Éphèse iriniwok 6 - Kice Manito Ocki Omirwatcimowin

Awacak acitc onikihikowawa

¹ Minawatc kirawaw awacak: actew anotc e tapwerimekw Teperitciketc kitci sapitowekok kinikihikowawok. Ekoni meka icikowisk e ici pimatisinaniwok.

² Enko ohwe peikw irakonikewin, nictam e nespi tapwemakak aniki otci ka nosanetatcik, e itemakak: “Kicterimik kinikihikok,

³ kitci ki mireritaman acitc kinowec kitci pimatisiin ota askik.” Exode 20.12; Deutéronome 5.16

⁴ Minawatc kirawaw otawiwok: ki ta miro mihawawok kinitcaniciwawok, aka tca kitci cakateritamihatcik. Aric wewerita ki ka kiskinohamawawawok; kirika ki ka kakeskimawawok, kecpin aka mia e itatisitcik kotc e ici nataweritamiritci Teperitcikeritci.

Arotakanak acitc ka tiperitakik

⁵ Kirawaw arotakanak: ki ta sapitowawaw awik ka tiperimitakw ota askik, kitci tipaterimitisoekw e atoskectawekw, mocak e kicterimekw, kaie kitehiwak kitci otciparik e miro atoskectawekw, mia tarasak Krist e atoskectawekw.

⁶ Aka tepirak e wapamikoiekw sapitowakw kitci mirwatcimikoiekw. Aric e irikokoteheiekw itotiskekw aniheriw e iteritak Kice Manito, mia mitowi arotakanak e iteritakosiekw Krist otci.

⁷ Mireritamokw e otamiroiekw, mia tarasak wir tipirawe Teperitciketc e atoskectawekw, nama tepirak iriniwok.

⁸ Aka onikekw ohwe: kaskina awik kata tapictako Teperitcikeritci, misawatc e arotakaniwitc kekotc ma e tiperitak. Aniheriw kata kanawapatcikateriw ka ki pe ici miro totak.

⁹ Minawatc kirawaw ka tiperitamekw: peikon ki ta miro mihawok kitarotakaniwawok. Nama wiskat ki ta kokwectasimawawok. Aka onikekw e tatc awik tapickotc e Tiperimitakw acitc aniki kitarotakaniwawok, wakwek e taciketc. Nama meka kirawe kicterimew atita iriniwa patok kotakihi.

Ke ici naskwakewakeikw aka kitci cakotcihitokw Matci Manito

¹⁰ Ohwe mamitcitc ki witamatinawaw: pakitinakw Teperitciketc kitci sokiteheckatakw, omackawisiwin e micta kice micarik kitci apatcitaiekw, aci e mamweritakosiekw kirika wir.

¹¹ Otapinamokw kaskina aniheriw ka ici pakitinak Kice Manito kitci naskwakewakeiekw, kitci ki sokerimoekw kaie kitci sokikapowiekw, kaskina wiec e wi natowi totak Matci Manito kitci ki oniwiritakw.

¹² Namaiew meka iriniwok ota askik ka wi cakotcihitokok. Kirawe aric manitowok ka matci apatcitatcik omackawisiwiniwaw, waskok e otciparitcik, acitc ka nikaniwitcik, ka kackitatcik kaie ka tiperitakik ota ka ici kiski tipiskarik.

¹³ Ekoni wetci actek kitci matcikonamekw kaskina aniheriw ka wi miritakw Kice Manito kitci ki nanakaskohwekw anahwe ka wi cakotcihitakw, tatwaw ke arimihitakw. Minawatc kaskina ickwa nanakaskweiekwe, peikon kitci sokikapowiekw.

¹⁴ Nisawikw tca kitci sokikapowiekw. Mitowi cimakanic wewerita e wespisotc kitci nta natoparitc, e piskak aniheriw ke apatcitatc owikasim, kitci ki ickwa aiketc kitci cakotcihatc anahweriw ka wi macikakotc, ekoni ke totamekw kaie kirawaw kitci sokikapowiekw. Mia mitowi e opokotehonitc cimakanic, kirawaw Kice Manito otapwewin ki ka apatcitawanawaw. Kaie mitowi piwapisko papakiwaniw e piskak cimakanic, kirawaw ki ka miro nanakatisinawaw, mocak kitci itotiskeiekw e ici nataweritak Teperitciketc.

¹⁵ Minawatc mitowi e micta sokarik omaskisin e piskak cimakanic, kirawaw e irikokoteheiekw ki ta tipatatenawaw Mirwatcimowin, anihe ka otci pekateritcikatek.

¹⁶ Minawatc kaie mocak ki ka asperimototawawaw Kice Manito. Nama kata kackitaw Ka Matcatikositc kitci cakotcihitakw e monewohotakw. Ekoni meka e irapatak tapweritamowin, mitowiriw aniheriw ka takonak cimakanic e nanakaskohikewaketc kitci actawehwatc pikokwa ka iskohwakaniwiritci onoskotc e motokwatakaniwitc.

¹⁷ Mitowi kaie e piskak otactotin ka mackawarik cimakanic, ki ka matcikonenawaw tapwe e ki akwacimikoiekw. Matci kaie ki ka matcikonenawaw Kice Manito otitewin, Miro Manito ka ki miritakw, mitowi cimakanic e omicta omokomanitc e nta natoparitc.

¹⁸ Minawatc kaskina anihe otci ki ka pakoserimawaw Kice Manito e aiamihaiekw. Tapwe wirata, kaskina wiec ki ka aiamihanawaw, Miro Manito e witcihitakw. Nanakatisikw kaie akawir ponitakw e aiamihectamowimekw kaskina e taciritci Kice Manito otirinima.

¹⁹ Aiamihectamacikw kaie nin, mocak kitci miritc Kice Manito aniheriw mia ke itewak arimweiane, kirika tekaci aka kitci koctatcian kaie aka kitci cakwerimoan e kiskeritamihakik iriniwok aniheriw Mirwatcimowiniw weckatc ka katcicterikipan.

²⁰ Ekoni meka wetci kipohokoian ota anotc. Aiamihectamacikw tca wewerita kitci tipatataman anihe, tekaci kitci sokeritaman, kotc e actek kitci itotiskeian.

Mamitcitc e arimikowatc okwimesa Pwar

²¹ Miro kiwitcicanino Tychique ka sakihakitc, kaie wir e atoskectawatc Teperitcikeritci, mocak kaie ke ki asperimototawakaniwitc, kaskina ki ka witamakowaw tan e iciwepasiwak, kitci ki kiskeritamekw e iti aitiwak.

²² Ekoni wetci iciticohwak anahwe, kitci witamatakw tan e aiciwiak kirika kitci ki kakisomitakw.

²³ Ni pakoserimon Kotawino Kice Manito acitc Teperitciketc Cecoc Krist kitci acotamawatcik kaskina ka tapwerimikotcik kiwitcicaninowa pekaterimowiniw, sakihiwewiniw acitc tapweritamowiniw.

²⁴ Ni pakoserimaw Kice Manito kitci cawerimatc omirotehewin kaskina awiriwa aka wiskat e ickwaparinik aniheriw osakihiwewiniwaw Cecoca otci, anihi Ka Tiperimitokw. Nin Pwar