Cak ka ki pe ici masinahiketc 2 - Kice Manito Ocki Omirwatcimowin

Aka papitoc kitci ici kicterimitonaniwok

¹ Niwitcicanak, kirawaw ka asperimototawekw Teperitciketc Cecoc Krist e icperitakositc, nama actew atita iriniwok kirawe kitci kicterimekok patok kotakihik.

² Mitowi ohwe, kecpin e pe pitaketc iriniw ka micikitatc neta e ici mawotcihitoekw, e micta mirohotc, otapitcitcepisona e misakitakosiritci e apatcihatc. Minawatc kaie kotak iriniw ka kitimakisitc e pe pitaketc, e kitimakihotc, e ketearik owikasim.

³ Anaha kirawe ki kicterimawaw ka mirohotc, e itekw: “Ota api ka ici kicteritakok.” Anaha tca ka kitimakisitc kit itawaw: “Ekota neta nanipowi,” kekotc ma e itekw: “Motcik nta api, ite ka icisitecineian.”

⁴ Kecpin ni isparike, ekoni aci papitoc e ici kicterimitoekw. Nama mia kit totenawaw, arotc e ici pokonamakeiekw.

⁵ Natotacikw, niwitcicanak e sakihitakok. Aniki ka kitimakisitcik ota askik ki orapamikowok Kice Manitowa kitci micikitatcik otcitcakociwak itekera, e asperimototawatcik, kirika kitci pe otitikotcik okimawiniw ka ki nespi tapwetc kitci miratc kaskina ka sakihikotc.

⁶ Aric kirawaw ki marerimawok ka kitimakisitcik! Ka micikitatcik, enko aniki ka arimihitakok, taina, kaie ka iciwiritakok nete arimitakosiwikamikok!

⁷ Enko aniki ni kaie ka mareritakik aniheriw ka mawotci mirwacinik icinikasowiniw ka ki mirikoiekw.

⁸ Wirata mia ki totenawaw kecpin e nosanetaiekw anihe irakonikewin Kice Manito Okimawinik e otciparik, kotc e itactek omasinahikanik: “Ki ka sakihaw kiwitc iriniw, mia mitowi e asitci sakihitisoin.” Lévitique 19.18

⁹ Kecpin aric papitoc e ici kicterimitoekw, aci nta ki pactatinawaw. Aci kit anwerimikonawaw irakonikewin, osam aka e sapitamekw.

¹⁰ Misawatc meka awik e nosanetatc kekatc kaskina aniheriw irakonikewiniw, aric tepirak peikw aka e nosanetatc, ekoni aci peikon ke otci anwerimakaniwitc, mitowi kecpin kaskina ki patahak.

¹¹ Tapwe wirata, anahwe ka ki itetc: “Akawir pacikwatisi,” Exode 20.14; Deutéronome 5.18 kaie ki itew, “Akawir manoho.” Exode 20.13; Deutéronome 5.17 Kecpin tca aka pacikwatisiine, aric ma nta manohwine, ekoni peikon e patahaman irakonikewin.

¹² Nanakatcihitisokw, kaskina ke pe aiteiekw kirika kaskina ke pe aitotamekw, osam e kiskeritamekw kitci tipaskonikoekw anihe irakonikewin, anihe kaie ke ki akwacimikoekw.

¹³ Tapwe wirata, Kice Manito nama kata kitimakerimew iriniwa aka ka ki otci kitimakerimaritci owitc iriniriw, tipaskonate. Aric anahwe ka kiskeritakositc e kitimakeritciketc, nama acteriw kitci koctak kitci tipaskonakaniwitc.

Asperimowin acitc miro totamowin

¹⁴ Niwitcicanak, tan e irapatanik awik kitci itetc: “Nit asperimototawaw Kice Manito,” kecpin aka e nokonik otapwetamowin e miro totak? Kata ki akwacimiko ia aniheriw towiriw otasperimowin?

¹⁵ Kecpin minawatc e tatc kiwitcicanino, aka e mirwacinik owikasim acitc aka e takonik ke mitcik tato kickwa,

¹⁶ tan e irapatanik kitci itekw: “Matca, miro pimatisi! Ekoci kicawasipiso aka kitci sikatciin, acitc kitci miro tipiparihitisowin,” kecpin aka mirekwe aniheriw wa apatcitatc kitci otci pimatisitc?

¹⁷ Ekoni peikon e icinakok tapwetamowin. Kecpin aka e nokotakaniwok e miro itotiskaniwok opimatisiwininak, nipomakan.

¹⁸ Pot awik kata itew: “Atita asperimototawewok Kice Manitowa, kotakihik tca miro totamok.” Ni ka itaw tca: “Wapatahici tapwe e asperimototawotc Kice Manito, kecpin aka e miro totaman! Nin tca, ni ka miro toten. Ekota ni ke otci kiskeritakok tapwe e asperimototawak Kice Manito.”

¹⁹ Ki tapweten ia e peikocitc Kice Manito? “Ehe” e itein, mia kit itwan. Wawatc matci manitowok kaie wirawaw tapwetamok. Kokwarisikerimewok kaie.

²⁰ Ki kiwockweriten! Ki pehon ia kiapatc kitci wapatahikoin ohwe e tapwemakak, aka wiec e irapatak tapwetamowin kecpin aka e takok miro totamowin?

²¹ Mamitonerimakw kitaniskotape kimocomino Abraham. Kekwariw wetci icikowisk ki iterimikotc Kice Manitowa? Osam ni e ki sapitowatc ka itikotc kitci aratc okosa, Isak neta ka ici ickwasowakaniwitcik awesisak e aiamihe pakitinikaniwonik.

²² Aci ki wapaten tapickotc e otamiromakanikipan otapwetamowin acitc omiro totamowin Abraham. Ki wapatahiwew e asperimototawatc Kice Manitowa, osam kaie e ki miro totak.

²³ Anihe ki pe iciwepan mia e itemakak Kice Manito Omasinahikanik: “Abraham ki asperimototawew Kice Manitowa. Icikowisk tca ki iterimiko, otapwetamowin e kanawapatamiritci.” Genèse 15.6 Acitc “nikwimes” ki icinikatiko.

²⁴ Ki wapatenawaw tca, icikowisk iterimiko Kice Manitowa iriniw, omiro totamowin e kanawapatcikaterik, aka tepirak otapwetamowin e kanawapatcikaterik.

²⁵ Peikon ki iciwepasikopan peikw iskwew weckatc e pimatisikopanen, Rahab e icinikasokopanen. Orina nosanetakopan matci pimatisiwiniw. Aric e itatisokatakaniwitc anahwe Rahab Kice Manito Omasinahikanik, peikwaw e kicikarik ki mihew e kanawerimatc omikiwamik atita Israël iriniwa ka ki iciticohwakaniwiritci, acitc ki witcihew kitci ocimoritci, kotakeriw meskanariw e ki witamawatc. Omiro totamowin e ki kanawapatcikaterik, icikowisk ki iterimiko Kice Manitowa.

²⁶ Tapwe wirata, mitowi kecpin iriniw aka awocamec e reretc, kiskeritakosiw e nipotc. Peikon kecpin awik aka e miro totak, kiskeritakosiw e nipomakanik otapwetamowin.