Colosse iriniwok 3 - Kice Manito Ocki Omirwatcimowin

¹ Ka apitcipatc Krist, tarasak kaie kirawaw ki ki apitcipahikowinawaw. Nanto kiskeritamokw tca anihi kekocica ka ici kicteritakoki wakwek, neta e ici apitc Krist onihiwinik Kice Manitowa.

² Mocak mamitoneritamokw anihi ka kicteritakoki nete icpimik, nama ka ici kicteritcikateki ota askik.

³ Aci meka tarasak ki ki niponawaw, e iteritakosiekw. Katcictew tca kipimatisiwiniwaw, neta e ici taciketc Kice Manito, Krist e kanaweritamatakw.

⁴ Minawatc pe nokosite Krist, anahwe ka ki miritakw tapwe kitci pimatisiekw, kaie kirawaw ki ka pe nokosinawaw, tapickotc kitci icperitakosiekw kirika wir.

Weckatc e ici pimatisinanikopanen kaie ocki pimatisiwin ke ki orapitamasowokw

⁵ Nipatakw tca kaskina ka maratak kipimatisiwiniwak, anihe notc ka ici nataweritak ko awik ota askik: pacikwatisiwiniw, aka kaie e mirwinakositc otehik, matci iteritamowiniw e makonikotc, e micta pasoweritak kitci matci totak kirika e monihowetc. E monihowetc meka awik, mia e manitoweritak okekocicima.

⁶ Kice Manito kiciwasictawew iriniwa ka itatisiritci, ka atimikapowictakotc.

⁷ Ekoni e itatisiekopanen weckatc mekwata ka pe pactatiekw kipimatisiwiniwak ka pe tiperimikoekopanen anihi pactatowina, epwamoci kiskerimekw Krist.

⁸ Aci aric anotc wepinamokw kaskina anihe: aka kitci kiciwasiekw, kaie aka kitci akohitoekw e kiciwasiekw, kirika aka kitci matcitaiekw. Aka wiskat marerimakw kiwitc iriniwaw, aka kaie wesa orina kitci aiteiekw.

⁹ Aka kiraskimitokw. Aci meka kit ickwa pakiteritenawaw weckatc kititeritakosiwiniwaw acitc kaskina weckatc e itatisiekopanen.

¹⁰ Minawatc ki ki otapinenawaw ocki iteritakosiwin, tarasak mitowi e ki ockihoekw. Ocki iriniwok kit iteritakosinawaw, kirika aspinikotc ki mirikowaw Kice Manito, anahwe kaskina ka ki kicerimitokw, kiapatc mia ocki kitci iteritakosiekw, mia wir kitci itatisiekw, kitci ki tca capo kiskerimekw.

¹¹ Nama tca aci pitoc iterimakaniwiwok cota iriniwok kaie aka ka cota iriniwitcik, nama kaie aniki ka ki kicawatocwakaniwitcik kaie tca aka ka ki otci totawakaniwitcik. Nama kaie iriniwok ka kicteritakositcik ota askik kaie aka ka kicteritakositcik, nama kaie iriniwok ka atoskectaketcik kaie tca aniki aka ka atoskectaketcik. Wir meka Krist mawotci kicteritakosiw, kirika wir ka taciketc kaskina iriniwa ka tiperimatc otehirik.

¹² Ki ki orapamikowaw Kice Manito, otirinima kitci iteritakosiekw, e kitcitwaweritakosiekw kirika e sakihitakw. Ekoni tca wetci actek kiapatc tarasak kitci ockihoekw kitcitcakociwak itekera: mocak kitci miro totamekw, kitci micta miroteheiekw, kitci tipaterimitisoekw, kitci roskiteheiekw, kaie kitci ciciperitamekw.

¹³ Wawitcihitokw. Kecpin arotc e totatakw kiwitc iriniwaw, kekotc kecpin e cakateritakositc, ponerimakw anihe. Mia ka ki totakw Kice Manito ka kasihamatakw, ekoni ke totatoekw e ponerimitoekw.

¹⁴ Aric enko ohwe ka mawotci kicteritakok: kitci sakihitoekw. Ekoni tca tekaci ke otci mamweritakosiekw.

¹⁵ Pakitinamokw Krist opekateritamowin kitci tiperitcikemakanik kitehiwak. Ekoni meka wetci ki wicamitakw Kice Manito kitci nosanehwekw, kaskina tapickotc kitci ki takok anihe pekateritamowin, mia Krist owiaw e iteritakosiekw, nakowi e irapatisiekw tato neta e taciekw. Mocak mikwetc ki ka itawaw aniheriw otci.

¹⁶ Ni pakoserimon mocak tekaci kitci kanaweritamwekw Krist otitewin kitehiwak e micta kice mirwacinik. Kiskinohamatokw kirika kakeskimitokw, mocak e omiro omitoneritcikaniekw. Nakamoctowakw Kice Manito e irikokoteheiekw e micta naskomekw, e nakamoekw Okimaw Tapit onakamowina, kaie mirwatatamo nakamowina acitc kotakihi aiamihe nakamowina kitci nakamoekw, Miro Manito e miritakw.

¹⁷ Kaskina tca ke itotiskeiekw kirika ke iteiekw, ki ka totenawaw Teperitciketc Cecoc oticinikasowin otci, wir otci e naskomekw Kotawino Kice Manito.

Ke totcikatek kitci miroparihitonaniwok ocki pimatisiwinik

¹⁸ Kirawaw iskwewok ka nipowiekw: tato neta e taciekw kata pakiterimitiso kitci natotawatc onapemiekw. Ekoni meka e acterik kitci ici nosanehwakaniwitc Teperitciketc.

¹⁹ Kirawaw iriniwok ka nipowiekw: tato nta e taciekw kata sakihew otiskwemiekw. Nama kata matcatakosictwew.

²⁰ Kirawaw awacak: ki ka sapitowawawok kinikihikowawok. Ekoni meka e ici naheritak Teperitciketc.

²¹ Kirawaw onikihikok: nama ki ka cakateritamihawawok kinitcaniciwawok, aka tca kitci otci atweritciketcik.

²² Kirawaw ka atoskectakeiekw: ki ka sapitowawawok aniki ka tiperimitak ota askik, kaskina ke ititakok. Aka tepirak totamokw e nanakatcihitakok kitci mireritamihekok. Aric kitehiwak kitci otciparik e miro atoskectawekw, osam kaie e kicterimekw Teperitciketc.

²³ Kotc e icinakok kotamirowiniwaw, e irikokoteheiekw ki ka totenawaw, mia Kice Manito e atoskectawekw, nama tepirak iriniwok e atoskectawekok.

²⁴ Ki kiskeritenawaw meka kitci tapictatakw Teperitciketc. Ki ka mirikowaw aniheriw ka ici kanaweritamawatc kaskina otirinima. Krist meka, enko na tapwe Kokimamiwaw ka atoskectawekw.

²⁵ Anahwe aric ka matci totak, kaie wir kata pe otitiko aniheriw ka ki ici kackitamatisotc. Kice Manito meka nama kirawe kicterimew atita iriniwa patok kotakihi.