Jean 12 - Kice Manito Ocki Omirwatcimowin

Mari e actomowatc ka miromakonik Cecoca ositirik

¹ Nikotwaso kickwa epwamoci kitciparik Pâque e icinikatek aiamihe makocan, Cecoc ki icaw Béthanie otenacik. Ekota neta Lazare e tacikeritci, anihi iriniwa ka ki apitcipahatc.

² Tekocik Cecoc neta, ki acamakaniwiw. Marthe ki mitaw makocaniw. Anahwe Lazare, enko na peikw nta e tacitcik ka witci mitcisomatcik Cecoca.

³ Aci Mari ki otapinam opotariw ka miromakonik e mawotci misakitakonik, tekaci e ki otci ocitakaniwonik nipiciriw “nard” e icinikaterik, e sikinak Cecoca ositirik. Ekoni e ici kasisitenatc Cecoca, owirisis e totak. Tekaci mockinemakon neta mikiwamik anihe ka miromakonik.

⁴ Judas Iscariote, peikw Cecoc owitcewakana —enko anahwe ke pakiterimatc Cecoca—, ki itew:

⁵ “Micta misakitakon anihe ka miromakok! Irikik e kanewitc awik peikwo pipona e otamirotc, ekoni e itakitakok! Kekwan tca wetci aka ki otci atawaniwok, ka kitimakisitcik kitci ki mirakaniwitcik aniheriw coriariw!”

⁶ Nama ki otci itew aniheriw tapwe e mamitonerimaspan ka kitimakisiritci. Osam e kimoti iriniwispan wetci ki itetc. Wir ka kanaweritakipan coriawociriw. Otapinamokopan ko neta ka pitahikaterik.

⁷ Aci ki itew Cecoc: “Ekoni ici ponihi anahwe iskwew! Ki nikan totam aniheriw ka totak, otcitciparinike e kicikarik otci arikoiane matikowocik.

⁸ Mocak kata tawok ka kitimakisitcik ota ka ici tacikeiekw, aric nin, nama mocak ki ka witci tacikemitinawaw ota.”

E natowi totcikatek kitci nipahakaniwitc Lazare

⁹ E mitcetinaniwonik, kaskina e cota iriniwitcik, ki petakewok Cecoca e tacikeritci Béthanie otenacik. Icawok nete, nama tepirak Cecoca e wi wapamatcik, aric kirika anihi Lazara e wi wapamatcik, Cecoc ka ki apitcipahatc.

¹⁰ Minawatc aniki cota makatewokorewok ka tiperitakik ki oreritamok kitci nipahakaniwiritci anihi Lazare kaie wir.

¹¹ Ekoni wetci mitcet cota iriniwok ki matcatcik e tca nta tapwerimatcik Cecoca.

Jérusalem otenak e takocik Cecoc

¹² Minawatc kecikarik, kiapatc e mitcetinaniwok e pe icaniwok kitci makocaniwok Pâque ka icinikatek, aci petakaniwon Cecoc e takocik Jérusalem otenak.

¹³ Kaskina ki iti matcewirewok cikopiwa e takonatcik, e orowitcik neta otenak, e tca nta nakickowatcik Cecoca e tepitepwetcik, e aitetcik: “Caweritakosiw Kice Manito! Kitci cawerimatc Kice Manito anihi ka pe icaritci Teperitciketc oticinikasowin otci! Kitci cawerimatc Kice Manito Israël okimawa!”

¹⁴ Cecoc ki miskawew atikocica, e nta okitapitc ospiskonirik, kotc e itasinaterik Kice Manito Omasinahikaniw kitci iciwepanik:

¹⁵ “Aka koctatci, Sion otenaw. Kanawapami, aci takociniw kokimam, atikocicik e okitapitc.” Zacharie 9.9

¹⁶ Nama tecikotc ki otci nisitotamok e iciwepanik aniki Cecoc owitcewakana. Nanake Cecoc otcitciparinike kitci icperimakaniwitc, ekota ni patoc ke mikawitcik Kice Manito Omasinahikaniw e itasinaterik e ki pe nikan tipatcimakaniwiritci, acitc tapwe e ki pe iciwepanik kotc e itemakanik wir otci.

¹⁷ Kaskina ka pe witcewakopanen Cecoca, ka ki petawatcik ka itaritci Lazara kitci orowiritci omatikowocirik, kaie ka ki wapamatcik e apitcipaharitci, ki atisokatamok ka ki ici wapatakik.

¹⁸ Ekoni wetci pe nta nakickowatcik Cecoca e mitcetitcik aniki iriniwok. Ki petamwakopan meka e arimomakaniwiritci, e ki matawi aitotamiritci.

¹⁹ Pharisien iriniwok aititowakopan: “Ki wapatenawaw ia, nama kekocic ki ka ki itotiskanano. Aci kaskina awik iti nosanehwew!”

Atita Grec iriniwok e nantowapamatcik Cecoca

²⁰ Tawakopan atita iriniwok aka e cota iriniwitcik, Grec askik e otcitcik, kaie wirawaw e ki pe icawakopanen neta Jérusalem otenak, e pe nta pakoserimatcik Kice Manitowa mekwata e makocaniwonik.

²¹ Ki natawapamewok Piripa, Bethsaïda otenak e otciritci, Galilée askik itekera. Aci ki itewok: “Ni ta mireritenan kitci wapamakitc Cecoc.”

²² Aci anahwe Pirip nta witamawew Atrewa. Minawatc aniki e nicitcik ki nta witamawewok Cecoca.

²³ Itew Cecoc: “Aci otcitciparin kitci icperimakaniwitc anahwe Ka ki pe iriniwihitisotc.

²⁴ Ohwe ka witamatakok, tapwe ni icinakon: tarasak mia okitamin, nama wiec irapatan, tepirak kata peikociw, patoc askik kitci nahikowakaniwitc e kitikaniwok, tarasak kitci ki nipomakak. Ekoni patoc mitcet kekocic ke ki otci nitawikik.

²⁵ Anahwe ka sakitatc opimatisiwin ota askik patok e asitci sakihitc, kata onitaw opimatisiwin. Aric anahwe ka sakihitc, aka ka naheritak opimatisiwin ota askik, nespitc kata kanaweritam kakike pimatisiwinik.

²⁶ Kecpin awik e wi atoskectawitc, acteriw kitci nosanehwitc. Wiec tca pa icaiane, kata icaw kaie wir nitarotakan. Notawi kata kicterimew anihi ka atoskectawimimitci.”

E arimotak Cecoc kitci nipotc

²⁷ Kiapatc itew Cecoc: “Anotc nit arimeriten. Tan mia ke iteian? Ni ka itwan ia: ‘Notawi, wikotcihici, aka kitci nekaterimoian’? Nama! Ekoni meka mia wetci ki pe icaian ota, kitci ni icinakok kaskina e itactek kitci iciwepasian.

²⁸ Notawi, ni nataweriten kitci icperitcikatek kiticinikasowin!” Keskat otci petakon icpimik e itwaniwok e kiciwaniwok: “Aci nit ickwa itotiskan kitci icperitcikatek. Kiapatc kaie nanake ni ka toten.”

²⁹ Neta iriniwok ka tacikewaspan e mitcetitcik ki petamwakopan aniheriw icpimik e otci ititakonik. Atita itewakopan: “Ah! Anahwe na onimiskiw ka ki kitotc!” Kotakihik itewok: “Aceriwa ni, ka ki aimihikotc!”

³⁰ Aci Cecoc itew: “Namaiew ni nin otci, wetci ki petakok anihe. Kirawaw ni otci.

³¹ Aci kitciparin kitci tipaskonikaniwok ota askik. Aci kata matceticohwakaniwiw anahwe ka tiperimatc iriniwa ka nosanetaritci matci meskanariw ota askik.

³² Nin tca, ickwa icpickahikoiane, ni ka wicamawok kaskina iriniwok ota askik kitci pe natawapamitcik.”

³³ Ani e itetc, aci witam Cecoc ke totawakaniwitc kitci nipahakaniwitc.

³⁴ Aniki e mitcetitcik iriniwok ki itewok: “Ni ki kiskinohamakowinan cota aiamihe irakonikewin e itemakak: ‘Anihi ka ki itespan Kice Manito kitci pe iciticohwatc ota askik kitci akwacimiweritci, nespitc kata pimatisiw.’ Kekwan tca wetci itein: ‘Kata icpickahakaniwiw anahwe Ka ki pe iriniwihitisotc’? Awin na anahwe Ka ki pe iriniwihitisotc?”

³⁵ Itew Cecoc: “Kiapatc ki witci tacikemikowaw anahwe ka wactenamaketc, nama aric kinowec kata tacikew. Pimotekw tca mekwata kiapatc e wactenamakoiekw ota, aka kitci oniciniekw e kiski tipiskak. Anahwe meka ka pa pimotetc e kiski tipiskarik nama kiskeritam nte e icatc.

³⁶ Tapwerimakw anahwe ka wactenamatakw mekwata e witci tacikemitakw ota, kitci ki iteritakosiekw ‘iriniwok ka takickakotcik anihi ka wactenamakeritci.’” Ka ickwa itetc aniheriw Cecoc, ekoni ka ici matcatc, warawik kitci nta taciketc, tekaci kitci peikocitc, aka kitci ki pe natawapamikotc anahweriw iriniwa.

Cota iriniwok nama tapwerimewok Cecoca

³⁷ Misawatc mitcet kekwariw e ki matawi aitotak, nama kiapatc otci tapwerimiko.

³⁸ Ekoni aci e iti icinakonik weckatc ka nikan tipatcimospan, Ésaïe ka icinikasospan, e ki pe itetc: “Teperitcikein, awin ka ki tapwetak ka ki pe iteiak? Awiriw ka ki wapatahatc omackawisiwin Teperitciketc?” Ésaïe 53.1

³⁹ Ohweriw kaie ki itew anahwe Ésaïe wetci aka ki tapwetamiritci anahweriw iriniwa:

⁴⁰ “Kice Manito ki totawew aka kitci wapiritci. Ki manimamwew okakitaweritamowiniwariw, aka kitci ki wapiritci e itapiritci, aka kitci nisitotamiritci e apatcitaritci okakitaweritamowiniwariw. Ekoni tca wetci aka pe itactimikapowictawitcik, itew Kice Manito, kitci ki kikehakik.” Ésaïe 6.9-10

⁴¹ Ohweriw ki itew Ésaïe e ki wapatak Cecoca oticperitakosiwiniw, kaie e ki arimomatc.

⁴² Peikon mitcet neta e tacitcik cota okimawok wirawaw tipirawe ki tapwerimewok Cecoca. Nama aric ki otci witamok aniheriw, aka tca kitci ki petakeritci Pharisien iriniwa. Koctamwakopan kitci matceticohwakaniwitcik cota aiamihe mikiwamik.

⁴³ Kirawe kicteritamwakopan iriniwa kitci mirwatcimikotcik, patok Kice Manitowa kitci mirwatcimaritci.

Cecoc otitewin kitci otci tipaskonikaniwonik

⁴⁴ Ki tepwew Cecoc, e itetc: “Anahwe ka tapwerimitc, nama tepirak nin ni tapwerimikw, aric tapwerimew aniheriw ka ki pe iciticohwimitc.

⁴⁵ Anahwe ka wapamitc wapamew kaie aniheriw ka ki pe iciticohwimitc.

⁴⁶ Ni ki pe ican ota askik kitci wactenamowakik iriniwok, aka awocamec kitci taciketcik e ici kiski tipiskarik kaskina ka tapwerimitcik.

⁴⁷ Kecpin awik e petak nititewiniw, aka aric e nosanetatc, namaiew ni nin ka anwerimak. Ni ki pe ican meka kitci akwacimakik iriniwok ota askik, aka kitci anwerimakik.

⁴⁸ Anahwe ka wepakonitc kaie aka ka wi natotak nititewiniw, kata tipaskonakaniwiw. Enkweriw nikiskinohamakewiniw ke otci anwerimikotc mamitcitc kicikarike.

⁴⁹ Namaiew ni nin tipirawe ka iteritaman ka aiteian. Notawi ka ki pe iciticohwitc, wir tipirawe ni ki witamakw ke itewak, kaskina e acterik kitci itewak kaie ke pe ici tipatcimoiapan.

⁵⁰ Ni kiskeriten ohwe: kaskina ka ici orakoniketc anahwe, ekote ka otci isparinik kakike pimatisiwiniw. Kaskina tca ka iteian, nit itwan kotc ka ki ici witamawitc Notawi kitci itewak.”