Cak ka ki pe ici masinahiketc 5 - Kice Manito Ocki Omirwatcimowin

Aiekwamisikw kirawaw ka micikitaiekw

¹ Natotacikw, kirawaw ka micikitaiekw! Matokw kirika micta arimeritamokw! Mictahi meka ki ka arimiparinawaw!

² Aci iti micta maratan kaskina e ici tatamekw kirika mantcocak ki mitciwok kiwikasimiwariw.

³ Aci tekaci akokwapiskaw kicoriamiwaw acitc kosawo coriamiwaw. Anihe e akokwapiskak, ekota ke otci kiskerimikoiekw aka wewerita e ki otci irapatcitaiekw kicoriamiwaw. Tekaci ki ka pikockakonawaw kaskina e itikitiekw, mia mitowi kitci ickwasokoekw. Ki ki micta mawotcitanawaw kikekocicimiwawa e misakitakoki misawatc aci kekatc e ponaskiwok.

⁴ Nama ki ki otci kicikowawok iriniwok ka otamirotcik kikitikan askiwak. Natotawakok e itewotakik e micta itactahoritakok. Petawew anahweriw Teperitciketc, anahwe ka mawotci mackawisitc e irikokoskamikarik, e petawatc anahweriw kitarotakaniwawa ka mockinamiritci kikitikaniwariw, e pakoserimikotc e nekaterimoritci.

⁵ Ki pa pimatisinawaw ota askik e micta mirwatcitahitisoekw kaie e ki mireritamihitisoekw. Ki ki wirinohitisonawaw, mia mitowi awesisak ka wirinohakaniwitcik kitci nipahakaniwitcik kitci ki mowakaniwitcik.

⁶ Ki ki totenawaw kitci anwerimakaniwitcik kiwitc iriniwawok aka wiec ka ki otci ici patahakik, minawatc kitci nipahakaniwitcik. Nama wiec itotiskewok kitci nanakaskohotisotcik.

Aka kitci atweritcikaniwok, aric kitci aiamihaniwok

⁷ Niwitcicanak, ciciperitamokw, aka wipatc atweritcikekw, nac minawatc kitci pe takocik Teperitciketc. Mamitonerimakw kotc kitike iriniw. Ciciperitam, kinowec e pehotc kitci kicikinik okitikan. Kiskeritam meka kitci takociparinik kitci iti kimiwonik ke mekwa takwakinik kirika ke mekwa miroskaminik.

⁸ Kaie kirawaw tca ciciperitamokw. Sokerimokw. Aci meka minawatc kekatc kata takociniw Teperitciketc.

⁹ Aka kakiterimitokw, niwitcicanak, aka tca kitci otci tipaskonitakw Kice Manito. Aci peconakosiw anahwe ke tipaskoniketc. Aci ickwa aikew kitci pe takocik!

¹⁰ Niwitcicanak, ki mikawerimawawok ia aniki ka ki pe nta nikan tipatcimotcik, ka ki aiarimwetcik Teperitcikeritci oticinikasowinik otci? Enko aniki ke nosanehwekok, mocak e ki ciciperitakik, misawatc e nekatcitawaspan.

¹¹ Caweritakosiwok kit iterimanowok e ki ici sokikapowitcik. Ki ki petakanawatake peikw iriniw e itatisokatakaniwitc, Job icinikasopan, e ki micta ciciperitak, micta kinowec aka e ki otci atweritciketc. Ki kiskeritenawaw kaie aniheriw mamitcitc ka ki cawerimikotc Teperitcikeritci. Ekoni tapwe e icinakositc Teperitciketc. Micta mirotehew ko kirika micta ko kitimakerimiwew.

¹² Niwitcicanak, ohwe minawatc ke ititakok mawotci kicteritakon: kecpin e nespi tapweiekw, aka apatcitakw Kice Manito oticinikasowin, nama kaie aski, nama kaie kotak kekocic. Tepirak “ehe” ki ta itanawaw kecpin ici naheritamekwe, kekotc “nama” itekw, aka tca kitci otci tipaskonitakw Kice Manito.

¹³ Taw ia awik neta e taciekw e nekaterimotc? Kata aiamihaw. Taw ia awik e micta mireritak? Kata nakamo, Kice Manitowa e mirwatcimatc.

¹⁴ Taw ia peikw nta e taciekw e akositc? Kata wicamew ka nikaniwiritci iriniwok otci ka tapwerimatcik Cecoca. Kata aiamihectamako. Memantcic pimiteriw kata coconiko neta octikwanik, Teperitcikeritci oticinikasowiniw e apatcitakaniwonik.

¹⁵ Ani e ici aiamihaniwonik e asperimototawakaniwitc Teperitciketc, kata wikotcihakaniwiw anahwe ka akositc. Kata miriko Teperitcikeritci kitci mirwatisitc, acitc kecpin ki pactatitc, kata kasihamawakaniwiw opactatowin.

¹⁶ Witamatokw tca kipactatowiniwaw. Aiamihectamatokw, kitci ki tca mirwatisihikoiekw. Mictahi mackawisimakaniw kaketin e pakoserimotc awik icikowisk ka itatisitc.

¹⁷ Peikon weckatc iriniw Élie ka icinikasospan, ki iriniwiw mia kirano. Ki micta pakoserimokopan anahwe Élie aka kitci kimiwonik. Nama tca ki otci kimiwoniw nicto pipona acitc apita irikik.

¹⁸ Minawatc ki pakoserimo kiapatc kitci kimiwonik. Tapwe tca ki kimiwoniw, ekoni minawatc ka nitawikinik kaskina kekociciriw askik.

¹⁹ Niwitcicanak, ani e taciekw, kecpin peikw paskete miro meskanak e pimotespan, peikw tca neta witcihate minawatc kitci mitimeritci miro meskanariw,

²⁰ ohwe ki ka mikaweritenawaw: anahwe ka kiwewiratc pactati iriniwa neta meskanak ka mitimerispana e onicinirispana, wikotcihew aka kitci niporitci otcitcakocik itekera, kirika kata kasihikatew micta mitcet pactatowin. Nin Cak