Hébreux iriniwok 1 - Kice Manito Ocki Omirwatcimowin

Kice Manito kit aimihikono

¹ Weckatc Kice Manito mitcetwaw aimihekopan kitaniskotape kimocominowa, kaskina wiec kaie, e ki pe iciticohwatc mitcet ka ki pe nikan tipatcimoritci, e ki miratc ke ici witamawaritci kitaniskotape kimocominowa.

² Aric anotc, aci e peconakok kitci ponaskiwok, Kice Manito kit aimihikono, e ki pe iciticahamatokw Okosa kitci aimihitokw. Enko anihi ka ki witcihikotc ka kiceritak kaskina e takonik acitc e taritci e irikokoskamikarik, kirika wir ka ki orapamatc kaskina kitci tiperitamiritci.

³ Cecoc wapatahiwew e apitc kicteritakosiritci Otawiwa Kice Manito. Kaskina e iteritakosiritci Otawiwa, ekoni kaie wir mia e iteritakositc. Tiperitam kaskina e ici takonik e irikokoskamikarik kaie tiperimew kaskina ka pimatisiritci, otitewin e totak e mackawisimakanik. Ka ickwa pakiteritak opimatisiwin kitci ki otci kasihikaterik kaskina iriniwa opactatowiniw, ki nta witapimew Otawiwa ka mawotci kicteritakosiritci wakwek, onihiwinik e ici apitc.

Cecoc kirawe kicteritakosiw patok kaskina aceriwok

⁴ Kirawe tca ki iti kicteritakosiriw Kice Manito Okosa patok kaskina aceriwa. Peikon kaie ki mirakaniwiw icinikasowiniw kirawe e kicteritakonik patok aceriwok oticinikasowiniwawa.

⁵ Nama meka wiskat ki otci itew Kice Manito otacerima: “Kir ni Nikosis. Aci anotc nin Kotawi.” Psaumes 2.7 Nama kaie ohweriw ki otci itew aceriwa otci: “Nin Otawiwa, wir kaie tipirawe Nikosis.” 2 Samuel 17.14; 1 Chroniques 17.13

⁶ Aric apitc ka iteritak Kice Manito kitci pe iciticohwatc ota askik Okosa nictam ka nitawikiritci, ki itew: “Acteriw kaskina Kice Manito otacerima kitci nipiskoctawatcik e kicterimatcik.” Deutéronome 32.43

⁷ Enkweriw ka aitetc Kice Manito, aceriwa e ki arimomatc: “Kice Manito iciticahwew otacerima, mitowi e mirowerik kitci icinakosiritci. Iciticahwew kitci atoskectakotc, mitowi ickote kitci icinakosiritci.” Psaumes 104.4

⁸ Aric Okosa ka arimomatc, enkweriw ka itetc: “Kir, Kikice Manitowin. Kakike ki ka okimawin. Icikowisk ki tiperimawok kitirinimak kokimawinik.

⁹ Ki sakitatai icikowisk ka icinakok. Ki cikeriten ka maratak. Ekoni wetci Kice Manito, Kikice Manitom, ki orapamisk e ki sikinik okitc kictikwanik pimiteriw kitci ki otci mireritaman, kirawe e kicterimisk patok kiwitcewakanak.” Psaumes 45.7-8(6-7)

¹⁰ Peikon Kice Manito itew Okosa: “Teperitcikein, nictam ka ki kiceritaman aski, kir tipirawe ka ki ocitain wakwek.

¹¹ Kaskina anihe nikotin nama kata takon, aric kir kakike mocak ki ka pimatisin. Aski kirika wakwek nikotin kata ickwa apatan, mia peikon kete wikasi ka ickwa apatak.

¹² Ki ka titipinen opimera kitci actain, mia mitowi kete kapotowan ka totcikatek, mitowi kaie e meckotaspisonaniwok. Aric kir mocak ekoni ke iteritakosiin, nama wiskat kata ickwaparin kipimatisiwin.” Psaumes 102.26-28(25-27)

¹³ Kice Manito nama wiskat ohweriw ki otci itew peikw otacerima: “Pe nta api ninihiwinik, nac kitci tepahakik ka cikerimiskik, kir tekaci kitci tiperimatcik.” Psaumes 110.1

¹⁴ Ekoni tca e irapatisitcik aceriwok: enko aniki manitowok ka atoskectawatcik Kice Manitowa, ka iciticohwatc ota askik kitci nta witcihatc kaskina ke mirakaniwitcik kitci akwacimakaniwitcik.