Hébreux iriniwok 4 - Kice Manito Ocki Omirwatcimowin

¹ Kice Manito ki nespi tapwew weckatc iriniwa otci, e ki itatc kitci pitakahatc ka ki ocitatc ke ki ici arwepiritci. Kaie kirano kaskina e taciikw nespi tapwew kirano otci. Ki ka tca aiekwamisinano kaskina e taciikw kitci iteritakosiikw kitci ki pitakeikw neta ke ki ici arwepiikw.

² Ki ki tipatcimoctakowinano Kice Manito Otitewin, mia peikon weckatc ka ki ici tipatcimoctawakaniwitcik aniki iriniwok mekwata ka taciketcik neta askik ka ici cipewatawokarik. Aniheriw tipatcimowiniw nama wiec ki otci witcihikowok, osam aka e ki otci nahitakik kitci tapweritakik.

³ Kirano tca ka tapweritamokw ki ka pitakanano neta ke ki ici arwepinaniwok. Ki itepan meka Kice Manito e arimomakopanen anahweriw aka ka tapwetakotc, e itetc: “Mekwata ka kiciwasictowakik aniki, ni ki nespi tapwan, e iteian: Nama wiskat kata pitakewok neta tacikewinik ka ki ocitowakik ke ki ici arwepitcik.” Psaumes 95.11 Ki itew aniheriw, misawatc aci e ki ickwa kictaspan otamirowin apitc ka kiceritak askiriw.

⁴ Wiec meka masinateriw omasinahikanik, ohweriw e arimotcikaterik e ickwa nicowaso kickokarik ka kiceritak askiriw: “Kice Manito ki arwepiw ka ickwa nicowaso kickokarik ka ickwa kictatc kaskina otamirowin.” Genèse 2.2

⁵ Kaie itasinatew ohwe: “Nama wiskat kata pitakewok neta tacikewinik ka ki ocitowakik ke ki ici arwepitcik.” Psaumes 95.11

⁶ Aniki nictam e petakik Kice Manitowa Otitewiniw, nama ki otci pitakewok neta arwepiwinik. Nama meka ki otci natotamok. Aric meckota kotakihik kata ki pitakewok.

⁷ Aniheriw ka ickwa itetc Kice Manito kiapatc ki orapatam peikw e kicikarik ka icinikaterik “anotc.” Minawatc ki mirew Okimaw Tapita kitci aiarimotamiritci kitci masinahamiritci wir e ici nataweritak, e itasinaterik aci ka ickwa iteian: “Kecpin e petawekw Kice Manito anotc e aimihitakw, aka anweritamokw kitci nisitotamekw.” Psaumes 95.7-8

⁸ Weckatc Josué ki iciwirekopan kitaniskotape kimocominana ocki askik, nama aric ki otci miskamok kitci arwepitcik. Ekoni wetci Kice Manito ki arimotak kotakeriw e kicikarik kitci otitikotcik.

⁹ Ki kiskeritenano tca Kice Manito otirinima nikotin kitci ki pe otitikoritci kitci arwepiritci, mia wir e ki arwepitc ka ickwa nicowaso kickokarik, ka ickwa kaskina kiceritak.

¹⁰ Kaskina awik meka ke pe otitikotc Kice Manitowa otarwepiwiniw kata arwepiw ickwa kictate otamirowin, mia peikon Kice Manito e ki arwepitc ka ickwa kictatc otamirowin.

¹¹ Mantokasotan tca kitci pitakeikw neta ke ki ici arwepinaniwok, aka tca kitci pakiciniikw, kaie aka kitci itatisiikw mia aniki weckatc kitaniskotape kimocominowok aka e ki otci natotakik ka itikotcik.

¹² Pimatisimakaniw meka Kice Manito Otitewin kaie mackawisimakaniw, tarasak kirawe e kinak kaie tca mokoman ka kinwapiskak e aitowi kinak. Kice Manito Otitewin tekaci icamakaniw iriniwa otehirik, mia mitowi mokoman e kotokocawaniwok, icamakaniw wawatc iriniwa otehirik kirika pitakamik otcitcakocik. Wapatahiwemakaniw kaskina e ici nataweritakik iriniwok otehiwak kaie e ici mitoneritakik.

¹³ Nama takoniw ke ki katowakaniwitc Kice Manito. Kaskina wapatam ka ki ici kiceritak kirika ki capo kiskerimikono atamik e aiteritamokw. Wir kaskina ki ka witamawano wetci ki ici itatisiikw.

Cecoc, enko na ka kitci makatewokorewitc, wir e mawotci kicteritakositc

¹⁴ Kaketin kanaweritetan anihe kitasperimowinino ka pa tipatatamokw. Taw meka kitci makatewokorew ka mawotci kicteritakositc mocak ke witcihitokw, aci wakwek ka ki ocpickatc kitci witcewatc Kice Manitowa. Enko anahwe Cecoc, Kice Manito Okosa.

¹⁵ Nama nte iteritakosiw anahwe kikitci makatekoremino mia awik aka ka kackitatc kitci nisitotak tan e ici arimipariikw aka e mackawisiikw. Anahwe kikitci makatekoremino ki kokwetcihakaniwiw kitci pactatitc kaie wir mia kirano, wir aric nama ki otci pactatiw.

¹⁶ Nama tca actew kitci cakwerimoikw kitci pakoserimokw Kice Manito e aiamihaikw, anahwe ka mirotehetc, e sakihitokw kotc e icinakosiikw. Ki ka mirikono kasihamakewiniw kaie mirotehewiniw, kitci witcihitokw tatwaw ke nataweritamawokw kitci witcihitokw.