Éphèse iriniwok 1 - Kice Manito Ocki Omirwatcimowin

E arimikaketc Pwar

¹ Nin Pwar ka masinahamatakok, Cecoc Krist otarotakana e iteritakosiwak, Kice Manito e ki iteritak kitci ici atoskectawak. Ki masinahamatinawaw kirawaw Kice Manito otirinima Éphèse otenak ka tacikeiekw, e mamweritakosiikw kirika Cecoc Krist, mocak e nosanehwekw.

² Ni pakoserimawok Kotawino Kice Manito kaie Teperitciketc Cecoc Krist, mirotehewiniw kirika pekateritamowiniw kitci acotamatakok.

E ici mirwacinik Kice Manito e miratc otirinima

³ Mirwatcimatan Kice Manito, Otawiwa anahwe Ka Tiperimitokw Cecoc Krist. Ki ki cawerimikono kitci mamweritakosiikw kirika Krist, kaskina miro kekociciriw e ki miritokw kitcitcakocinak itekera, icpimik e pe otciparinik.

⁴ Aci meka ki ki ickwa orapamikono Kice Manito, epwamoci kiceritak askiriw, kitci otirinimitokw, Krist otci, kitci ki kitcitwawisiikw, aka kekocic ka maratak kitci takackakoikw kitehinak, wir e iterimitokw. E apitc sakihitokw Kice Manito,

⁵ aci weckatc ki ickwa oreritamokopan kitci kanawerimitokw, mia tipirawe onitcanica kitci iteritakosiikw, osam Cecoc aniheriw ka ki totak. Ekoni ka ki ici mireritak Kice Manito kaie ka ki ici nataweritak kitci itotisketc kirano otci.

⁶ Mirwatcimatan tca e ki ici miritokw omirotehewin kirika caweritakosiwiniw, e ki pe iciticohatc Okosa e micta sakihatc.

⁷ E ki pakiterimitisotc Krist kitci nipahakaniwitc, ekota ka otci wikotcihikoikw ka ici maratak, kaie ka otci kasihamakoikw kipactatowinino. Ekota ka otci kiskeritakonik e apitc micarik omirotehewin Kice Manito.

⁸ Enkweriw omirotehewin ka ki micta acotamatokw, kaie e ki miritokw tekaci kitci omiro omitoneritcikaniikw, kaie kakitaweritamowiniw e ki miritokw, kaskina e ici nataweritak kitci kiskeritamokw.

⁹ Ki ki kiskeritamorikono aniheriw aci ka iteritakipan kitci pe iciwepanik ka katcicterikipan. Aci weckatc ki ickwa iteritamokopan kitci kiskeritamoritokw aniheriw e micta mirotehetc, Krist otci.

¹⁰ Enkweriw ka ici nataweritakipan kitci pe iciwepanik: kaskina ni awik e tatcik askik acitc wakwek, kitci peikohatcik okimamiwawa, anihi Krist, kirika kaskina ka ici takonik kitci tiperitamiritci. Kata icitaw aniheriw Kice Manito ani apitc ka ki iteritakipan aci weckatc.

¹¹ Aci e mamweritakosiikw kirika Krist, ki ki pe otitikono kaskina ka ki ici nespi tapwetc kitci mirikoikw. Kicatc meka ki ki orapamikono Kice Manito kitci otirinimitokw, mia weckatc e iteritakipan kitci itotisketc. Otcitciparitaw meka kaskina kekociciriw kotc e ki iteritak kaie e ki ici nataweritak.

¹² Mirwatcimatan tca Kice Manito e micta kicteritakositc, kirano nictam ka ki asperimototawokw anahwe Krist!

¹³ Kaie kirawaw, ka natotamekw tipatcimowin e tapwemakak, anihe Mirwatcimowin ka ki akwacimikoekw, ki ki tapwerimawaw Krist. Ki ki tca kicawatcihikowaw Kice Manito, otirinima kitci iteritakosiekw, e ki miritakw Miro Manitowa, mia ka ki ici nespi tapwetc.

¹⁴ Miro Manito e ki mirikoikw, kicatc ki kiskeritenano kitci mirikoikw kaskina Kice Manito ka ici kanaweritak otirinima otci. Ki kiskeritamihikono otcitakotc kitci ici tatamokw aniheriw, ickwa tekaci wikotcihikoikwe. Mirwatcimatan tca Kice Manito e apitc kicteritakositc!

Pwar otaiamihewin

^15-16 Ekoni wetci aka ponitaian e naskomak Kice Manito kirawaw otci e aiamihectamatakok, aci e ki petakeian e asperimototawekw Cecoc Teperitciketc acitc e micta sakihimekw kaskina ka tapwerimikotc.

¹⁷ Kirika ni nataweritamawimaw anihi Okice Manitoma anahwe Ka Tiperimitokw Cecoc Krist, Otawiwa e mawotci icperitakosiritci, kitci miritakw Miro Manitowa ka pakitinamiritci miro mitoneritcikaniw. Anahwe Miro Manito ki ka wapatahikowaw tan mia e iteritakosiritci Kice Manitowa acitc ki ka witcihikowaw kirawe awocamec kitci miro kiskerimimekw.

¹⁸ Ni pakoserimon kitci wactenamatakw Kice Manito kitci ki nisitotamekw aniheriw asperimowiniw ka ki miritakw ka wicamitakw otirinima kitci iteritakosiekw, acitc e apitc micta micarik kaie e icperitakonik aniheriw ka ici kanaweritak otirinima otci,

¹⁹ kaie kitci ki nisitotamekw omackawisiwin e micta mataweritakonik, aniheriw ka apatcitatc kirano otci ka tapwerimokw. Enkweriw ni peikon mackawisiwiniw e micta mirwacinik ka ki totak Kice Manito

²⁰ ka apitcipahatc Krist, kirika neta ka apihatc icpimik nte onihiwinik.

²¹ Ekota neta Krist ka ici mawotci kicteritakositc, kirawe mictahi e kicteritakositc patok kaskina manitowa ka nikaniwiritci e taciritci. Kaskina pacitohwew ka kackitaritci acitc kaskina ka mackawisiritci kaie kaskina ka tiperitamiritci, e pacitahak kaskina ke ki witcikaterik kaie ke ki wirakaniwiritci, nama tepirak anotc mekwata ota askik, matci kaie neta nikanik ke pimatisinaniwonik.

²² Kice Manito kaskina tiperitamowiniw ki mirew anihi Krist acitc kitci kice okimamiritci kaskina ka tapwerimikotc, ka mawotcihitoritci kitci aiamiharitci.

²³ E iteritakositcik tca aniki ka tapwerimatcik Krist, mia ni aniheriw owiawiriw. Tekaci mockineckakowok anihi Krist, anihi kaskina ka mockineckamiritci e irikokoskamikarik.