Colosse iriniwok 1 - Kice Manito Ocki Omirwatcimowin

Pwar e arimikowatc Colosses iriniwa

¹ Nin Pwar ka masinahamatakok, Cecoc Krist otarotakana e iteritakosiwak, Kice Manito e ki iteritak kitci ici atoskectawak. Kiwitcicanino Timothée ni witcihikw e masinahikewak.

² Ki masinahamatinawaw, kirawaw Kice Manito otirinima, Colosses otenak ka tacikeiekw, niwitcicananak e iterimitak, mocak ka asperimototakoiekw, tapickotc e mamweritakosiikw kirika Krist. Ni pakoserimowanan Kotawino Kice Manito kitci acotamatakw mirotehewiniw acitc pekaterimowiniw.

E naskomakaniwitc Kice Manito

³ Mocak ni naskomanan Kice Manito, anihi Otawiwa Ka Tiperimitokw Cecoc Krist, e aiamihectamatak.

⁴ Ni ki petakanan meka e asitci asperimototawekw Cecoc Krist, kaie e sakihimekw kaskina Kice Manito otirinima.

⁵ Nictam ka pe tipatcimonaniwok Mirwatcimowin neta kitacikewiniwak, tapwewin e aiarimotcikatek, ki ki kiskinohamakowinawaw aniheriw asperimowiniw mia ka ici kanaweritak wakwek Kice Manito kirawaw otci. Ekote ni wetciparik e asperimototawekw kirika e sakihiweiekw.

⁶ Mirwatcimowin icinakon mia mitowi wapiminatikw ka mirokitc nac kitci kinwaskositc kaie ka ici nitawikiritci mitcet wapimina. Kaskina wiec ota askik eckam iti mitcetiwok iriniwok ka petakik aniheriw Mirwatcimowiniw kirika ka otci nosanehwatcik Kice Manitowa, mitowi aci e ki isparik kaie kirawaw ka iti nosanehwekw, nictam ka petamekw Kice Manito omirotehewin tapwe e icinakonik.

⁷ Épaphras, anahwe ka witcewitokw e atoskectakeikw, ka micta sakihokw, enko na ka ki kiskinohamatakw aniheriw. Kit atoskectakowaw, mia mocak e miro atoskectawatc Krist.

⁸ Ni ki witamakonan e asitci sakihiekw, Miro Manito e ki miritakw kitci ici sakihiweiekw.

⁹ Ekoni wetci aka ponitaiak e aiamihectamatak, esko ka petakeiak e arimomikoiekw. Ni nataweritamawanan Kice Manito kitci miritakw kitci kiskeritamekw kaskina e ici nataweritak, osam Omiro Manitoma kaskina e miritakw miro mitoneritcikaniw kaie kakitaweritamowiniw.

¹⁰ Ki ka tca kackitanawaw wewerita kitci itatisiekw kotc e ici nataweritak Teperitciketc otirinima kitci itatisiritci, mocak e miro totamekw kotc e ici mireritak. Kata mitcen tca ke miro totamekw e nakowi aicinakok, kirika mocak eckam ki ka miro kiskerimawaw Kice Manito.

¹¹ Ni nataweritamawanan kaie kaskina wiec kitci sokiteheckatakw, omackawisiwin kitci apatcitatc e icperitakonik, kitci ki tca sokikapowiekw, nakickamekwe ke ici arimiparik, kitci ki tca ciciperitamekw.

¹² Naskomakw Kotawino Kice Manito e micta mireritamekw. Ki ki mirikowaw meka kitci kackitaiekw kaie kirawaw kitci mirikoiekw aniheriw ka ici kanaweritak kaskina otirinima otci neta okimawinik ka ici wasearik.

¹³ Tapwe meka ki ki otci wikotcihikono neta e ici tiperitakosikopanen e ici kiski tipiskak, kirika nete ki ki iciwirikono okimawinik Okosa ka micta sakihatc.

¹⁴ Osam Okosa e ki pakiterimitisoritci kitci niporitci tcipaiatikok, ki ki meka wikotcihikono Kice Manito ka ici maratanik, kirika ki otci kasihikatew kipactatowininowa.

E iteritakositc Krist kaie e ici otamirotc

¹⁵ Tapickotc e icinakositc Kice Manito aka ka nokositc, ekoni mia e icinakositc Cecoc ka nokositc. Enkweriw nictam Okosa ka ki pe nitawikiritci. Wir kirawe kicteritakosiw patok kaskina ka ki pe kicerimakaniwiritci kaie ka ki pe kiceritcikaterik.

¹⁶ Wir ka ki totak kaskina kitci kiceritcikaterik, kaskina e takonik wakwek kaie ota askik, ka nokonik kaie aka ka nokonik, kaskina kaie ka kicerimatc manitowa ka mackawisiritci, wakwek e otcipariritci kaie anahweriw ka tiperitamiritci acitc kotakihi ka nikaniwiritci kaie ka kackitaritci. Kaskina awiriw ki kicerimew, kaie kaskina kekociciriw ki kiceritam, wir otci.

¹⁷ Wirctam ki pe taw Cecoc epwamoci kaskina kekociciriw pe takonik, kaie epwamoci kaskina awiriw pe taritci. Wir kaie ka mitatc kaskina mamo kitci miroparinik, kotc e irapatanik.

¹⁸ Nikaniwiw, kaskina otirinima e tiperimatc, mia owiaw e iterimatc, wir tipirawe e iteritakositc octikwan. Wir ka kitciparitatc ocki pimatisiwiniw. Enkweriw nictam Okosa Kotawino Kice Manito, nictam kaie ka ki apitcipahakaniwiritci, kaskina tca wiec kitci ki nikaniwiritci.

¹⁹ Kice Manito meka ki oreritam misiwe kitci pitciteheckowatc Okosa, mia wir kitci iteritakositc.

²⁰ Kaie ki oreritam kitci totamiritci anihi Okosa kitci ki koski miroparihitotcik Kice Manito acitc kaskina anihi ka ki kicerimatc, kaskina kaie ka ki ici kiceritak, ota askik kaie wakwek. Ohweriw tca ki itotiskew kitci ki icinakonik: pekateritamowiniw ki icitaw kaskina awiriw otci, Okosa omikoriw e ki macikowinik, tcipaiatikok ka niporitci.

²¹ Kaie kirawaw weckatc ki rawonatawaw Kice Manito. Tarasak ki cikerimatawaw, osam e maratakipan kaskina e ici mamitoneritamekopanen kirika e totamekopanen.

²² Aric anotc, ki mirikowinawaw kitci itactimikapowictawekw Kice Manito, kitci ki koski miroparihitoekw kirika wir, osam e ki pe iriniwihitisoritci Okosa acitc e ki niporitci. Ki icitaw aniheriw kitci ki kitcitwaweritakosiekw, aka kekocic ka maratak kitci takickakoekw kitehiwak, aka kitci takok ke ki otci itactahorikoekw, ka ici wapamitakw Kice Manito.

²³ Actew aric kiapatc mocak kitci asperimototawekw Kice Manito, wewerita kitci sokikapowiekw, aka kitci pakiterimitisoekw kitci oniwirikoiekw e pakiteritamekw anihe asperimowin ka ici tatamekw esko ka petamekw Mirwatcimowin. Aci kaskina iriniwok ota askik ki tipatcimoctawakaniwiwok aniheriw Mirwatcimowiniw. Enko anihe peikon Mirwatcimowin ka atoskectaman, nin Pwar.

Ka ki ici mirakaniwitc Pwar kitci witcihatc iriniwa

²⁴ Ni mireriten anotc e nekatcitaian kirawaw otci. Ni nekatcitan meka niwiawik, osam e kictawak aniheriw aci ka ki kitciparitatc Cecoc ka pe nekatcitatc otirinima otci, kaskina ka tapwerimikotc, mia wir tipirawe owiaw e iterimatc.

²⁵ Ni ki mirikowin kitci atoskectawimaki otirinima. Ekoni ka ici miritc Kice Manito kitci atoskectatakok: wewerita kitci tipatcimoctatakok kaskina otipatcimowin.

²⁶ Aniheriw otipatcimowin, enkweriw micta weckatc ka iteritakipan kitci itotisketc ka ki tca katcicterikipan, aka awiriwa e ki otci kiskeritamihatc, mitceto pipona aka kitci kiskeritcikaterik, aci aric anotc otirinima ka ki kiskeritamihatc.

²⁷ Nataweritamokopan meka Kice Manito kitci kiskeritamiritci wa ici kiskeritamihaspan, aniheriw ka wi totakipan, e apitc mirwacinik kaie e micta icperitakonik, ka ki icitatc kaskina iriniwa otci. Enkweriw tca ka ki katcicterikipan: ki witci tacikemikowaw Krist kitehiwak kaie ki mirikowaw kitci ketcinaweritamekw tapwe kaie kirawaw kitci pe otitikoiekw Kice Manitowa oticperitakosiwiniw.

²⁸ Kaskina tca awik ni tipatcimoctawanan anihi Krist. Tato neta e tacitcik ni kakeskimanan kaie ni kiskinohamawanan, e apatcitaiak kaskina miro mitoneritcikan ka ki mirikoiak, kaskina e wi witcihakitcik, tato nta e tacitcik kitci mirokitc otcitcakocik itekera, kitci kiceatisitc, e mamweritakositc acitc Krist.

²⁹ Ekoni wetci mantokasoian ohwe ka itotiskeian, Krist omackawisiwin e apatcitaian, kirika e apitc mackawisimakanik e otamiromakanik pitc nitehik.