Ka ki aitotiskeritci Cecoc otarotakana 4 - Kice Manito Ocki Omirwatcimowin

Pien kirika Jean e kokwetcimikotcik cota iriniwa Ka Kitci Tipaskonikeritci

¹ Pien kirika Jean kiapatc taci aimihewakopan iriniwa e mitcetiritci. Aci ki pe takociniwok makatewokorewok acitc anahwe ka tiperimatc iriniwa ka nanakatcitaritci kitci aiamihe mikiwamiriw, kirika Sadducéen iriniwok.

² Nama mireritamwakopan osam anahweriw Piena kirika Jeanwa e taci kiskinohamakeritci kirika e tipatcimoritci e ki apitciparitci Cecoca, minawatc tca kitci ki tapweritcikaterik tapwe kitci apitcipaniwonik.

³ Ki makonewok kaie ki arewok kipohotowikamikok nac e iti kicepawonik. Aci meka osam otakocinipan.

⁴ Aci aric mitcetiwakopan iriniwok neta e tacitcik ka ki petakik aniheriw tipatcimowiniw e tapwerimatcik Cecoca. Wiec niaranwaw kice mitato mitana iriniwok aci taciwakopan ka tapwerimatcik.

⁵ Minawatc kecikarik, aci cota okimawok kirika cota aiamihe okimawok kaie ka kiskinohamaketcik cota aiamihe irakonikewiniw ki mawotcihitowok neta Jérusalem otenak.

⁶ Enko anahwe kaie ka ki pe icatc, kitci makatewokorew, Hanne ka icinikasotc, acitc Caïphe, Jean, Arikisan, kaie kaskina iriniwok ka tcirowematcik anihi kitci makatewokorewa.

⁷ Ki itewok kitci pe iciwirakaniwiritci anahweriw Piena kirika Jeanwa, kitci tca kokwetcimatcik: “Tante wetciparik anihe mackawisiwin ka ki apatcitaiekw kitci ki kikehekw awik, kekotc awin ka ki miritakw aniheriw ka ici kackitaiekw?”

⁸ Aci Pien, e mockineckakotc Miro Manitowa, itew: “Okimawok kirika aiamihe okimawok:

⁹ anotc ki kokwetciminan osam e ki miro totawakitc iriniw e maskisispan kirika e kokwetcimiak tan wetci ki kiketc anahwe iriniw.

¹⁰ Aci actew kitci kiskeritamekw ohwe, kirawaw kaskina e taciekw, kaskina kaie Israël iriniwok kitci kiskeritakik: wetci miro pimatisitc anahwe iriniw ka witcikapowictatakw, osam e ki apatanik oticinikasowiniw e mackawisimakanik, Cecoc Krist, Nazareth ka otcitc. Enko anahwe ka ki tcictaskowatekw tcipaiatikok, minawatc Kice Manito ka ki apitcipahatc.

¹¹ Anaha Cecoc, enko anahwe asini ka arimomakaniwitc Kice Manito Omasinahikanik: ‘Anaha asini, kirawaw manike iriniwok ka ki wepinekw, enko anaha aci ka mawotci kictapatisitc.’ Psaumes 118.22

¹² Wir tepirak Cecoc kata ki akwacimew awiriwa. Nama meka taw kotak awik ota askik ka ki pe iciticohikotc Kice Manitowa ke ki akwacimitokw.”

¹³ Aniki iriniwok ka tipaskoniketcik cota iriniwok otci, Ka Kitci Tipaskoniketcik e icinikatakaniwitcik, micta mamiskaterimewakopan anihi Piena kirika Jeanwa. Wapamewakopan meka e sokeritamiritci, kirika e kiskerimatcik aka e ki otci kiskinohamasoritci, aka kaie e kitci iriniwiritci. Kiskerimewakopan kaie e ki pa witcewaritci Cecoca.

¹⁴ Aric kaie wapamewakopan anihi iriniwa ka ki kikehakaniwiritci pecotcik e pa nanipowiritci. Nama tca miskamwakopan kekociciriw ke ki itetcik.

¹⁵ Ki itewok Piena kirika Jeanwa kitci orowiritci neta ka ici mawotcihitoritci niheriw Ka Kitci Tipaskonikeritci, wirawaw tepirak kitci aimihitotcik.

¹⁶ Ki ititowok: “Tan ke totawikok aniki iriniwok? Kaskina meka Jérusalem otenak ka taciketcik wewerita kiskeritamok anahweriw iriniwa ka ki ici mata kackitaritci. Nama tca ki ka ki itanano kiraskinaniwon.

¹⁷ Nama aric actew awocamec kitci petakaniwok e aiarimotcikatek anihe ka ki isparik. Ki ka tca kokwectasomanowok. Ki ka itananowok aka awocamec kitci arimomatcik Cecoca oticinikasowinik.”

¹⁸ Minawatc ki wicamewok Piena kirika Jeanwa, kaketin e itatcik tekaci kitci ponitaritci e arimomaritci kekotc e kiskinohamakeritci Cecoca oticinikasowiniw otci.

¹⁹ Aric Pien kirika Jean ki naskamawewok, e itatcik: “Kirawaw tipirawe orakonamokw e apitc nataweritamokwen Kice Manito wir kitci sapitowakaniwitc kekotc ma kirawaw kitci sapitatak!

²⁰ Aric ninan nama ni ka ki ponitanan e arimotamak anihe ka ki ici wapatamak kaie ka ki ici petamak.”

²¹ Aniki iriniwok ka kitci tipaskoniketcik kiapatc ki kokwectasomewok, minawatc ki pakitinewok. Nama ki otci miskamawewok kekociciriw ke ki otci kicakonatcik. Kaskina meka iriniwok mirwatcimepanak Kice Manitowa aniheriw otci ka ki isparinik.

²² Anahwe iriniw ka ki kikehakaniwitc awocamec nemitana tato piponesikopan.

E ici aiamihatcik ka tapwerimatcik Cecoca

²³ Kotc e ickwa pakitinakaniwitcik Pien kirika Jean, ki natawapamewok okwimesiwawa kirika ki atisokowewok kaskina ka ki aiteritci anahweriw cota makatewokorewa ka tiperitamiritci kirika cota aiamihe okimawa.

²⁴ Ka ickwa petakik ka itatisokwakaniwitcik, kaskina aniki ka tapwerimatcik Cecoca tapickotc ki aiamihawok ohweriw: “Teperitcikein, kir ka ki kiceritaman wakwek, aski, kaie kitcikami, kirika kaskina neta ka ici takok.

²⁵ Kir ka ki miratc nitaniskotape nimocominan, kitarotakan Okimaw Tapit, ke itespan, Miro Manitowa e ki miratc, kitci tca aitetc: ‘Kekwariw wetci micta kiciwasitcik iriniwok kaskina wiec ota askik? Kekwariw wetci natowi totakik kitci matci totakik, aka tca wiec e irapatanik? Ceckwat nte totamokw!

²⁶ Kice okimawok ota askik nisawiwok kitci natoparitcik, okimawok mamo witcihitowok e wi cakotcihatcik Teperitcikeritci kirika anihi okimawa ka ki orapamaritci.’ Psaumes 2.1-2

²⁷ Tapwe ni okimawok Hérode kirika Ponce Pilate ki mawotcihitowok ota otenak kirika iriniwok aka ka cota iriniwitcik acitc Israël iriniwok, e wi witcihitotcik kitci cakotcihatcik anihi kitarotakana ka kitcitwawisiritci, Cecoca, anihi ka ki orapamimatc.

²⁸ Ani e ki itotisketcik aniki okimawok, ki kictawok kaskina kir ka ki ici nataweritamopan acitc nikan ka ki oreritamopan kitci pe iciwepak, e micta mackawisiin.

²⁹ Anotc tca, Teperitcikein, ki petawawok e kokwectatcihiwetcik, kirika miricinan ninan ka atoskectatak tekaci kitci sokerimoak e tipatatamak kititewin.

³⁰ Wapatahiwe kimackawisiwin kitci ki kikehakaniwitcik iriniwok, kitci mata kackitakaniwok kirika kitci matawi aitotiskaniwok, Cecoc oticinikasowin otci, kitarotakan e kitcitwawisitc.”

³¹ Ka ickwa aiamihatcik, neta ka tacikewaspan ka ki ici mawotcihitowaspan ki aiatcipariniw. Kaskina e tacitcik ki mockineckakowok Miro Manitowa, kirika ki pa tipatcimowok Kice Manitowa otitewiniw e sokeritakik.

E wawitcihitotcik aniki ka tapwerimatcik Cecoca

³² Kaskina neta e tacitcik iriniwok ka tapwerimatcik Cecoca tekaci mamweritakosiwakopan, tapickotc e iteritakik kirika e ici nataweritakik, nama otci peikw neta e tacitcik kitci itetc e ici tatak wircike e tiperitak. Aric kaskina e tacitcik itewakopan: “Kaskina e ici tataman, kaskina e taciikw tapickotc ki tiperitenano.”

³³ Cecoc otarotakana micta mackawerimowakopan e tipatcimowaspan e ki wapamatcik Teperitcikeritci Cecoca e ki apitciparitci. Kaskina tca mictahi ki cawerimikowok Kice Manitowa.

³⁴ Nama awik neta e tacitcik noteparikopan e ici kictapatcitatc. Kaskina meka aniki ka tatakik kitikan askiriw kekotc mikiwamiriw ki atawewok. Ki tca petawok aniheriw coriariw irikik ka ki isparinik e atawetcik,

³⁵ e miratcik Cecoca otarotakaniw. Minawatc papeikw matinamatowok aniheriw coriariw irikik wa apatcitatcik.

³⁶ Enko ohweriw towiriw e totamwakopanen: tapan neta peikw iriniw, Sosep e icinikasotc. Arica kaie ki icinikatakaniwiw Barnabas, Cecoca otarotakana e ki icinikatikotc. —Aniheriw oticinikasowin wi itemakaniw “Anahwe ka sokimiwetc.”— Anahwe Sosep cota iriniwipan, Lévite itekera ka ici apitcik aniki cota iriniwok, kirika neta otcikopan minictikok Chypre ka icinikaterik.

³⁷ Ki atawew okitikan aski e tatakipan. Minawatc ki petaw aniheriw coriariw, e miratc anahweriw Cecoca otarotakaniw.