Hébreux iriniwok 2 - Kice Manito Ocki OmirwatcimowinMackawisimakaniw e ki akwacimitokw Teperitciketc 1 Ekoni wetci actek wawatc kirawe awocamec kitci miro natotamokw tapwewin ka ki ici petamokw, aka kekocic kitci oniwirikoikw. 2 Aniheriw tipatcimowiniw weckatc aceriwok ka ki petatcik iriniwa otci ki tapwemakan kaie tatwaw iriniwok aka ka ki otci pameritakik kaie aka ka ki otci natotakik, ki nta kackitamatisowok kitci anweritakositcik. 3 Kirano tca anotc, nama ki kackitanano kitci ocimohitisoikw ka ki ici kackitamatisoikw ke ici anweritakosiikw, kecpin aka pameritamokwe ka wi mirikoikw kitci ici akwacimikoikw. Wir meka Teperitciketc Cecoc tipirawe wirctam ki tipatcimo ohweriw tipatcimowiniw, minawatc kaie aniki ka ki petawatcik kaie wirawaw ki witamok e ici kicteritakosiritci. 4 Kaie wir tipirawe Kice Manito ki ki wapatahikono tapwe e icinakonik, e mamiskasinakonik kaie e ki matawi aitotak acitc e ki mamiratc otirinima Miro Manitowa ocaweritcikewiniw kotc e ici nataweritak kitci totak. Cecoc ki nipo kaskina awiriw otci 5 Namaieriw aceriwa Kice Manito ka ki miratc kitci tiperitamiritci neta ocki askik ke takonik nikanik, anotc ka arimotaman. 6 Aric itasinatew wiec Kice Manito Omasinahikanik: “Kice Manito, ki mamiskateritakosin e apitc mamitonerimatcik iriniwok! E apitc kicterimatcik e iriniwitcik, ki miro nakatawerimawok. 7 Kaie memacic ki ki mirawok iriniwok tapickotc kekatc aceriwok kitci asiteritakositcik. Ki ki mirawok icperitakosiwiniw kirika kicteritamowiniw. 8 Ki ki mirawok kaskina kekociciriw kitci tiperitakik.” Psaumes 8.5-7(4-6) E itasinatek neta Kice Manito e ki miratc iriniwa kitci tiperitamiritci kaskina kekociciriw, wi itemakan, tekaci nama takoniw kekociciriw aka ke tiperitamiritci. Anotc aric mekwata nama moci ki wapatenano e ki isparinik, aka moci kaskina e tiperitak iriniw. 9 Aric ki ketcinaweritenano ohwe ka ki pe iciwepak: Cecoc ki mirakaniwiw kitci pe iriniwitc, memacic aka kitci asitci kicteritakositc kirika aceriwok, kitci ki nipotc kaskina iriniwa otci, e ki ici cawerimikotc Kice Manitowa e miroteheritci. Anotc aci ki wapatenano e ki mirakaniwitc icperitakosiwiniw kirika kicteritamowiniw, osam e ki nekatcitatc kirika e ki nipotc. 10 Tapwe wir Kice Manito ka kiceritak kaskina kekociciriw kirika kaskina takoniw kitci ki otci kicterimakaniwitc. Ekoni wetci ki miratc Cecoca tekaci kitci mirwasiritci osam e ki nekatcitaritci, mitcet tca nta e taciritci onitcanica kaie wirawaw kitci ki icperimakaniwitcik kirika wir. Wir meka Cecoc ka nikanickowatc kitci akwacimakaniwiritci. 11 Cecoc, anahwe ka ki totak kaskina iriniwok kitci kasihamawakaniwitcik opactatowiniwaw kitci ki tca pekitehetcik, acitc peikon kaie wirawaw kaskina ka ki mirakaniwitcik kitci mirwinakositcik otehiwak, kaskina tapickotc otawiwok Kice Manitowa. Ekoni wetci aka waneritak Cecoc kitci icinikatatc anihi iriniwa “niwitcicanak.” 12 Tapwe ki itew Cecoc: “Kice Manito, e aimihakik niwitcicanak, ki wi arimomitin. Ki ka mirwatcimitin mawotcihitoake.” Psaumes 22.23(22) 13 Kaie itew: “Ni ka asperimototawaw Kice Manito.” Ésaïe 8.17 Kaie kiapatc itew: “Kanawapamicikw, kirika enko aniki awacak Kice Manito ka ki cawerimitc.” Ésaïe 8.18 14 Ohki awacak e arimomakaniwitcik ota, iriniwiwok e owiawitcik kaie e omikotcik. Cecoc wir tipirawe ki iriniwihitiso mitowi wirawaw, tapickotc kitci ki iriniwitcik. Ekoni tca wetci, ki nipotc, ki otci cakotcihew Matci Manitowa, anihi ka kackitaritci kitci nipaharitci iriniwa. 15 Kirika kaskina ki wikotcihew iriniwa mocak ka ki koctamiritci nipowiniw irikik ka pimatisiritci. Tarasak tiperitakosiwakopan neta e koctakwapan. 16 Tapwe, namaiew aceriwa ka pe nta witcihatc. Abraham aric otaniskotape osima ka pe nta witcihatc. 17 Ekoni wetci acterik kitci icihitisotc irinik kitci icinakositc, “niwitcicanak” e iterimatc owitc iriniwa, kaie kitci ki iteritakositc okitci makatewokoremiwawa, e mirotehetc acitc mocak ke ki asperimototawakaniwitc kitci atoskectawatc Kice Manitowa wirawaw otci. Ekoni ka totak kitci ki kasihamawakaniwitcik iriniwok opactatowiniwaw. 18 Minawatc ekoni wetci kackitatc kitci pe nta witcihatc anahweriw ka kokwetcihakaniwiritci kitci matci totamiritci, osam wir tipirawe e ki kokwetcihakaniwitc kirika e ki nekatcihakaniwitc. |
Canadian Bible Society, 2014
Canadian Bible Society