Éphèse iriniwok 5 - Kice Manito Ocki Omirwatcimowin

E waseak kitci ici pimatisinaniwok

¹ Kit iteritakosinawaw Kice Manito onitcanica, e sakihitakw. Mantokasokw tca kitci ici pimatisiekw mitowi wir.

² Mocak sakihakok kiwitc iriniwawok, mia Cecoc Krist ka ki asitci sakihitokw. Ki pakiterimitiso meka kitci nipahakaniwitc kirano otci, kitci ki mireritamihatc Kice Manitowa, mitowi ka totcikatek ka aiamihe pakitinikaniwok, ka sasakewotcikaniwok Kice Manito otci.

³ Kice Manito otirinima kit iteritakosinawaw. Tekaci tca nama actew kitci takok pacikwatisiwin, matci pimatisiwin kekotc marisiwin neta kipimatisiwiniwak, aka wawatc kitci takok ke ki otci marerimikoiekw.

⁴ Aka kaie kitci maratwaniwok, kitci kiwockwe arimwaniwok, acitc kitci matci arimwaniwok. Kirawe kata mirwacinopan kitci nanaskomekw Kice Manito.

⁵ Wewerita ohwe kitci kiskeritamekw: awik ko ka matci totak, mocak ka pacikwatisitc, kekotc ka monihowetc, nama wiskat kata takoniw Okimawiniwariw Krist acitc Kice Manito. —Awik meka e monihowetc, tarasak e omanitomiwaketc ocoriam.—

⁶ Aiekwamictowakw awik ka wi paciwiritakw, ohweriw e aitetc: “Nama ni orina wiec ici pataham awik ani e totak.” Enkweriw meka towiriw patahamowiniw ka otci kiciwahikotc Kice Manito anahweriw iriniwa ka atimikapowictakotc.

⁷ Tekaci aka pamerimakok aniki towihik.

⁸ Tarasak weckatc ki pe kiski tipiskipitawaw. Aric anotc aci e mamweritakosiekw kirika Teperitciketc, tarasak waseaw e ici tacikeiekw. Ki ta itatisinawaw tca kotc e itacterik kitci ici pimatisitcik e ici wasearik.

⁹ Ani e ici pimatisinaniwok e ici waseak, ekoni ka otci takok kaskina ka mirwacik, icikowisk itatisiwin acitc tapwewin.

¹⁰ Nanto kiskeritamokw mocak tan e ici nataweritak Teperitciketc.

¹¹ Tekaci aka nosanetawakw aniheriw ka totakik aniki ka matci totakik, aka wiec e irapatanik, tarasak e kiski tipiskarik e taciketcik e iteritakonik. Ekoci aric witamokw aka e mirwacinik.

¹² Waneritakoniw wawatc e arimotcikaterik aniheriw kimotc ka aitotakik.

¹³ Aric kecpin wewerita e nokotakaniwok e ici waseak, ani ka aitotcikatek, aci nte wewerita wapatcikatew tan mia e icinakok.

¹⁴ Kaskina meka ka nokotakaniwok e ici waseak, minawatc kaie iti wactenamakew. Ekoni wetci itwaniwok: “Onicka, kir ka nipain, Pasiko, kir ka ki nipoin, Krist ki ka wactenamakw.”

¹⁵ Wewerita nanakatcihitisokw, icikowisk kitci ici pimatisiekw. Aka keskinowapamakok aniki aka kekociciriw ka kiskeritakik. Mia mitowi ka omiro omitoneritcikanitcik ki ka itatisinawaw.

¹⁶ Ekoci mocak miro totamokw, kotc ke iti aiciwiekw. Mitcen meka ka maratak ka makockatcitakaniwok anotc mekwata.

¹⁷ Ekoni wetci iteian aka kitci kiwockweritamekw, aric mocak nta kitci wikokwe nisitotamekw tan e ici nataweritamatakw Teperitciketc.

¹⁸ Aka kiwockweparitisokw. Kecpin meka nipara minicapo e minikweiekw, otcitakotc ki ka onactamatisonawaw kipimatisiwiniwaw, tekaci kitci oniciniekw. Aric mirakw Miro Manito kitci mockineckatakw.

¹⁹ Wawitcihitokw kitci sokiteheiekw, weckatc nakamowina Kice Manito Omasinahikan e takonik e nakamoiekw, aiamihe mirwatatamo nakamowina acitc kotakihi nakamowina. Nakamoctowakw Teperitciketc, e irikokoteheiekw kitci mirwatcimekw.

²⁰ Mocak kaskina kekocic otci mikwetc ki ka itawaw Kotawino Kice Manito, anahwe Ka Tiperimitokw Cecoc Krist oticinikasowin otci.

Ka nipowitcik

²¹ Pakiterimitisokw kitci natotatoekw, osam meka e kicterimekw Krist.

²² Kirawaw iskwewok ka nipowiekw: tato nta e taciekw kata pakiterimitiso kitci natotawatc onapema, mitowi Teperitcikeritci e natotawatc.

²³ Iriniw meka ka mihatc owiwa, mitowi Krist e tiperimatc kaskina anahweriw ka tapwerimikotc. Wir meka Krist ka ki akwacimatc anahweriw kaskina ka tapwerimikotc, mia tipirawe owiaw e iteritakosiritci.

²⁴ Ekoni tca wetci nataweritakositcik iskwewok, tato neta e tacitcik mocak kitci pakiterimitisotc kitci natotawatc onapema, mitowi kaskina ka tapwerimatcik Krist e ici nataweritakositcik kitci pakiterimitisotcik kitci natotawatcik.

²⁵ Minawatc kirawaw iriniwok ka nipowiekw: tato neta e taciekw kata sakihew otiskwema, mitowi Cecoc Krist ka asitci sakihatc anahweriw ka tapwerimikotc, kirika ka pakiterimitisotc kitci nipahakaniwitc wirawaw otci.

²⁶ Wetci ki totak aniheriw, kitci ki tipi iteritakosiritci, Kice Manito otirinima kitci iteritakosiritci, tekaci e ki mirwinakohatc otehiwarik, nipiriw acitc otitewin e ki apatcitatc.

²⁷ Nataweritamopan Krist wir tipirawe kitci pe icikapowictakotc otirinima tekaci e mirosiritci, aci tekaci e mirwinakosiritci otehiwarik, aka e atameritakosiritci, kaie aka tekaci e takonik ka maratanik, kaie aka e pikockakoritci pactatowiniw, aka wiec e ici patahamiritci.

²⁸ E asitci sakihitisotc iriniw, ekoni peikon ke asitci sakihatc owiwa. Anahwe ka sakihatc owiwa, sakihitiso.

²⁹ Tapwe wirata nama wiskat awik ki otci cikerimitiso, aric acamitiso, mihitiso, tarasak mia Cecoc Krist e totatokw kaskina ka tapwerimokw,

³⁰ mia meka owiaw tapickotc e iteritakosiikw.

³¹ Itemakan meka: “Ekoni wetci acterik iriniw kitci nakatatc otawiwa acitc okawiwa, kitci nta witci tacikematc owiwa, kitci mamweritakositcik. Mia peikw kata iteritakosiwok.” Genèse 2.24

³² Anihe ka masinatek, kitci tapwewin otci kiskeritakon, weckatc ka katcictekipan. Nin e ici nisitotaman, arimomakaniwiw neta Krist acitc e totak otirinima otci.

³³ Peikon aric e ici nataweritakosiekw kaie kirawaw: tato iriniw neta e taciekw kitci sakihatc owiwa, mia e asitci sakihitisotc. Tato iskwew kaie kitci kicterimatc onapema.