Cak ka ki pe ici masinahiketc 4 - Kice Manito Ocki Omirwatcimowin

Pakiteritamokw ka ici kicteritamekw ota askik, anihe tca otapinamwokw Kice Manito ka ici kicteritak

¹ Tante wetciparik anihe e matciparihitoekw kirika e kikamitoekw? Ekota wetciparik, kitehiwak, aspinikotc e kowetowi iteritamekw, e micta pasoweritamekw kitci itotiskeiekw ka maratak.

² Ki nataweritenawaw kekocic, nama aric ki mirikowinawaw. Aci tca nta kekatc ki ta nipahawaw kiwitc iriniwaw anihe otci. Kekocic ki moctenenawaw, nama aric ki mirikowinawaw. Aci tca nta ki matce kikatonawaw kirika ki mikasonawaw. Nama aric takon anihe ka ici nataweritamekw, osam aka e kiskeritamekw kitci nataweritamawekw Kice Manito.

³ Misawatc aric e nataweritamawekw kekociciriw, nama ki pe otitikonawaw. Nama meka mirwacin anihe wetci nataweritamekw, tepirak e wi mirwatcitahitisoekw, kaskina tca e wi onactamatisoekw kitci ki mireritamihitisoekw.

⁴ Nama wirawatc ki nosanetanawaw kitapwetamowiniwaw! Nama ia ni moci ki kiskeritenawaw, kecpin awik e micta kicteritak ota askik kekociciriw, nama okwimesimew Kice Manitowa. Anahwe ka kicteritak tepirak ota askik kitci mirerimakaniwitc, itotiskew aka kitci okwimesimatc Kice Manitowa.

⁵ Nama ceckwat itacteriw Kice Manito Omasinahikan: “Kice Manito micta moctenawew anihi miro manitowa ka ki miritokw kitci pitciteheckatokw.”

⁶ Aric kirawe mictahi mirwaciniw omirotehewin Kice Manito. Itemakan meka kaie: “Kice Manito atimikapowictawew anahweriw ka kicterimoritci, aric miro totawew anahweriw ka tipaterimitisoritci.” Proverbes 3.34

⁷ Pakitinakw tca wir Kice Manito kitci tiperimitakw. Naskowakw Matci Manito aka kitci makockatcihitakw. Ki ka ni ocimikowaw.

⁸ Wi pecowapamakw Kice Manito, kaie wir ki ka wi pecowapamikowaw. Kirawaw ka pactatiekw, wepinamokw pactatowin. Tekaci maninamokw ka maratak kitehiwak, kirawaw ka kowetowi iteritamekw.

⁹ Micta kackeritamokw e ki pactatiekw. Mictahi kaie nekaterimokw. Micta matokw. Anotc ki papinawaw. Meckotc ki ta matonawaw. Anotc ki micta mireritenawaw. Kirawe aric ki ta kackeritenawaw.

¹⁰ Tipaterimitisokw e pakoserimekw Teperitciketc. Ki ka tca icperimikowaw.

Aka kaskina wiec kitci tipaskonatc owitc iriniwa

¹¹ Niwitcicanak, akawir marerimitokw. Anahwe ka marerimatc owitc iriniwa kekotc e wi tipaskonatc, ekoni aci e mareritamwatc otirakonikewiniw Kice Manitowa acitc tipaskonamwew. Kecpin anihe e totaman, aci nta ki miritison kitci tipaskonaman irakonikewin, aka nitowatc kitci nosanetain.

¹² Aric wircike Kice Manito ka pakitinak irakonikewiniw acitc ke ki tipaskoniketc. Enko tepirak ke ki akwacimiwetc, peikon ke ki anwerimiwetc. Awin tca ni kir, e iterimitisoin kitci ki tipaskonatc kiwitc iriniw?

Aka kitci kicterimonaniwok

¹³ Natotacikw, kirawaw anotc ka iteiekw: “Anotc kekotc wapake neta otenak ki ka icanano, peikwo pipona irikik ki ka itanahonano, ki ka otamironano, ki ka coriakanano.”

¹⁴ Nama aric ki kiskeritenawaw tan ke iciwepasiekw wapake. Tapwe wirata, mia mitowi e kockowok kit iteritakosinawaw, memacic ko e kockowok, minawatc e miro nokok.

¹⁵ Aric ohwe kirawe ki ta itanawaw: “Kecpin ici naheritake Teperitciketc, ki ka pimatisinano, kirika enko ohwe ke totamokw kekotc anihe kotak ki ka itotiskanano.”

¹⁶ Aric, tapwe wirata, ki micta kicterimonawaw acitc ki mirwatcimitisonawaw. Kaskina towi kicterimowin maratan.

¹⁷ Kecpin tca awik e kiskeritak mia ke itatisitc, aka aric e itotisketc, ekoni aci e pactatitc.