcewakana ka tacikeritci nama otci peikw neta e taciritci nisitotamiriw wetci itetc aniheriw Cecoc.

²⁹ Wir Judas kanaweritamokopan coriawociriw. Ekoni wetci atita iteritamwakopanen: “Wi witamawetake kitci nta otapinamiritci kekociciriw, aci e natciparinik kitci makocaniwonik, kekotc kitci nta cawerimakaniwiritci ka kitimakisiritci.”

³⁰ Judas ki otapinew anihi pakwecikana, tecikotc e iti orowitc neta mikiwamik, aci e tipiskarikopanen.

Ocki irakonikewin: kitci sakihitonaniwok

³¹ Ka ickwa orowiritci anihi Judawa, aci itew Cecoc: “Aci anotc nokoniw oticperitakosiwin anahwe Ka ki pe iriniwihitisotc, kaie Kice Manito oticperitakosiwin nokoniw, anihi otci Ka ki pe iriniwihitisoritci.

³² Kecpin kaie nokonike e icperitakositc Kice Manito anihi Ka ki pe iriniwihitisoritci opimatisiwinik, wir tipirawe Kice Manito kata nokotaw e icperitakosiritci. Tecikotc kaie kata totam.

³³ Ninitcanicak, memacic tepirak kiapatc ki ka witci tacikemitinawaw. Ki ka nantowapaminawaw, nama aric ki ka ki pe icanawaw nte ke icaian. Enkweriw aci ka ki itakik kaie wirawaw kotakihik cota iriniwok.”

³⁴ “Ocki irakonikewin ki miritinawaw: sakihitokw. Mia nin ka ki ici sakihitakok, ekoni kaie kirawaw ke ici sakihitoekw.

³⁵ Kecpin tca sakihitoekwe, ekoni aci kaskina awik kitci kiskerimitakw kirawaw niwitcewakanak, tapwe e witcewiekw.”

E nikan witak Cecoc kitci itikotc Piena aka e kiskerimikotc

³⁶ Simo Pien itew: “Teperitcikein, tante e icain?” Cecoc itew: “Nama anotc ki ka ki pe nosanehwin nte e icaian. Aric nanake ki ka nosanehwin.”

³⁷ Pien itew: “Teperitcikein, kekwan aka tecikotc ke otci nosanehitan? Aci nit ickwa aikan kitci pakiteritaman nipimatisiwin kir otci!”

³⁸ Cecoc naskamawew, e itatc: “Aci ia tapwe kit ickwa aikan kitci ki pakiteritaman kipimatisiwin nin otci? Tapwe icinakon ohwe ka witamatan: epwamoci kitotc nape pakahakwan, aci nictowaw ki ka ickwa itwan aka e kiskerimiin.”