Hébreux iriniwok 5 - Kice Manito Ocki Omirwatcimowin

¹ Tato kitci makatewokorew orapamiko Kice Manitowa ani e tacitcik iriniwok, kirika orapamakaniwiw kitci atoskectawatc Kice Manitowa wirawaw otci. Aiamihe pakitinikew e cawerimatc Kice Manitowa kirika e ickwaswatc awesisa wir otci, kitci ki kasihikaterik pactatowiniw.

² Kice makatewokorew kackitaw wewerita kitci mihatc kaskina aka ka kiskeritamiritci kaie ka oniciniritci miro meskanariw e wi nosanetaritci, osam kaie wir nanikotino e pakicik.

³ Ekoni wetci acterik kitci aiamihe pakitiniketc e cawerimatc Kice Manitowa kaie wir tipirawe opactatowin kitci kasihikaterik, nama tepirak kaskina iriniwa opactatowiniw.

⁴ Nama awik wir tipirawe kata ki orapamitiso kitci kitci makatewokorewitc, patoc Kice Manitowa orapamikote, mitowi weckatc Aaron ka ki orapamakaniwitc kitci kitci makatewokorewitc.

⁵ Peikon kaie wir Krist nama wir tipirawe ki otci orapamitiso kitci kitci makatewokorewitc. Kice Manito ka ki orapamatc, e itatc: “Kir ni Nikosis. Aci anotc nin Kotawi.” Psaumes 2.7

⁶ Kaie ohweriw ki itew: “Kakike ki ka makatewokorewin, mitowi weckatc Melkisédec ka ki ici makatewokorewitc.” Psaumes 110.4

⁷ Mekwata ota askik e pimatisispan Cecoc, mitcetwaw ki aiamihaw kirika ki pakoserimew Kice Manitowa, anihi wircike ke ki wikotcihikotc, aka kitci pakiterimikotc kitci nipotc. E apitc arimeritakipan ki notakosiw kaie ki mato. Ki tca natotako osam mocak e ki natotawatc kaie e ki kicterimatc.

⁸ Misawatc e Otawitc Kice Manitowa, ki iti kiskeritam kaie wir kitci natotawatc, osam mekwata kaskina ka nekatcitatc.

⁹ Ka ickwa kiskeritakositc tekaci e mirwasitc, ki mirakaniwiw kakike kitci ki akwacimatc kaskina iriniwa ka natotakotc.

¹⁰ Ki mirikopan meka Kice Manitowa kitci kitci makatewokorewitc, mitowi weckatc Melkisédec ka ki makatewokorewitc.

Aiekwamisikw aka kitci pakiteritamekw kitapwetamowiniwaw

¹¹ Mitcet ke ki itwaniwok anahwe otci, ariman aric kaskina wewerita kitci ki arimotamatak, aka wipatc e nisitotamekw.

¹² Aci ki ta kackitanawaw kirawaw tipirawe kitci kiskinohamawekok kotakihik iriniwok. Nama aric moci nte icinakon. Kiapatc actew kitci kiskinohamakoiekw nictam ka ki ici witamakoiekw Kice Manito otipatcimowin otci. Mia peikon awacic e iteritakosiekw, aka moci ka kackitatc e mitcik mitcimiriw, patoc kiapatc tcotcocanaporiw e minihakaniwitc.

¹³ Anahwe ka otci pimatisitc tepirak tcotcocanaporiw, kiapatc awaciwiw. Nama moci kiskeritam pitoc e icinakonik icikowisk kaie ka maratanik.

¹⁴ Aric mitcim mirwacin ka kiceatisitcik e mitcitcik. Aci weckatc otci pe pimatisiwok, kaskina aci nakatcitawok, e kiskeritakik kaie e nisitowinakik pitoc e icinakonik ka mirwacinik kaie ka maratanik.