Cak ka ki pe ici masinahiketc 3 - Kice Manito Ocki Omirwatcimowin

Kitci mana itwaniwok

¹ Niwitcicanak, kirawe kata miroparinopan aka kitci mitcetiekw e wi kiskinohamakeiekw. Ki kiskeritenawaw ohwe, tipaskonikaniwoke, ninan ka kiskinohamakeiak kirawe kata ariman ke ici tipaskonikoiak patok kotakihik iriniwok.

² Kaskina e taciikw ki patahenano, kaskina wiec e icinakok e patahamokw. Kecpin e takwen awik aka wiskat arotc e ici arimwetc, mia itatisiw, e kackitatc tekaci kitci nanakahamasotc, kaskina e itikititc.

³ Mitowi atikw e totawakaniwitc kitci ki sapitak, piwapiskoriw actakaniwoniw nte otonik. Ekote wetapiketinik osakapikan kitci ki maminohwakaniwitc. Ekote e ici matcatc tante wa icaniwonik, kaskina e itikititc.

⁴ Peikon kaie mamitoneritamokw micta napikwan tciman e icinakok. Misawatc e micta micak acitc orina e sokirowek e mitcahak, micta apicacin ite e otci minopitcikatek. Ekote e isparik tante wa icatc anahwe ka miparitciketc.

⁵ Peikon otoninan, nama micaw. Aric enko anihe ka irapatcitakaniwok e wi micta mirwatcimitisonaniwok. Mamitoneritamokw kotc ickote notcimik. Peikwaw e piskarek apatan, misawatc e micta apicacik, ekoni aci e tcakaskitek.

⁶ Ekoni mia peikon e icinakok otoninan kirika ickote. Mictahi kata ki maratan kiwiawinak e matci irapatcitakaniwok otoninan, ekoni aci kaskina kipimatisiwininak kitci iti maratak. Ekoni aci tekaci e iti otci niciwonatcitakaniwok pimatisiwin. Atamaskamikok otciparin anihe.

⁷ Iriniw kackitaw kitci tiperimatc kaskina kotakihi ka pimatisiritci, kaskina awesisa kirika pirecica acitc namesa, kaskina kotc e aicinakosiritci. Aci meka mekwata tiperimew.

⁸ Nama aric awik kackitaw kitci tiperitak oton. Micta maratan ka itotiskemakak. Nama wi poniparin. Mia mitowi matci mackiki ka nipahiwemakak, ekoni e iteritakok.

⁹ Enko anihe ka apatcitaikw kitci mirwatcimokw Kotawino Teperitciketc, peikon kaie kitci marerimokok kiwitc irininook, anahweriw Kice Manito ka ki kicerimatc mia wir kitci icinakosiritci.

¹⁰ Ekota peikon e otciparik e mirwatcimiwaniwok acitc e mareritcikaniwok. Niwitcicanak, nama actew ani kitci icinakok.

¹¹ Mitowi peikon moskitciwonipekw, nama tapickotc kata ki otcitciwon nipi ka mirwakamik acitc ka maratakamik.

¹² Nama kaie kata ki otci nitawikiw pakan wapiminatikok, niwitcicanak. Peikon kaie wapimin nama kata ki otci nitawikiw cweminatikok. Peikon kaie nipi ka ciwakamik kitcikamik ka takok, nama nta kata ki otacikowin ka mirwakamicik.

Kice Manito ka pakitinak miro mitoneritcikaniw

¹³ Ani e taciekw, taw ia awik ka iterimitisotc e omiro omitoneritcikanitc kirika e kakitaweritak? Kata wapatahiwew tca tapwe e itatisitc. Kata miro totam, tekaci e tipaterimitisotc acitc e omiro omitoneritcikanitc.

¹⁴ Kecpin aric e micta asawakeritamekw kitehiwak, e otameritamekw acitc kecpin mocak e natowi totamekw kitci nanikaniparohoekw, ponitakw e mirwatcimitisoekw, “ni micta omiro omitoneritcikaninan” e iterimitisoekw, e kataiekw tca tapwe e icinakosiekw.

¹⁵ Nama ani wakwek otciparin anihe towi e omiro omitoneritcikanikasonaniwok. Ekota ota askik e otciparik. Ekoni e itatisitcik iriniwok aka ka kiskerimatcik Kice Manitowa. Wawatc Matci Manitok otciparin anihe.

¹⁶ Neta meka e ici asawakerimitonaniwok acitc e nanikaniparohonaniwok, mictahi kaie matciparitakaniwon, kirika kaskina wiec totcikatew ka maratak.

¹⁷ Pitoc aric icinakon anihe miro mitoneritcikan icpimik ka otciparik. Nictam, mictahi mirwacin, nama takon ka maratak neta. Minawatc kaskina wiec wi totcikatew kitci ki miroparihitonaniwok. Pekatisinaniwon, nama mackoctikwaninaniwon, micta mirotehaniwon, acitc mocak ka mirwacik totcikatew. Nama kirawe miro mihakaniwiwok atita iriniwok patok kotakihik, nama kaie miro iriniwikasonaniwon.

¹⁸ Aniki ka otamirotatcik pekateritamowiniw kitci miroparihitonaniwonik neta e ici taciketcik, mia mitowi awik ka matce kitiketc miro kitikaniw iteritakosiwok, minawatc tca e mockinak aniheriw okitikan e ki mirokinik. Enkweriw tca icikowisk itatisiwiniw ka pe otitikotcik.