Jean 1 - Kice Manito Ocki Omirwatcimowin

Cecoc, anahwe ka icinikatakaniwitc “Itewin,” wactenamawew iriniwa acitc mirew pimatisiwiniw

¹ Ickotokw aci ki taw awik, Itewin e icinikatakaniwitc. Witci tacikemepan Kice Manitowa, kaie Kice Manitowipan.

² Aci witci tacikemekopan kotc ka kiceritamiritci kaskina kekociciriw.

³ Kaskina ka ki kiceritamiritci Kice Manitowa, wir anahwe Itewin ki otci kiceritcikateriw. Nama kekociciriw kata ki otci takonipan, kecpin aka wir ki otci witcihiwetc.

⁴ Wir ka ki pakitinak pimatisiwiniw. Enkweriw tca pimatisiwiniw ka wactenamakotcik iriniwok.

⁵ Wacteriw neta ka ici kiski tipiskarik. Nama ki otci actawehikateriw.

⁶ Peikw iriniw ki pe iciticohoko Kice Manitowa. Capatis icinikasokopan.

⁷ Ki pe icaw kitci witak ka ici kiskerimatc anihi ka wactenamakeritci, kaskina awik kitci ki otci tapwerimatc.

⁸ Namaiew wir tipirawe anahwe ka wactenamaketc Capatis. Wetci ki pe icatc, tepirak kitci ki tipatcimatc anihi ka wactenamakeritci.

⁹ Anahwe ka pe wactenamaketc, enko anahwe e peikocitc tapwe ka wactenamaketc, ka pe takocik ota askik acitc ka wactenamowatc kaskina iriniwa.

¹⁰ Pamatisikopan ota askik. Misawatc e ki witcihakopanen Kice Manitowa ka ocitaritci askiriw, nama peikon ki otci nisitowinakokopan iriniwa ota askik ka tacikeritci.

¹¹ Wir tipirawe otaskik ki pe icaw. Nama aric kaskina owitc iriniwa neta ki otci mireritamiriwa e ki pe takocik.

¹² Aric atita neta e taciritci ki otapiniko kaie ki tapwerimiko. Ki mirew tca Kice Manito onitcanica kitci ki asiteritakosiritci.

¹³ Ka mirakaniwitcik ani kitci asiteritakositcik, pitoc ki iteritakon kirika irin e onitcanicinaniwok ota askik. Nama ki otci mirakaniwiwok aniheriw osam iriniwa e ki ici nataweritamiritci, nama kaie awiriw e ki otci ici oreritamiritci, aric Kice Manitowa otiteritamowiniw wetci ki mirakaniwitcik. Kice Manitowa meka ki mirikowok ocki pimatisiwiniw.

¹⁴ Ki pe iriniwiw anahwe ka iteritakositc Itewin. Ni ki pe nta witci tacikemikonan, e micta mirotehetc kirika tekaci e tapweritakositc. Aci ni ki wapatamwanan oticperitakosiwin, aniheriw icperitakosiwiniw Kotawino Kice Manito ka ki miratc Okosa e peikociritci.

¹⁵ Capatis pa tipatcimekopan anihi, e tepitepwetc e aitetc: “Enko anahwe ka arimomakipan ka iteiapan: ‘Iriniw kata pe takociniw, ickwa takociniane. Wir aric kirawe kicteritakosiw patok nin. Aci meka weckatc ki pe taw epwamoci nin.’”

¹⁶ Mitcetwaw ki ki mirikono omirotehewin, aiackotc, kaskina e taciikw, e kice micarik.

¹⁷ Weckatc irakonikewiniw ki pakitinam Kice Manito, Moïsa e ki miratc. Aric mirotehewin acitc tapwewin ki pakitinikatewa, wir Cecoc Krist e ki petatc.

¹⁸ Nama wiskat ki otci wapamakaniwiw Kice Manito. Aric anihi Okosa e peikociritci, ka kice manitowiritci acitc anotc ka witci tacikemikotc Kotawino, wircike Okosa ki itotiskeriw kitci ki kiskerimakaniwitc Kice Manito.

Capatis otipatcimowin

¹⁹ Cota okimawok, Jérusalem otenak e taciketcik, ki iciticohwewok cota makatewokorewa acitc kotakihi cota iriniwa Lévite itekera ka ici apiritci, kitci nta kokwetcimaritci Capatisa: “Awin tca ni kir?”

²⁰ Nama ki otci anwetam anahwe Capatis kitci witamawatc. Wewerita ki itew: “Namaiew ni nin, anihi ka ki itespan Kice Manito kitci pe iciticohwatc ota askik kitci akwacimiweritci.”

²¹ Kiapatc ki kokwetcimiko: “Awin tca ni kir? Kir ia Élie?” “Namaiew ni nin,” ki itew. “Kir ia ni anahwe Ka Nikan Tipatcimotc aci weckatc ka pehakaniwitc?” “Nama,” ki ici naskamo.

²² Minawatc ohwe mamitcitc ki kokwetcimakaniwiw: “Awin tca ni kir? Witamacinan kitci ki nta witamawakitcik aniki ka ki pe iciticahamowimitcik. Tan tca e iterimitisoin e irapatisiin?”

²³ Ekoni tca e ici naskamotc anahwe Capatis: “Nin anahwe ka petakositc neta ka ici cipewatawokarik, e tepitepwetc e aitetc: ‘Ocitawakw meskanariw, Teperitciketc otci, tipickotc kitci iticimonik taci ke pimotetc!’” Ésaïe 40.3 —Ekoni ka ki itasinahak Ésaïe, iriniw ka ki pe nikan tipatcimotc.—

²⁴ Atita neta e tacitcik ka ki pe iciticohwakaniwitcik kitci natawapamatcik anihi Capatisa ki Pharisien iriniwiwok.

²⁵ Kiapatc ki kokwetcimewok, e itatcik: “Kecpin aka kir anihi ka ki itespan Kice Manito kitci pe iciticohwatc ota askik kitci akwacimiweritci, kaie kecpin aka kir Élie, acitc anahwe Ka Nikan Tipatcimotc, kekwan wetci sikahatakein?”

²⁶ Ekoni e itetc Capatis: “Nin, ki sikahatatinawaw, nipi e apatcitaian. Aric taw awik aka ka kiskerimekw ota e ici tacikeiekw.

²⁷ Ni ki takocinin epwamoci wir. Nama aric ni tipi asiteritakosin wawatc kitci ki apikonamowak omaskisiniapi.”

²⁸ Kaskina anihe ka tipatcitcikatek ki iciwepan neta otenacik Béthanie ka icinikatek, akam sipik Jourdain, neta e ici sikahatakekopanen Capatis.

Cecoc, Kice Manito omaritcenicima

²⁹ Minawatc kecikarik, Capatis ki wapamew Cecoca e pe natcikapowictakotc. Ki itew: “Enkweriw Kice Manito omaritcenicima ka maninamowaritci kaskina awiriw opactatowiniw.

³⁰ Enko anahwe ka arimomakipan ka iteiapan: ‘Iriniw kata pe takociniw, ickwa takociniane. Aric kirawe wir kicteritakosiw patok nin. Aci meka wir weckatc ki pe taw epwamoci nin.’

³¹ Nama ni kiskerimatai awin mia ke pe icatc, aric peikon ni ki pe nta sikahatakan, nipi e apatcitaian, Israël iriniwa kitci ki kiskerimikotc.”

³² Kiapatc itew Capatis: “Ni ki wapamaw Miro Manito wakwek e otci pe raciretc, mia omemew e icinakositc, wir otci.

³³ Nama moci ni kiskerimatai. Kice Manito, anahwe aric ka ki pe iciticohwitc kitci pe nta sikahatakewak, ni ki itikw: ‘Ki ka wapamaw Miro Manito e pe raciretc, nte irinik e ponetc. Enko anahwe iriniw ke sikahataketc, Miro Manitowa kitci miriwetc.’

³⁴ Ni ki wapaten anihe mia ka ki isparik,” itew Capatis. “Ekoni wetci witamakeian: anahwe iriniw tapwe anihi Kice Manito Okosa.”

Nictam Cecoc owitcewakana

³⁵ Minawatc e kicikarik, kiapatc Capatis tacikepan neta kirika nicw owitcewakana.

³⁶ Ka wapamatc Cecoca e pimoteritci, ki itew: “Enkweriw Kice Manito omaritcenicima!”

³⁷ Anihi Capatis owitcewakana e niciritci ki petako ani e itetc. Ekoni ka ici nosanehwatcik Cecoca.

³⁸ Ki kiwekapowiw Cecoc. Ki wapamew anihi iriniwa e nosanehikotc. Ekoni e ici kokwetcimatc, e itatc: “Kekwan ka nantowapatamekw?” Kokwetcimakaniwiw: “Tante e ici tacikein, Rabbi?” (Anihe itewin wi itemakan “Kiskinohamake iriniw.”)

³⁹ Itikowok: “Petcimotekw. Ki ka tca wapatenawaw.” Ki icawok. Ki wapatamok ite e tacikeritci. Aci wiec new tipahikanearipan e ickwa apita kicikarik ka icatcik. Ekota ka taciketcik kape kickwa.

⁴⁰ Aniki ka ki nosanehwatcik Cecoca, ka petawatcik Capatisa ka iteritci, peikw nta Atre icinikasopan, Simo Pien anihi ocima.

⁴¹ Anihi nictam ka ki natawapamatc anahwe Atre, enko anihi octesa, Simo, e itatc: “Aci ni ki miskawanan anihi ka ki itespan Kice Manito kitci pe iciticohwatc ota askik kitci akwacimiweritci!” Ekoni mia wa itemakak “Krist.”

⁴² Ekoni e ici iciwiratc anihi octesa Simowa kitci natawapamaritci Cecoca. Cecoc ki kanawapamew, e itatc: “Kir ni Simo, Jean okosa. Aci Céphas ki ka icinikason.” Aniheriw icinikasowiniw ka ki mirakaniwitc, “asini” wi itemakaniw.

Pirip kirika Nathanaël

⁴³ Minawatc kecikarik ki iteritam Cecoc kitci matcatc, nte Galilée askik itekera kitci icatc. Ki nakickawew Piripa, e itatc: “Pe nosanehici!”

⁴⁴ Bethsaïda otenacik otcikopan anahwe Pirip, mitowi Atre kirika Pien.

⁴⁵ Minawatc Pirip ki natawapamew Nathanaëla, e ki tca itatc: “Ni ki miskawimawanan aci anihi iriniwa, Moïse ka arimomaspan nte aiamihe irakonike masinahikanik, kaie wirawaw ka arimomawaspan ka ki pe nikan tipatcimotcik. Enko ni anahwe Cecoc, Sosep okosa, Nazareth otenak ka otcitc.”

⁴⁶ Nathanaël itew: “Kata ki otciparin ia kekocic e mirwacik nete Nazareth otenak?” Itiko Piripa: “Petcimote! Ki ka tca wapaten.”

⁴⁷ Ka wapamatc Cecoc Nathanaëla e iti pe natcikapowictakotc, ki itew, e arimomatc: “Enko na tapwe Israël iriniw. Nama takoniw wir ka maratanik.”

⁴⁸ Aci kokwetcimiko anihi Nathanaëla: “Tan nte ka otci kiskerimiin?” Itew Cecoc: “Ki ki wapamitin e taci akwactecimoroin nete wapiminatikok, epwamoci wicamisk Pirip.”

⁴⁹ Aci itew Nathanaël: “Kiskinohamake iriniw, kir Kice Manito Okosa, Israël iriniwok okimamiwawa.”

⁵⁰ Minawatc itew Cecoc: “Ki tapwerimin ia osam anihe ka ki ititan, e ki wapamitan e taci akwactecimoin wapiminatikok? Mitcet kekocic ki ka wapaten kirawe mictahi ka mamiskateritakok patok anihe!”

⁵¹ Minawatc kiapatc ki itew: “Ohwe ka witamatakok, tapwe ni icinakon: ki ka wapatenawaw e ceparik waskok. Kata nokosiriwa Kice Manito otacerima e iskwatowiritci, minawatc e nitatowiritci, okitc neta e ici apitc anahwe Ka ki pe iriniwihitisotc!”