Jean 11 - Kice Manito Ocki Omirwatcimowin

Lazare ka poni pimatisitc

¹ Peikw iriniw takopan, Lazare e icinikasotc. Ki iti akosiw anahwe Lazare. Nte ici tacikepan otenacik Béthanie ka icinikaterik, neta ka ici tacikerispana nicw omisa. Peikw Mari icinikasoripana, kotakihi Marthe.

² Enko anahwe Mari ka ki actamawaspan Cecoca ositirik pimiteriw ka miromakonik kirika ka ki pekonamowaspan, owirisis e ki totak.

³ Aniki iskwewok, Lazare omisa, ki iciticohwewok peikw iriniwa kitci nta witamawakaniwiritci Cecoca, ohweriw kitci itakaniwiritci: “Teperitcikein, akosiw kikwimes.”

⁴ Ka ickwa witamawakaniwitc aniheriw Cecoc, aci itew: “Nama kata nipahiko aniheriw otakosiwin Lazare. Wetci akositc, kitci ki wapatahiwaniwonik omackawisiwin Kice Manito e micta icperitakonik, kitci ki otci kiskeritakonik Kice Manito Okosa oticperitakosiwiniw.”

⁵ Sakihepan Cecoc anihi e nictiritci, Marthe acitc omisa kaie anihi Lazare.

⁶ Aric ka ickwa petaketc e akosiritci anihi Lazare, kiapatc nicwo kickwa ki tacikew nte ka ici tacikespan.

⁷ Minawatc ki itew anahweriw owitcewakana: “Kiwetan Judée askik.”

⁸ Aci itiko owitcewakana: “Kiskinohamake iriniw, nama orina weckatc ki wi nipahikowitai e pe mosinihikoin! Kekwan wetci wi icain nete minawatc?”

⁹ Aci itikowok Cecoca: “Mitato acitc nicwo tipahikan irikik kicikaw e kicikak. Kecpin awik e pimotetc e mekwa kicikarik, nama pakicin. Wapatam meka e wasearik ota askik.

¹⁰ Kecpin aric e pimotetc e mekwa tipiskarik, pakicin, osam aka e wasearik neta opimatisiwinik.”

¹¹ Ka ickwa itetc aniheriw Cecoc, minawatc ki itew: “Ki notekociw anahwe kikwimesino Lazare. Ni ka aric ni nta kockonaw!”

¹² Aci itiko Cecoc owitcewakana: “Teperitcikein, kecpin ki notekocikwen, kata kikew.”

¹³ Cecoc wi itekopan: “Ki poni pimatisiw ni Lazare.” Aric anahweriw owitcewakana iteritamwakopan aniheriw ka arimotamiritci irin e nipaniwonik.

¹⁴ Aci wewerita witamawew Cecoc: “Poni pimatisiw ni Lazare.

¹⁵ Ni mireriten kirawaw otci aka e ki otci tacikeian nete. Wapatamekwe minawatc ke totaman, aci nta ki ka otci tapweriminawaw. Natawapamatan tca anahwe.”

¹⁶ Minawatc peikw Cecoc owitcewakana, Toma, “Nicocan” ka icinikatakaniwitc, ki itew anahweriw kotakihi owitcewakana: “Matcatan kaie kirano, tapickotc kitci ki nipoikw kirika wir.”

Cecoc ka apitcipahiwetc kaie ka pakitinak pimatisiwiniw

¹⁷ Tekocik neta Cecoc petakew aci new kickwa esko ka arakaniwirikopanen Lazare matikowocik.

¹⁸ Aniheriw otenaciciriw Béthanie nama warawik ici takonikopan Jérusalem otenak, nama wawatc nicto tipahikanearikopan e asitcarik.

¹⁹ Mitcet cota iriniwok ki pe natawapamewakopan Marthewa kaie Mariwa omikiwamiwarik e wi kakitcihatcik e ki poni pimatisiritci ocimiwaw.

²⁰ Ka petaketc Marthe aci e pe iti takociniritci Cecoca, ki matcaw e nta nakickowatc. Mari ki tacikew omikiwamiwak.

²¹ Aci Marthe itew Cecoca: “Teperitcikein, kecpin ota ki tacikein, nama kata ki otci poni pimatisipan nicim!

²² Aric ni kiskeriten anotc mekwata peikon kaskina kitci mirisk Kice Manito ke ici nataweritamawotc.”

²³ Itiko Cecoca: “Kata apitcipaw ni kicim!”

²⁴ Marthe itew: “Ehe, ni kiskeriten, kaskina ka poni pimatisitcik kata apitcipawok mamitcitc kicikarike.”

²⁵ Aci itiko Cecoca: “Nin ka apitcipahiweian, kaie ka pakitinaman pimatisiwin. Anahwe ka tapwerimitc kata pimatisiw, misawatc poni pimatisiwate.

²⁶ Kaie anahwe ka pimatisitc kirika ka tapwerimitc, nama wiskat kata poni pimatisiw. Ki tapweten ia anihe?”

²⁷ “Ehe, Teperitcikein,” itew Marthe. “Ni tapweten, kir anihi Kice Manito ka ki itespan kitci pe iciticohwatc ota askik kitci akwacimiweritci, Kice Manito Okosa, anahwe ka ki nikan tipatcimakaniwitc kitci pe icatc ota askik.”

E matotc Cecoc

²⁸ Ka ickwa ni aitetc anahwe Marthe, ki matcaw e nta wicamatc omisa, Mari, e kimotc witamawatc: “Aci pe takociniw Kiskinohamake iriniw. Ki wicamikw kitci natawapamatc.”

²⁹ Kotc ka petak aniheriw ka itakaniwitc anahwe Mari, tecikotc ki pasiko e tca natawapamatc Cecoca.

³⁰ Nama moci ki otci pitakepan Cecoc neta otenacik. Ekote nete kiapatc e taci tacikespan nte Marthewa ka ki ici nakickakotc.

³¹ Cota iriniwok ka kiwotimawaspan Mariwa omikiwamirik e wi kakitcihatcik ki wapamewok e pasikoritci e wepita orowiritci. Ki nosanehwewok, e iterimatcik: “Rikwaskanik nete icatake e nta matotc.”

³² Aci ki takociniw Mari nte e ici tacikerispana Cecoca. Ka wapamatc, ki nipiskopariho ositirik, e tca itatc: “Teperitcikein, kecpin ota ki tacikein, nama kata ki otci poni pimatisipan nicim!”

³³ Cecoc wapamew e matoritci anihi Mariwa, kirika cota iriniwa ka ki pe witcewikotc kaie wirawaw e matoritci. Ki micta kackeritam kirika e arimeritak.

³⁴ Minawatc tca ki kokwetcimew: “Tante ka ici nahikowekw?” Aci itewok Cecoca: “Teperitcikein, petcimote. Ki ka tca wapaten.”

³⁵ Ki mato Cecoc.

³⁶ Aci itewok aniki cota iriniwok: “Kanawapamakw e apitc sakihaspan!”

³⁷ Aric atita nta e tacitcik aniki cota iriniwok itewok: “Wir ka ki totak kitci wapatamiritci aka ka wapiritci. Nama ia ni kata ki otci natowi totamopan aka kitci niporitci anihi Lazare?”

Lazare e apitcipahakaniwitc

³⁸ Aci minawatc e micta kackeritak Cecoc, ki icaw neta rikwaskanik. Atamapiskw takonokopan neta. Micta asini kipahiwapiskihikewakopan.

³⁹ Aci itew Cecoc: “Akitenakw anahwe asini.” Marthe, Lazare omisa, itew Cecoca: “Teperitcikein, aci mirakonotake. Aci meka new kickwa esko ka nahikowakaniwitc ota.”

⁴⁰ Cecoc itew: “Nama ia ni ki ki otci witamatin: kecpin tapweritamane, ki ka wapatamwan oticperitakosiwin Kice Manito.”

⁴¹ Minawatc ki akitenakaniwiw anahwe micta asini. Aci Cecoc ki itapiw icpimik wakwek, e itetc: “Notawi, mikwetc kit ititin e ki natotawiin.

⁴² Ni kiskeriten mocak e natotawiin, aric ohwe wetci iteian, tepirak ohki iriniwok otci ka witcikapowictawitcik, kitci ki tapwetakik tapwe e ki pe iciticohwiin.”

⁴³ Ka ickwa itetc aniheriw, aci micta kiciwew e tepwetc: “Lazare, orowi neta!”

⁴⁴ Aci pe orowiw anahwe ka ki nipotc, kiapatc e wikweapikasotc pakiwaniciapik, kaskina e itikititc, wawatc otcitcik kaie ositik, kaie pakiwaniciriw e ki totcikaterik otactamikok. Aci Cecoc itew anahweriw cota iriniwa: “Apikwekinakw, minawatc tca pakitinakw kitci matcatc.”

E natowi totcikatek kitci nipahakaniwitc Cecoc

⁴⁵ Mitcet neta e tacitcik aniki cota iriniwok ka ki pe icatcik neta Mari omikiwamirik kaie ka ki wapamatcik e totamiritci Cecoca, aci ki tapwerimewok.

⁴⁶ Atita aric neta e tacitcik ki natawapamewok Pharisien iriniwa e ki atisokowatcik ka ki totamiritci Cecoca.

⁴⁷ Aniki cota makatewokorewok ka tiperitakik kaie Pharisien iriniwok ki mawotcihitowok, aniki e tacitcik ka tipaskoniketcik cota iriniwa otci, Ka Kitci Tipaskoniketcik e icinikatakaniwitcik, e itetcik: “Tan ke totamokw? Mitceniw e aitotak anahwe iriniw e matawinakonik!

⁴⁸ Kecpin pakitinakite kiapatc aniheriw kitci aitotak, kaskina awik kata tapwerimew. Minawatc tca wirawaw ka okimawitcik Romain iriniwok kata pe nanto aitotamok matci kitci pikopitakik kikitci aiamihe mikiwaminariw kaie kitirosowininariw.”

⁴⁹ Peikw cota okimaw, Caïphe e icinikasotc, ani apitc kitci makatewokorewikopan. Aci itew anahwe: “Tekaci nama ki nisitotenawaw kekocic!

⁵⁰ Nama ia ani ki nisitotenawaw, kirawe miroparin kirawaw otci, peikw iriniw kitci nipotc cota iriniwok otci, patok kaskina e taciikw ota kitaskinak kitci onicikik?”

⁵¹ Aniheriw ka itetc Caïphe, nama wir tipirawe otciparinikopan. Nikan tipatcimokopan aniheriw mia ka ki pe ici mirakaniwitc kitci witak, osam meka kitci makatewokorewikopan ani apitc, e witakipan kitci niporitci Cecoca, cota iriniwok otci,

⁵² nama aric cota iriniwok tepirak otci, matci kaie wirawaw kaskina Kice Manito onitcanica ka ki orackaritci kitci mawotcihatc, peikw kitci iteritakosiritci.

⁵³ Ekota nta ka otci oreritakik cota okimawok kitci nipahakaniwiritci Cecoca.

⁵⁴ Ekoni wetci ki ponitatc Cecoc e pa icatc wiec e ici mitcetinaniwonik, cota iriniwa e ici tacikeritci. Nete otenacik ki icaw, Éfraïm e icinikaterik, pecotcik ka ici cipewatawokarik. Ekota neta ka taciketc kirika owitcewakana.

⁵⁵ Aci natciparinikopan kitci aiamihe makocetcik cota iriniwok, Pâque ka icinikaterik. Mitcet iriniwok ki matcawok otacikewiniwak, nte kitci icatcik Jérusalem otenak e nta weritcik kitci pekitehickatisotcik cota aiamihewinik itekera, epwamoci otcitciparinik kitci makocaniwonik.

⁵⁶ Nantowapamewakopan Cecoca. Mekwata neta kitci aiamihe mikiwamik e nanipowitcik ki ititowok: “Tan e iteritamekw kirawaw? Kata pe icaw ia ota e makocaniwonik kekotc nama?”

⁵⁷ Aniki cota makatewokorewok ka tiperitakik kaie aniki Pharisien iriniwok ohweriw ki orakonikepanak: kecpin awik kiskeritake nte e ici tacikeritci Cecoca, acteriw kitci pe nta witak, kitci ki makonakaniwiritci.