Éphèse iriniwok 2 - Kice Manito Ocki Omirwatcimowin

E ocki pimatisinaniwok

¹ Weckatc ki ki niponawaw kitcitcakociwak itekera, osam e matci totamekopanen, kipactatowiniwaw e itotiskemakakipan.

² Ki nosanetatawaw anihe matci itatisiwin ka nosanetakaniwok ko anotc ota askik. Ki sapitowatawaw anaha ka tiperimatc matci manitowa waskok, ka tiperimatc iriniwa ka atimikapowictawaritci Kice Manitowa.

³ Ekoni kaskina e taciikw e totamokopanen mia wirawaw, kotc e ici nataweritamokopanen, kaie e iteritamokopanen kitci mireritamihitisoikw kiwiawinak, misawatc kekocic e maratakipanen, ekoni ko e ici totamokopanen. Ekoni ko e totakik iriniwok aka ka kiskerimatcik Kice Manitowa, peikon kaie kirano e itatisiikopanen. Matci ki ta ki tipaskonikotano Kice Manito, mia kotakihik aka ka pamotowatcik.

⁴ Aric Kice Manito kice micariw okitimakeritcikewin. E apitc sakihitokw,

⁵ ki ki mirikono kiapatc minawatc kitci pimatisiikw kirika Krist, misawatc e nipoikopanen kitcitcakocinak itekera, osam e micta pactatiikopanen. Enkweriw meka omirotehewin Kice Manito wetci ki akwacimikoiekw.

⁶ Ka mirikoikw kitci mamweritakosiikw kirika Cecoc Krist, tarasak Kice Manito ki ki apitcipahikono tapickotc kirika Cecoc, kitci ki witapimokw icpimik, kaie kirano kitci tiperitcikeikw kirika wir.

⁷ Ka wapatahiwetc Kice Manito e apitc mirwasitc e ki pe iciticahamatokw Cecoc Krist, nataweritamopan nespitc kitci kiskeritakonik e apitc micarik omirotehewin e mataweritakonik.

⁸ Enkweriw meka omirotehewin Kice Manito wetci ki akwacimikoiekw, e ki tca asperimototawekw. Namaiew ni kirawaw tipirawe ka ki akwacimitisoekw. Kice Manito ni ka ki ici cawerimitakw.

⁹ Nama ki ka ki tipi miro totenawaw kitci ki mirikoiekw. Nama tca awik kata ki otci mirwatcimitiso.

¹⁰ Wir meka Kice Manito ka ki ocihitokw. Ki ki kicerimikono mocak kitci miro totamokw, e mamweritakosiikw kirika Cecoc Krist. Enkweriw ni aci kicatc ka iteritakipan kitci ici pimatisiikw.

E mamweritakosiikw kirika Cecoc Krist

¹¹ Aka tca onikekw tan e iteritakosiekopanen weckatc! Nama kirawaw ki cota iriniwinawaw. Pitoc kit iterimikowawok cota iriniwok. “Aniki aka ka ki otci kicawatocwakaniwitcik” kit icinikatikowawok. Wirawaw tca icinikatitisowok “ka ki kicawatocwakaniwitcik.” Tepirak aric ni okitc ocakawak wi nokoniw aniheriw ka totawakaniwitcik.

¹² Tapwe wirata, ani apitc ki rawapamatawaw Krist. Mantewok kit iteritakositawaw. Nama meka kit iteritakositawaw Kice Manito otirinima. Aniheriw meka ka ki ici nespi tapwetc kitci totak otirinima otci, nama nta kirawaw kit akitakositawaw. Ki pa pimatisitawaw ota askik, aka aric e takokipan kitasperimowiniwaw, aka kaie e kiskerimekopanen Kice Manito.

¹³ Aric aci anotc e mamweritakosiekw kirika Cecoc Krist, ki pecowapamawaw, kirawaw ka micta rawapamekopanen. Ka pakiterimitisotc kitci nipahakaniwitc, ki totam kitci ki pecowapamekw.

¹⁴ Wir tipirawe Krist ka ki pe iciwiritokw pekateritamowinik, kaskina tapickotc e ki mamowinitokw, cota iriniwok acitc aka ka cota iriniwitcik, mamowi kitci iteritakosiikw. E ki pakiterimitisotc kitci nipahakaniwitc kirano otci, ki pikotaw aniheriw ka tatipanirikoikopanen. Nama aci takon ke ki otci cikerimitoikw.

¹⁵ Ki nota pakiticowatam cota aiamihe irakonikewiniw e mitcenik, kaskina kitci mamowinatc ka cota iriniwitcik acitc aka ka cota iriniwitcik, mia peikw kitci iteritakositcik, ocki iriniwok e mamoweritakositcik kirika wir. Ekoni ka totak kitci ki itactatc pekateritamowiniw.

¹⁶ E ki nipotc tcipaiatikok Krist, ki ocitaw kitci ici mamweritakosinaniwonik, peikw kitci iteritakosinaniwonik, kaie kitci ki koski miroparihitonaniwonik kirika Kice Manito. Ki ickwanam e cikerimitonaniwonik, tcipaiatikok ka nipotc.

¹⁷ Ki tca pe nta tipatatam pekateritamowiniw, kaskina kirawaw otci ka rawapamekopanen weckatc Kice Manito acitc aniki ka pecowapamekopanen.

¹⁸ Tapwe meka wir Krist ka ki totak kitci miroparinik kitci ki pakoserimokw Kotawino Kice Manito, kirano ka cota iriniwiikw acitc aka ka cota iriniwiikw, kaskina tapickotc e witcihitokw Miro Manito.

¹⁹ Nama tca aci mantewok kit iteritakosinawaw, kirawaw aka ka cota iriniwiekw. Nama aci pitoc kit iterimikowinawaw kirika kotakihi Kice Manito otirinima. Tapickotc aci otirinima kit iteritakosinano. Mia aci ki peikotenwesinano, tapickotc e otawiikw Kice Manito.

²⁰ Tarasak mia e manikasotc Kice Manito, kaskina otirinima mia asiniwok iteritakosiriwa e manikewakaniwonik. Kaie kirawaw tca mia asiniik kit iteritakosinawaw neta e ici manikaniwok. Aniki Cecoc otarotakana acitc aniki ka ki pe nikan tipatcimotcik Kice Manitowa otci, tarasak mia aniki nictam asiniik ka ki apatisitcik neta ka otci matcekatek anihe manikan. Anahwe tca asini ka mawotci kictapatisitc neta ka otci sokiskicikik aniki kotakihik asiniik, enko na Cecoc Krist.

²¹ Wir ka totak kitci sokarik manikaniw, nac ocitaw kitci aiamihe mikiwamiriw e kitcitwaweritakonik, Teperitcikeritci otci.

²² Aci tca e mamweritakosiekw kirika Cecoc, kaie kirawaw ki mirwapatisinawaw neta manikewinik, tapickotc kirika kaskina kotakihik, ite ke tacikeritci Kice Manito Omiro Manitoma.