Hébreux iriniwok 3 - Kice Manito Ocki Omirwatcimowin

Cecoc kirawe kicteritakosiw patok Moïse

¹ Ekoni wetci iteian, niwitcicanak, kirawaw ka tiperimitakw Kice Manito kaie ka ki wicamitakw “otirinima” kitci iterimitakw: mamitonerimakw Cecoc, anahwe ka ki pe iciticohikotc Kice Manitowa kirika ka ki mirikotc “kitci makatewokorew” kitci iteritakositc asperimowinik itekera. Enko anahwe ka tipatcimakitc e asperimototawakitc.

² Mocak ki miro atoskectawew Kice Manitowa Cecoc, anihi ka ki orapamikotc kitci itotisketc, mitowi Moïse mocak ka ki totak ka ki ici mirakaniwitc kitci itotisketc, kitci atoskectawatc Kice Manito otirinima.

³ Kirawe tca iteritakosiw Cecoc kitci kicterimakaniwitc patok Moïse. Itwaniwon meka: “Anahwe ka maniketc kirawe kicteritakosiw patok omanikan.”

⁴ Tato meka mikiwam ka ocitakaniwok, taw awik ka ocitatc. Wir aric tipirawe Kice Manito ki ocitaw kaskina kekociciriw.

⁵ Weckatc anahwe Moïse mocak miro atoskectawekopan Kice Manitowa, e witcihakopanen Kice Manito otirinima, mia peikon mikiwam e ki ocitakaniwok e iteritakositcik, Kice Manito wir tipirawe e ki ocitatc. Moïse tca, mia peikon e ki atoskectaketc neta mikiwamik, e ki mirakaniwitc kitci arimotak Kice Manitowa ka wi iteritci.

⁶ Kirawe aric wir Krist kicteritakosiw patok Moïse. Enko na Kice Manito Okosa, ka miro mitatc aniheriw omikiwam, ota ka arimotcikaterik, kaskina e totak ka ici mirakaniwitc kitci itotisketc. Kirano tca, tarasak omikiwam e iteritakosiikw, kecpin mocak sokerimoikwe kaie asperimoikwe, kotc e ici tipatatamokw.

Kice Manito nikotin kata mirew kaskina otirinima kitci arwepiritci

⁷ Mamitoneritamokw tca ohwe ka itasinatek, Miro Manito ka ititokw: “Kecpin e petawekw Kice Manito anotc e aimihitakw,

⁸ aka anweritamokw kitci nisitotamekw, mitowi kitaniskotape kimocomiwawok ka totamwakopanen, aka ka ki otci natotakik mekwata e pimatisiwakopanen neta askik ka ici cipewatawokarik.

⁹ Kice Manito itew: Kitaniskotape kimocomiwawok nama ki otci ponitawok e nosanehakik pactatowiniw, e wi nta kiskerimiwaspan irikik ke asitci ciciperitamwak epwamoci anwerimakik, misawatc e ki wapatakik kaskina ka totamwak nemitana tato pipona irikik otananik.

¹⁰ Ekoni wetci ki kiciwasictowakik, e iteian: ‘Nama ponitawok e onicikik otehiwak. Nama ki otci nisitotamok e ici pehikwapan kitci totakik.’

¹¹ Mekwata tca ka kiciwasian, ni ki nespi tapwan, e iteian: ‘Nama wiskat kata pitakewok neta tacikewinik ka ki ocitowakik ke ki ici arwepitcik.’” Psaumes 95.7-11

¹² Niwitcicanak, aiekwamisikw kaskina neta e taciekw, aka kitci matciteheiekw, aka kitci anweritamekw, kaie aka kitci atimikapowictawekw Kice Manito ka pimatisitc.

¹³ Tato kickwa tca wawitcihitokw kitci sokiteheiekw, kotc e ici nisitotakok anihe e itwaniwok “anotc,” aka tca otci peikw neta e taciekw kitci anweritak kitci nisitotak, kaie aka kitci pakiterimitisotc kitci wecimikotc pactatowiniw.

¹⁴ Tapwe wirata, ki witcewanano Krist, kecpin kaketin kanaweritamokwe kitasperimowinano, nac kitci ickwa pimatisiikw, anihe asperimowin ka ki ici tatamokw ka ki otci kitciparik e tapwetowokw.

¹⁵ Enko ohwe e itasinatek Kice Manito Omasinahikanik: “Kecpin e petawekw Kice Manito anotc e aimihitakw, aka anweritamokw kitci nisitotamekw, mitowi kitaniskotape kimocomiwawok ka totamwakopanen, aka ka ki otci natotakik.” Psaumes 95.7-8

¹⁶ Awin aniki ka ki petawatcik Kice Manitowa e aimihikotcik, kaie aka ka ki otci natotawatcik ka itikotcik? Enko aniki kaskina weckatc Moïse ka ki ocimohatc neta Égypte askik.

¹⁷ Awiriw ka ki kiciwasictowatc Kice Manito nemitana tato pipona irikik? Enko anihi kaskina peikon iriniwa ka ki pactatiritci kaie arotcikotc ka ki nipotcik neta askik ka ici cipewatawokarik.

¹⁸ Awiriw ka aimihaspan Kice Manito, ka nespi tapwetc e itetc: “Nama wiskat kata pitakewok neta tacikewinik ka ki ocitowakik ke ki ici arwepitcik”? Enkweriw peikon ka arimomatc, anahweriw iriniwa aka ka ki otci natotakotc.

¹⁹ Ki kiskeritenano tca aka e ki otci iteritakositcik kitci pitaketcik neta tacikewinik Kice Manitowa ka ki ocitakotcik ke ki ici arwepiwaspan, osam aka e ki otci tapwerimatcik Teperitcikeritci.