Hébreux iriniwok 8 - Kice Manito Ocki Omirwatcimowin

Cecoc, enko na kikitci makatekoremino

¹ Enko ohwe ka mawotci kicteritakok mekwata ka taci witamatakok: ki tarano aci kitci makatewokorew e witcihitokw, nete wakwek e taciketc, e witapimatc Kice Manitowa ka mawotci mackawisiritci, onihiwinik e ici apitc.

² Weckatc makatewokorewok otamirowakopan rakasimonikiwamik, iriniwok e ki orekahakwapan. Wir aric Cecoc atoskectawew Kice Manitowa otitawinik wakwek, neta ka ici mawotci kitcitwaweritakonik, wir Teperitciketc ka ki ocitatc, namaiew iriniw.

³ Tato kitci makatewokorew orapamakaniwiw kitci cawerimatc Kice Manitowa kirika kitci aiamihe pakitiniketc, kitci ki kasihamawakaniwitcik iriniwok opactatowiniwaw. Kirano tca kikitci makatekoremino Cecoc acteriw kaie wir kekociciriw kitci aiamihe pakitinak.

⁴ Kecpin ota askik tacikekopanen Cecoc, nama kata makatewokorewipan, osam meka aci e tatcik ota makatewokorewok ka aiamihe pakitiniketcik ko, kotc e itasinaterik cota irakonikewinik kitci totcikaterik.

⁵ Aniheriw ka itotisketcik cota makatewokorewok ota askik, wikotcitatakenak kitci keskinowapatakik aniheriw tapwe ka totcikaterik wakwek. Ekoni peikon weckatc ka ki isparitc kaie wir Moïse, apitc ka iteritak kitci orekahikiwametc kitci aiamihaniwonik. Kice Manito ki itew: “Aiekwamisi kaskina wewerita kitci ocitain, mia ka ki ici wapatahitan neta matinak kitci ocitain.” Exode 25.40

⁶ Aric anotc Cecoc ki mirakaniwiw otamirowiniw kitci totak kirawe e kicteritakonik kaie tca aniki cota makatewokorewok e totakik. Kirawe meka e kicteritakonik aniheriw ocki acotamakewiniw ka ki petatc ota askik, nictowitc e icikapowitc iriniwa kirika Kice Manitowa otci. Kirawe meka e sokeritakonik aniheriw ka ki ici nespi tapwaniwonik ka pakitinikaterik.

⁷ Kecpin anihe nictam acotamakewin ki miroparik kitci ki otci nahitatotcik iriniwok, nama arimatc kata ki otci actakaniwonopan ocki acotamakewin.

⁸ Nama aric ki otci mireritam Kice Manito e ki wapamatc e itatisiritci otirinima. Ekoni e itasinaterik omasinahikanik: “Itew Teperitciketc: ‘Aci kekatc kata pe otcitciparin kitci ocitaian ocki acotamakewin Israël iriniwok otci kaie Juda iriniwok.

⁹ Nama tapickotc kata icinakon kaie tca anihe weckatc acotamakewin ka ki ici nahitatowakipan kirika weckatc otaniskotape omocomiwawa otci, apitc ka witcihakik kitci ki orowitcik neta Égypte askik. Nama meka ki otci nosanetawok aniheriw ka ki ici nahitatowakipan ani apitc. Ekoni wetci ki atimikapowictawakik,’ itew Teperitciketc.

¹⁰ ‘Ekoni tca ke icinakok ocki acotamakewin minawatc ke totaman Israël iriniwok otci,’ itew Teperitciketc. ‘Ni ka actawan nitirakonikewiniw omitoneritcikaniwak, ni ka masinahamwan pitc otehiwak. “Nikice Manitominan” ni ka iterimikok, kirika “nitirinimak” ni ka iterimawok.

¹¹ Nama awocamec otci peikw nta e tacitcik kata acteriw kitci kiskinohamawatcik owitc iriniwawa kekotc owitcicaniwawa, ke totamiritci kitci kiskerimitcik. Aci meka kaskina ni ka kiskerimikok, wawatc ka mawotci awaciwitcik, nac ka kiceatisitcik.

¹² Ni ka kasihamawawok ka ki ici matci totakik. Nama kaie awocamec ni ka mikawiwan opactatowiniwaw.’” Jérémie 31.31-34

¹³ Ka ici arimotak tca aniheriw ocki acotamakewiniw Kice Manito, aci kete iteritakoniw aniheriw nictam acotamakewiniw. Kecpin tca kete e iteritakok kekocic, kaie aka awocamec e mirwapatak, aci peconakon kitci ickwaparik.