Colosse iriniwok 2 - Kice Manito Ocki Omirwatcimowin

¹ Ni nataweriten kitci kiskeritamekw e apitc arimak ohwe ka ici mantokasoan kirawaw otci, kaie aniki otci ka taciketcik Laodicée otenak, peikon kaie mitcet kotakihik iriniwok aka ka kiskerimitcik.

² Ni natawerimawok tekaci kitci sokerimotcik otehiwak, kaie kitci mamweritakositcik e sakihitotcik, acitc kitci micta cawerimakaniwitcik tapwe kakitaweritamowiniw. Otcitakotc tca kata otci kiskeritamok aniheriw ka ki katarispana Kice Manitowa, ni wi itwan, wir tipirawe Krist kitci kiskerimekw.

³ Wir meka Cecoc e kiskerimakaniwitc, ekota kaskina ke ki otci miskikaterik aniheriw ka ki katcicterik, miro mitoneritcikaniw kaie kiskeritamowiniw, Kice Manitok ka otciparinik, e micta mirwacinik.

⁴ Ki witamatinawaw anihe aka kitci oniwirikoiekw e wi wecimikoiekw, kecpin kaskina wiec e aitikoiekw kekocic, e mirotakok e ititamekw.

⁵ Misawatc aka anotc e witci tacikemitakok, mictahi ki mamitonerimitinawaw, mia e witci tacikemitakok kitehiwak. Ni mireriten kaie e wapamitakok e sokiteheiekw acitc e sokikapowiekw e asperimototawekw Krist.

E apitc cawerimitokw Cecoc e nosanehokw

⁶ Aci e ki otapinamekw kitci tapwerimekw Cecoc Krist, wir kitci tiperimitakw, miro itatisikw e mamweritakosiekw kirika wir.

⁷ Mocak ki ka sokowaskonawaw, enko kaie anahwe ke ici tcimataiekw kipimatisiwiniwaw. Enko anahwe ke otci pimatisiekw kirika ke mackawisihitakw. Mocak eckam asperimototawakw, mia ka ki ici kiskinohamakoiekw, kaie mocak ki ka naskomawaw.

⁸ Aiekwamisikw aka kitci tapwetowekok iriniwok ka wi onicimitakok, arotc ka aitetcik e aiarimwetcik, aka wiec e iteritakonik omitoneritcikaniwaw. Iriniwa ni otiteritamowiniwariw wi nosanetawok, aci weckatc e ki nosanetakaniwonik ota askik, kaie arotc matawosiwiniw ka mitawoparinik e wi nosanetatcik, ota askik e otciparinik. Nama nte otcipariniw Cecoc ka ki pe ici kiskinohamaketc.

⁹ Kaskina e iteritakositc Kice Manito, ki mockineckawew anihi Krist kaie wir tekaci kitci iteritakosiritci e iriniwiritci.

¹⁰ Kirika enko anahwe Krist ka ki mockineckatakw kaskina kitci ki pe otitikoiekw, wir e tiperimatc kaskina manitowa ka nikaniwiritci kaie kaskina ka kackitaritci.

¹¹ Weckatc Kice Manito ki itepan cota iriniwa kitci kicawatocwakaniwiritci, kitci otci kiskerimakaniwiritci “otirinima” e iteritakosiritci. Aric kirawaw aci e mamweritakosiekw kirika Krist, tarasak ki mirikowaw Kice Manito peikon kitci iteritakosiekw “kicawatocwakaniwiwok,” otirinima kitci iteritakosiekw. Namaiew ni aric iriniwok ka ki totakik, namaiew ni kiwiawiwaw ka ki kickicikatek. Wir Krist ka ki totatakw kitci icinakosiikw, e ki maninamatokw anihe weckatc kititeritakosiwinino, kotc e ici nataweritamokopanen ko kiwiawinak itekera.

¹² Tapwe wirata, ka sikahatakoiekw, tarasak ki ki arikowinawaw matikowocik kirika Krist, minawatc tapickotc ki ki apitcipanawaw kirika wir e iteritakosiekw, osam e ki tapweritamwekw Kice Manito omackawisiwin, anahwe ka ki apitcipahatc Krist.

¹³ Weckatc “ki nipo” kit iteritakositawaw kitcitcakociwak itekera, osam e pactatiekopanen, osam kaie aka e ki otci kicawatacokoiekw. Nama ki otci kiskerimatawaw Kice Manito. Aric anotc aci Kice Manito ki ki mirikowaw kitci koski pimatisiekw kirika wir Krist. Ki ki kasihamakono kaskina kipactatowininariw.

¹⁴ Ki kasisinaham aniheriw masinahikaniw ka ki anwerimikoikw, ite e masinaterikipan kaskina kipactatowininariw. Kaskina ki manisinaham, tcipaiatikok e ki tcictaskowatak aniheriw masinahikaniw.

¹⁵ Ekota ni ka otci maninamowatc omackawisiwiniwaw manitowa ka nikaniwiritci acitc ka kackitaritci. Kaskina ki tepihew e tca matcikonatc kitci kipaskohwatc. Kaskina awiriw tca ki wapatahew Kice Manito: wir Cecoca kaskina e ki cakotcitaritci, ka niporitci tcipaiatikok.

¹⁶ Aka tca awik pakitinakw kitci tipaskonitakw, aka tca kitci witamatakw kekwariw mia ke mitciekw kirika aka ke mitciekw, e iteritak kicteritakon aiamihewinik itekera. Akawir kaie pakitinakw kitci ititakw otcitakotc kitci kicteritamekw e aiamihe mirwatcitcikaterik, mitowi aniheriw e mirwatcitcikaterik ocki tipiski pisim otci, kaie e arwepi kicikarik.

¹⁷ Nama orina kicteritakon nihi irakonikewin, tepirak mirwapatanokopan kitci iti kiskeritakok minawa ke pe isparikipan. Aric aci e ki pe takocik Cecoc Krist, wir mawotci ka kicteritakositc.

¹⁸ Akawir kaie pakitinakok iriniwok kitci oniwiritakok kitci anwerimikoiekw, aniki towihik ka mireritakik e tipaterimitisokasotcik kirika ka pakoserimatcik aceriwa, kaie ka micta kicteritakik kekociciriw e icinakik. Micariw okicterimowiniwaw aka wiec e irapatanik, osam meka e iteritakik mia ko arotc e ici tapweritamiritci iriniwa ota askik.

¹⁹ Nama awocamec mamweritakosiwok kirika Krist, anihi ka nikaniwiritci kaskina Kice Manito otirinima otci. Mia Krist owiaw ki iteritakosipanak. Nama aric awocamec itapikeciniwok kirika aniheriw octikwaniwaw. Mia meka octikwaninan iteritakosiw Krist. Kaskina tca anihi iriniwa ka tapwerimikotc, enkweriw owiaw Krist, e micta miroparinik kaskina e itikititc e mamowititakaniwonik. Anahwe tca kictikwanino, ekote wetciparik kaskina wa apatcitaikw kitci miro pimatisiikw, kitci mackawisiikw kirika kitci miroparihitoikw, kitci ki tca mirokiikw, kotc e ici nataweritak Kice Manito.

Kitci nipoikw kaie kitci pimatisiikw kirika Cecoc

²⁰ Tarasak aci ki ki niponawaw kirika Krist. Ki ki tca otci wikotcihikowinawaw neta ka ki ici tiperitakosiekw, ka nosanetaiekopanen arotc matawosiwin ka mitawoparik ota askik. Kekwan tca wetci kiapatc ici pimatisiekw, e pakitinamekw kitci witamakoiekw otcitakotc kitci nosanetaiekw anihe towi irakonikewin? Ceckwat ki natotenawaw arotc aiamihe irakonikewin ka wi mirikoiekw,

²¹ e itwaniwok: “Aka mitcikw anihe!”, “Aka takinamokw anihe!” kirika “Aka kotcictamokw!”

²² Kaskina anihi ka otcihokowiekw neta irakonikewinik, ki icitakaniwono peikwaw tepirak kitci apatcitakaniwoki, minawatc acteriw nikotin aka awocamec kitci takoki. Iriniwok meka ka ici irakoniketcik, ekoni kaie e ici kiskinohamaketcik.

²³ Tapwe wirata, kekatc mia miro mitoneritcikan ititakonotake anihi irakonikewina, osam meka ohwe e arimotcikatek neta: wir tipirawe otaiamihewin awik acitc kitci tipaterimitisonaniwok acitc otcitakotc kitci arimihitisonaniwok. Nama aric wiec irapatan anihe towi irakonikewin kitci ki otci tiperimitisotc awik, aka tca kitci wi nosanetatc aniheriw notc e ici nataweritak kitci matci totak.