Éphèse iriniwok 3 - Kice Manito Ocki Omirwatcimowin

Ka mirakaniwitc Pwar kitci tipatcimotc aka ka cota iriniwitcik otci

¹ Ekoni wetci pakoserimak Kice Manito, nin Pwar. Ni kipohokowin ota, Cecoc Krist e atoskectawak, kirawaw otci aka ka cota iriniwiekw.

² Ki ki petakanawatake aniheriw e ki miritc Kice Manito kitci itotiskewak, kitci witcihitakok, e micta mirotehetc.

³ Ni ki wapatahikw aniheriw ka iteritakipan kitci totak ka katcicterikipan. Aci memantcic ni ki arimotamwan ota masinahikanik.

⁴ Kirika tapwatamekwe ki ka ki nisitotenawaw tapwe wewerita e kiskeritamwak aniheriw ka katcicterikipan, enko na Cecoc ka arimomakaniwitc.

⁵ Weckatc otananik nama awik ki otci witamawakaniwikopan aniheriw. Aric anotc Kice Manito ki witamawew anahweriw otarotakana acitc anahweriw ka nikan tipatcimoritci e kitcitwawisiritci, Omiro Manitoma e ki totak.

⁶ Enko ohwe ka katcictekipan: aci anotc kitci miroparik, Mirwatcimowin e ki totcikatek, kaskina tapickotc, aka ka cota iriniwitcik kaie ka cota iriniwitcik, kitci pe otitikotcik ka ici kanaweritamiritci Kice Manitowa kaskina otirinima otci, acitc mia peikw kitci iteritakositcik kaskina tapickotc e tacitcik, acitc kaskina tapickotc kitci cawerimikotcik Kice Manitowa, aniheriw ka ki ici nespi tapweritci kitci totamiritci, e ki pe iciticohwaritci Cecoc Krist.

⁷ Ni ki mirikw Kice Manito kitci atoskectawak, kitci tipatcimowak Mirwatcimowiniw. E micta mirotehetc ni ki cawerimikw kitci ici kackitawak kitci itotiskewak, omackawisiwin kaie e ki apatcitatc ka totak.

⁸ E tacitcik ka tapwerimatcik Kice Manitowa, nin mawotci nama ni kicteritakosin. Aric peikon Kice Manito ni ki pe acotamakw aniheriw otamirowiniw e micta kicteritakonik, kitci nta tipatcimoctawakik aka ka cota iriniwitcik Cecoca omirwasiwiniw aka wiskat ke ickwaparinik.

⁹ Ni ki acotamakw kaie kitci nta wactenamowakik kaskina iriniwok tan ke totak Kice Manito kitci ki miroparinik aniheriw ka wi totak ka katcicterikipan. Wir kaskina kekociciriw ka ki kiceritak, ki katcictowepan iriniwa aniheriw ka wi totakipan,

¹⁰ anotc tca kitci ki kiskeritakik manitowok ka nikaniwitcik acitc ka mackawisitcik nete icpimik ka taciketcik, e apitc micta omiro omitoneritcikaniritci Kice Manitowa, kaskina wiec e aicinakonik, mocak mia e aitotamiritci, aci e wapamatcik anahweriw iriniwa ka tapwerimaritci Cecoca.

¹¹ Aci ickwa otcitcipariniw aniheriw Kice Manito nespitc ka ki iteritak, minawatc tca ka ki kictatc ka pe iciticohwatc anihi Ka Tiperimitokw Cecoc Krist.

¹² Anotc aci e mamweritakosiikw kirika Krist, kaie e asperimototawokw, ki kiskeritenano aci e mireritcikatek kitci natotatokw Kice Manito e pakoserimokw, tekaci aka kitci sekisiikw.

¹³ Ekoni wetci nataweritamatakok aka kitci atweritcikeiekw anotc e ici nekatcitaian kirawaw otci. Kirawe meka kata miroparin kirawaw otci e ki iciwepasian.

Krist osakihiwewin

¹⁴ Ekoni wetci nipiskoctawak Kotawino Kice Manito,

¹⁵ anahwe ka ki kicerimatc kaskina e otenwesiritci wakwek kaie ota askik.

¹⁶ Ni nataweritamawaw tca, e apitc micarik omirwasiwin kaie oticperitakosiwin, kitci sokiteheckatakw, Omiro Manitoma omackawisiwiniw e miritakw,

¹⁷ kaie mocak kitci witci tacikemitakw Krist kitehiwak e asperimototawekw. Kirika ni nataweritamawaw kitci witcihitakw, tekaci kitci sokeritamekw sakihiwewin acitc kitci miro sokikapowiekw,

¹⁸ kitci ki kackitaiekw kitci miro nisitotamekw kirika kaskina aniki kotakihik Kice Manito otirinima e apitc sakihiwetc Cecoc, tan e irikokwarik aniheriw osakihiwewin, e apitc kice micarik.

¹⁹ Ekoni tca kitci kiskeritamekw aniheriw osakihiwewin, misawatc aka wiskat awik e ki otci capo kiskeritakipan, kitci ki tca tekaci mockineckatakw kaskina omirwasiwin Kice Manito.

²⁰ Wir Kice Manito ka kackitatc wawatc awocamec kitci miritokw aniheriw kaskina ka ici nataweritamawokw kekotc ke ki iteritamokw, aci e otamiromakanik omackawisiwin kitehinak.

²¹ Mirwatcimatan tca Kice Manito, Cecoc Krist otci kaie otirinima, anotc mekwata nac nespitc. Kekora ki iki.