Colosse iriniwok 4 - Kice Manito Ocki Omirwatcimowin

¹ Minawatc kirawaw ka tiperitamekw: icikowisk ki ka ici mihawawok iriniwok ka atoskectatakok, kaie ki ka mirawawok kaskina ka ici kackitamatisotcik. Ki kiskeritenawaw meka kaie kirawaw e tatc Kokimamiwaw wakwek.

Ke itotiskeritci Kice Manito otirinima

² Aka ponitakw e aiamihaiekw, mocak e pehekw Kice Manito kitci natotatakw, mocak kaie e nanaskomekw.

³ Kirika aiamihectamacinan kaie ninan, kitci miro mirimitc Kice Manito kitci miroparik kitci pa tipatatamak otipatcimowin, kitci ki aiarimotamak Krist otipatcimowin weckatc ka ki ici katcicterikipan. Ekoni meka wetci ki kipohokowian.

⁴ Aiamihectamacikw tca wewerita kitci tipatataman, kitci miro nisitotakok, kotc e itactek kitci itotiskeian.

⁵ Actew kitci omiro omitoneritcikaniekw e witcewekok iriniwok aka ka kiskerimatcik Cecoca, kitci miro nisawiekw kitci witcihekok kitci nosanehwatcik, tatwaw ke kackitaiekw.

⁶ Actew kaie mocak kitci miro arimweiekw aiarimweiekwe, kirika kitci mirotakosiekw. Ki ta kiskeritenawaw kaie mia ke iteiekw e ici kokwetcimitakw kaskina awik.

E matcacikowakaniwitcik iriniwok

⁷ Tychique, anahwe anotc ka witcewimitc, kiwitcicanino ka micta sakihokw kirika mocak ka witcihimitc tapickotc e atoskectawakitc Teperitciketc, kaskina ki ka witamakowaw e ici pimatisiwak.

⁸ Otcita nit iciticohwaw kitci natawapamitakw, kitci ki kiskeritamekw e iciwepasiwak, kirika kitci nta kakitcimitakw.

⁹ Pe witcewiko anihi iriniwa mocak ka ki iterimimokw kiwitcicanino, Onésime, mocak ke ki asperimototawakaniwiritci kitci witcihiweritci, kaie wir e ki pe otciritci neta ka ici tacikeiekw. Kaskina ki ka witamakowawok e isparinik ota.

¹⁰ Aristarque, ka kipohwakaniwitc kirika nin, kit arimikakowaw, peikon kaie Mark, Barnabas anihi ocima. Aci kit ickwa witamakowinawaw kitci miro mihekw, kecpin pe takocike neta kit otenamiwak.

¹¹ Jésus, arica Justus ka icinikatakaniwitc, kaie wir kit arimikakowaw. Aniki iriniwok e nictitcik, enko aniki tepirak e tacitcik ka cota iriniwitcik ka witcihitcik, Kice Manito Okimawin otci. Mictahi ni ki witcihikok aka kitci atwerimoan.

¹² Épaphras, anahwe kaie wir e ki pe otcitc neta ka ici tacikeiekw, kit arimikakowaw. Kaie wir e atoskectawatc Cecoca, nama ponitaw e irikokotehetc e aiamihectamatakw, kitci sokikapowiekw, aka kekocic kitci notepariekw e asperimototawekw Kice Manito, kirika kaskina wiec kitci ickwa aikeiekw kitci totamekw kaskina e iteritak Kice Manito.

¹³ Ni ka ki itewan ohweriw Épaphras otci: micta arimihitiso kirawaw otci, kirika anahweriw iriniwa otci Laodicée otenak ka tacikeritci, kaie anahweriw otci Hiérapolis otenak ka tacikeritci.

¹⁴ Luc, kikwimesino ka mackiki iriniwitc, kaie Démas, kit arimikakowawok kaie wirawaw.

¹⁵ Nit arimikowananak kotakihik kiwitcicaninowok nete Laodicée otenak ka taciketcik. Kaie wir Nympha nit arimikowanan, kaskina kaie ka mawotcihitotcik omikiwamik kitci aiamihatcik.

¹⁶ Ickwa tapwatamekwe ohwe nimasinahikan, mirakok iriniwok ka tapwerimatcik Cecoca ka taciketcik nta Laodicée otenak kitci tapwatakik kaie wirawaw. Minawatc ki ka pe iciticahamakowinawaw kotak nimasinahikan ka ki ici masinahamowakik, kaie kirawaw kitci ki tapwatamekw.

¹⁷ Witamawakw Archippe: “Nanakatcita wewerita kitci kictain anihe ka ki ici mirikoin kitci itotaskein e atoskectawotc Teperitciketc.”

¹⁸ Nin tipirawe anotc ka masinahaman ohwe: kit arimikatinawaw, nin Pwar. Aka onikekw e kipohokoian ota. Ni pakoserimon omirotehewin Kice Manito kitci witci tacikemikoekw. Nin Pwar