Éphèse iriniwok 4 - Kice Manito Ocki Omirwatcimowin

Mia Cecoc owiaw e iteritakosiikw

¹ Ki pakoserimitinawaw tca, nin e kipohokoian osam e atoskectawak Teperitciketc, otcitakotc icikowisk kitci ici pimatisiekw, kotc ka ki wicamitakw Kice Manito kitci itotiskeiekw.

² Mocak tipaterimitisokw. Pekatisikw. Aka otake kiciwasikw. Wawitcihitokw e sakihitoekw.

³ Mantokasokw kaketin kitci wikokwe matcitaiekw mocak peikw kitci iteritakosiekw. Enkweriw meka pekateritamowiniw ka ki miritakw Miro Manito kitci ici mamweritakosiekw.

⁴ Peikw iteritakosiwok kaskina ka asperimototawatcik Cecoca, mia owiaw e peikocinik e iteritakositcik. Peikociw Miro Manito, peikon e peikocik anihe asperimowin ka ki wicamitakw Kice Manito kitci nosanetaiekw.

⁵ Peikociw anahwe Ka Tiperitciketc. Peikociniw tapwetamowin kaie sikahatakewin.

⁶ Peikociw Kice Manito, kaskina awik e otawiitc, kaie kaskina kekociciriw e tiperitak. Tan wa irapatcihatc kaskina awiriwa, ekoni e ici totawatc, kaskina kaie e witci tacikematc otehiwarik.

⁷ Aric tato neta e taciikw aci ki pe otitiko caweritcikaniw, kotc ka iteritamiritci Krist kitci cawerimikotc e micta miroteheritci.

⁸ Itemakan meka Kice Manito Omasinahikanik: “Ka ocpickatc, mitcet ki makonew ka kipohwakaniwiritci, acitc caweritcikaniw ki mirew iriniwa.” Psaumes 68.19(18)

⁹ Tan tca wa itemakak anihe “ki ocpickaw”? Ani e itwaniwok, ici nisitotakon kaie, e ki pe nitcickatc mawotci atamik askik.

¹⁰ Anahwe ka ki nitcickatc, enko na peikon ka ki ocpickatc neta mawotci icpimik wakwek kitci ki tca mockinak kaskina e irikokoskamikarik.

¹¹ Wir ka ki cawerimatc papeikw iriniwa ke ici kackitaritci. Atita ki mirakaniwiwok Cecoc otarotakana kitci irapatisitcik, kotakihik kitci pa tipatcimotcik Mirwatcimowiniw. Kotakihik kiapatc ki mirakaniwiwok kitci kikeskwetcik. Minawatc kotakihik ki iterimakaniwiwok kitci nikaniwitcik kekotc kitci kiskinohamaketcik Kice Manitowa otarimwewiniw.

¹² Wetci ki totak aniheriw Krist, kitci nisawihatc otirinima kitci miro atoskectatoritci wir otci, kirawe kiapatc kitci sokikapowiritci e mirokiritci otcitcakociwarik itekera.

¹³ Nac kaskina tapickotc ki ka pimotanano, tapickotc e asperimototawokw Kice Manito, kirika Okosa e kiskerimimokw. Ki ka kiceatisinano kitcitcakocinak itekera, nac tekaci icikowisk kitci itatisiikw mia Krist.

¹⁴ Nama tca awocamec mia awacak ki ka itatisinano. Nama aci ki ka otake cakosimikonowok aniki ka onicimiwetcik, arotc aiamihe kiskinohamakewiniw e kiskinohamaketcik. Kiraskimewok owitc iriniwawa tepirak e wi paskewiratcik. Kecpin meka otake cakosimikoikwe, tarasak mia tciman ka matceahotek, arotc ka aitactak e rotik, ekoni ke iteritakosiikw.

¹⁵ Pitoc aric kata icinakon kirano otci e aiarimotamokw tapwewin, mocak kaie e sakihiweikw. Kaskina ki ka mirokinano, kirawe eckam mia Cecoc Krist kitci itatisiikw, anahwe ka tiperimitokw.

¹⁶ Wir meka ka totak kitci mamweritakosiritci anahweriw ka tapwerimikotc, mia peikw e iteritakosiritci e witcihitoritci kaskina tapickotc kitci sokikapowiritci acitc kitci miroparihitoritci. Kecpin tca tato neta e tacitcik e miroparitcik, kaskina mamo mirokiwok kaie wawitcihitowok e sakihitotcik.

Ocki pimatisiwin, aniki otci ka nosanehwatcik Cecoca

¹⁷ Enko ohwe kaketin ka ici nataweritamatakok Teperitciketc otci: aka awocamec kitci totamekw iriniwok aka ka kiskerimatcik Kice Manitowa e totakik, arotc e aiteritakik.

¹⁸ Nama wikokwe nisitotamok. Nama ici tatamok aniheriw pimatisiwiniw Kice Manitowa ka pakitinamiritci. Nama meka kekociciriw kiskeritamok. Tekaci aka e wi ntotakik.

¹⁹ Nama wirawatc aci waneritamok e matci totakik. Ki pakiterimitisowok ka maratanik e nosanehitatcik, kaie eckam e nataweritakik kitci aitatisitcik.

²⁰ Kirawaw aric nama nte ki ki otci ici kiskinohamakowinawaw e arimomakaniwitc Krist.

²¹ Otcitakotc ki ki petakanawaw kaskina ka itatcimakaniwitc, kirika ka ki ici kiskinohamakowek aniheriw Cecoc otapwewiniw.

²² Ki ta tca meckotatisinawaw, tekaci e wepinamekw weckatc e itatisiekopanen. Oniwiritiso meka iriniw aniheriw itatisiwiniw, e micta wiecimikotc, e pasoweritak ka maratanik.

²³ Ki ta pakitinawaw Kice Manito tekaci kitci meckotcitatc e ici mosoweritamekw kitehiwak acitc e iteritamekw kimitoneritcikaniwak.

²⁴ Kweskatisikw, mia tarasak awik ka meckotcihotc e ki ometciwonik owikasim. Ki ki meka mirikowinawaw anihe ocki pimatisiwin mia wir Kice Manito kitci iteritakosiekw, icikowisk kitci itatisiekw, acitc kitci kitcitwawisiekw, tapwewinik kitci otciparik anihe kititatisiwiniwaw.

²⁵ Ekoni wetci actek kitci wepinamekw kiraskiwin! Mocak kitci wawitamatoekw tapwewin. Ki mamweritakosinano meka, mia peikw e iteritakosiikw.

²⁶ Kecpin kiciwasiekwe, aka pactatikw. Aka kinowec kiciwasikw, kitci actwerowesiekw epwamoci pakicimotc pisimw.

²⁷ Aka kaie mirakw Matci Manito ke ki otci kokwetcihitakw kitci pactatiekw.

²⁸ Anahwe ka kimotispan, patoc kata ponitaw e kimotitc. Kata nantowapatam kitci miro otamirotc, tipirawe otcitci kitci otamirowaketc kitci ki otci pimatisitc acitc kitci witcihatc ka kitimakisiritci.

²⁹ Aka wiskat apatcitakw matci itewina e arimweiekw. Tepirak miro itewina ka witcihiwemakaki ki ka apatcitanawaw, kitci ki witcihakaniwitcik kiwitc iriniwawok, kitci sosokimakaniwitcik, kotc e aiciwepasitcik. Ki ka tca mireritamihanawaw aniki ka ntotakik.

³⁰ Akawir kackeritamihakw Miro Manito. Wir anihi meka ka ki acotamatakw Kice Manito kitci ki kiskeritamekw otcitakotc nikotin kitci takociparinik aniheriw e kicikarik tekaci kitci wikotcihitakw.

³¹ Tekaci wepinamokw otameritamowin, cikeritamowin acitc kiciwasiwin. Nama actew kitci notakosinaniwok, aka kaie kitci marerimitonaniwok, tekaci aka kitci matcitwaniwok!

³² Miro totatokw kirika cawerimitokw kaskina e taciekw. Ponerimitokw ka ki ici matci totatoekw, mia Kice Manito ka pe iciticohatc Cecoca kitci kasihamatakw kipactatowinariw.